རྨ་ཆེན་རྫོང་མི་རིགས་སློབ་འབྲིང་གཉིས་པའི་ཡིག་གཟུགས་འགྲེམ་སྟོན།
༄༅། །རྨ་ཆེན་རྫོང་མི་རིགས་སློབ་འབྲིང་གཉིས་པས་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་སྟེང་སྤེལ་བའི་དགེ་སློབ་ཡོངས་ཀྱི་ཡིག་གཟུགས་འགྲེམ་སྟོན་མཛད་སྒོ།
ཤིས་བརྗོད།
འཇམ་མགོན་ཐོན་མིའི་རྨད་བྱུང་ཐུགས་ཀྱི་མཚོར།།
འཁྲུངས་པའི་གསེར་ཡིག་དབྱངས་གསལ་སོ་བཞིའི་གདངས།།
ཕྱི་རབས་ཡིག་མཁན་སོར་མོའི་འདུ་བྱེད་དུ།།
འཕོས་པའི་གཟུགས་ཀྱིས་སྲིད་ཞིའི་རྒྱན་དུ་ཆེ།།
ཡིག་གཟུགས་ཀྱི་བྱུང་རིམ་ངོ་སྤྲོད་རགས་བསྡུས།
དེ་ཡང་བོད་ཀྱི་ཡིག་གཟུགས་ནི་བོད་མི་རིགས་ཀྱི་ཐུན་མོང་མ་ཡིན་པའི་རིག་གནས་རྩ་ཆེན་ཞིག་ཡིན་པར་མ་ཟད།འཛམ་གླིང་རིག་གནས་ཀྱི་བང་མཛོད་ཁྲོད་གསེར་བཙོ་མ་བཞིན་འོད་དུ་འཚེར་ཞིང་། ལོ་ངོ་ཆིག་སྟོང་བཞི་བརྒྱ་ལྷག་གི་ལོ་རྒྱུས་ཡོད་པ་ཞིག་ཡིན་ལ།བོད་ཀྱི་ལོ་རྒྱུས་སུ་བསྟན་པ་སྔ་དར་གྱི་དུས་སུ་ཡིག་མཁན་གྲགས་ཅན་དགུ་བྱུང་ཞིང་།བསྟན་པ་ཕྱི་དར་གྱི་སྐབས་སུའང་གྲ་ཁྱུང་རྣམ་གཉིས་དང་ཁྱུང་པོ་གཡུ་ཁྲི་སོགས་བོད་ཀྱི་ཡིག་མཁན་མཁས་པ་མང་དུ་བྱུང་།དེ་དང་དེས་མཚོན་པའི་དུས་རབས་རིམ་བྱོན་གྱི་བྲིས་པ་གྲགས་ཅན་མང་པོས་བོད་ཡུལ་སྟོད་སྨད་བར་གསུམ་དུ་རང་རང་གི་ཐུན་མོང་མ་ཡིན་པའི་བྲིས་རྒྱུན་སྣ་ཚོགས་གྲ་མ་ཉམས་ཞིང་དྲི་མ་ཡལ་བའི་སྒོ་ནས་སྤེལ་བའི་ལོ་རྒྱུས་བཤད་ན་རྨ་ཀླུང་རིང་མོ་ལས་རྒྱུན་རིང་ལ།གེ་སར་སྒྲུང་གླུ་ལས་གདངས་སྙན་པ་མང་དུ་ཡོད་དོ།།ནང་སྒོས་སུ་རང་རེའི་མགོ་ལོག་ས་ཁུལ་ལ་མཚོན་ན་སྡེར་ནང་ས་བྲིས་ཀྱི་སྙན་པ་དང་འཕྲིན་ལས་ཕྱོགས་མཐར་རྒྱས་ཏེ་རྒྱལ་ཁབ་རིམ་པའི་གཟུགས་འདས་ཤུལ་བཞག་རིག་གནས་ཀྱི་གྲས་སུའང་སླེབས་ཡོད་པ་རེད།ཉེ་ཆར་བོད་སྤྱི་ཚོགས་ཀྱི་ཤེས་ལྡན་པ་སྐོར་ཞིག་གིས་ལྷག་བསམ་དང་སྙིང་སྟོབས་ལ་བརྟེན་ནས་སྤྱི་ཟླ་༤ཚེས་༣༠ཉིན་ནི་བོད་ཀྱི་ཡིག་གཟུགས་དུས་ཆེན་དུ་གཏན་ཁེལ་བྱས་པ་ནས་བཟུང་བོད་སྤྱི་ཚོགས་ཙམ་དུ་མ་ཟད།ཕྱི་རྒྱའི་མཁས་པའི་ཁྲོད་ནའང་བོད་ཀྱི་ཡིག་གཟུགས་ལ་མཐོང་ཆེན་དང་གདེང་འཇོག་བྱེད་མཁན་མང་དུ་ཡོད་དོ།། དེས་ན་དེ་རིང་གི་བཀྲ་ཤིས་གཟའ་སྐར་གྱི་འཕྲོད་སྦྱོར་ལེགས་པོ་འདི་དང་བསྡོངས་ནས་རང་རེའི་སློབ་གྲྭས་ཀྱང་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་བསུ་ཆེད་དང་དགེ་སློབ་རྣམས་ཀྱིས་རང་གི་ཕ་སྐད་གཙང་མ་དང་མ་ཡིག་དག་མའི་རྒྱུན་ལས་འཁྲུངས་པའི་ཡིག་གཟུགས་ལ་མཐོང་ཆེན་ཡོང་ཆེད་དྲིན་གྱི་བུ་ལོན་བྲིས་ཀྱིས་འཇལ་ཞེས་པའི་དགེ་སློབ་ཡོངས་ཀྱི་ཡིག་གཟུགས་འགྲེམ་སྟོན་མཛད་སྒོ་དངོས་སུ་མགོ་བརྩམས་པ་ཡིན།
དེ་རིང་གི་མཛད་སྒོ་འདིའི་དབུ་ཁྱུད་ཀྱི་ཚུད་དུ། མི་རིགས་སློབ་གསོའི་ལས་དོན་ལ་གཅིག་ཏུ་གཞོལ་ཅིང་། ལྷག་དོན་བོད་ཀྱི་ཡིག་གཟུགས་དུས་ཆེན་མཛད་སྒོ་ལ་ཆེད་གཉེར་གྱིས་འགན་ལེན་དང་རྒྱབ་སྐྱོར་གནང་མཁན་གྱི་རང་རེའི་སློབ་གཙོ།
ཡུལ་མགོ་ལོག་གི་བྲིས་པ་གྲགས་པ་ཅན་སྒ་ཚེ་རིང་བརྟན་པ་ལགས་ཀྱིས་ཡིག་གཟུགས་དུས་ཆེན་གྱི་དགོས་གལ་རང་བཞིན་ཐད་ནས་གསུང་བཤད་གལ་ཆེན་གནང་།
རྒྱལ་ཡོངས་གཟུགས་འདས་ཤུལ་བཞག་རིག་གནས་སྡེར་ནང་ས་བྲིས་ཀྱི་རྒྱུད་འཛིན་པ་དང་བོད་ཀྱི་ཡིག་མཁན་གྲགས་ཅན་རྒན་སེངྒེ་དར་རྒྱས་མཆོག་གིས་ཐེངས་འདིའི་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་དང་སྦྲགས་ཏེ་ཡིག་གཟུགས་ཐད་དུ་གཏམ་བཤད་གལ་ཆེན་གནང་།
མཐར་དགེ་སློབ་ཡོངས་ཀྱི་བྱ་བ་ལྷུན་གྱིས་འགྲུབ་པ་དང་ནད་མེད་ཚེ་རིང་ཡོང་བའི་བཀྲ་ཤིས་བདེ་ལེགས་ཞུ།
གསར་འགོད་པ་དང་རྩོམ་སྒྲིག་པ། རྭ་ཁྱུང་ཕྲུག་གམ་ཚེ་རིང་དོན་འགྲུབ།
|
|
