འབྲི་རུ་རྫོང་ཤག་ཆུ་སློབ་ཆུང་ནས་སྤྱི་ཟླ་༤པའི་ཚེས་༢༥ཉིན་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་ངོ་༧༠འཁོར་བར་རྟེན་འབྲེལ་ཞུ་ཆེད་དང་། བོད་ལ་དམངས་གཙོའི་བཅོས་སྒྱུར་བྱས་ནས་ལོ་ངོ་༦༠འཁོར་བར་རྟེན་འབྲེལ་ཞུ་བ་དང་ཆབས་ཅིག་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་བསུ་བའི་མཛད་སྒོ་གཉེར་བ།
འབྲི་རུ་རྫོང་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་ཤག་ཆུ་གྲོང་རྡལ་གྱི་ཏང་ཨུད་ཧྲུའུ་ཅི་བཀྲ་ཤིས་ཉི་མ་མཆོག་དང་། ཤག་ཆུ་གྲོང་རྡལ་མངགས་གཏོང་ཁང་གི་འགོ་འཛིན་ཕུར་དོན། འབྲི་རུ་རྫོང་སྲིད་གྲོས་ཨུ་ཡོན་ཤག་ཆུ་སློབ་ཆུང་གི་ཏང་ཀྲི་པུའུ་ཧྲུའུ་ཅི་ནོར་བུ་ཚངས་ལྡན་མཆོག ཤག་ཆུ་སློབ་ཆུང་གི་སློབ་སྤྱི་སྒྲོལ་སྐྱིད་སོགས་འབྲེལ་ཡོད་ཚན་པའི་འགོ་ཁྲིད་དང་ལས་དོན་མི་སྣ་བྱ་དགའ་སྤྲོད་པའི་མཛད་སྒོར་ཞུགས་ཡོད།
ཀྲུང་གོ་བོད་ཀྱི་ཡིག་གཟུགས་དུས་ཆེན་ཉིན་མོར་བཀྲ་ཤིས་རྟེན་འབྲེལ་ཞུ་ཆེད་དང་མ་འོངས་བོད་སྐད་ཡིག་འདི་ཉིད་མི་ཉམས་གོང་འཕེལ་དང་ཉམས་པ་སླར་གསོ་ཡོང་ཆེད་ཤག་ཆུ་སློབ་ཆུང་གི་སློབ་མ་1400ཙམ་ལ་“སྣང་ཆེན་བཞི་དང་དགའ་ཞེན་བཞིའི་”ནང་དོན་གཙོ་བོར་བྱས་པའི་བརྩམས་ཆོས་དང་།བྱིས་གསོ་ཁང་གི་སློབ་མ་290ཙམ་ལ་དབྱངས་བཞི་གསལ་བྱེད་སུམ་ཅུའི་རྨང་གཞིར་བྱས་པའི་བརྩམས་ཆོས་ཡིག་གཟུགས་འགྲན་བསྡུར་གྱི་བྱ་འགུལ་སྤེལ་བ་ལས།
མཇུག་མཐར་བརྩམས་ཆོས་ཁག་35ལ་བྱ་དགའ་རིམ་པ་དང་པོ་དང་།བརྩམས་ཆོས་70ལ་བྱ་དགའ་རིམ་པ་གཉིས་པ། བརྩམས་ཆོས་105ལ་བྱ་དགའ་རིམ་པ་གསུམ་པ་ཐོབ། ད་ཐེངས་ཡིག་གཟུགས་འགྲན་སྡུར་ཁྲོད་བྱ་དགའ་ཐོབ་མཁན་གྱི་གྲས་སུ་སློབ་ཆུང་གི་སློབ་མ་180དང་། བྱིས་གསོ་ཁང་གི་སློབ་མ་30ལ་བྱ་དགའ་ཐོབ་ཡོད།
འབྲི་རུ་རྫོང་སྲིད་གྲོས་ཨུ་ཡོན་ཤག་ཆུ་སློབ་ཆུང་གི་ཏང་ཀྲི་པུའུ་ཧྲུའུ་ཅི་ནོར་བུ་ཚངས་ལྡན་མཆོག་ནས་བོད་ཀྱི་ཡིག་གཟུགས་ཀྱི་འཕེལ་རིམ་དང་ཡིག་གཟུགས་དུས་ཆེན་གྱི་ངོ་སྤྲོད་གནང་བ།
བོད་རང་སྐྱོང་ལྗོངས་ཡིག་གཟུགས་མཐུན་ཚོགས་ཀྱི་ཚོགས་མི།ལྷ་ས་གྲོང་ཁྱེར་ཡིག་གཟུགས་མཐུན་ཚོགས་ཀྱི་ཚོགས་མི།འབྲི་རུ་རྫོང་ཡོངས་ཀྱི་བོད་ཡིག་ཡིག་གཟུགས་དགེ་རྒན་བསླབ་གསུམ་མཆོག་ནས་ཀྲུང་གོའི་ཕུགས་འདུན་ལས་བོད་ལྗོངས་ཀྱི་གཏམ་རྒྱུད་མཚོན་པའི་ནང་དོན་དང་འབྲེལ་ནས་གསུང་བཤད་གནང་བ་མ་ཟད་དུས་རྒྱུན་ཡིག་གཟུགས་འབྲི་སྦྱོང་ཐད་སྣང་འཇོག་བྱེད་དགོས་པའི་གནད་དོན་འགའ་དང་སླད་ཕྱིན་ཡིག་གཟུགས་འབྲི་སྦྱོང་ཐད་ལ་རེ་བ་ནན་པོ་བཏོན་པ།
ཡིག་མཁན་བསླབ་གསུམ་དང་སྐལ་བཟང་རྒྱ་མཚོས་གཙོས་པའི་ཡིག་གཟུགས་བྱ་དགའ་ཐོབ་མྱོང་བའི་དཔྱད་འདེམ་མཁན་རྣམ་པས་གཞུང་དྲང་བདེན་པའི་སྒོ་ནས་དཔྱད་འདེམས་རབ་དང་རིམ་པ་གནང་བཞིན་པ།
རིམ་པ་དང་པོའི་བྱ་དགའ་ཐོབ་པའི་སློབ་མས་ཡིག་གཟུགས་འབྲི་བཞིན་པའི་རྣམ་པ།
དགེ་རྒན་རྣམ་པས་ཡིག་གཟུགས་འགྲེམས་སྟོན་ལ་གྲ་སྒྲིག་གནང་བཞིན་པ།
ཤག་ཆུ་སློབ་ཆུང་གི་སློབ་མ་210ལ་བྱ་དགའ་ཐོབ་པའི་རྣམ་པ།
ཡིག་གཟུགས་ལ་དགའ་ཞེན་ཆེ་ལ་ཐེངས་འདིའི་ཡིག་གཟུགས་འགྲེམས་སྟོན་ཁྲོད་ཞུགས་མཁན་གྱི་ཁྱིམ་བདག་ལ་ཕྱག་རྟགས་འབུལ་བཞིན་པ།
ད་ཐེངས་ཡིག་གཟུགས་འགྲེམས་སྟོན་དང་བྱ་དགའ་སྤྲོད་པའི་མཛད་སྒོར་ཞུགས་མཁན་གྱི་གྲས་སུ་ཤག་ཆུ་སློབ་ཆུང་གི་དགེ་སློབ་ཡོངས་དང་ལས་རིགས་ཁག་གི་མི་སྣ་དེ་བཞིན་ཁྱིམ་བདག་བཅས་ཁྱོན་མི་གྲངས་4000ལྷག་ཡོད།
དགེ་རྒན་དང་སློབ་མ་ཁྱིམ་བདག་བཅས་ཀྱི་ཡིག་གཟུགས་བརྩམས་བྱ་1800ལྷག་ལ་གཟིགས་སྐོར་ལ་བསྐྱོད་བཞིན་པ།
ད་ཐེངས་ཀྱི་ཡིག་གཟུགས་བརྩམས་བྱ་ནི་རྨང་གཞིར་དམིགས་ནས་ཚུགས་རིང་གཙོ་བོར་བྱས་ནས་འགྲན་སྡུར་དང་འགྲེམས་སྟོན་བྱས་ཡོད་ལ།རྒྱལ་ཡོངས་བོད་ཀྱི་ཡིག་གཟུགས་དུས་ཆེན་གྱི་བྱུང་འཕེལ་དང་མཚོན་རྟགས་རྒྱུས་མངའ་བྱུང་བ་ཙམ་མ་ཟད།ཚང་མས་རང་རེའི་བོད་ཀྱི་ཡིག་གཟུགས་ཀྱི་གལ་ཆེའི་རང་བཞིན་ཐད་ལ་ངོས་འཛིན་བྱུང་བ་དང་།དགེ་སློབ་རྣམས་ཡིག་གཟུགས་ལ་དད་མོས་དང་མཐོང་ཆེན་བྱེད་པའི་སེམས་ཤུགས་འཕེལ་བར་ནུས་པ་ཤུགས་ཆེན་ཐོན་ཡོད།ཐེངས་འདིའི་བྱ་འགུལ་ཐད་ཤག་ཆུ་སློབ་ཆུང་གི་ཀུན་སློབ་ཁྲུའུ་ནས་འགན་འཁུར་གནང་བའི་རྨང་གཞིའི་ཐོག་གོང་རིམ་གྱི་རྒྱབ་སྐྱོར་དང་དགེ་སློབ་རྣམ་པའི་ཧུར་བརྩོན་འོག་རྒྱལ་ཁའི་ངང་ཡིག་གཟུགས་འགྲན་སྡུར་དང་འགྲེམས་སྟོན་ཐུབ་སོང་། །
མར་སྤགས་རྣམ་སྤྲུལ་ཉི་མས།
སྤྱི་ལོ་2019ལོའི་ཟླ་4ཚེས་28ཉིན་གྱི་ཕྱི་དྲོར།
|
|
