༢༠༡༩ལོའི་ཟླ༣ཚེས༡ནས་ཚེས༢༡ཉིན། མགོ་ལོག་ཁུལ་རྨ་ཆེན་རྫོང་རྟ་སྨད་བཅའ་སྡོད་སློབ་གྲྭས་འབྲི་ཀློག་གཉིས་ནི་ཡོན་ཏན་ཀུན་གྱི་གཞི་ཞེས་པ་ལྟར། སློབ་མར་ཆུང་དུས་ནས་ཡིག་གཟུགས་ལ་སྦྱང་བ་དཔྱིས་ཕྱིན་པ་ཞིག་བྱས་ན་མཛེས་པར་ཞེན་པ་དང་རིག་པ་གྲིམ་པ། རྒྱུན་ཆགས་བརྩོན་པ་དང་སེམས་རྣལ་དུ་ཕབ་པའི་ནུས་པ་སྐྱེད་སྲིང་བྱེད་པ་སོགས་ལ་དམིགས་ནས་མདོ་སྨད་དྷཱིཿཚ་དགོན་ཆེན་གྱི་ཡིག་མཁན་རིག་སྨོན་བསམ་གཏན་རྒྱ་མཚོ་ལགས་གདན་འདྲེན་བྱས་ཏེ། ཉིན་ཉི་ཤུ་ལྷག་གི་རིང་ལ་བོད་རང་གི་སྲོལ་རྒྱུན་སློབ་ཁྲིད་བྱེད་ཐབས་ལས་ལོ་རྒྱུས་ཀྱི་རྒྱུན་རིང་ཞིང་འབྲས་བུ་འབྱུང་སླ་བའི་སྦྱང་ཤིང་སྟེང་ལ་ཐིག་རྩ་འདེབས་སྲོལ་དང་། སྨྱུག་ཁམ་བཟོ་སྟངས། སྣག་ལམ་འདྲེན་སྟངས། མཐེབ་དབྲིལ་གཏོང་སྟངས་བཅས་སློབ་ཁྲིད་ལེགས་པར་གྲུབ་པས། ཡིག་གཟུགས་ཀྱི་བྲིས་རྒྱུན་དྷཱིཿཚའི་སྨྱུག་རིལ་འབྲི་སྟངས་ཀྱི་སྨྱུག་རིམ་དང་། གཙང་བཀྲ་ཤིས་ལྷུན་པོའི་བྲིས་རྒྱུན་ཚུགས་ཆེན། སྨོན་ལམ་ཡིག་རྒྱུན་བཅས་ཀྱི་བརྩམས་ཆོས་ཐང་ག་སུམ་ཅུ་དང་དཔར་ཤིང་སུམ་ཅུ་ལྷག ཡིག་གཟུགས་ལས་བྱ་བརྒྱ་བཅས་སློབ་གྲྭའི་ཡིག་གཟུགས་ཁང་དུ་བྲིས་རྒྱུན་འགྲེམ་སྟོན་བྱས།
ཐེངས་འདིར་སློབ་གྲྭའི་སློབ་གཙོ་བསོད་ནམས་ཚེ་རིང་དང་། དགེ་རྒན་རིག་སྨོན་བསམ་གཏན། སློབ་གཙོ་གཞོན་པ་རྟ་མགྲིན་མཚོ། ཡུལ་ཚོ་སྲིད་གཞུང་གི་འགོ་ཁྲིད་བསམ་འགྲུབ་དང་ཡུལ་གཙོ་རྡོ་རྗེ་ཚེ་བརྟན། འབྲོག་ཨུ་ཁང་སོ་སོའི་འགོ་བ་བཅས་ཀྱིས་བོད་ཀྱི་ཡིག་གཟུགས་འབྲི་སྦྱོང་སྐོར་གྱི་གཏམ་བཤད་མང་པོ་གནང་བ་དང་། བོད་ཡིག་སྡེ་ཁག་གི་འགོའམ་སློབ་གཙོ་གཞོན་པ་རྟ་མགྲིན་མཚོས་མདོ་འཛིན་བྱས་པར་མ་ཟད། སློབ་རའི་གླུ་བ་མི་འགྱུར་རྡོ་རྗེ་ཡིས་སྙན་མོ་ངག་གི་དབྱངས་རྟ་དང་གླུ་གར་འཛིན་གྲྭའི་ལྡེམ་མྱུར་གར་གྱི་སྟངས་སྟབས་ཁྲོད་ནས་སློབ་གྲྭའི་ཡིག་རྒྱུན་འགྲེམ་སྟོན་བསུ་བའི་མཛད་སྒོ་གཟབ་རྒྱས་ངང་འཚོགས།
རྒན་རིག་སྨོན་བསམ་གཏན་གྱིས་ཡིག་གཟུགས་ཀྱི་གལ་ཆེའི་གསུང་བཤད་སྨྱན་གཟུགས་ཀྱི་ལམ་ནས་གནང་བཞིན་པ།
སློབ་གཙོ་བསོད་ནམས་ཚེ་རིང་ལགས་ཀྱིས་ཡིག་གཟུགས་དང་འབྲེལ་བའི་སྐོར་ནས་གསུང་བཤད་གནང་བཞིན་པ །
རང་རེའི་ཡུལ་ཚོའི་ཏང་གཙོ་བསམ་འགྲུབ་ལགས་ཀྱིས་གསུང་བཤད་གནང་བཞིན་པ །
རྒན་ལགས་ཀྱིས་ཡུལ་དངོས་ནས་ཡིག་གཟུགས་ཐད་འབྲི་བྱེད་བཞིན་པ།
རྒན་རིག་སྨོན་བསམ་གཏན་ལགས་ཀྱིས་འཛིན་གྲྭ་རེ་རེ་དང་དགེ་སློབ་ཁྱིམ་བདག་ཡོངས་ལ་ཡིག་གཟུགས་ངོ་སྤྲོད་བྱས་པ །
སློབ་བུ་རྣམས་ཀྱིས་བོད་ཀྱི་སྦྱང་ཤིང་སྟེང་ཡིག་གཟུགས་སྦྱོང་བཞིན་པའི་རྣམ་པ།
ཐོན་མིའི་ཕྱག་རྒྱུན་རྟགས་མའི་ཡིག་གཟུགས་འགྲན་སྡུར་དང་ལས་བྱ། བློ་རྒྱུགས་སོགས་རེ་རེ་བཞིན་ཨང་རིམ་དགར་ནས་བྱ་དགའ་གནང་བ །
ཡིག་གཟུགས་ལེགས་པའི་དགེ་སློབ་ཡོངས་ལ་བྱ་དགའ་གནང་བའི་ཡུལ་དངོས །
མཇུག་མཐར་རང་སློབ་གྲྭའི་དགེ་སློབ་ཉིས་བརྒྱ་དང་ཉི་ཤུ་ལྷགའགྲེམ་སྟོན་ལ་ཞུགས་ནས་བརྩམས་ཆོས་རེ་རེ་ལ་ཞིབ་གཟིགས་མཛད་པར་མ་ཟད་དགེ་སློབ་སོགས་ལ་བྱ་དགའི་གཟེངས་རྟགས་བསྩལ་ནས་རྒྱལ་ཁ་དང་གཟི་བརྗིད་ཀྱིས་མཇུག་གྲོལ་བ་ཡིན།
|
|
