སྒོ་རབ་རྒྱས་སམ་དཔལ་བེའུ་ནི་༡༩༨༠ལོའི་ཟླ༡༢ཚེས༡༦ཉིན་རེབ་གོང་སྒོ་དམར་ནས་སྐྱེས། མཚོ་སྔོན་ཞིང་ཆེན་སྲ་སྨྱུག་ཡིག་གཟུགས་མཐུན་ཚོགས་ཀྱི་ཚོགས་མི་དང་། རྨ་ལྷོའི་རྩོམ་པ་པོ་མཐུན་ཚོགས་དང་། རྨ་ལྷོའི་ཡིག་མཐུན་ཚོགས་ཀྱི་ཚོགས་མི་ཡིན། སློབ་ཆུང་ལོ་རིམ་གཉིས་པ་མཐར་ཕྱིན་པའི་ལོ་དེར་རབ་བྱུང་བསྒྲུབས་ཏེ་སྒོ་དམར་དགོན་པའི་ཚོགས་གྲལ་ལ་ཞུགས། ལོ་བཅུ་གསུམ་སྟེང་སྒྲུབ་བརྒྱུད་བསྟན་པའི་མངའ་བདག་ཡབ་རྗེ་བླ་མ་སྐལ་ལྡན་རྒྱ་མཚོའི་གདན་ས་ཁྱད་པར་ཅན་རོང་བོ་གྲྭ་ཚང་དུ་ཐོས་བསམ་རྣམ་པར་རྒྱལ་བའི་གླིང་དུ་ཚོགས་གྲལ་ལ་ཞུགས་ཏེ་མཁས་དབང་རྗེ་བློ་བཟང་དགེ་འདུན་ཚང་གི་སྐུ་མདུན་ནས་བསྡུས་གྲྭ་དང་སུམ་རྟགས་གཙོས་དབུ་ཅན་གྱི་ཡིག་གཟུགས་སོགས་ལའང་སྦྱངས་ཁུལ་ཙམ་བྱས་པ་དང་། རོང་བོ་དགོན་པའི་ནང་བསྟན་སློབ་གླིང་ནས་རེབ་གོང་གི་ཡིག་མཁན་ཆེན་མོ་རྒན་དགེ་འདུན་དོན་འགྲུབ་ཚང་གི་གམ་ནས་ཀྱང་དབུ་ཅན་གྱི་ཡིག་གཟུགས་འབྲི་སྟངས་ལ་སློབ་སྦྱོང་བྱེད་པའི་སྐལ་བ་ཐོབ། ༡༩༩༧ལོ་ནས་བཟུང་དགའ་ལྡན་བྱང་རྩེ་གྲྭ་ཚང་ནས་སློབ་གཉེར་བྱེད་སྐལ་བྱུང་སྟེ་བྱང་རྩེ་གྲྭ་ཚང་གི་ཡིག་གཟུགས་མཁས་ཅན་ནམ། ལྷ་རམས་པ་འཇིགས་མེད་མཐར་ཕྱིན་ཚང་དང་། དགའ་བྱང་སློབ་གྲྭའི་ཡིག་གཟུགས་དགེ་རྒན་འཇིགས་མེད་རྣམ་གཉིས་ཀྱི་གམ་ནས་དབུ་མེད་ཀྱི་ཚུགས་རིང་ནས་རྒྱུགས་བྲིས་བར་ཞིབ་ཏུ་སྦྱངས་པའི་སྐལ་བཟང་མངོན་པར་ཤར། ༢༠༠༨ལོ་ནས་བཟུང་རྩོམ་ཡིག་མང་པོ་བྲིས་པ་དང་། བོད་ཡིག་གི་དུས་དེབ་གྲགས་ཅན་༼གངས་རྒྱན་མེ་ཏོག༽་དང་། ༼སྦྲང་ཆར།༽ ༼ཟླ་ཟེར། ༽༼བོད་ཀྱི་རྩོམ་རིག་སྒྱུ་རྩལ།༽༼རྨ་ལྷོ་བོད་ཡིག་ཚགས་པར།༽སོགས་ཚགས་དེབ་མང་པོའི་སྟེང་སྙན་ངག་དང་། སྒྲུང་གཏམ་སོགས་རྩོམ་ཡིག་མང་ཙམ་སྤེལ། ༢༠༠༩ལོར་རྗེ་བློ་བཟང་དགེ་འདུན་ཚང་གི་མདུན་ནས་ཡང་བསྐྱར་ལོ་རྒྱུས་ཀྱི་ཆུ་རྒྱུན་ཧ་ཅང་རིང་བའི་རེབ་གོང་གི་ཡིག་རྒྱུན་ཐུན་མོང་མ་ཡིན་པའམ། བོད་ཀྱི་ཐོན་མི་གཉིས་པར་གྲགས་པའི་རྗེ་བཙུན་ཚེ་ཏན་ཞབས་དྲུང་རིན་པོ་ཆེའི་ལན་ཝར་དང་དབུ་ཅན་སོགས་ཀྱི་ཡིག་རྒྱུན་དྲི་མ་མེད་པ་དེ་ལེན་པའི་གོ་སྐབས་ལེགས་པར་ཐོབ། དེའི་ཞོར་དུ་སྙན་ངག་གི་བརྩམས་ཆོས་༼ལྐོག་ལབ།༽ དང་།༼མཚན་མོའི་གཤོག་པ།༽ གཉིས་སྔ་ཕྱི་བྱས་ཏེ་དཔར་སྐྲུན་བྱས་སོ།།
|
|
