༢༠༡༩ལོའི་ཟླ༤བའི་ཚེས༥ཉིན་ཀླུ་ཆུ་རྫོང་མཛེས་རྩལ་དང་ཡིག་མཁན་མཐུན་ཚོགས་ཀྱིས་བོད་ཀྱི་ལྷ་རིས་པ་གྲགས་ཅན་དང་ཡིག་གཟུགས་ཆེད་མཁན་རྒན་ཆོས་འཁོར་བ་བསྟན་འཛིན་རྒྱ་མཚོ་ལགས་ཀྱིས་བརྩམས་གནང་མཛད་པའི་༼ གཙུག་ལག་ཁང་སོགས་ལ་བརྐོས་རིས་བཟོ་ཚུལ་གྱི་མི་ཕྱི་བློ་ལྡན་མིག་གི་དགའ་སྟོན་ཞེས་བྱ་བ ༽འགྲེམ་སྤེལ་གྱི་མཛད་སྒོ་ཀླུ་ཆུ་རྫོང་བོད་ཁྱིམ་དང་པོའི་གསོལ་ཚིགས་ཐོག་ཁང་ནས་སྤེལ།
དེབ་འདི་ནི་བོད་ཀྱི་ཐུན་མོང་མ་ཡིན་པའི་གཙུག་ལག་བརྐོས་རིས་བཟོ་རྩལ་མ་ཉམས་གོང་དུ་སྤེལ་བ་དང་། བླ་མེད་ཀྱི་བརྐོས་རིས་བཟོ་རྩལ་འདིས་བོད་ཀྱི་ཕྱི་རབས་གཞོན་སྐྱེས་རྣམས་ལ་ཕན་རེ་ཐོགས་ན་སྙམ་པའི་ཀུན་སློང་གཙང་མས་སྐུལ་ཏེ་བརྩམས་གནང་མཛད་པ་ཡིན།
ཐེངས་འདིའི་བྱེད་སྒོར་ཡིག་མཁན་མཐུན་ཚོགས་ཀྱི་ཚོགས་མི་མགོན་པོ་སྐྱབས་ཀྱིས་མདོ་འཛིན་མཛད་པ་དང་། བྱ་འགུལ་གྱི་དགོས་པ་དང་དམིགས་ཡུལ། རིམ་པ་བཅས་གསལ་བཤད་གནངས་པ་མ་ཟད། ཨ་ཁུ་ཁོང་གི་ལྷ་རིས་སྒྱུ་རྩལ་དང་ཡིག་གཟུགས་ཕྱོགས་ཀྱི་མཛད་པ་འཕྲིན་ལས་ཀུན་ལ་ངོ་སྤྲོད་ཞིབ་རྒྱས་བྱས།
བྱེད་སྒོའི་གོ་རིམ་ལྟར་ཨ་ཁུ་ཁོང་དང་ཡིག་མཁན་མཐུན་ཚོགས་ཀྱི་ཚོགས་གཙོ་རྟ་མགྲིན་མགོན་པོ་གཉིས་ཀྱིས་དཔེ་ཆ་འགྲེམ་སྤེལ་གྱི་དབུ་དངོས་སུ་བརྩམས་ཤིང་། ཚོགས་མི་རྣམ་པས་དྲི་མེད་ཁ་བཏགས་དཀར་པོ་ལག་ཏུ་བཏེགས་ནས་རྟེན་འབྲེལ་ཞུས།
རྒན་ལགས་ཀྱིས་ཡུལ་དངོས་སུ་ཕེབས་པའི་ཚོགས་མི་ཀུན་ལ་དཔེ་དེབ་གནང་སྦྱིན་བྱས་ཤིང་ཡིག་གཟུགས་འཛིན་སྐྱོང་སྤེལ་གསུམ་དང་ལྷ་རིས་བཟོ་རྩལ་མ་ཉམས་གོང་སྤེལ་སོགས་ཀྱི་གསུང་བཤད་གལ་ཆེན་གནངས།
གསར་འགོད་པ། རིག་པའི་སྐར་ཆུང་། རྩོམ་སྒྲིག་པ་རྟ་མགྲིན་མགོན་པོ།
|
|
