༄༅།། བྱ་བཞག་གསར་གཏོད་པ་ཡིག་མཁན་བྱམས་པ་རྡོ་རྗེའི་ངོ་སྤྲོད་མདོར་བསྡུས།
བྱམས་པ་རྡོ་རྗེའམ་ཆོས་གྲགས་ཚེ་རིང་ནི་སྤྱི་ལོ་༡༩༩༣ལོར་དཀར་མཛེས་རྫོང་གི་རྫ་ཁོག་ཡུལ་ཚོའི་ཉག་གཞིས་ཚང་དུ་ཐོག་མའི་ལྟེ་ཕྲག་འཐོར། ཆུང་དུས་ནས་བྲིས་ལ་མཁས་པའི་དགེ་རྒན་ལུང་རྟོགས་སོགས་ཀྱིས་མཛུབ་ཁྲིད་བཟང་པོས་ཡིག་གཟུགས་ལ་དགའ་བའི་གོམས་གཤིས་ཟབ་མོ་བཞག ཉིས་སྟོང་བཅོ་ལྔ་ལོ་ནས་བོད་ཀྱི་ཡིག་གཟུགས་ཆེད་སྦྱོང་གི་ལམ་དུ་ཞུགས་ཏེ་མཚོ་སྔོན་དང་ཁམས་ཕྱོགས་ཀྱི་ཡིག་གཟུགས་མཁས་ཆེན་མང་པོའི་མདུན་སར་ཆེད་བཅར་གྱིས་བོད་ཀྱི་སྲོལ་རྒྱུན་ཡིག་གཟུགས་དྲི་མ་མེད་པར་འབྲི་སྦྱོང་ལྷོད་མེད་བྱས་ཤིང་། དགེ་རྒན་ཁོང་རྣམ་པས་ཀྱང་དམིགས་བསལ་ལྟ་སྐྱོང་དང་བསྔགས་བརྗོད་གནང་བ་མ་ཟད། དཀར་མཛེས་ཁུལ་དུ་སྐབས་གཉིས་པའི་བོད་ཀྱི་ཡིག་གཟུགས་འགྲན་བསྡུར་ཆེན་མོ་ལས་དབུ་ཅན་ལ་ཨང་དང་པོའི་རྟགས་མ་ཐོབ། སྤྱི་ལོ་༢༠༡༨ལོར་ཁོང་གིས་རང་རེའི་ཁུལ་དུ་གསེར་བྲིས་རིག་གནས་ཀྱི་དབུགས་རྒྱུན་ཕྲ་མོ་འགག་ལ་ཉེ་བར་གཟིགས་ནས་དཀར་མཛེས་རྫོང་དུ་དཀར་མཛེས་བོད་ཀྱི་གསེར་བྲིས་རིག་གནས་ཉམས་གསོ་ལྟེ་གནས་བཙུགས་ཏེ། རང་ཉིད་ཀྱི་ཆུང་དུས་ཀྱི་ཕུགས་འདུན་མངོན་དུ་འགྱུར་བར་ངལ་བ་དུ་མར་མ་འཛེམ་པར་བོད་ཀྱི་གསེར་བྲིས་རིག་གནས་འཛིན་སྐྱོང་སྤེལ་གསུམ་གྱི་ལས་ལ་ཞུགས། དེ་ཡང་གསེར་ཡིག་འབྲི་བཞེངས་བྱེད་པ་ལ་ཉེ་བར་མཁོ་བའི་བོད་ཤོག་ལས་སྣོན་བྱེད་སྟངས་དང་མཐའ་ཐིག་འདབས་སྟངས། གསེར་དངུལ་འདུལ་སྦྱོང་བྱེད་སྟངས་བཅས་ཀྱི་ལག་རྩལ་ལའང་དབང་ཐོབ། དེ་བས་མཚོ་སྔོན་ཡུལ་ཤུལ་གྲོང་ཁྱེར་དུ་གནས་གཞི་བྱས་པའི་གསེར་བྲིས་ཁང་དག་གིས་གདན་ཞུ་བྱས་ཤིང་བོད་ཤོག་བཟོ་སྟངས་སོགས་ལ་མཛུབ་ཁྲིད་བྱས།
ད་ལྟ་དཀར་མཛེས་བོད་ཀྱི་གསེར་བྲིས་རིག་གནས་ཉམས་གསོ་ལྟེ་གནས་ཀྱི་སྤྱིའི་འགན་འཛིན་པ་དང་། དཀར་མཛེས་གནའ་དཔེ་གསེར་བྲིས་རིག་གནས་ཀྱི་རྒྱུན་འཛིན་པ། དཀར་མཛེས་ཡིག་གཟུགས་མཐུན་ཚོགས་ཀྱི་ཚོགས་མི། དཀར་མཛེས་ནོར་གླིང་བོད་ཀྱི་ཡིག་གཟུགས་སྒྱུ་རྩལ་ཚན་ཆུང་གི་ཚོགས་མི་བཅས་ཀྱི་ལས་ཀ་བྱེད་པའི་ཞོར་དུ་སློབ་མ་མང་པོ་སྐྱེད་སྲིང་བྱེད་བཞིན་ཡོད་ལ། དེ་དག་ལའང་རང་གིས་སྦྱངས་པ་མཐར་སོན་པའི་དབུ་ཅན་ཁམས་ཀྱི་སྡེབ་བྲིས་དང་སྙེ་བྲིས། སྨོན་ལམ་ཡིག་གཟུགས་དང་ཚེ་ཏན་ཡིག་གཟུགས་སོགས་ཀྱིས་གསེར་བྲིས་སྣ་ཚོགས་འབྲི་ལུགས་ལ་སློབ་ཁྲིད་བྱེད་མུས་སུ་མཆིས།
དེ་ཡང་། ཁམས་པའི་དྲ་བ་དང་རྒྱལ་ཡོངས་ས་ཆེན་དྲ་བ། ཁུལ་ཉིན་རེའི་ཚགས་པར། གངས་དཀར་རི་བོའི་དུས་དེབ། འབོད་པ་འདོན་ཐེངས་གསུམ་པ་སོགས་དང་རྫ་སྲས་བོད་ཀྱི་རིག་གནས་འཕྲིན་སྟེགས་སོགས་ཚད་ལྡན་གྱི་འཕྲིན་སྟེགས་བཅུ་ཕྲག་དང་། གྲོང་ཁྱེར་ཆེན་པོ་ཧྲིན་ཀྲུའུ“深圳”་དང་རང་ཁུལ་གྱི་ཡུལ་སྐོར་ལྟེ་གནས་གྲགས་ཅན་ཉི་སྟེན་གྱི་བཤམས་སྟོན་ཁང་དག་གིས་ཀྱང་ཁོང་གི་ཡིག་གཟུགས་ལ་མགྲོན་འབོད་བྱས། ཉེ་བའི་ཟླ་འགའ་ཡི་སྔོན་དུ་ཁོང་གིས་ཀྲུང་དབྱང་མི་དམངས་ཀུན་ཁྱབ་རླུང་འཕྲིན་ལས་ཁུངས་ཀྱི་བཅར་འདྲི་དང་ལེན་བྱས་ཏེ་བཤད་རྒྱུར། ངས་དམིགས་ཀྱིས་ལས་རིགས་འདི་འདེམས་པ་ནི་ང་ཚོའི་ས་ཁུལ་དུ་ཉེ་བའི་ལོ་བཅུ་ཕྲག་འགའི་ཡར་སྔོན་དུ་གསེར་བྲིས་འབྲི་བའི་སྲོལ་ཡོད་ན་ཡང་། རིག་གསར་སོགས་དུས་ཀྱི་འགྱུར་བ་ཡི་དབང་གིས་མིག་སྔར་རིན་ཐང་གཞལ་ཐབས་བྲལ་བའི་རིག་གནས་འདི་བསྐྱར་གསོ་བྱེད་མཁན་ཧ་ཅང་ཉུང་སྟབས། རང་གིས་ནུས་པ་ཡོད་དགུས་ལས་རིགས་འདི་ལ་འཇུས་ཏེ། བོད་རང་གི་ཐུན་མོ་མ་ཡིན་པའི་ཡིག་གཟུགས་སྒྱུ་རྩལ་འདི་ཉིད་ཀྱིས་ཐོན་རྫས་བཞེངས་སྐྲུན་བྱས་ཏེ་དེ་ཉིད་ཁྲོམ་རར་འགྲེམས་པ་དང་། དེང་རབས་ཅན་གྱི་དཔལ་འབྱོར་འཚོལ་སྒྲུབ་ཀྱི་བྱ་བར་སྐུལ་འདེད་བྱས་ཏེ་མི་རིགས་རང་གི་རིག་གནས་ཀྱི་མི་རིགས་རང་ལ་ཞབས་ཞུ་བྱེད་ཅི་ཐུབ་ཀྱི་བསམ་བློས་ཀུན་ནས་སློང་ཏེ་འདི་ཉིད་འཛུགས་པ་ཡིན་ལ། འདི་ལའང་རྩ་བའི་དབྱེ་བ་གསུམ་དང་དེ་དག་ལའང་ནང་ཚན་རིགས་མི་འདྲ་བ་མང་པོ་བྱས་ཐོག ཁྱོན་ཐོན་རྫས་ཀྱི་རྣམ་གྲངས་རིགས་མི་འདྲ་བ་བཅོ་ལྔ་ཙམ་བྱུང་ཐུབ་པ་བྱས་ཡོད་ལ། ཐོན་རྫས་དེ་ཡིས་སྒྲུབ་པའི་མ་དངུལ་དག་ནི་ད་གཟོད་གསེར་དངུལ་བྲིས་ཀྱི་རིག་གནས་ཉམས་གསོ་ཡི་མ་རྐང་བྱས་པ་ཡིན་ཅེས་ཟེར། ད་དུང་ཁོང་གིས་རང་གི་གྲོགས་པོ་དག་ལ་བཤད་དོན། གལ་ཏེ་ངའི་མི་ཚེ་འདི་མར་མེ་རྐང་ཅིག་ཡིན་ན། ཀོང་བུ་ནི་གསེར་བྲིས་ཁང་འདི་ཡིན་པས། ཇི་སྲིད་ངའི་མི་ཚེའི་སྣུམ་དེ་མ་ཟད་བར་གྱི་དེ་སྲིད་དུ་ཀོང་བུའམ་གསེར་བྲིས་ཁང་འདིའི་ནང་ནས་འོད་སྣང་གི་ངང་དུ་འགྲེང་ངེས་ཡིན་ལ། འདིས་ཀྱང་མི་རིགས་རང་གི་འབུར་དུ་ཐོན་པའི་གསེར་བྲིས་རིག་གནས་ལ་འོད་ལམ་ལམ་གྱི་གཟི་མདངས་རེ་སྒྲོན་ཨེ་ཐུབ་ཀྱི་འདུན་པ་ཡོད་ཅེས་ཀྱང་གསུངས་སོ།།
|
|
