རིག་གནས་སྒྱུ་རྩལ་གྱི་གྲུབ་འབྲས་སྐྱེས་སུ་འབུལ་བའི་ཐེ་བོའི་མཚར་ཉམས།
ཟླ༩་ཚེས་༢༦ཉིན་ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་ཐེ་བོ་རྫོང་རིག་གནས་ཁང་གིས་གཙོ་སྒྲུབ་གནང་བའི་བཅོས་བསྒྱུར་སྒོ་འབྱེད་བྱས་ནས་ལོ་འཁོར་བཞི་བཅུ་ལོན་པར་༼ མཛེས་སྡུག་གི་ཐེ་བོ་འཆམ་མཐུན་གྱི་ཁྱིམ་གཞིས ༽ཞེས་པའི་རྫོང་ཡོངས་ཀྱི་ཡིག་གཟུགས་དང་མཛེས་རིས་འགྲེམ་སྟོན་རྫོང་རིག་གནས་ཁང་གི་དྲུག་ཐོག་འགྲེམ་སྟོན་ཚོམས་ཆེན་དུ་དངོས་སུ་འགྲེམ་སྟོན་གནང་།
ཐེངས་འདིའི་ཡིག་གཟུགས་དང་མཛེས་རིས་འགྲེམ་སྟོན་ནི་གཙོ་འཛིན་ཞིའི་ཅིན་ཕེང་གི་དུས་རབས་གསར་བའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་བསམ་བློ་དང་ཏང་གི་ཚོགས་ཆེན་བཅུ་དགུ་བའི་དགོངས་དོན་ལ་སློབ་སྦྱོང་དང་ལག་ལེན་མཐར་ཕྱིན་ནམ། བཅོས་བསྒྱུར་སྒོ་འབྱེད་བྱས་ནས་ལོ་ངོ་བཞི་བཅུ་ཟིན་པར་རྟེན་འབྲེལ་ཞུ་བའམ། ཀྲུང་གོའི་སྔོན་ཐོན་སྲོལ་རྒྱུན་རིག་གནས་དར་སྤེལ་དང་རྫོང་ཡོངས་ཀྱི་ལས་བཟོ་བའི་ཡིག་གཟུགས་དང་མཛེས་རིས་སྒྱུ་རྩལ་ཐད་ཀྱི་གྲུབ་འབྲས་སམ་མདུན་སྐྱོད་གོང་སྤེལ་གྱི་སྙིང་སྟོབས་མངོན་མཚོན་ནམ། རྒྱ་ཆེའི་མི་དམངས་མང་ཚོགས་ཀྱི་རིག་གནས་འཚོ་བ་ཕུན་སུམ་ཚོགས་པ་སོགས་ཀྱི་དགོས་མཁོར་དམིགས་ཏེ་བསྒྲུབས་པ་ཞིག་ཡིན། ཉིན་འདིར་རྫོང་དམངས་ཆེན་ཀྲུའུ་རེན་གཞོན་པ་ཡང་ཀྲི་ཧོང་དང་། རྫོང་དཔོན་གཞོན་པ་ཀྲང་ཡེའུ་ཅུས་སོགས་དང་། རྫོང་རིག་རྩལ་དང་རྒྱང་སྒྲོགས་ཅུས། ཡིག་ཚགས་ཅུས་སོགས་ཀྱི་མགོ་ཁྲིད་མི་སྣ་དང་རྒྱ་ཆེའི་ཡིག་གཟུགས་དང་མཛེས་རིས་དགའ་ཞེན་པ། སློབ་གྲྭ་ཆུང་འབྲིང་གི་སློབ་མ་༢༠༠ལྷག་འགྲེམ་སྟོན་ལ་ཞུགས་ཡོད།
མི་དམངས་ཀྱི་སེམས་འདུན་དང་དུས་རབས་ཀྱི་འཕེལ་རྒྱས་མཚོན་པའི་བརྩམས་ཆོས་༨༠ལྷག་གཟིགས་མོ་བའི་མིག་གི་དགའ་སྟོན་དང་ཡིད་ཀྱི་རྒྱག་ཕྱེ་རུ་སྟེགས་པའི་འགྲེམ་སྟོན་འདི་ནི་ཐེ་བོ་རྫོང་ཁོང་གི་ཡིག་མཁན་དང་མཛེས་རྩལ་བས་གསར་བཞེང་བྱས་པའི་ཉིང་བཅུད་ཤ་སྟག་ཡིན་ལ། རྣམ་པ་དང་ནང་དོན་ཕུན་སུམ་ཚོགས་པའི་བརྩམས་ཆོས་ཁྲོད་སྒྱུ་རྩལ་བ་དག་གི་སླད་མེད་ཀྱི་ལྷག་བསམ་དཀར་པོ་དང་དཀའ་སྤྱད་འབད་བརྩོན་གྱི་འཚོལ་སྙེགས་འདུས་པ་མ་ཟད། བྱོན་ལེགས་ལ་སྒྱུ་རྩལ་ཉམས་འགྱུར་གསལ་བའི་གཟུགས་རིས་ཁྲོད་ཐེ་བོ་མི་དམངས་ཀྱི་རིག་གནས་རྨང་གཞི་མངོན་ཡོད།
ཐེངས་འདིའི་བྱ་འགུལ་ནི་གཟའ་འཁོར་གཅིག་གི་རིང་ལ་རྒྱུན་བསྲིང་བ་དང་། དེའི་སྐབས་སུ་མཛེས་རྩལ་དང་ཡིག་གཟུགས་པ་ཚོས་གསར་རྩོམ་ཐད་ཀྱི་མཉམ་མྱོང་བརྗེས་རེས་རྒྱ་ཆེར་བྱས་ཡོད་དོ།།
|
|
