བོད་ཀྱི་ཡིག་གཟུགས་མཁས་དབང་དྲུང་ཡིག་སྨོན་ལམ་རྒྱ་མཚོའི་འཁྲུངས་གཞིས་
སུ་མཛད་རྣམ་དྲན་གསོ་ཁང་བཙུགས་པ།
མདོ་སྨད་ཀན་སུའུ་ཞིང་ཆེན་ཀན་ལྷོ་ཁུལ་བསང་ཆུ་རྫོང་འབོ་ར་གྲོང་རྡལ་ལོ་ཡག་ཐང་སྡེ་བ་ནི་བོད་ཀྱི་ཡིག་གཟུགས་མཁས་དབང་དྲུང་ཡིག་༧སྨོན་ལམ་རྒྱ་མཚོའི་འཁྲུངས་ཡུལ་ཡིན་ལ། ༢༠༡༨ལོའི་ཟླ༧ཚེས་༡༨ཉིན་ཁོང་གི་འཁྲུངས་གཞིས་སུ་སྐུ་ཉིད་ཀྱི་མཛད་རྣམ་དྲན་གསོ་ཁང་དངོས་སུ་སྒོ་འབྱེད་པའི་མཛད་སྒོ་གཟབ་རྒྱས་ངང་ཚོགས།
ཚོགས་རའི་རྣམ་པ།
འབོ་ར་གྲོང་རྡལ་གྱི་ཏང་གཙོ་མགོན་པོ་ལགས་ཀྱིས་མདོ་འཛིན་མཛད་པ།
འབོ་ར་ལོ་ཡག་ཐང་སྡེ་དམངས་ཨུ་ཡོན་ལྷན་ཁང་གི་ཀྲུའུ་རེན་བན་དེ་མཁར་གྱིས་བཀའ་དྲིན་ཞུ་བའི་གཏམ་བཤད་གནང་བ།
དྲན་གསོ་ཁང་གི་སྒོ་འབྱེད་པའི་ཚུལ།
འདས་པའི་ལོ་ངོ་གཉིས་ཀྱི་རིང་ལ་དྲན་གསོ་ཁང་འདི་འཛུགས་ཆེད། སྡེ་བ་འདི་དང་། འབོ་ར་གྲོང་རྡལ། བསང་ཆུ་རྫོང་ཨུ་དང་རྫོང་མི་དམངས་སྲིད་གཞུང་སོགས་རིམ་པའི་སོ་སོའི་འབྲེལ་ཡོད་ལས་ཁུངས་དང་མགོ་ཁྲིད་རྣམ་པས་ཐུགས་ཁུར་ཟབ་བཞེས་གནང་ཤིང་། མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་སྡེ་བ་འཛུགས་སྐྲུན་ནམ། ཞང་སྡེའི་ཤུལ་བཞག་རིག་དངོས་སྲུང་སྐྱོབ་ལས་གཞིའི་མཐུན་རྐྱེན་སྣ་ཚོགས་དང་འབྲེལ། བོད་ཀྱི་སྨྱུག་འཛིན་དབང་བོ་དྲུང་ཡིག༧སྨོན་ལམ་རྒྱ་མཚོའི་མཛད་རྣམ་དྲན་གསོ་ཁང་གི་གཞིས་ཀ་གསར་བཞེང་དང་ནང་རྟེན་འཚོལ་བསྡུ་སོགས་ལེགས་འགྲུབ་བྱུང་བ་རེད།
དྲན་གསོ་ཁང་ལ་ལེགས་སྐྱེས་འབུལ་བཞིན་པ།
དྲན་གསོ་ཁང་འདིར་ཁོང་གི་སྐུ་ཚེ་ཧྲིལ་པོའི་མཛད་རྣམ་དང་། མི་རིགས་རིག་གནས་དང་ཆོས་ལུགས། ཆབ་སྲིད་དང་མི་རིགས་མཐུན་སྒྲིལ་སོགས་ཀྱི་ཐད་ལ་བཞག་པའི་ཞབས་རྗེས་རེ་རེ་འཚོལ་སྡུད་བྱས་ཤིང་། ཁྱད་པར་བོད་ཀྱི་ཡིག་གཟུགས་རིག་གནས་ཀྱི་བསྟན་པ་དར་རྒྱས་ལ་ཕུལ་པའི་མཛད་རྗེས་ཁྲོད་ཀྱི་གསེར་ཞུན་ཐིགས་པ་རེ་རེ་ཉར་ཚགས་བྱས་ཏེ། ཁོང་གི་སྐུ་ཚེ་ཧྲིལ་བོའི་འོད་ཟེར་རེ་རེ་སུབ་མེད་ཀྱི་རིས་སུ་ཕབ་ཡོད།
དྲན་གསོ་ཁང་ལ་གཟིགས་མོ་བྱེད་པའི་རྣམ་པ།
ཐེངས་འདིའི་མཛད་སྒོར་ཁུལ་དམངས་ཆེན་རྒྱུན་ཨུ་ཁང་གི་ནོར་དོན་ཨུའི་ཀྲུའུ་རེན་ལོའུ་ཁྲིན་ལཱོ་དང་། ཁུལ་འཕེལ་རྒྱས་བསྒྱུར་བཅོས་ཨུའི་ཀྲུའུ་རེན་གཞོན་པ་ཚེ་དབང་རྣམ་རྒྱལ༼ ཁོང་གི་སྐུ་སྲས་ཡིན། ༽ བསང་ཆུ་རྫོང་དམངས་ཆེན་རྒྱུ་ཨུ་ཁང་གི་ཀྲུའུ་རེན་ཚེ་ཁོ། སྲིད་གྲོས་བསང་ཆུ་རྫོང་ཨུ་ཡོན་ལྷན་ཁང་གི་ཀླུ་འབུམ་ཐར། ཁུལ་དམངས་ཆེན་ཁྲིམས་འཛིན་བྱ་བའི་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་ཀྲུའུ་ཡོན་ཧོང་། བསང་ཆུ་རྫོང་ཨུའི་ཧྲུའུ་ཅི་གཞོན་པ་སངས་ཀྲི་མེན། རྫོང་ཨུའི་རྒྱུན་ཨུ། སྲིད་ཁྲིམས་ཨུ་ཡོན་ལྷན་ཁང་གི་ཧྲུའུ་ཅི་ཀྲང་ཞིན་ཁྲོན། དྲིལ་བསྒྲགས་པུའུ་ཀྲང་ཚེ་རིང་སྐྱིད། རྫོང་ཨུའི་རྒྱུན་ཨུ།འཐབ་ཕྱོགས་ཅིག་གྱུར་པུའུ་ཀྲང་རྟ་མགྲིན་ཐར། རྫོང་དམངས་ཆེན་རྒྱུན་ཨུ་ཁང་གི་ཀྲུའུ་རེན་གཞོན་པ་མ་ཆིན་ཁྲང་། མགོན་པོ་དབང་རྒྱལ། ཚེ་རིང་དབང་མོ། བསོད་ནམས་དོན་གྲུབ། ཁོང་འཚོ་བཞུགས་སྐབས་ཀྱི་ལས་གྲོགས་ཡོན་ཏན་དགེ་འདུན་དང་ཡོན་ཏན་ལྷུན་གྲུབ། ཁོང་གི་སློབ་མའི་སྐུ་ཚབ་པ་སངས་རྒྱས་བཀྲ་ཤིས། སྒོམ་པ་བཀྲ་ཤིས། ཤེས་རབ། རྡོ་བྷ། སངས་རྒྱས་ཚེ་རིང་། སངས་རྒྱས་མཁར། ཟམ་ཚ་ཚེ་རིང་དོན་གྲུབ། ཀན་ལྷོ་ཁུལ་བོད་ཀྱི་ཡིག་མཁན་མཐུན་ཚོགས་ཀྱི་སྐུ་ཚབ་སོགས་དབུ་གྲལ་ལ་བཞུགས། གཞན་ཡུལ་ཕྱོགས་སོ་སོ་ནས་ཕེབས་པའི་ཡིག་གཟུགས་པ་དང་། བསང་ཆུ་རྫོང་གི་ལས་བྱེད་པ། ས་གནས་མང་ཚོགས་དང་ལོ་ཡག་ཐང་སྡེ་བའི་ལས་སྣ་སོགས་མི་གྲངས་ཉིས་བརྒྱ་ལྷག་ཚོགས་ཞུགས་མཛད།
ཁོང་གི་མཛད་རྗེས་ཐོར་བུ་མཚོན་པའི་རིག་དངོས།
མཛད་སྒོའི་ཐོག་མཐའ་བར་གསུམ་ལ་འབོ་ར་གྲོང་རྡལ་གྱི་ཏང་ཨུའི་ཧྲུའུ་ཅི་མགོན་པོ་ལགས་ཀྱིས་མདོ་འཛིན་མཛད་པ་དང་། རྫོང་ཨུ་དང་རྫོང་མི་དམངས་སྲིད་གཞུང་གིས་སྐུ་མགྲོན་རྣམ་པར་ལྷག་བསམ་དང་དགའ་བསུ་མཚོན་པའི་ལྷ་དར་ཕུལ། གྲོང་དཔོན་གནམ་ཕྱུག་རྒྱལ་གྱིས་མཛད་སྒོར་ཤིས་ཚིག་སྒྲོན་པ་དང་རྗེས་དྲན་ཁང་གསར་འཛུགས་ཀྱི་ལས་ཀའི་གནས་ཚུལ་མཚམས་སྦྱོར་བྱས། གཞན་ད་དུང་འབོ་ར་ལོ་ཡག་ཐང་སྡེ་དམངས་ཨུ་ཡོན་ལྷན་ཁང་གི་ཀྲུའུ་རེན་བན་དེ་མཁར་གྱིས་ཁོང་གི་འཁྲུངས་གཞིས་མི་དམངས་ཀྱི་ཚབ་བྱས་ནས་བཀའ་དྲིན་ཞུ་བའི་གཏམ་བཤད་དང་། མ་འོངས་རེ་བ་དང་འབྲེལ་བའི་སྨོན་འདུན་ཞུས། གཏམ་བཤད་སྣ་ཚོགས་ཀྱི་རྗེས་སུ་ཀན་ལྷོ་ཁུལ་བོད་ཀྱི་ཡིག་མཁན་མཐུན་ཚོགས་དང་། ནང་བསྟན་སློབ་གྲྭ ཀླུ་ཆུ་རྫོང་མཛེས་རྩལ་དང་ཡིག་མཁན་མཐུན་ཚོགས་སོགས་ཀྱི་འཐུས་ཚབ་ཡིག་མཁན་གྱིས་དྲན་གསོ་ཁང་ལ་ལེགས་སྐྱེས་ཕུལ།
ཁོང་གི་མཛད་རྗེས་ཐོར་བུ་མཚོན་པའི་རིག་དངོས།
ཁོང་གིས་ལས་གྲོགས་ཡོན་ཏན་ལྷུན་གྲུབ་ལགས་ཀྱི་གཉེན་སྟོན་ལ་ཕུལ་པའི་བོད་ལུགས་གཉེན་སྟོན་བཀྲ་ཤིས་མདུད་པ་མཚོན་པའི་ཡིག་ཕུད་དང་རི་མོ་ཟུང་སྦྲེལ་མ།
མཇུག་མཐར་ཁུལ་དང་རྫོང་གི་མགོ་ཁྲིད་སྐུ་ཚབ་པས་རྗེས་དྲན་ཁང་གི་སྒོ་འབྱེད་ཆོ་ག་སྤེལ་པ་དང་། ལས་འཛིན་མི་སྣས་སྐུ་མགྲོན་རྣམས་ལ་བོད་ཀྱི་ཡིག་གཟུགས་མཁས་དབང་༧ སྨོན་ལམ་རྒྱ་མཚོའི་དྲན་གསོ་ཁང་གི་མཛད་རྣམ་བཤམས་སྟོན་ཁང་། ཡིག་གཟུགས་བཤམས་སྟོན་ཁང་། ཡིག་གཟུགས་ཤུལ་བཞག་རིག་གནས་རོལ་མྱོང་ཁང་། ཡུལ་སྲོལ་རིག་དངོས་བཤམས་སྟོན་ཁང་སོགས་རེ་རེ་བཞིན་མཚམས་སྦྱོར་ཡིད་ཚིམ་པར་མཛད།
ཁོང་གི་མཛད་རྗེས་ཐོར་བུ་མཚོན་པའི་རིག་དངོས།
ཆུ་ཚོད་བཅུ་གཉིས་སྟེང་ཆེད་དུ་མཛད་སྒོར་ཕེབས་པའི་ཤེས་ཡོན་པའི་སྡེ་དང་མགོ་ཁྲིད་པའི་སྡེ། ཐག་ཉེ་རིང་གི་སྐུ་མགྲོན་གྱི་སྡེ་དང་བཅས་ཚང་མ་མཉམ་འཛོམས་སྒོས་བོད་རང་གི་སྲོལ་རྒྱུན་ལྡན་པའི་ཟས་རིགས་ཀྱི་གུང་གསོལ་མཉམ་བཞེས་གནང་ཞིང་། མི་རིགས་རིག་གནས་དང་། བོད་ཀྱི་ཡིག་གཟུགས། ཁོང་གི་སྐུ་ཚེ་ཧྲིལ་བོའི་མཛད་རྣམ་སོགས་ཀྱི་ཆ་ནས་གཏམ་གླེང་སྣ་ཚོགས་བྱས།
བྲིས་རྩལ་ངོམ་པའི་ཡུལ་དངོས།
གསོལ་ཚིགས་ཀྱི་རྗེས་སུ་བྲིས་པ་ཚོས་ཡུལ་དངོས་ནས་ཡིག་གཟུགས་ཀྱི་འཁྱུག་རྩལ་ངོམ་པ་དང་། ཡུལ་མི་རྒན་དར་གཞོན་གསུམ་ཚོས་ཡིག་གཟུགས་ཀྱི་འཚོ་བཅུད་མངར་མོའི་ཁོར་ཡུག་ཁྲོད་རིག་གནས་ཀྱི་འཚོ་བ་གསར་བའི་ལོངས་སྤྱོད་རྫོགས་པའི་དགའ་བདེའི་དཔལ་ལ་རོལ་ལོ།།
བྲིས་རྩལ་ངོམ་པའི་ཡུལ་དངོས།
གུང་གསོལ་རྣམ་པ།
མཇུག་མཐར་ཀན་ལྷོའི་བྲིས་པའི་སྐུ་ཚབ་སྐོར་ཞིག་ཁོང་གི་ཕ་གཞིས་སུ་ཕེབས་ནས་མཇལ་དར་འབུལ་ཞིང་
ཁོང་གི་ཉེ་འབྲེལ་དང་མཉམ་པར་སྒྲོན་ནས་བོད་ཀྱི་ཡིག་གཟུགས་ཡུན་ནས་དར་པའི་སྨོན་ལམ་ཞུས།
གསར་འགོད་པ་འཇམ་དཔལ་ཚེ་ལོ། རྩོམ་སྒྲིག་པ་ཧེ་རམ་པ།
|
|
