༄༅། །མཚོ་སྔོན་དགེ་འོས་སློབ་ཆེན་གྱི་སླའོ་ཡིག་གཟུགས་ཚོགས་པས་ཡིག་གཟུགས་འགྲེམ་སྟོན་གྱི་བྱེད་སྒོ་སྤེལ་བ།
སྤྱི་ལོ་ཉིས་སྟོང་བཅོ་བརྒྱད་ལོའི་ཧོར་ཟླ་བཞི་པ་ཚེས་ཏེ་ལྷ་བྱ་ཁུ་བྱུག་གི་སྐད་སྙན་ལྷང་ལྷང་གྲག་པའི་དུས་བཟང་ལ། མཚོ་སྔོན་དགེ་འོས་སློབ་ཆེན་གྱི་སླའོ་ཡིག་གཟུགས་མཐུན་ཚོགས་དང་གཡུ་ཁྲི་འབར་བོད་རྒྱ་ཡིག་རིས་སྒྱུ་རྩལ་དང་སྙོམས་ངོས་ཇུས་འགོད་ཚད་འགན་ལེན་སྤྱི་གཉེར་ཁང་གིས་སློབ་གླིང་གི་འགོ་ཁྲིད་དང་སློབ་མའི་ལས་དོན་ཁྲུའུ་ཡིས་རྒྱབ་སྐྱོར་དང་མཛུབ་སྟོན་འོག སློབ་གྲྭ་ཡོངས་ལ་ཁ་ཕྱོགས་ཏེ་བོད་ཡིག་ཡིག་གཟུགས་བརྩམས་ཆོས་འགྲེམ་སྟོན་གྱི་བྱེད་སྒོ་སྤེལ།
བྱེད་སྒོ་འདི་ནི་གཅིག་ནས་ད་ལོའི་མཐར་ཕྱིན་སློབ་གྲོགས་ཚོར་བཀྲ་ཤིས་བདེ་ལེགས་དང་བགྱི་བ་ལམ་ལྷོངས་འོང་བའི་སྨོན་འདུན་གྱི་ལེགས་སྐྱེས་སུ་ཕུལ་བ་དང་། གཉིས་ནས་ཚོགས་པའི་ཁོངས་མི་གཙོ་བྱས་ཏེ་བོད་ཀྱི་ཡིག་གཟུགས་སྒྱུ་རྩལ་ལ་དགའ་མོས་དུང་ཞེན་ཡོད་པའི་སློབ་གྲོགས་ཚོའི་སྦྱངས་འབྲས་ཀྱི་སྙན་ཞུའི་ཚུལ་དུ་ཕུལ་བའི་བྱེད་སྒོ་ཞིག་ཡིན་ནོ། །
ཐེངས་འདིའི་གཟུགས་འགྲེམ་སྟོན་དེ་སློབ་གྲྭའི་སློབ་ཆེན་པའི་བྱ་འགུལ་ལྟེ་གནས་སུ་སྤེལ་ཞིང་། བོད་ཡིག་ཡིག་གཟུགས་བརྩམས་ཆོས་བརྒྱ་ལྷག་དང་རྒྱ་ཡིག་ཡིག་གཟུགས་བརྩམས་ཆོས་རེ་འགའ་བཅས་ཚུད་ཡོད། དེ་དག་ཕལ་ཆེ་བ་ནི་གནའ་དེང་ཟུང་འབྲེལ་གྱི་ཐབས་ལམ་སྣ་ཚོགས་ལ་བརྟེན་ནས་གསར་རྩོམ་དང་རྒྱན་སྤྲས་བྱས་ཡོད་པས། དེང་རབས་ཀྱི་ཁྱད་ཆོས་ཀྱི་ཟུར་ནས་བོད་ཡིག་ཡིག་གཟུགས་སྒྱུ་རྩལ་རྒྱུན་འཛིན་དར་སྤེལ་གྱི་དངོས་ཡོད་གནས་བབ་ཅིག་མཚོན་ཡོད། གཞན་ད་དུང་བོད་ཡིག་ཡིག་གཟུགས་སྒྱུ་རྩལ་གྱི་འཕེལ་ཕྱོགས་གསར་པ་ཞིག་ཀྱང་བསྟན་ཡོད་པའི་སྣང་བ་སྟེར།
འགྲེམ་སྟོན་གྱི་སྐབས་སུམ་སློབ་གྲྭའི་སློབ་གཙོ་གཞོན་པའམ་མི་རིགས་དགེ་འོས་སློབ་གླིང་གི་གླིང་གཙོ། དགེ་རྒན་ཆེན་མོ་རྒྱ་ཡེ་བཀྲ་བྷོ་ལགས་དང་། གླིང་གཙོ་གཞོན་པ། དགེ་རྒན་ཆེན་མོ་ལྕགས་ཐར་རྒྱལ་ལགས་དང་བོད་ཡིག་སྡེ་ཁག་གི་ཀྲུའུ་རིན་ནམ་དགེ་རྒན་ཆེན་མོ་སྟོབས་ལྡན་ལགས། སློབ་མའི་ལས་དོན་ཁྲུའུ་ཡི་འགོ་ཁྲིད་རྒྱ་མཚོ་སོགས་གཙོ་བྱས་པའི་དགེ་སློབ་མང་པོ་ཡུལ་དངོས་སུ་ཕེབས་ཏེ་སློབ་མ་ཚོའི་ཡིག་གཟུགས་བརྩམས་ཆོས་ལ་རོལ་མྱོང་བྱས། རྒན་རྒྱ་ཡེ་བཀྲ་བྷོ་ལགས་ཀྱིས་སློབ་གྲོགས་རྣམས་ཀྱི་ཡིག་གཟུགས་འབྲི་སྦྱོང་གི་གྲུབ་འབྲས་ལ་གདེང་འཇོག་ཚད་མཐོན་པོ་གནང་བ་མ་ཟད། བྱེ་བྲག་གི་རེ་བ་དང་བླང་བྱ་གལ་གནད་ཆེའང་བཏོན་གནང་མཛད། ཆེད་ལས་ཀྱི་དགེ་རྒན་བོད་ཀྱི་བྲིས་པ་ཆེན་མོ་དོན་གྲུབ་ཚེ་རིང་ལགས་ཀྱིས་ཡུལ་དངོས་ཀྱི་སློབ་གྲོགས་རྣམས་དང་། སླའོ་ཡིག་གཟུགས་མཐུན་ཚོགས་ཀྱི་ཚོགས་མི་དག་ལ་བརྩམས་ཆོས་སྤྱིའི་བཀོད་པ་དང་། བྲིས་ཀྱི་བྱེ་བྲག་གི་གནད་དོན་ཐམ་ག་རྒྱག་སྟངས། མིང་འབྲི་སྟངས། ཟླ་ཚེས་འགོད་ལུགས་སོགས་ཀྱི་ཕྱོགས་ནས་མཛུབ་སྟོན་གནང་བ་སོགས་ལས། རང་རེའི་བཤད་རྒྱུན་ལ་ཆུ་མགོ་གངས་དང་ཆོས་མགོ་དབུས་ཟེར་བ་ཇི་བཞིན། བོད་ཀྱི་ཡིག་གཟུགས་སྒྱུ་རྩལ་ནི་ཁུངས་བཙུན་ཞིང་ལོ་རྒྱུས་ཀྱི་རྒྱུན་རིང་བ། རིགས་དང་རྣམ་གྲངས་མང་བ། གཞུང་ལུགས་ཀྱི་རྒྱབ་རྟེན་བཙན་པ་ཞིག་ཡིན་པས་སྔོན་གྱི་ཕྱག་སྲོལ་དང་རང་རང་གི་ལག་ལེན་གཉིས་ཡ་མ་བྲལ་བར་སྦྱོང་བ་ཡུན་རིང་བྱ་རྒྱུ་དང་། ཁྲིད་རྒྱུན་ཡང་དག་པའི་རྨང་གཞིའི་སྟེང་ནས། དུས་སྐབས་གསར་པའི་ཉེར་སྤྱད་སྣ་ཚོགས་དང་། མི་རིགས་གཞན་པའི་ཡིག་གཟུགས་སྒྱུ་རྩལ་གྱི་སྤྱི་ཁོག་འབུབས་ཚུལ། རྒྱན་སྤྲས་བྱེད་སྟངས་ལ་སོགས་ལེགས་པའི་ཆར་ངོས་འཛིན་བྱས་ཆོག་པ་ཅི་ཡོད་ལ་སློབ་སྦྱོང་དང་ནང་འདྲེན་འོས་འཚམ་བྱས་ནས་ཡིག་གཟུགས་བྱ་གཞག་གི་འཕེལ་རྒྱས་ལ་བརྩོན་པ་བསྐྱེད་དགོས་པར་སྐུལ་ལྕག་གནང་བཞིན་པའི་དོན་དེ་རྟོགས་ཐུབ།
ཉིན་དེའི་ཕྱི་དྲོའི་ཆུ་ཚོད་དྲུག་ཙམ་གྱི་སྟེང་། གཙོ་སྒྲུབ་བྱེད་མཁན་གྱིས་སླའོ་ཡིག་གཟུགས་མཐུན་ཚོགས་ཀྱི་ཚོགས་མི་རྒན་པ་རྣམས་ལ་དྲན་རྟེན་གྱི་དཔང་ཡིག་དང་དྲི་མེད་ཁ་བཏགས་དཀར་པོའི་རྫོངས་རྟེན་ཕུལ་ཏེ་ཐེངས་འདིའི་ཡིག་གཟུགས་བརྩམས་ཆོས་ཀྱི་འགྲེམ་སྟོན་བདེ་བླག་ངང་མཇུག་བསྡུས་སོ། །
གསར་འགོད་པ། སྐལ་བཟང་འབུམ་གྱིས།
|
|
