མགོ་ལོག་ཁུལ་རྭ་རྒྱ་གྲོང་རྡལ་བཅའ་སྡོད་སློབ་གྲྭ་གཉིས་པས་བོད་ཀྱི་ཡིག་གཟུགས་ཁྲིད་སྦྱོང་གི་ལས་དོན་ལ་མཐོང་ཆེན་བྱས་པ།
མགོ་ལོག་ཁུལ་རྭ་རྒྱ་གྲོང་རྡལ་བཅའ་སྡོད་སློབ་གྲྭ་གཉིས་པའི་དགེ་རྒན་ཡོངས་ཀྱིས་ཡུན་རིང་གི་སློབ་ཁྲིད་ཉམས་མྱོང་དང་བགྲོ་གླེང་མང་པོ་བྱས་མཐར་བོད་ཀྱི་རིག་གནས་ལ་ཆེས་ཐོག་མར་འཇུག་སྐབས་འབྲི་ཀློག་གཉིས་ནི་ཆེས་གཞི་མ་ཡིན་པའི་ངོས་ཟིན་འཐོབ་སྟེ། དགེ་སློབ་ཡོངས་ཀྱི་ཡིག་གཟུགས་ཀྱི་བྱང་ཚད་ཇེ་མཐོར་གཏོང་བར་ཁ་ཚ་དགོས་གཏུག་དུ་གྱུར་བའི་གནད་དོན་ལ་གཞིགས་ནས་སློབ་གྲྭས་ཡིག་མཁན་རིག་སྨོན་བསམ་གཏན་ལགས་ཆེད་དུ་གདན་ཞུ་མཐར། ཟླ༤པའི་ཚེས༢༩ཉིན་ཡིག་མཁན་རིག་སྨོན་བསམ་གཏན་ལགས་ཀྱིས་སྐུ་ངལ་ལ་མ་འཛེམ་པར་དགེ་སློབ་ཡོངས་ལ་བོད་ཀྱི་ཐུན་མོང་མ་ཡིན་པའི་བྲིས་རྒྱུན་མང་པོ་འཁྱེར་ནས་ངེད་སློབ་གྲྭར་སློབ་ཁྲིད་བྱེད་དུ་ཕེབས།
བོད་ཀྱི་ཡིག་གཟུགས་སྒྱུ་རྩལ་ལ་དུང་བའི་དགེ་སློབ་རྣམས་ལ་བོད་ཡིག་གི་བྲིས་རྒྱུན་ལས་གཙང་བྲིས་དང་དབུས་བྲིས། འཁྱུག་བྲིས། སྨོན་ལམ་ཡིག་གཟུགས། སྨྱུག་རིལ་སོགས་ཡིག་རྒྱུན་ཁུངས་ཐུབ་འགའ་ཤོས་དགོང་སྔ་ཕྱི་དང་གུང་གསེང་གི་དུས་ཚོད་སོགས་བེད་སྤྱད་དེ་ཉིན་བཅོ་ལྔ་ལ་སློབ་ཁྲིད་བྱས།
དེའི་ཁྲོད་དུ་ལོ་རིམ་གསུམ་པ་དང་བཞི་པ། དགེ་རྒན་རྣམས་ལ་གཙང་བྲིས་དང་སྨོན་ལམ་ཡིག་གཟུགས། དབུས་བྲིས་འཁྱུག་ཡིག་བཅས་ཁྲིད་ཅིང་། ལོ་རིམ་དང་བོ་དང་གཉིས་པར་སྨྱུག་རིལ་ཁྲིད་པ་མ་ཟད། དགེ་སློབ་གཉིས་ལ་བོད་ཀྱི་ཡིག་ཆས་གལ་ཆེན་སྦྱང་ཤིང་བཀོལ་སྟངས། གདབ་རྐྱལ་དང་ཐིག་རྐྱལ། སྨྱུག་ཁ་གཅོད་ལུགས། ཐིག་རྒྱག་ཚུལ། སྨྱུ་གུ་འཛིན་སྟངས། སྨྱུག་འགྲོས་སྨྱུག་ལམ་འཐེན་པ་སོགས་ཕྱག་རྒྱན་དང་ཁྲིད་རྒྱུན་ཇི་བཞིན་རྡོ་ལག་རྒྱུན་གྱི་ཚུལ་དུ་དཔེ་ཁྲིད་གནང་བ་རེད།
|
|
