འདི་ལོའི་སྤྱི་ཟླ་བཞི་པའི་ཚེས་སུམ་ཅུ་ཉིན་བོད་ལྗོངས་ནག་ཆུ་སོག་རྫོང་སློབ་འབྲིང་གིས་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་ལ་བསུ་བ་ཞུ་ཕྱིར་དུ།
སྔར་ཡོད་ཀྱི་ཡིག་གཟུགས་འགྲན་བསྡུར་ཐོག་ཏུ་ཡིག་གཟུགས་བརྩམས་ཆོས་འགྲེམ་སྟོན་དང་སུག་འབྲི་དཔེ་སྟོན་གྱི་མཛད་སྒོ་གཟབ་རྒྱས་ཤིག་སྤེལ་ཡོད་པ་རེད།
དེ་ཡང་སྔོན་ཚུད་ནས་ས་གནས་དེ་གའི་དགེ་སློབ་ཀྱི་ཕུལ་བྱུང་ཡིག་གཟུགས་བརྩམས་ཆོས་མི་ཉུང་བ་ཞིག་མཁོ་བསྡུ་བྱས་རྗེས་སློབ་མའི་ཡིག་གཟུགས་ཀྱི་མོས་པ་བསྐྱེད་སྲིང་བྱ་ཕྱིར་ཞིབ་ཚགས་དང་ནན་ཏན་ངང་ཡིག་གཟུགས་ཐང་ག་སྤུས་དག་ཏུ་བཟོས་ཤིང་།
ཟླ་བ་བཞི་པའི་ཚེས་སུམ་ཅུ་ཉིན་ནས་ལྔ་པའི་ཚེས་གཉིས་བར་གྱི་ཉི་མ་གསུམ་རིང་སློབ་གྲྭའི་ཚོམས་ཆེན་དུ་འགྲེམ་སྟོན་དང་གཟིགས་སྐོར་གྱི་བྱེད་སྒོ་སྤེལ་བ་རེད།
དེ་ཡང་། ཉིན་དང་པོར་དགེ་སློབ་ཡོངས་སུ་རྫོགས་པས་རང་རང་གི་དགའ་མོས་ལྟར་ཕུལ་བྱུང་བརྩམས་ཆོས་དག་ལ་མྱོང་རོལ་བྱས་པ་དང་སྦྲགས།
ཕུལ་བྱུང་གི་སུག་འབྲི་རྣམས་ཀྱིས་གནས་ཡུལ་དངོས་སུ་ཡིག་གཟུགས་འབྲི་སྟོན་མཛད་ནས་སློབ་མ་ཚོར་དཔེ་སྟོན་ལེགས་པོ་མཛད་པ་དང་།
ཉིན་གཉིས་པ་དང་གསུམ་པར་རྫོང་དེ་གའི་ཞིང་འབྲོག་མང་ཚོགས་དང་སྤྱི་ཚོགས་ལས་རིགས་གཞན་གྱི་ཡིག་གཟུགས་ལ་དགའ་མོས་ཡོད་མཁན་དག་ལ་གཟིགས་སྐོར་དང་མྱོང་རོལ་གྱི་གོ་སྐབས་བསྐྲུན་ཡོད་པ་རེད།
སྤྱིར་སློབ་གྲྭ་དེ་གར་ལོ་ལྟར་དགེ་སློབ་ཀྱི་ཡིག་གཟུགས་འགྲན་བསྡུར་ཆེན་མོ་ཐེངས་རེ་རྒྱུན་མ་ཆད་པར་སྤེལ་གྱིན་ཡོད་ཀྱང་། འདི་ལོར་དམིགས་བསལ་གྱིས་ཡིག་གཟུགས་འགྲེམ་སྟོན་དང་སུག་འབྲི་དཔེ་སྟོན་གྱི་མཛད་སྒོ་གྲ་རྒྱས་པོ་ཞིག་བཀོད་སྒྲིག་བྱས་ཡོད་པ་རེད།
དགེ་རྒན་རྣམས་ཀྱིས་མིང་རྟགས་འགོད་བཞིན་པ།
སློབ་མ་རྣམས་ཀྱིས་མིང་རྟགས་འགོད་བཞིན་པ།
དགེ་རྒན་དག་གིས་དཔེ་སྟོན་གྱིས་འབྲི་བཞིན་པ།
སློབ་མས་དཔེ་སྟོན་གྱིས་འབྲིི་བཞིན་པ།
སློབ་མ་དག་གིས་འགྲེམ་སྟོན་བརྩམས་ཆོས་ལ་ལྟ་བཞིན་པ།
རི་མོའི་དགེ་རྒན་གྱིས་ཡུལ་དངོས་སུ་རི་མོ་འབྲི་བཞིན་པ།
ཡུལ་དངོས་སུ་བྲིས་པའི་རི་མོའི་བརྩམས་ཆོས།
བྱེད་སྒོའི་གཙོ་འགན་འཁུར་མཁན།
སོག་རྫོང་སློབ་འབྲིང་གི༼ ཅོང་བརྡ ༽ རྩོམ་སྒྲིག་ཁང་ནས།
|
|
