སྐྱེ་དགུ་རྡོ་བྲིས་སྒྱུ་རྩལ་སྤྱི་གཉེར་ཁང་གིས་ཐེན་ཅན་ནས་བོད་ཀྱི་ཡིག་གཟུགས་དུས་ཆེན་བསུས་བའི་རྣམ་པ།
བོད་ཀྱི་ཕུན་སུམ་ཚོགས་པའི་ཡིག་གཟུགས་སྒྱུ་རྩལ་འདི་ཉིད་མི་ཉམས་གོང་འཕེལ་དང་ཉམས་པ་སོར་ཆུད་སོགས་ལ་ཐུགས་ཁུར་བླ་ན་མེད་པ་གནང་མཁན་གྱི་སྐྱ་སེར་ཡོངས་ལ་སྙིང་ཁོང་རུས་པའི་གཏིང་ནས་བཀའ་དྲིན་ཆེ་ཞུ།
སྤྱིར་བཏང་ཡིག་གཟུགས་མཐུན་ཚོགས་འཛུགས་རྒྱུ་དང་། ཡིག་གཟུགས་དུས་ཆེན་བསུ་རྒྱུ་ལ་སོགས་ནི་བྱ་བ་གཞན་དང་མི་འདྲ་བར། རིག་གནས་དང་། སྒྱུ་རྩལ་གྱི་ལས་དོན་རྒྱུན་འཛིན་དང་གོང་འཕེལ་གཏོང་བའི་ལས་ཀ་དོན་སྙིང་དང་ལྡན་པ་ཞིག་ཡིན་པ་སྨོས་ཅི་དགོས། བོད་ཀྱི་ཡིག་གཟུགས་སྒྱུ་རྩལ་ནི་ལོ་ངོ་སྟོང་ཕྲག་ལྷག་གི་རིང་ལ་མེས་པོ་གོང་མ་རྣམས་ཀྱིས་ང་ཚོར་བཞག་པའི་ཤེས་རབ་ཀྱི་ཉིང་བཅུད་དང་། ང་ཚོ་མཐུན་མོང་ལ་དབང་བའི་ནོར་བུ་རེད། ཡིན་ན་ཡང་དེ་རིང་ཁ་སང་བོད་ཡིག་འདི་ཡང་ཡིག་རིགས་གཞན་དག་ལྟར་རྩིས་འཕྲུལ་དང་ཁ་པར་སོགས་འཕྲུལ་ཆས་རིགས་ཀྱི་ནང་དུ་བེད་སྤྱོད་བྱེད་ཐུབ་པར་གྱུར་ནས་སྟབས་ཇེ་བདེར་སོང་བ་དང་མཉམ་དུ། བོད་ཡིག་འབྲི་ཤེས་མཁན་དང་འབྲི་མཁན་ཇེ་ཉུང་དུ་འགྱུར་བཞིན་ཡོད་ལ། བོད་ཀྱི་ཡིག་གཟུགས་འབྲི་བའི་སྒྱུ་རྩལ་འདི་ཉམས་བཞིན་ཡོད། རྒྱུ་མཚན་དེའི་ཕྱིར་ཡིག་གཟུགས་ཀྱི་འགྲན་ཚོགས་བསྡུ་བ་དང་ཡིག་གཟུགས་ཀྱི་དུས་ཆེན་སོགས་རྩ་འཛུགས་བྱེད་རྒྱུ་དེ་ནི། མཁོ་ཐོག་གི་ལྷན་པོ་དང་། དུས་ཐོག་གི་ཆར་པ་རེད་སྙམ་ཡོད། དེ་དང་བསྟུན་ཕྱོགས་སོ་སོའི་ལས་ཁུངས་སམ་མི་སྒེར་སོགས་ཀྱིས་བོད་ཀྱི་ཡིག་གཟུགས་དུས་ཆེན་བསུས་དང་བསུ་བཞིན་པ་ལ། འདིར་ངེད་སྐྱེ་དགུའི་རྡོ་བྲིས་སྒྱུ་རྩལ་ཁང་གིས་ཀྱང་ཁྱེད་རྣམ་པའི་ཡ་རབས་ཀྱི་བྱ་བར་ཡི་རང་ཞུ་བ་དང་། རང་ནུས་གང་ཐོན་གྱིས་རྒྱབ་སྐྱོར་གྱི་ཚུལ་དུ། ཐེན་ཅན་ནས་བོད་ཀྱི་ཡིག་གཟུགས་དུས་ཆེན་བསུས་པ་དང་། བོད་ཀྱི་ཡིག་གཟུགས་སྒྱུ་རྩལ་འདི་ཉིད་ཇི་སྲིད་བསྐལ་པའི་བར་དུ་ཉམས་པ་མེད་པའི་སྨོན་འདུན་ཞུ་བ་ཡིན། བཀྲ་ཤིས་བདེ་ལེགས།
|
|
