པ་སྣམ་རྫོང་དཔའ་རྩལ་ཤང་སློབ་ཆུང་གིས་བོད་ཀྱི་ཡིག་གཟུགས་དུས་ཆེན་ལ་རྟེན་འབྲེལ་ཞུས་བ།
ཧྲུའུ་ཅི་ཞི་ཅིན་ཕིང་གིས་གྲངས་ཉུང་མི་རིགས་ཀྱི་སྐད་ཡིག་རིག་གནས་སྐོར་ལ་གནང་བའི་གསུང་བཤད་གནད་བསྡུས་དང་། ལྗོངས་སློབ་གསོ་ཐིང་གི《དགེ་རྒན་གྱི་སློབ་ཁྲིད་ནུས་རྩལ་གྱི་ཁྱབ་རྒྱ་ཆེ་བའི་ཞུན་བརྡར》ཡིག་ཆའི་དགོངས་དོན་ལག་སྟར་དོན་འཁྱོལ་ཡོང་ཆེད་དང་རྒྱལ་ཡོངས་བོད་ཀྱི་སྐབས་གཉིས་པའི་ཡིག་གཟུགས་དུས་ཆེན་ལ་རྟེན་འབྲེལ་ཞུ་བའི་དགའ་སྟོན་གྱི་མཛད་སྒོ་དེ་ཟླ་༤ཚེས་༣༠ཉིན་དགེ་སློབ་ཐུན་མོང་གི་འབད་བརྩོན་འོག་དཔའ་རྩལ་ཤང་སློབ་ཆུང་གི་ལུས་རྩལ་ཐང་དུ་རྒྱལ་ཁའི་ངང་སྤེལ་བ་རེད།
བྱེད་སྒོ་མགོ་འཛུགས་པའི་རིམ་པ།
ད་ཐེངས་ཀྱི་བྱེད་སྒོ་འདིའི་དམིགས་ཡུལ་ནི། རང་ཅག་གི་འོད་སྟོང་འབར་བའི་སྲོལ་རྒྱུན་རིག་གནས་ཉམས་པ་སླར་གསོ་དང་མི་ཉམས་རྒྱུན་འཛིན་ཡོང་སླད་དང་། བོད་ཀྱི་སྐབས་གཉིས་པའི་ཡིག་གཟུགས་དུས་ཆེན་ལ་རྟེན་འབྲེལ་ཞུ་བ། ཕྱི་རབས་སློབ་མ་རྣམས་པས་བོད་མི་རིགས་ཀྱི་སྐད་དང་ཡི་གེར་དགའ་ཞེན་གྱི་བསམ་པ་སྐྱེད་སྲིང་བྱེད་དམ། རང་སློབ་གྲྭའི་ལོ་མང་རིང་བོད་ཡིག་སྦྱོང་སྤྱོད་སྤེལ་གསུམ་གྱི་གོམས་གཤིས་བཟང་པོ་རྒྱུན་མཐུད་དར་སྤེལ་གཏོང་བ། སྒོས་སུ་རང་སློབ་གྲྭའི་རིག་གནས་འཚོ་བ་དེ་བས་ཕུན་སུམ་ཚོགས་པ་ཡོང་བ། བོད་ཀྱི་ཡིག་གཟུགས་ཉིན་མོ་འདི་ཉིད་དགེ་སློབ་ཁྲོད་ཁྱབ་གདལ་དང་རྒྱུས་མངའ་ཡོང་ཕྱིར་དམིགས་པ་ཡིན།
རྒན་ཕུལ་བུ་ཚེ་རིང་ལགས་ཀྱིས་ཡིག་གཟུགས་ཀྱི་གནས་བབས་དང་ཚོགས་རྟགས་སོགས་ཀྱི་སྐོར་གནས་གསུང་བཤད་གནང་པའི་རིམ་པ།
ད་རེས་ཀྱི་བྱེད་སྒོའི་མཛད་རིམ་ཁག་ཁ་གསལ་ཞིང་ལས་དོན་བཀོད་སྒྲིག་འཐུས་སྒོ་ཚང་བ་ཞིག་བྱུང་ཡོད། སློབ་གྲྭའི་སློབ་སྟོན་ཁྲུའུ་འགན་འཛིན་པ་རྒན་ཕུར་བུ་ཚེ་རིང་ནས་ཐེངས་འདིའི་བྱེད་སྒོའི་གཙོ་སྐྱོང་གནང་བ་དང་། སློབ་སྤྱི་ཆུང་ཐག་གིས་བྱེད་སྒོའི་དབུ་འཛུགས་གཏམ་བཤད་གནང་མུར་སློབ་སྟོན་ཁྲུའུ་རྒན་ཕུར་བུ་ཚེ་རིང་གིས་བོད་ཀྱི་ཡིག་གཟུགས་ཀྱི་གལ་ཆེའི་རང་བཞིན་དང་། དུས་ཆེནསྐོར། ཚོགས་རྟགས་ཀྱི་མཚོན་དོན་ངོ་སྤྲོད། བོད་ཀྱི་ཡིག་གཟུགས་ཀྱི་དབྱེ་བ་དང་གལ་ཆེའི་གནས་བབས་བཅས་ཀྱི་སྐོར་ལ་གཏམ་བཤད་གནང་བ། དེ་རྗེས་ལས་འཁྱུར་ཞུས་ཟིན་པའི་གདན་ཞུའི་སྐུ་མགྲོན་གསུམ་ནས་ཡུན་རིང་སློབ་གསོའི་ལས་གནས་ཐོག་ཕྱག་གནས་གནང་བའི་ཕུན་སུམ་ཚོགས་པའི་སློབ་ཁྲིད་མྱོང་བ་མཉམ་སྤྱོད་དང་། བོད་ཀྱི་ཡིག་གཟུགས་སྐོར་དང་འབྲེལ་བའི་རིན་བྲལ་གྱི་གཏམ་བཤད་གནངསོང་བ་རེད།
བྱེད་སྒོ་མགོ་རྩོམ་པ་དང་མགོ་་ཁྲིད་དང་ཡིག་མཁན་གྱིས་གསུང་གླེང་གནང་པའི་རིམ་པ།
གཞན་ཡང་ལོ་རིམ་དྲུག་པའི་སློབ་མས་སློབ་དཔོན་ཐོན་མིའི་བཀའ་དྲིན་རྗེས་དྲན་གྱིས་ཐོན་མིར་བསྔགས་པའི་སྙན་ངག་གྱེར་འདོན་གནང་བས་དགེ་སློབ་ཚང་ མའི་བསྔགས་བརྗོད་ཐོབ་ཡོད། དེའི་མུར་གདན་ཞུའི་སྐུ་མགྲོན་གསུམ་དང་རང་སློབ་གྲྭའི་རྒན་ལགས་རྣམ་པས་སློབ་མར་དཔེ་སྟོན་ཚུལ་དུ་ཡུལ་དངོས་སུ་སོར་མོའི་ འདུ་བྱེད་ཀྱི་རྩལ་ངོམས་ཏེ་དུས་ཆེན་གྱི་ཤིས་ཚིག་བསྒྲོན་པ་དང་། དེ་མ་ཐག་སློབ་ཕྲུགགི་འཐུས་མི་སུམ་ཅུ་ལྷག་གིས་རང་རང་གི་སོར་རྩལ་ལ་བརྟེན་ནས་ཡིག་གཟུགས་ཀྱི་སྒྱུ་རྩལ་ཤོག་བུའི་ལམ་དུ་ཕབ་ཏེ་ཡིག་གཟུགས་དུས་ཆེན་ལ་རྟེན་འབྲེལ་ཞུས་པ་རེད།
དགེ་སློབ་ཡོངས་ནས་ཡིག་གཟུགས་སྒྱུར་རྩལ་ལ་རོལ་མྱོང་བྱེད་པའི་རིམ་པ།
དེ་མིན་ད་ཐེངས་ཡིག་གཟུགས་དུས་ཆེན་ལ་རང་སློབ་གྲྭའི་དགེ་སློབ་ཀྱི་བརྩམ་བྱ༤༡དང་། ཁྱིམ་མཚེས་སློབ་གྲྭའི་སློབ་མའི་ཤོག་ཐང་བརྩམ་བྱ༡༠དང་རིང་ཚད་རྨིད༡༥༠བྱས་པའི་འཐུམ་སྒྲིལ་བརྩམ་བྱ་རིང་གྲས་ཤིག ལྗོངས་ཡོངས་སུ་མིང་གྲགས་ཡོད་པའི་ཡིག་མཁན་གྱི་ཕུལ་བྱུང་བརྩམ་བྱ༤༢བཅས་ཁྱོན་ཡིག་གཟུགས་འདྲ་མིན་སྣ་ཚོགས་ཀྱི་བརྩམ་བྱ༩༤འགྲེམ་སྟོན་ལ་ཞུགས་ནས་མྱོང་རོལ་དུ་བྱས་ཡོད།
བྲིས་པ་རྒན་པ་དང་ཡིག་མཁན་དགེ་རྒན་རྣམ་པས་ཡུལ་དངོས་ཕྱག་རྩོམ་སྤེལ་བའི་རིམ་པ།
དེ་རྗེས་སློབ་སྤྱི་སྐུ་གཞོན་ཕུར་ནོར་དང་། ནོར་ཚེ། སློབ་སྟོན་ཁྲུའུ་འགན་འཛིན་པ་སྐུ་གཞོན་ཟླ་ཕན། བོད་སྐད་ཡིག་སློབ་དཔྱོད་ཁང་གི་ཁོངས་མི་བཅས་ཀྱིས་ཚ་ཚ་འུར་འུས་འགྲེམ་སྟོན་ཐོག་བྱ་དགའ་ཐོབ་པའི་དགེ་སློབ་ལ་བྱ་དགའ་གནང་བ་མ་ཟད་དཀར་གཙང་མཇལ་དར་བསྒྲོན་ནས་བཀྲ་ཤིས་རྟེན་འབྲེལ་མཚོན་པར་བྱས།
དགེ་སློབ་ལྷན་འཛོམས་ཀྱིས་ཡུལ་དངོས་ནས་སུག་བྲིས་སྤེལ་པའི་རིམ་པ།
མཇུག་ཏུ། སློབ་སྟོན་ཁྲུའུ་རྒན་ཕུར་བུ་ཚེ་རིང་ནས་ཐེངས་འདིའི་བྱེད་སྒོའི་ལས་རིམ་ཁག་ལ་མཇུག་སྡོམ་གཏམ་བཤད་གནང་བ་མ་ཟད། དགེ་སློབ་ཚང་མས་བོད་ཀྱི་སྲོལ་རྒྱུན་སྒོར་གཞས་ཀྱི་བགྲོད་དང་བསྟུན་ནས་བྱེད་སྒོར་རྫོགས་རྟགས་བཀོད་གནང་བ་རེད།
དགེ་སློབ་ཕུལ་བྱུང་ཅན་ལ་བྱ་དགའ་གནང་པའི་རིམ་པ།
མདོར་ན། ཐེངས་འདིའི་བྱེད་སྒོ་བརྒྱུད་རང་སློབ་གྲྭའི་དགེ་སློབ་ཚང་མར་བོད་ཀྱི་ཡིག་གཟུགས་ལ་འཛིན་པའི་བསམ་པའི་འཁྱེར་སོ་གསར་པ་ཞིག་དང་། བློ་སྐྱེད་གསར་པ་ཞིག ཀུན་སློང་གསར་པ་ཞིག བག་ཆགས་གསར་པ་ཞིག སློབ་རའི་རིག་གནས་འཚོ་བ་གསར་པ་ཞིག་བཅས་བསྐྲུན་ཐུབ་པ་བྱུང་ཡོད།།
བྱེད་སྒོ་བཀྲ་ཤིས་བདེ་ལེགས་ངང་མཇུག་རྫོགས་པའི་རིམ་པ།
|
|
