དྲ་ཚིགས་གསར་འགོད་པར་འབྱོར་བའི་གནས་ཚུལ་ལྟར་ན། བོད་ཀྱི་ཡིག་གཟུགས་ཉིན་མོར་ཨ་མདོ་མཛོད་དགེ་རྫོང་པད་ཡུ་ཆ་ཚང་བཅའ་སྡོད་སློབ་གྲྭས་ཡང་དུས་ཆེན་ལ་རྟེན་འབྲེལ་ཞུ་བའི་མཛད་སྒོ་ཉི་ཟེར་གྱི་སྤྲོ་འཛུབ་དང་ཁ་བ་དཀར་པོའི་རྟེན་འབྲེལ་གྱི་ཁྲོད་ནས་རྒྱ་ཆེར་སྤེལ་བ་གཤམ་ལྟར།
བོད་ཀྱི་ཡིག་གཟུགས་བྱུང་འཕེལ་གྱི་བསྐོར་ལ་བཞད་པ་མི་མཐུན་པ་རེ་གཉིས་ཡོད་མོད། ཡིན་ཡང་། ད་ལྟ་ང་ཚོས་སྤྱོད་བཞིན་པའི་དབུ་ཅན་དང་དབུ་མེད་གཉིས་ཀྱིས་གྲུབ་པའི་ཡིག་རིས་སྒྱུ་རྩལ་འདི་ནི་བོད་བཙན་པོའི་རྒྱལ་རབས་ཀྱི་དུས་སྐབས་རྒྱལ་རབས་སུམ་ཅུ་སོ་གསུམ་པ་ཆོས་རྒྱལ་སྲོང་བཙན་སྒམ་པོའི་ཐུགས་བཞད་ལྟར་རྗེ་བཙུན་འཇམ་པའི་དབྱངས་ཀྱི་སྤྲུལ་བ་སློབ་དཔོན་ཐོན་མི་སམྦྷོཊས་རྒྱ་གར་ཡི་གེར་དཔེ་བླངས་ནས་དབྱངས་བཞི་དང་གསལ་བྱེད་སུམ་ཅུའི་བདག་ཉིད་ཅན་གྱི་ཡི་གེ་འདི་གཏན་ལ་ཕབས་པ་ནས་བཟུང་བོད་བསིལ་མོའི་ལྗོངས་ཀྱི་སྐྱེ་འགྲོ་ཡོངས་མ་རིག་རྨོངས་བའི་གནས་ལས་གྲོལ་ཞིང་དར་མ་འུ་དུམ་བཙན་གྱི་བར་དུ་གནས་པར་བཤད། ཕྱིས་སུ་བོད་ཀྱི་སྐད་དང་ཡི་གེ་ལ་ལོ་རྒྱུས་ཀྱི་གོད་ཆགས་ཅུང་ཙམ་ཞིག་བྱུང་མོད།བསྟན་པ་ཕྱི་དར་གྱི་སྐབས་སུ་ཁྱུང་བོ་གཡུ་ཁྲི་འབར་ཞེས་བྱ་བས་ལོ་ཙཱ་བ་ཆེན་མོ་སྐ་བ་དཔལ་བརྩེགས་ལུགས་ཀྱི་དབུ་ཆེན་ཡིག་གཟུགས་དཀྱིལ་འཁོར་གྱི་ཆ་ཚད་ལ་དཔེ་བླངས་ནས་ཆ་ཆེན་དང་ཆ་ཆུང་དུ་བགོས་པ་སོགས་ཐིག་དང་སྨྱུ་གུ་ཤོག་ཆག་འབྲི་ལུགས་སོགས་ཀྱི་བསྟན་བཅོས་བརྩམས་ཏེ། སློབ་མ་མང་བོ་བསྐྱངས། སྔོན་བྱོན་ཡིག་མཁན་རྣམས་ཀྱི་བཀའ་དྲིན་རྗེས་སུ་དྲན་ཕྱིར། མཛོད་དགེ་རྫོང་པད་ཡུ་ཆ་ཚང་བཅའ་སྡོད་སློབ་ཆུང་ནས་ཆེད་ཞུའི་ཡིག་གཟུགས་དགེ་རྒན་བདུན་དང་དགེ་སློབ་ལྔ་བརྒྱ་ལྷག་གིས་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་སྐབས་གཉིས་པ་བསུས།
|
|
