བྲག་དཀར་རྫོང་མི་རིགས་སློབ་འབྲིང་གཉིས་པས་བོད་ཀྱི་ཡིག་གཟུགས་དུས་ཆེན་སྐབས་གཉིས་པ་བསུ་བའི་བྱེད་སྒོ་སྤེལ།
ཟླ༤བའི་ཚེས་༣༠ཉིན་གྱི་ཕྱི་དྲོར། མཚོ་སྔོན་ཞིང་ཆེན་བྲག་དཀར་རྫོང་མི་རིགས་སློབ་འབྲིང་གཉིས་པའི་ཡིག་གཟུགས་མཐུན་ཚོགས་ཀྱི་དགེ་རྒན་རྣམ་པའི་དབུ་ཁྲིད་འོག་སློབ་གྲྭ་ནང་ཁུལ་དུ་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་སྐབས་གཉིས་པ་བསུ་བའི་བྱེད་སྒོ་སྤེལ།
བྱེད་སྒོའི་ཁྲོད་དུ་སློབ་གཙོ་གཞོན་པའམ་ཡིག་མཁན་ཁོ་ལེ་ལགས་ཀྱིས་རང་གིས་ལོ་མང་རིང་འབྲི་སྦྱངས་དང་ཉར་ཚགས་བྱས་པའི་དབུ་ཅན་དང་དབུ་མེད་ཀྱི་ཡིག་གཟུགས་གྱ་ནོམ་པ་ཞིག་འགྲེམ་སྟོན་དུ་བཤམས་ཏེ་རྒྱ་ཆེའི་དགེ་རྒན་དང་སློབ་མ་རྣམས་ཀྱི་མིག་རྒྱ་སྐྱེད་དུ་བཅུག་པ་མ་ཟད། ཡིག་གཟུགས་ལ་མོས་པ་ཆེ་བའི་ན་གཞོན་དགེ་རྒན་རྣམས་ཀྱིས་ཀྱང་ལོ་འདིན་དག་རིང་གི་ཡིག་གཟུགས་ལ་བསླབས་སྦྱང་གི་འབྲས་བུར་གྱུར་བའི་ཡིག་གཟུགས་བརྩམས་ཆོས་མི་ཉུང་བ་ཞིག་དགེ་སློབ་ཀུན་གྱི་སྤྱན་སྔར་ཕུལ།
བྱེད་སྒོའི་ཁྲོད་ཡིག་ཟུགས་བརྩམས་ཆོས་འགྲེམ་སྟོན་ལས་གཞན་ད་དུང་ཡུལ་དངོས་ནས་ཡིག་གཟུགས་བྲིས་ཤིང་། ཞོར་དུ་བོད་ཀྱི་ཡིག་གཟུགས་དུས་ཆེན་གྱི་སྐོར་ལ་རྒྱུས་ལོན་དང་ངོ་སྤྲོད་ཀྱང་གནང་བས་བྱེད་སྒོའི་མགོ་རྔ་འཁྲུག་ཆ་དོད་ཅིང་རྒྱ་ཆེའི་དགེ་སློབ་ཀུན་གྱིས་དགའ་བསུ་ཆེན་པོ་ཐོབ།
|
|
