གསེར་ཆེན་རྫོང་མི་རིགས་སློབ་འབྲིང་།
རྒྱལ་ཡོངས་བོད་ཀྱི་ཡིག་གཟུགས་དུས་ཆེན་སྐབས་གཉིས་པ་སྲུང་བརྩི་བྱེད་ཆེད་ངེད་གསེར་ཆེན་རྫོང་མི་རིགས་སློབ་འབྲིང་གིས་༢༠༡༨ལོའི་ཟླ་༤ཚེས་༢༩ཉིན་《ལེགས་བྲིས་མ》ཞེས་པའི་ཡིག་གཟུགས་འགྲེམ་སྟོན་གྱི་བྱེད་སྒོ་གཟབ་རྒྱས་ངང་སྤེལ།
འདི་ནི་ང་ཚོས་ཏང་གི་ཚོགས་ཆེན་བཅུ་དགུ་བའི་དགོངས་དོན་མཛུབ་སྟོན་དུ་བཟུང་ནས་སློབ་གྲྭ་རུ་ཡིག་གཟུགས་སློབ་ཐུན་བཀོད་སྒྲིག་བྱེད་དགོས་པའི་སྲིད་ཇུས་ལག་བསྟར་བྱེད་ཆེད་དང་“ཕུལ་དུ་བྱུང་བའི་མི་རིགས་རིག་གནས་རྒྱུན་འཛིན་དང་།བོད་ཀྱི་ཡིག་གཟུགས་སྒྱུ་རྩལ་རྒྱ་ཆེར་དར་སྤེལ་གཏོང་བའི་”བརྗོད་དོན་གཞིར་བཟུང་ནས་《ལེགས་བྲིས་མ》ཞེས་པའི་ཡིག་གཟུགས་འགྲེམ་སྟོན་གྱི་བྱེད་སྒོ་འདི་ཆེད་དུ་སྤེལ་ཏེ་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་སྐབས་གཉིས་པ་སྲུང་བརྩི་བྱས་པ་ཡིན།
ཐེངས་འདིའི་ཡིག་གཟུགས་འགྲེམ་སྟོན་སྟེང་དུ།ལྷ་སའི་པོ་ཏཱ་ལའི་ཡིག་མཁན་སྙེ་འཕྲིན་ལས་རྒྱལ་མཚན་མཆོག་དང་།འཕན་པོ་ནཱ་ལེནྡྲའི་ཡིག་མཁན་ལེགས་བཤད་བཟོད་པ། མཚོ་སྔོན་དགེ་ཐོན་སློབ་ཆེན་གྱི་དགེ་རྒན་ཆེན་མོ་དོན་གྲུབ་ཚེ་རིང་། མགོ་ལོག་གི་སྡེར་ནང་ས་བྲིས་པ་སེང་གེ་དར་རྒྱས་སོགས་ཡིག་མཁན་བཅུ་ཕྲག་ལྷག་གིས་ངེད་སློབ་གྲྭར་ཆེད་དུ་བྲིས་པའི་མཁས་དབང་རིམ་བྱོན་གྱི་ཞལ་གདམས་གསུང་གི་བདུད་རྩི་ཞེས་པ། ཡིག་གཟུགས་སྙེ་བྲིས་དང་སྨོན་ལམ་ཡིག་གཟུགས། ཚེ་ཏན་ཞབས་དྲུང་ཡིག་གཟུགས། ཚུགས་ཆེན། པཎ་ཆེན་ཚུགས་རིང་། ཚུགས་ཆུང་། སྡེར་ནང་ས་བྲིས། བཀའ་བརྒྱུད་བྲབ་བྲིས། ནང་བྲིས་ནོར་བུ་མ། གཞུང་བྲིས། འབྲུ་མ། འབྲུ་ཚ། ཧོར་ཡིགའཁྱུགས་བྲིས། ཚུགས་མ་འཁྱུག་སོགས་ཡིག་གཟུགས་རིགས་བཅོ་ལྔ་ཙམ་གྱི་ལམ་ནས་ལེགས་པར་བྲིས་པའི་ཡིག་ཐང་བཞི་བཅུ་ལྷག་ཉར་ཚགས་བྱས་ཡོད་པ་ཐེངས་འདིར་ཆེད་དུ་བཏོན་ནས་འགྲེམ་སྟོན་བྱས་ཤིང་། ཡིག་མཁན་འདི་དག་གིས་བོད་ཀྱི་ཡིག་རྒྱུན་གཙང་མའི་ཁུངས་གཙོ་བོར་བཟུང་ཡོད་པས་ཡིག་གཟུགས་སྣ་རེ་རེ་ལ་རང་རང་གི་ཐུན་མོང་མ་ཡིན་པའི་ཁྱད་ཆོས་ལྡན།
དེ་མིན་རྗེ་དགེ་འདུན་གྲུབ་ཀྱིས་མཛད་པའི་《ལེགས་བྲིས་མ》ཆ་ཚང་ཐོན་མིའི་ཡིག་རྒྱུན་སྙེ་བྲིས་ཀྱི་ལམ་ནས་རང་སློབ་གྲྭའི་ཡིག་མཁན་དགེ་རྒན་བློ་བཟང་སྙན་གྲགས་ཚང་དང་། ཡིག་གཟུགས་ལ་དགའ་མོས་ཡོད་པའི་དགེ་རྒན་བླ་མ་ཚེ་རིང་དང་། རྡོ་རྗེ་ཚེ་བརྟན། ལྷ་རྣམ་རྒྱལ། ཚེ་མགོན་རྒྱལ་སོགས་ཀྱིས་ལེགས་པར་བྲིས་པའི་ཡིག་ཐང་བཅུ་དྲུག་དང་། དགེ་རྒན་དང་སློབ་མ་སྐོར་ཞིག་གིས་ལེགས་པར་བྲིས་པའི་བྲིས་གཟུགས་སྣ་ཚོགས་ཀྱི་ཡིག་ཐང་བཞི་བཅུ་ལྷག་ཀྱང་ཐེངས་འདིའི་འགྲེམ་སྟོན་དུ་ཚུད་ཡོད།
ཐེངས་འདིའི་འགྲེམ་སྟོན་སྟེང་གི་ཡིག་གཟུགས་བརྩམས་ཆོས་འདི་དག་ལ་ཚད་མི་འདྲ་བའི་རིན་ཐང་ལྡན་ཞིང་སྒྱུ་རྩལ་གྱི་མཛེས་ཉམས་མངོན་པར་ཐོན་པས་དགེ་སློབ་ཡོངས་དང་ལྟད་མོ་བ་མང་པོ་ཞིག་གི་མིག་གི་དགའ་སྟོན་དུ་གྱུར་ཡོད་ལ། འདི་ཡིས་སློབ་རའི་རིག་གནས་འཚོ་བ་ཕུན་སུམ་ཇེ་ཚོགས་སུ་གཏོང་ཐུབ་པ་མ་ཟད་བོད་ཀྱི་ཡིག་གཟུགས་སྒྱུ་རྩལ་གྱི་འཕྲིན་ལས་འདི་གོང་ནས་གོང་དུ་འཕེལ་བའི་རྒྱུ་རུའང་འགྱུར་བར་སྨོན།
༢༠༡༨ལོའི་ཟླ་༤ཚེས་༢༩ཉིན།
|
|
