རོང་བོ་དགེ་འདུན་དར་རྒྱས།
ཁོང་ནི་སྤྱི་ལོ་༡༩༧༨ལོར་མདོ་སྨད་རེབ་གོང་སྒྱུ་རྩལ་གྱི་ཕ་ཡུལ་རྐ་སར་སྡེ་བར་སྐྱེས། ལོ་བཅུ་གཅིག་སྟེང་འདུལ་འཛིན་ཆེན་མོ་རྗེ་དགེ་འདུན་ཆོས་འཕེལ་ལས་རབ་ཏུ་བྱུང་ཤིང་། རྐ་སར་དགོན་པའི་ཚོགས་གྲལ་དུ་ཞུགས་ཏེ་འདོན་ཆོས་སྤྱོད་དང་ཞོར་དུ་དགེ་བའི་བཤེས་གཉེན་བློ་བཟང་དགེ་འདུན་དང་སྨྱུག་ཐོགས་དབང་བོ་བློ་བཟང་འོད་ཟེར་གྱི་མཛུབ་སྟོན་འོག་སུམ་རྟགས་དག་གསུམ་དང་ཡིག་བྲིས་ལ་བསླབ། ལོ་བཅུ་དྲུག་སྟེང་རོང་བོ་དགོན་ཆེན་གྱི་ཆོས་གྲལ་དུ་ཞུགས། སྔ་ཕྱིར་པཎ་ཆེན་སྐུ་ཕྲེང་བཅུ་བ་མཆོག་དང་། རེབ་གོང་སྐྱབས་མགོན་བརྒྱད་པ་ཆེན་མོ། ཆོས་པ་རིན་པོ་ཆེ་འཇམ་དབྱངས་དགེ་འདུན་རྒྱ་མཚོ། རྗེ་ཤར་གདོང་བློ་བཟང་བཤད་སྒྲུབ་རྒྱ་མཚོ། བསེ་ཚང་བློ་བཟང་དཔལ་ལྡན་ཆོས་ཀྱི་རྡོ་རྗེ། ལ་མོ་ཡོངས་འཛིན་མཁས་གྲུབ་རྒྱ་མཚོ། རྗེ་དགེ་འདུན་བསྟན་འཛིན། འདན་མ་བློ་ཆོས་རིན་པོ་ཆེ། རྗེ་བློ་གསལ་རྒྱ་མཚོ། མཁན་ལས་ཐོགས་པ་དགེ་ལེགས་རྒྱ་མཚོ། སེར་བྱེས་ལྷ་རམས་པ་རོང་བོ་བློ་བཟང་སྙན་གྲགས། དགེ་བའི་བཤེས་གཉེན་བློ་བཟང་ཆོས་གྲགས། མཁན་ཟུར་འཇམ་དབྱངས་ཆོས་འཕེལ། རྟོག་གྲོལ་ཡོན་ཏན་རྒྱ་མཚོ། རྒན་བསྟན་པ་ཆོས་འཕེལ། རྒན་རྡོ་རྗེ་རྒྱལ་སོགས་ལས་དབང་ལུང་ཁྲིད་དང་། མདོ་སྔགས་རིག་གནས་ཀྱིས་བསྡུས་པའི་གཞུང་ལུགས་ལ་སློབ་གཉེར་གནང་ཁུལ་མཛད། སེ་ར་ནས་ཟླ་གཅིག་གི་རིང་ལ་བྲིས་ཀྱི་ཕྱོགས་ནས་སྐལ་བ་ཅུང་ཟད་ཐོབ། སྔ་གཞུག་ཏུ་རྐ་གསེར་ཞུན་དང་བྱང་ཆུབ་ཤིང་སོགས་ཀྱི་པིར་མིང་བཀོད་དེ་<སྦྲང་ཆར>དང་། <མཚོ་སྔོན་མང་ཚོགས་སྒྱུ་རྩལ།> <གངས་རྒྱན་མེ་ཏོག> <བོད་ཀྱི་རྩོམ་རིག་སྒྱུ་རྩལ།> <གངས་ལྗོངས་རིག་གནས།> <ལྷོ་ཁའི་རྩོམ་རིག་སྒྱུ་རྩལ།><བདག་པོ> <མཚོ་སྔོན་སློབ་གསོ།> <དགེ་ལུགས་ཞིབ་འཇུག> < མཚོ་སྔོན་རེབ་གོང་།>སོགས་དུས་དེབ་ཁག་ཏུ་སྙན་ངག་དང་དཔྱད་རྩོམ། རྟོགས་བརྗོད། རྣམ་ཐར། ཡིག་གཟུགས་བཅས་བརྩམས་ཆོས་ཉིས་བརྒྱ་ལྷག་སྤེལ་མྱོང་། བརྩམས་ཆོས་མི་ཉུང་བ་ཞིག་ལ་ཞིང་ཆེན་རིམ་པ་དང་ཁུལ་རིམ་པ། རྫོང་རིམ་པ་དུ་མ་ནས་གཟེངས་རྟགས་ཐོབ། ད་ལྟ་རོང་བོ་དགོན་ཆེན་དུ་ཕྱོགས་སོ་སོའི་དགོན་པ་དང་སློབ་གྲྭ་ཁག་གི་དོན་གཉེར་ཅན་མང་པོར་ཚད་མ་དང་གྲུབ་མཐའི་སྐོར། སྒོས་སུ་རེབ་གོང་བྲིས་རྒྱུན་གཙོ་བྱས་པའི་ཐུན་མོང་རིག་གནས་སྐོར་འཆད་སྤེལ་གནང་མུས་སུ་བཞུགས།
|
|
