བོད་ཀྱི་ཡིག་གཟུགས་སྒྱུ་རྩལ་དང་འབྲེལ་བའི་གསེར་ཆེན་མཆོད་དབྱངས་ཀྱི་དགོང་ཚོགས།
༢༠༡༨ལོའི་ཟླ་༡ཚེས༡༣ཉིན་གྱི་དགོང་མོར་ཨ་མདོའི་མཚོ་ལྷོ་ཁུལ་ནས་སྐབས་དང་པོའི་གསེར་ཆེན་མཆོད་དབྱངས་ཞེས་པའི་བོད་ཁམས་གཞས་པ་གཞས་མའི་དགོང་ཚོགས་ཤིས་བསྡུས་པ་རེད།
ང་ཚོས་རང་མི་རིགས་ཀྱི་རིག་གནས་སྒྱུ་རྩལ་དང་ཡིག་གཟུགས་སྒྱུ་རྩལ་འདི་ཉམས་པ་སོར་ཆུད་དང་། མ་ཉམས་གོང་འཕེལ་གཏོང་བར་དམིགས་ནས་གཙོ་སྒྲུབ་མི་སྣས་ཡང་ཡང་རེ་ཞུ་བྱས་པ་ལྟར། ཡིག་མཁན་རིག་སྨོན་བསམ་གཏན་གྱིས་ཐེངས་འདིའི་ཆེད་ཞུའི་གླུ་བ་གླུ་མ་རྣམ་དང་། ཆེད་ཞུའི་སྐུ་མགྲོན་རྣམ་པའི་ལེགས་སྐྱེས་ཚང་མ་བྲིས་རྒྱུན་སྣ་ཚོགས་ཀྱི་ཡིག་གཟུགས་སྒྱུ་རྩལ་གྱི་ལམ་ནས་བྲིས་ཏེ་ཕུལ་བ་ཡིན།
རྣམ་པ་གསར་བ་དང་ལེགས་སྐྱེས་གསར་བ་འདིས་ཐེངས་འདིའི་གཞས་པ་གཞས་མ་དང་སྐུ་མགྲོན་རྣམ་པ་དགའ་བ་འབུམ་གྱིས་མྱོས་ཏེ་རང་མི་རིགས་ཀྱི་ཡིག་གཟུགས་སྣ་ཚོགས་ཀྱི་ལེགས་སྐྱེས་འདི་དག་ཧ་ཅང་རིན་ཐང་ཆེ་བ་དང་དྲན་རྟེན་གྱི་ཆ་ནས་རྣམ་པ་གསར་བ་ཞིག་ཏུ་འདོད་པ་མ་ཟད། ཉར་ཚགས་རང་བཞིན་དང་ལོ་རྒྱུས་རང་བཞིན་ཆེ་ཆེར་ལྡན་ཟེར་བཞིན་ཚང་མས་དགའ་སྤྲོའི་ཐལ་སྒྲ་དང་དགོད་སྒྲའི་ཀི་སྒྲ་སྒྲོགས་ཏེ་བོད་ཀྱི་ཡིག་གཟུགས་སྒྱུ་རྩལ་གྱི་རྣམ་པས་ཁེངས་བའི་གསེར་ཆེན་མཆོད་དབྱངས་དགོང་ཚོགས་གཟབ་རྒྱས་ངང་མཇུག་བསྡུས་པ་ཡིན་།
བྱ་འགུལ་འདིའི་སྟེང་ནས་ང་ཚོའི་མདོ་དབུས་ཁམས་གསུམ་གྱི་བྲིས་པ་རྒན་དར་གཞོན་གསུམ་ཚང་མས་རང་ས་ནས་བྱ་འགུལ་སྣ་ཚོགས་ལ་ཡིག་གཟུགས་ཀྱིས་རྒྱབ་སྐྱོར་དང་། ཡིག་གཟུགས་དར་སྤེལ་ལ་བྱ་འགུལ་སྣ་ཚོགས་ཀྱིས་རྒྱབ་སྐྱོར་བྱེད་པའི་རྣམ་པ་གསར་བ་ཞིག་རྒྱུན་འཁྱོངས་བྱས་ནས་བོད་ཀྱི་ཡིག་གཟུགས་སྒྱུ་རྩལ་གྱི་འདས་མ་ད་གསུམ་ལ་སྲི་ཞུ་ཅི་ལྕོགས་བྱེད་པའི་འདུན་པ་ཞིག་ངང་ངམ་ཤུགས་ནས་མཚོན་ཡོད་དོ།།
|
|
