ཐོན་མིའི་ཕྱག་རྒྱུན་རྟགས་མའི་ཡིག་གཟུགས་འགྲེམ་སྟོན་ཐེངས་གསུམ་པ་རྫ་ཆུ་ཁ་ནས་སྤེལ།
རབ་རྒྱན་མེ་བྱ་ལོའི་བོད་ཟླ་༡༡བོད་ཚེས་༤ཉིན་མདོ་ཁམས་རྫ་རྒྱུད་འབུམ་རྙིང་ཤེས་རིག་གླིང་ནས་ཐོན་མིའི་ཕྱག་རྒྱུན་རྟགས་མའི་ཡིག་གཟུགས་འགྲན་བསྡུར་དང་འགྲེམ་སྟོན་ཐེངས་གསུམ་པའི་མཛད་སྒོ་བསྡུས་ཏེ། ལོ་ངོ་གསུམ་གྱི་རིང་ལ་འབུམ་རྙིང་ཤེས་རིག་གླིང་གི་ཡིག་གཟུགས་དགེ་རྒན་རིག་སྨོན་བསམ་གཏན་རྒྱ་མཚོ་ལགས་ཀྱིས་སྐུལ་འདེད་དང་བྱམས་སྐྱོང་གི་འོག་ནས་སློབ་བུ་རྣམས་ལ་གཙང་བཀྲ་ཤིས་ལྷུན་པོ་ནས་བརྒྱུད་པའི་གཙང་བྲིས་ཚུགས་རིང་དང་། ཚུགས་ཐུང་། ཚུགས་མ་ཐིག་གཅིག དབུས་བྲིས་ཚུགས་རིང་དང་། འཁྱུག་ཡིག བླ་བྲང་བཀྲ་ཤིས་འཁྱིལ་ནས་བརྒྱུད་པའི་སྨོན་ལམ་ཡིག་གཟུགས། མཁས་དབང་ཚེ་ཏན་ཞབས་དྲུང་ཚང་གི་ཐུན་མོང་མ་ཡིན་པའི་བྲིས་རྒྱུན་སྨྱུག་རིལ་དང་། སྨྱུག་བཅད་སོགས་བོད་གངས་ཅན་གྱི་ཐུན་མིན་ཡིག་གཟུགས་མང་པོའི་ཁྲིད་རྒྱུན་ཁུངས་ལྡན་བཅས་བསྩལ་བ་ལྟར། ལོ་ངོ་གསུམ་གྱི་རིང་ལ་དགེ་སློབ་གཉིས་ཀས་འབད་འབད་དུང་དུང་བྱས་པའི་གྲུབ་འབྲས་ཡོད་ཚད་ཀུན་གྱི་སྤྱན་ལམ་དུ་བསྟར།
ཐེངས་འདིར་སློབ་མ་རྣམས་ཀྱིས་རང་རང་གི་དགའ་མོས་ལྟར་བྲིས་པའི་ཚད་ལྡན་ཡིག་གཟུགས་འདྲ་མིན་གྱི་དཔར་ཤིང་བརྒྱ་དང་བཅུ་དྲུག ཡིག་གཟུགས་ཐང་ག་ལྔ་བཅུ། སློབ་བུ་དར་ལོ་ལགས་ཀྱིས་བྲིས་པའི་རྟེན་འབྲེལ་བསྟོད་པའི་ཡིག་གཟུགས་ཞལ་ཐང་རིང་མོ་དང་། ད་དུང་སློབ་མ་ཁོང་གིས་གསར་དུ་བྲིས་པའི་ཡིག་གཟུགས་དཔེ་དེབ<<བོད་ཀྱི་ཡིག་གཟུགས་བློ་གསལ་ཡིད་ཀྱི་དགའ་སྟོན། >>དང་། སློབ་བུ་བསམ་འགྲུབ་ཚེ་རིང་གིས་བྲིས་པའི་ཡོན་ཏན་གཞིར་གྱུར་མའི་ཡིག་གཟུགས་ཞལ་ཐང་དང་། སློབ་བུ་རབ་འབྱོར་གྱིས་བྲིས་པའི་<<མཁའ་མཉམ་མའི་ཡིག་གཟུགས་ཞལ་ཐང་རིང་མོ་>>གཅིག་བཅས་དང་། སྐབས་སྔོན་མའི་མཐར་ཕྱིན་སློབ་མ་རྣམས་ཀྱིས་བྲིས་པའི<<ཐོན་མིའི་ཕྱག་རྒྱུན>>དང་། <<གསེར་མདོག་གི་མི་ལོ་བཞི>>ཞེས་པའི་དཔེ་དེབ་སོགས་འགྲེམས་སྟོན་བྱས་ཏེ་ཉམ་ང་ཉག་ཕྲའི་གནས་སུ་གྱར་པའི་བོད་གངས་ཅན་པའི་ཡིག་གཟུགས་ཀྱི་མཛད་འཕྲིན་ལ་གསེར་མདོག་གི་གཟི་འོད་སྦར་ཞིང་སྐད་ཡིག་གི་ལུས་ཟུངས་ལ་བླ་མེད་ཀྱི་དངོས་གྲུབ་བསྩལ།
དགོན་པའི་མཁན་པོ་དང་དགེ་བཤེས་ལྷ་རམས་པ་ཚུལ་ཁྲིམས་སོགས་ཀྱིས་བོད་ཀྱི་ཡིག་གཟུགས་ཀྱི་དགེ་མཚན་དང་འབྲེལ་བར་གསུང་བཤད་གནང་བཞིན་པ།
འབུམ་རྙིང་ཤེས་རིག་སློབ་གླིང་གི་ཡིག་གཟུགས་དགེ་རྒན་རིག་སྨོན་བསམ་གཏན་རྒྱ་མཚོས་བོད་ཀྱི་ཡིག་གཟུགས་ཀྱི་དགེ་མཚན་གླེང་བ།
དགོན་པའི་བསྟན་བདག་མཆོག་སྤྲུལ་སྟག་ལབ་རིན་པོ་ཆེ་དང་དགེ་བཤེས་ལྷ་རམས་པ་ཚུལ་ཁྲིམས་སོགས་ཀྱིས་སློབ་མ་ཚོས་ཡུལ་དངོས་ནས་བྲིས་རྒྱུན་སྣ་ཚོགས་ཀྱི་ཡིག་གཟུགས་འབྲི་བར་གཟིགས་ཞིབ་གནང་བཞིན་པ།༡
དགོན་པའི་བསྟན་བདག་མཆོག་སྤྲུལ་སྟག་ལབ་རིན་པོ་ཆེ་དང་དགེ་བཤེས་ལྷ་རམས་པ་ཚུལ་ཁྲིམས་སོགས་ཀྱིས་སློབ་མ་ཚོས་ཡུལ་དངོས་ནས་བྲིས་རྒྱུན་སྣ་ཚོགས་ཀྱི་ཡིག་གཟུགས་འབྲི་བར་གཟིགས་ཞིབ་གནང་བཞིན་པ།༣
དགོན་པའི་བསྟན་བདག་མཆོག་སྤྲུལ་སྟག་ལབ་རིན་པོ་ཆེ་དང་དགེ་བཤེས་ལྷ་རམས་པ་ཚུལ་ཁྲིམས་སོགས་ཀྱིས་སློབ་མ་ཚོས་ཡུལ་དངོས་ནས་བྲིས་རྒྱུན་སྣ་ཚོགས་ཀྱི་ཡིག་གཟུགས་འབྲི་བར་གཟིགས་ཞིབ་གནང་བཞིན་པ།༤
དགོན་པའི་བསྟན་བདག་མཆོག་སྤྲུལ་སྟག་ལབ་རིན་པོ་ཆེ་དང་དགེ་བཤེས་ལྷ་རམས་པ་ཚུལ་ཁྲིམས་སོགས་ཀྱིས་སློབ་མ་ཚོས་ཡུལ་དངོས་ནས་བྲིས་རྒྱུན་སྣ་ཚོགས་ཀྱི་ཡིག་གཟུགས་འབྲི་བར་གཟིགས་ཞིབ་གནང་བཞིན་པའི་གནས་ཚུལ།༥
མཛད་སྒོའི་སྟེང་དུ་འབུམ་རྙིང་དགོན་གྱི་མཁན་རིན་པོ་ཆེ་དང་། དགེ་བའི་གཤེས་གཉེན་ཆེན་མོ་སེར་ཤུལ་ཚུལ་ཁྲིམས་སོགས་ཕེབས་ཏེ་བཀའ་སློབ་རིམ་པར་གནང་ཞིང་། བླ་སྤྲུལ་དགེ་བཤེས་དང་འདུས་མང་། དེེར་ཕེབས་ལྟད་མོ་བ་ཚང་མས་སློབ་མ་རྣམས་ཀྱིས་བྲིས་པའི་ཡིག་གཟུགས་སྒྱུ་རྩལ་ལ་ཧ་ལས་ཧང་སངས་ཀྱི་ངང་ནས་བསྔགས་བརྗོད་ཆེས་ཆེར་མཛད།
དགོན་པའི་བླ་མ་དང་ལས་སྣེ། གྲྭ་བ་དང་ས་གནས་མང་ཚོགས་ཀྱིས་ཡིག་གཟུགས་བརྩམས་ཆོས་ལ་རོལ་མྱོང་བྱ་བཞིན་པ།༡
ཞར་བྱུང་ངོ་སྤྲོད་བྱ་རྒྱུར།
༈ མདོ་ཁམས་རྫ་རྒྱུད་འབུམ་རྙིང་ཤེས་རིག་གླིང་ནི་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་སེར་ཤུལ་རྫོང་གི་མངའ་ཁོངས་སུ་ཡོད་པའི་དགེ་ལུགས་པའི་དགོན་སྡེ་ཆེ་གྲས་རྫ་འབུམ་རྙིང་དགོན་དགེ་ལྡན་མདོ་སྔགས་བཤད་སྒྲུབ་ཆོས་རྒྱས་གླིང་གི་རྨང་གཞིའི་རིག་གནས་སློབ་གྲྭ་ཞིག་ཡིན་ལ། ད་སྐབས་སློབ་མ་ཉིས་བརྒྱ་ལྷག་དང་དགེ་རྒན་དང་ལས་བཟོ་བ་ཉི་ཤུ་ཡས་མས་ཡོད། བོད་དབྱིན་རྒྱ་གསུམ་དང་རྩིས་རིག་སོགས་སློབ་ཁྲིད་བྱེད་ཀྱིན་ཡོད། ཁྱད་པར་དུ་བོད་ཀྱི་ཡིག་མཁན་རིག་སྨོན་བསམ་གཏན་རྒྱ་མཚོ་ལགས་གདན་དྲངས་ཏེ་ཁོང་གིས་འབད་བརྩོན་ལྷོད་མེད་དང་གཟབ་ནན་ཞིབ་ཚགས་ཀྱིས་ཡིག་གཟུགས་སློབ་ཁྲིད་གནང་བས་སློབ་གླིང་འདིའི་སློབ་མ་རྣམས་ལ་ཡིག་གཟུགས་ཀྱི་ཕྱོགས་ནས་གཞན་དང་མ་འདྲ་བའི་གྲུབ་འབྲས་ཆེན་པོ་བྱུང་ཡོད།
དགོན་པའི་བླ་མ་དང་ལས་སྣེ། གྲྭ་བ་དང་ས་གནས་མང་ཚོགས་ཀྱིས་ཡིག་གཟུགས་བརྩམས་ཆོས་ལ་རོལ་མྱོང་བྱ་བཞིན་པ།༢
དེ་ཡང་བོད་ཀྱི་སྲོལ་རྒྱུན་གྱི་ཐུན་མོང་མ་ཡིན་པའི་ཡིག་གཟུགས་ཁྲིད་ཐབས་ཏེ་སྦྱང་ཤིང་གི་སྟེང་དུ་འབྲི་བའི་བྲིས་རྒྱུན་དབུས་ཕྱོགས་སུ་མ་གཏོགས་ད་སྐབས་མདོ་སྨད་དུ་ཉམས་རྒུད་ཆེན་པོ་བྱུང་ཡོད་མོད། ཁོང་གིས་སྲོལ་རྒྱུན་བཟང་པོ་དེ་ཉིད་རྒྱུན་འཛིན་དང་དར་སྤེལ་གཏང་ཆེད་སློབ་གླིང་འདིའི་སློབ་མ་ཐམས་ཅད་ཀྱིས་སྦྱང་ཤིང་གི་སྟེང་དུ་འབྲི་བ་ནས་དབུ་བཟུང་སྟེ་དབུ་ཅན་སྙུག་རིས་དང་སྙུག་བཅད། དབུ་མེད་ཚུགས་རིང་ནས་དབུ་མེད་འཁྱུག་བྲིས་བར་དུ་ཁྲིད་ཐབས་དང་ལག་ལེན་གྱི་གོ་རིམ་མ་འཁྲུགས་པར་ཚད་ལྡན་ངང་སློབ་ཁྲིད་བྱས་པར་བརྟེན་སློབ་མ་རྣམས་ལ་བོད་ཀྱི་ཡིག་གཟུགས་ཀྱི་ཁྲིད་ཐབས་དང་ལག་ལེན་སོགས་ངོས་ལེགས་པོར་འཕྲོད་དེ་རྨང་གཞི་ཡག་པོ་བཞག་ཡོད།
དགོན་པའི་བླ་མ་དང་ལས་སྣེ། གྲྭ་བ་དང་ས་གནས་མང་ཚོགས་ཀྱིས་ཡིག་གཟུགས་བརྩམས་ཆོས་ལ་རོལ་མྱོང་བྱ་བཞིན་པ།༣
ཉིས་སྟོང་བཅུ་བཞི་ལོའི་སྟོན་ཁར་ཐོན་མིའི་ཕྱག་རྒྱུན་རྟགས་མའི་ཡིག་གཟུགས་འགྲན་བསྡུར་དང་འགྲེམས་སྟོན་གྱི་བྱེད་སྒོ་ཐེངས་དང་པོ་དང་། ཉིས་སྟོང་བཅོ་ལྔ་ལོའི་དབྱར་ཁར་ཐོན་མིའི་ཕྱག་རྒྱུན་རྟགས་མའི་ཡིག་གཟུགས་འགྲན་སྡུར་དང་འགྲེམ་སྟོན་ཐེངས་གཉིས་པ། ད་ལོར་ཐེངས་གསུམ་པ་བཅས་སྤེལ་ཞིང་། གླིང་འདིའི་དགེ་སློབ་ཡོངས་དང་། ལྟད་མོ་བ། གཟིགས་ཞིབ་པ་ཚང་མས་བསྔགས་བརྗོད་ཆེས་ཆེར་ཐོབ་ཡོད་པར་མ་ཟད་། ཉེ་བའི་ལོ་འདི་དག་གི་རིང་བྱང་སྡེ་ཉི་མ་རྫ་ཆུ་ཁ་རུ་བོད་གངས་ཅན་གྱི་ཐུན་མོང་མ་ཡིན་པའི་ཡིག་གཟུགས་བྲིས་རྒྱུན་གྱི་མེ་རོ་སླར་ཡང་གསོ་བའི་ཚ་རླབས་དྲག་པོ་འཕྱུར་ཞིང་། སློབ་གླིང་འདིའི་ད་ཡོད་སློབ་མ་རྣམས་དང་། སྐབས་དང་པོ་དང་གཉིས་པའི་མཐར་ཕྱིན་སློབ་མ་ཡོངས་ཀྱིས་གཡུར་དུ་ཟ་བའི་གྲུབ་འབྲས་རྒྱ་ཆེན་པོ་བླངས་ཡོད།
ཐེངས་འདིའི་བྱ་འགུལ་ཁྲོད་ཀྱི་ཡིག་གཟུགས་བརྩམས་ཆོས་པར་རིས་འདེམ་བཀོད།
སློབ་བུ་དར་ལོ་དང་བསམ་འགྲུབ་ཚེ་རིང་། རབ་འབྱོར་སོགས་ཀྱིས་བྲིས་པའི་རྟེན་འབྲེལ་བསྟོད་པ་དང་ཡོན་ཏན་གཞིར་གྱུར་མ། མཁའ་མཉམ་མའི་ཞལ་ཐང་རིང་མོ།
གསར་འགོད་པ། དགེ་མིང་པ་ལྡོང་འཆི་དབང་གིས།
|
|
