༡༠.དྲི་བ། ཡི་གེ་འབྲི་མཁས་པའི་ཚད་གང་ཡིན།
དྲིས་ལན། སྙོམས་གཙང་འགྲིག་གསུམ་ལྡན་པ་དང་། །ལེགས་མགྱོགས་དག་གསུམ་དྲུག་ཚང་ན། །མཁས་པའི་གོ་ས་ཐོབ་པ་ཡིན། །ཞེས་དང་། ཉེ་རབས་ཀྱི་ཡིག་མཁན་ཆེན་མོ་ཞལ་ལྕེ་བོན་གྲོང་ཚེ་བརྟན་ཡེ་ཤེས་ཀྱིས། མགོ་ལ་མཐོ་དམན་དབར་ལ་ཡངས་དོག་དང་། །དེ་བཞིན་རྐང་ལ་རིང་ཐུང་མེད་པའི་ངོས། །འབྲུ་ནི་ཡུངས་དཀར་བསྟར་ལ་བཀོད་འདྲ་བ། །སྙོམས་ལེགས་འབྱུང་དུས་ཧ་ལམ་མཁྱེན་པའི་ཚད། །ཅེས་གསུངས་པས་གྲུབ་བོ། །
༡༡.དྲི་བ། ཡི་གེ་བྱུང་ཚུལ་བརྒྱུད་པའི་ལོ་རྒྱུས་ཇི་ལྟར་ཡིན།
དྲིས་ལན། སྔོན་བསྐལ་པ་མཐའ་ཡས་མུ་མེད་པའི་དུས་སུ་འོག་མིན་སྟུག་པོ་བཀོད་པའི་ཞིང་དུ་ཡི་གེའི་མཁན་པོ་ལྷའི་བུ་ཉི་མ་རབ་ཏུ་སྣང་བྱེད་དང་། དགའ་བྱེད་གཉིས་ཀྱིས་དབྱངས་བཅུ་དྲུག་དང་། གསལ་བྱེད་སོ་བཞིའི་སྒོ་ནས་ཡིག་སྲོལ་བཏོད་དེ་སྒྲའི་གཞུང་ཐལ་འགྱུར་རྩ་བའི་རྒྱུད་ཅེས་བྱ་བ་བརྩམས་པ་ནི་ཡི་གེ་འབྲི་བའི་ཐོག་མའི་འབྱུང་ཁུངས་ཡིན་པར་གྲགས།
|
|
