༄༅། །སླའོ་ཡིག་གཟུགས་ཚོགས་པ་ནི་མཚོ་སྔོན་དགེ་འོས་སློབ་ཆེན་མི་རིགས་དགེ་འོས་སློབ་གླིང་གི་འབྲེལ་ཡོད་འགོ་ཁྲིད་དང་། བོད་ཀྱི་སྐད་ཡིག་དང་རྩོམ་རིག་སྡེ་ཁག སློབ་མའི་ལས་དོན་ཁྲུའུ་སོགས་ཀྱི་རྒྱབ་རོགས་ཐུགས་ཁུར་དང་། དགེ་རྒན་རྨོག་རུ་དོན་གྲུབ་ཚེ་རིང་ལགས་ཀྱི་ཐད་ཀའི་མཛུབ་སྟོན་འོག་ནས་བཙུགས་པ་ཡིན་ལ།བོད་ཡིག་ཡིག་གཟུགས་སློབ་ཁྲིད་ལ་རམ་འདེགས་དང་། གཞུང་ལུགས་དང་ལག་ལེན་ཡ་མ་བྲལ་བར་འཕེལ་རྒྱས་སུ་གཏོང་བར་མེད་དུ་མི་རུང་བའི་སྟེགས་བུ་གལ་ཆེན་ཞིག་ཀྱང་ཡིན།
སླའོ་ཡིག་གཟུགས་ཚོགས་པས་ལོ་རེ་རེར་ཡིག་གཟུགས་སྒྱུ་རྩལ་ལ་སྤྲོ་བ་ཡོད་པའི་སློབ་མ་གསར་བ་བསྡུས་ཏེ་གཟའ་རེའི་གཟའ་མཇུག་གི་སྐབས་སུ་སློབ་མ་ཚོའི་འདོད་མོས་ལྟར་ཐོན་མིའི་ཡིག་རྒྱུན་ལ་ཞུགས་མྱོང་བའི་སློབ་གྲོགས་ཚོ་རྩ་འཛུགས་ཀྱིས་བོད་ཀྱི་ཡིག་གཟུགས་སྣ་ཚོགས་ཏེ་ཚུགས་རིང་དང་སྡེར་ནང་ས་བྲིས་སོགས་སློབ་ཁྲིད་དང་། ལག་ལེན་ཟུང་འབྲེལ་གྱི་བགྱི་བ་ལྷུར་བླངས་པས་ད་ཆ་བྲིས་པ་མང་པོ་ཞིག་ཆར་རྗེས་ཀྱི་ཤ་མོ་བརྡོལ་བ་ལྟར་འཚར་ལོངས་བྱུང་། སླའོ་ཡིག་གཟུགས་ཚོགས་པས་སློབ་སྐབས་ཡིག་གཟུགས་འགྲེམ་སྟོན་དང་ཡིག་གཟུགས་ཐོལ་བྲིས་ཀྱི་བྱ་འགུལ་སྣ་ཚོགས་སྤེལ་ནས་རྒྱ་ཆེའི་དགེ་སློབ་ལྷན་རྒྱས་ཀྱི་མིག་གི་དགའ་སྟོན་དུ་ཡིག་གཟུགས་སྒྱུ་རྩལ་གྱི་སྟོན་མོ་རྒྱ་ཆེར་བཤམས་མྱོང་པ་ཡིན། ད་ལོར་ཡང་སློབ་འགོ་གསར་བ་ཚུགས་པ་དང་བསྟུན་ནས་སྔར་སྲོལ་ལྟར་བོད་ཀྱི་ཡིག་གཟུགས་སྒྱུ་རྩལ་ལ་དུངས་པ་ཟབ་ཅིང་སྤྲོ་བ་ཡོད་པའི་གསར་ཞུགས་ཀྱི་སློབ་མ་མང་པོ་ཞིག་བསྡུ་བཞིན་ཡོད་པས། གོ་སྐབས་འདི་ནི་ཡིག་གཟུགས་སྒྱུ་རྩལ་ལ་དོ་སྣང་ཡོད་པའི་སྐལ་ལྡན་གྱི་སློབ་གྲོགས་རྣམ་ལ་མཚོན་ན་རང་ཉིད་ལ་རིག་པའི་རྒྱན་ཆ་སྤྲས་པ་རང་ཉིད་ཀྱི་ནུས་པ་ཕྱོགས་ཡོངས་ནས་མཐོར་འདེགས་གཏོང་བར་ཀུན་ནས་ཕན་པ་ཞིག་ཡིན་པས་སློབ་གྲོགས་བརྒྱ་ཕྲག་ལ་ཉེ་བ་ཞིག་ཚོགས་པ་འདིར་གསར་དུ་ཞུགས་ནས་ཚོགས་པའི་དཔུང་སྟོབས་ཆེ་རུ་བཏང་། སླད་མར། ང་ཚོས་མཉམ་དུ་རང་ཅག་གི་མེས་པོའི་ཕྱག་བྲིས་ལ་བརྟེན་ནས་བྱུང་བའི་ཡིག་གཟུགས་སྒྱུ་རྩལ་གྱི་ཕྱོགས་ལ་ལག་ལེན་དང་གཞུང་ལུགས་ཡ་མི་བྲལ་བར་འབད་བརྩོན་གྱི་བགྱི་བ་ལྷུར་ལེན་པའི་སེམས་ཤུགས་དང་སྟ་གོན་སྔར་ལས་ལྷག་པ་ཡོད་ཅེས་ཚོགས་པ་འདིའི་འགན་འཛིན་པས་བརྗོད།
|
|
