“ཐོན་མིའི་མཛུབ་རིས”མིང་ཅན་གྱི་ཡིག་གཟུགས་འགྲན་སྡུར་ཐེངས་ལྔ་པའི་བྱ་དགའ་བདམས་ཐོན་བྱུང་བ།
མཚོ་སྔོན་མི་རིགས་དཔེ་སྐྲུན་ཁང《སྦྲང་ཆར》རྩོམ་སྒྲིག་ཁང་གིས་བསྡུ་རུབ་བྱས་ཤིང་། བོད་ཁུལ་ཡོངས་ལ་ཁ་ཕྱོགས་ཏེ་སྒྲུབ་པའིི“ཐོན་མིའི་མཛུབ་རིས”མིང་ཅན་གྱི་བོད་ཡིག་ཡིག་གཟུགས་འགྲན་སྡུར་དཔྱད་འདེམ་བྱ་འགུལ་ཉེ་ལམ་རྒྱལ་ཁའི་ངང་ཁྱབ་སྒྲོག་མཛད། བྱ་འགུལ་འདིར་ཁྱོན་བསྡོམས་བོད་ཁུལ་གྱི་ས་གནས་སོ་སོ་ནས་བསྐུར་ཡོང་བའི་ཆེད་ལས་ཡིག་མཁན་དང་ཡིག་གཟུགས་དོན་གཉེར་ཅན་གྱི་བརྩམས་ཆོས400ལྷག་འབྱོར་ཞིང་། རྩོམ་སྒྲིག་ཁང་གིས་དེ་དག་ལས་ཡིག་གཟུགས་ཀྱི་ནང་དོན་དང་འབྲི་སྟངས་ཕྱི་མོ་སོགས་ལ་གཞིགས་ཏེ་བརྩམས་ཆོས63ཙམ་བདམས་ནས་དེབ་ཐོག་ཏུ་བཀོད་ཅིང་འགྲེམ་སྤེལ་བྱས་པ་དང་སྦྲགས། འདི་ག་རྩོམ་སྒྲིག་ཁང་གིས“ཐོན་མིའི་མཛུབ་རིས”མིང་ཅན་གྱི་ཡིག་གཟུགས་འགྲན་སྡུར་དཔྱད་འདེམ་བྱེད་ཐབས་ཀྱི་གཏན་ཁེལ་ལྟར་རྒྱལ་ཡོངས་ཀྱི་ཡིག་མཁན་གྲགས་ཅན་དག་གདན་དྲངས་ཏེ་དཔྱད་འདེམ་ཨུ་ཡོན་བཙུགས་པ་དང་། གཟབ་ནན་གྱིས་འགན་འཁུར་ཞིང་ཞིབ་ཕྲའི་ངང་དཔྱད་འདེམ་བྱས་པ་བརྒྱུད། ཐོག་མར་བརྩམས་ཆོས་ལེགས་ཤོས33བདམས་ཐོན་བྱུང་བ་དང་། མཇུག་མཐར་འདེམ་ཤོག་འཕངས་ནས་དེ་རྣམས་ལས་བྱ་དགའ་ཨང་དང་པོ་ཅན་གཅིག་དང་ཨང་གཉིས་པ་ཅན་གཉིས། ཨང་གསུམ་པ་ཅན་གསུམ། ཕུལ་བྱུང་བྱ་དགའ་ཐོབ་མཁན་བདུན་བཅས་བསྡོམས་པས་ཡིག་མཁན13གྱི་ཡིག་གཟུགས་བརྩམས་ཆོས་ལ་བྱ་དགའ་ཐོབ། དེ་དག་ལས་བོད་ལྗོངས་རྒྱ་ཚྭ་རྫོང་གི་བག་བྲོ་ལ་བྱ་དགའ་ཨང་དང་པོ་དང་། བོད་ལྗོངས་ནག་ཆུ་རྫོང་གི་སངས་རྒྱས་དང་སི་ཁྲོན་རྔ་བ་རྫོང་གི་ཕུན་ཚོགས་ཐུབ་ཆེན་གཉིས་ལ་བྱ་དགའ་ཨང་གཉིས་པ། མཚོ་སྔོན་མཚོ་ལྷོ་ཁུལ་གྱི་བསམ་གཏན་རྒྱ་མཚོ་དང་ཀུན་བཟང་དོན་གྲུབ། མགོ་ལོག་དགའ་བདེ་རྫོང་གི་པེ་རི་ངག་གྲུབ་གསུམ་ལ་བྱ་དགའ་ཨང་གསུམ་པ་ཐོབ། གཞན་ཡང་བོད་ལྗོངས་གྲ་ནང་རྫོང་གི་ཡེ་ཤེས་ཚུལ་ཁྲིམས་དང་། ཀན་སུའུ་ཀླུ་ཆུ་རྫོང་གི་བསྟན་འཛིན་རྒྱ་མཚོ། རྟ་མགྲིན་མགོན་པོ། བསང་ཆུ་རྫོང་གི་ཐུབ་བསྟན་རྒྱ་མཚོ། མཚོ་སྔོན་ཟི་ལིང་གི་རྟ་མགྲིན་རྡོ་རྗེ། མཚོ་ལྷོ་ཁུལ་བྲག་དཀར་རྫོང་གི་ཁོ་ལེ། མང་ར་རྫོང་གི་རྟ་མགྲིན་ཚེ་བརྟན་བཅས་མི་བདུན་ལ་ཕུལ་བྱུང་བྱ་དགའ་ཐོབ།
ཐེངས་འདིའི་ཡིག་གཟུགས་འགྲན་སྡུར་ལ་ཞུགས་པའི་བརྩམས་ཆོས་མང་ཐོག ཡིག་མཁན་རེ་རེས་བརྩམས་ཆོས་དུ་མ་བསྐུར་སོན་བྱུང་བ་དང་། འགྲན་སྡུར་གྱི་ཁྱབ་ཁོངས་ཆེ་སྟབས་ཧ་ལམ་བོད་ཁུལ་ཡོངས་ཀྱི་ཡིག་མཁན་དག་ནང་དུ་འདུས་ཡོད། ལྷག་དོན་འགྲན་ཞུགས་ཀྱི་བརྩམས་ཆོས་དག་གིས་བོད་ཡིག་ཡིག་གཟུགས་ཀྱི་ཕྱི་མོ་སོ་སོ་དང་འབྲི་སྟངས་སྣ་ཚོགས་མཚོན་ལ། དེ་དང་ཆབས་ཅིག་ཏུ་བོད་ཡིག་འབྲི་སྟངས་གསར་བའི་མཚོན་དཔེ་ཡང་སྐོར་ཞིག་བྱུང་ཡོད་སྟབས། དེ་སྔར་སྤེལ་པའི་ཡིག་གཟུགས་འགྲན་སྡུར་དག་དང་བསྡུར་ཚེ། རེབ་འདིར་སྤྱི་ཚོགས་སྟེང་གི་ཡིག་མཁན་སོ་སོས་བོད་ཀྱི་ཡིག་གཟུགས་ལ་བཟུང་བའི་དུངས་བརྩེ་ཟབ་མོ་རང་ཤུགས་ཀྱིས་མཚོན་འདུག་པར་མ་ཟད། ཉེ་བའི་ལོ་འགའི་རིང་བོད་ཡིག་ཡིག་གཟུགས་ལ་ཕྱོགས་གང་ཐད་ནས་ཡར་རྒྱས་དང་གྲུབ་འབྲས་བྱུང་དང་འབྱུང་བཞིན་པའང་མཐོང་ཐུབ། དེའི་ཕྱིར་ཐེངས་འདིའི་ཡིག་གཟུགས་འགྲན་སྡུར་ནི་བོད་ཡིག་ཡིག་གཟུགས་ཀྱི་བསྡུ་ཉར་དང་འགྲེམ་སྤེལ་གྱི་བྱ་བ་རྒྱ་ཆེན་པོ་ཞིག་ཡིན་པས། དེ་ཉིད་རྒྱལ་ཁའི་ངང་ལེགས་འགྲུབ་བྱུང་བ་འདིས་བོད་ཀྱི་ཡིག་གཟུགས་སྔར་ལས་ཕུན་ཚོགས་དར་རྒྱས་སུ་འགྲོ་བར་སྐུལ་འདེད་ཀྱི་ནུས་པ་ངེས་ཅན་ཞིག་ཐོན་ཡོད།
|
|
