བོད་ཀྱི་བཟོ་རིག་པའི་ཁོངས་གཏོགས་སུ་གྱུར་བའི་ཡིག་གཟུགས་སྒྱུ་རྩལ་ལ་འཕེལ་རྒྱས་ཀྱི་རྣམ་པ་གསར་པ་ཞིག་འབྱུང་བཞིན་ཡོད་པའི་དེང་གི་དུས་འདིར། བོད་པ་རྒན་དར་གཞོན་གསུམ་གྱི་ནང་དུ་ཡིག་གཟུགས་ལ་དོ་སྣང་བྱེད་མཁན་ཇེ་མང་ནས་ཇེ་མང་དུ་འགྲོ་བཞིན་ཡོད། ཡིག་གཟུགས་དོན་གཉེར་ཅན་ཞིག་ལ་མཚོན་ན། སྣག་འགྲོས་ཁོ་ན་མ་ཡིན་པར་དེ་དང་འབྲེལ་ཡོད་ཀྱི་གཞུང་ལུགས་ཤེས་བྱ་བློ་ལ་ངེས་རྒྱུ་དེ་ཡང་ཧ་ཅང་དགོས་གལ་ཆེ་བར་མཐོང་བས། མདོ་དབུས་ཁམས་གསུམ་གྱི་ཡིག་གཟུགས་ལ་དགའ་ཞེན་གནང་མཁན་གྱི་གྲོགས་པོ་ཡོངས་ལ་དམིགས་ཏེ། ངེད་འཕྲིན་སྟེགས་ཀྱིས་བོད་ཀྱི་ཡིག་མཁན་ཆེན་མོ་རྒན་སྤེན་ནོར་ལགས་གདན་ཞུ་ཞུས་པ་ལྟར། བོད་ཀྱི་བཟོ་་རིག་པའི་ཁོངས་གཏོགས་ཀྱི་ཡི་གེའི་གཟུགས་དང་འབྲེལ་ཡོད་ཀྱི་ཤེས་བྱ་ཁག་དྲི་བ་དྲིས་ལན་གྱི་ལམ་ནས་རྒྱ་ཆེའི་གྲོགས་པོ་ཡོངས་ཀྱི་སྤྱན་ལམ་དུ་རིམ་བཞིན་འབུལ་རྒྱུ་ཡིན་པས། ཡིག་གཟུངས་ལ་དོ་སྣང་གནང་མཁན་གྱི་གྲོགས་པོ་ཡོངས་ལ་ཡིག་གཟུགས་དང་འབྲེལ་བའི་དྲི་བ་གང་ཡོད་ང་ཚོའི་འཕྲིན་སྟེགས་ལ་བསྐུར་རོགས་གནང་དང་། རྒན་ལགས་ནས་གནང་བའི་ཁྱེད་ཀྱི་དྲིས་ལན་འཕྲིན་སྟེགས་སུ་སྤེལ་ངེས་ཡིན།
སློབ་དཔོན་ཐུ་མིས་གཟབ་མ་དང་བཤར་མའི་གཟུགས་མཉམ་དུ་བཟོས་སམ་ཇི་ལྟར་ཡིན།
དེ་ལ་ཞ་ལུ་ལོ་ཆེན་སོགས་ཀྱིས་རྗེས་སུ་དཔག་པའི་རིགས་པས་ཐུ་མིས་ལཉྩ་ལ་དཔེ་བལྟས་ནས་གཟབ་མའམ་དབུ་ཆེན་དང་། ཝརྟུ་ལ་དཔེ་མཛད་དེ་བཤར་མའམ་དབུ་མེད་མཛད་ཅེས་གཟབ་བཤར་གཉིས་དུས་མཉམ་དུ་མཛད་པར་བཞེད་ཅིང་། བཞེད་ཕྱོགས་འདི་འཐད་ལྡན་དུ་འདོད་པའང་མང་མོད། རང་ལུགས་ཐུ་མིའི་སྐུ་དུས་གཟབ་མ་ལས་བཤར་མ་མེད་ཅིང་། གཟབ་མ་མགྱོགས་བྲིས་ལས་བཤར་མ་རང་བཞིན་གྱིས་ཐོན་པར་འདོད་པ་ཡིན། གལ་ཏེ་ཐུ་མིས་གཟབ་བཤར་གཉིས་དུས་གཅིག་ཏུ་མཛད་ན། བཤར་མའི་ཡིག་གཟུགས་བརྐོས་པའི་བཙན་པོའི་སྐབས་ཀྱི་རྡོ་རིང་ངམ། བྲག་བརྐོས་སམ། ལུགས་སུ་བླུགས་པའི་ཅོང་གི་ཡི་གེ་ལྷག་ལུས་རེ་ཟུང་ཡོད་དགོས་པ་ལ། གཏན་ནས་སྣང་དུ་མེད་པར་ཐམས་ཅད་གཟབ་མའི་གཟུགས་འབའ་ཞིག་ཡིན་པའི་གཏན་ཚིགས་ཅི། དེས་ན་བཤར་མའི་གཟུགས་ནི་བཤར་མ་ཞེས་པའི་མིང་དོན་ལྟར་གཟབ་མ་བཤར་བཤར་བྲིས་པ་ལས་ཐོན་པའི་བྲིས་གཟུགས་ཡིན་པས་དེ་ལྟར་ཐོགས་ཤིང་། རྒྱུ་མཚན་དེའི་དབང་གིས་བཙན་པོའི་རྒྱལ་རབས་ཀྱི་དུས་མཇུག་ཏུ་བྲིས་པའི་བྲག་དང་རྡོ་བར་བརྐོས་པའི་ཡི་གེ་དང་། ཏུན་ཧོང་ཤོག་དྲིལ་ཡི་གེ་སོགས་མང་པོ་ཞིག་གཟབ་མ་བཤར་ནས་བྲིས་ཏེ་གཟབ་བཤར་གཉིས་ཀྱི་བར་གནས་ལྟ་བུའི་ཉམས་འགྱུར་ཡོད། དེ་བཞིན་རིགས་པས་དཔྱད་ན་བཤར་མའི་བྲི་རྒྱུན་རྙིང་མ་མང་པོར་གཟབ་མ་མགྱོགས་པར་བྲིས་པའི་རྟགས་མཚན་ཤིན་ཏུ་གསལ་པོ་ཡོད་པ་ནི་བྲིས་ལ་རྒྱུས་མངའ་ཡོད་པ་ཀུན་གྱིས་མཁྱེན་ནུས་པ་ཡིན། གཞན་ཡང་མཁས་དབང་དགེ་འདུན་ཆོས་འཕེལ་དང་། ཚེ་ཏན་ཞབས་དྲུང་གཉིས་ཀྱིས་དེའི་ཐད་རྣམ་པར་བཀྲ་བའི་རིགས་འདེད་གནང་བ་ཙམ་དུ་མ་ཟད། མཐོང་གྲོལ་ཡིག་དཔེའི་ཐོག་ནས་ར་སྤྲད་དེ་གཟབ་མ་མགྱོགས་བྲིས་ལས་བཤར་མ་བྱུང་ཚུལ་གྱི་སྡོམ་ཚིག་བཞག་པ་ཡིན། གཞན་བོད་དུ་ཡིག་གཟུགས་ཀྱི་རྣམ་གྲངས་མི་འདྲ་བ་བརྒྱ་སྐོར་ཡོད་པ་དེ་དག་ལས་བྲི་སྲོལ་རྙིང་པ་ཀུན་ཐུ་མིས་བཏོད་པར་འདོད་དགོས་ན་དོན་དངོས་ལས་རྣམ་པར་འཁྱམས་སོ། །
|
|
