གཅིག ཡིག་གཟུགས་འབྲུ་ཚ་འདི་རྒྱལ་དབང་ལྔ་བའི་སྐབས་ནས་ཡུན་གྱིས་དར་བ་ཡིན་གསུང་འདུག དེའི་སྔོན་ལ་ཡོད་དམ་མེད་ལན་ཞིག་གསུང་རོགས་ཞུ།
ལན། འབྲུ་ཚ་ནི་བོད་ཡིག་གཤར་མའི་མཆོག་གྱུར་འབྲུ་མ་ལས་མཆེད་པ་ཡིན་ཞིང་། དེ་ཡང་འབྲུ་ཆེན་འབྲུ་ཆུང་གཉིས་ཀྱི་འབྲི་སྲོལ་དར་འཕེལ་བྱུང་བ་ལས་ཆགས་པའི་ཡིག་གཟུགས་སྤྱིའི་མིང་ཡིན་པ་ལས་དེང་སང་གི་འབྲུ་ཚ་ཞབས་ཐུང་མ་གཅིག་པུར་གོ་མི་རུང་། དེས་ན་འབྲུ་ཚ་དུས་ནམ་ཞིག་ལ་དར་བ་རེད་ཟེར་ན་འདི་ལ་བཤད་ཚུལ་མང་ཡང་ང་རང་གིས་ནི་བསྟན་པ་སྔ་དར་གྱི་དུས་མཇུག་ཙམ་དུ་འབྲུ་ཚའི་འབྲི་སྲོལ་གྱི་མགོ་འབུས། དུས་རབས་བཅུ་གསུམ་པ་ཡས་མས་སུ་དར་རྒྱས་བྱུང་། དུས་རབས་བཅུ་བདུན་ནས་ཉི་ཤུའི་བར་ཤིན་ཏུ་དར་རྒྱས་སུ་བྱུང་བའི་དུས་སྐབས་གསུམ་ཡོད་པར་འདོད་དོ། །
ཕྱོགས་དང་པོ་ནི་དེང་གི་ཨབ་གྷ་ནི་སི་ཐན་གྱི་ཝལ་ཏིའི་ཡུལ་ནས་བྱུང་བའི་རྡོ་བརྐོས་ཡི་གེ་ཞིག་དེ་སྔ་འབྲུ་གུང་བ་དཀོན་མཆོག་བསྟན་འཛིན་ཀུན་བཟང་འཕྲིན་ལས་ལྷུན་གྲུབ་མཆོག་གིས་གསར་ཞིབ་བྱས་པའི་ཡིག་ཆ་དེར། ༄།། ཞང་ལོན་ཆེན་པོས་བྲྀས། ཞེས་དང་། ཡང་ཕ་བོང་གཞན་ཞིག་ཏུ། སྟོང་དཔོན་ལྡོམ། ཞེས་པའི་ཡིག་འབྲུ་དེ་དག་ནི་དེང་སང་གི་འབྲུ་ཚ་ཞབས་ཐུང་མ་དང་འབྲི་ཚུལ་ཐད་ཁྱད་པར་མ་མཆིས་ཤིང་། ལྷག་པར་"སྟོང་"གི་འབྲི་ཚུལ་ནི་འབྲུ་ཚ་རང་ཡིན་འདུག་པ་དེས་སོ། །
ཕྱོགས་གཉིས་པ་ནི་དུས་རབས་བཅུ་བ་བཅུ་གཉིས་སུ་རྩ་བའི་ལྡན་ཡིག་འབྲུ་ཆེ་ཆུང་དང་འབྲི་ཚུལ་ལོགས་སུ་ཡོད་པའི་ཚེག་བྲིས། ཟླུམ་བྲིས། འབའ་ཧོ་སོགས་འབྲུ་ཚའི་རིགས་ཇི་སྙེད་པ་བྱུང་ཡོད་ལ། དེ་ཡང་འབྲུ་ཚ་ལ་དེ་དུས་འབྲུ་མ་དང་འབྲི་ཚུལ་མི་འདྲ་བའི་ཡི་གེ་བཅོ་བརྒྱད་ཡོད་པར་ཤེས་བྱ་ཀུན་ཁྱབ་ཏུ་གསུངས། ས་སྐྱའི་དུས་ནས་བཟུང་འབྲུ་ཚ་ཞབས་རིང་ཐུང་འབྲིང་གསུམ། སྒོང་ཞབས་མ་དང་བཅས་པ་ཧ་ཅང་དར་བས་འབྲུ་ཚའི་བྲིས་རྒྱུན་ཕུན་སུམ་ཚོགས་པ་བྱུང་ཞིང་། འབྲུ་ཚ་ཞེས་པའང་། རྩ་བའི་འབྲུ་མ་ལས་མཆེད་པའམ་དེའི་ཚ་བོ་ཡིན་པས་མིང་དེ་ལྟར་ཐོགས་པར་མཁས་པ་རྣམས་གསུངས་སོ།།
ཕྱོགས་གསུམ་པ་ནི་དགའ་ལྡན་ཕོ་བྲང་གི་དུས་ནས་འབྲུ་ཚ་སོགས་ཡིག་རིགས་སྤྱི་ལ་དར་ཁྱབ་བྱུང་ཞིང་། རྒྱལ་དབང་ལྔ་བའི་ཕྱག་བྲིས་འབྲུ་ཚ་ཞབས་རིང་མས་མཚོན་གཞུང་ཡིག་ཏུ་ཡིག་རྒྱུན་འདི་བཀོལ། ལྷག་པར་གོང་ས་བཅུ་གསུམ་པའི་སྐབས་འབྲུ་ཚ་ཞབས་ཐུང་མ་ནི་གཞུང་བྲིས་ཀུན་ལས་མཆོག་ཏུ་གྱུར་གཤིས་མང་པོ་ཞིག་གིས་དེ་ལ་དཔག་ནས་འབྲུ་ཚ་ནི་དགའ་ལྡན་ཕོ་བྲང་གི་སྐབས་ནས་གཟོད་དར་བར་འདོད་པའི་འཁྲུལ་སྣང་བྱུང་བ་རེད།
ཞེས་པའང་གཙོས་ཤེས་རབ་རྒྱ་མཚོས་ཁུངས་དང་ལྡན་པར་བསྡུར་ཏེ་ཟླ་ ༧ པའི་ཚེས་ ༡༨ ཀྱི་མཚན་མོར་ངལ་གསོའི་ལྷོངས་སུ་ལན་དུ་ཕུལ་བའོ།།
|
|
