ཡིག་གཟུགས་འབྲི་བའི་ཤེས་བྱ།
ཡིག་གཟུགས་འབྲི་བའི་སྦྱོང་བརྡར་ནི། ཡུན་རིང་སྙུགས་་བསྲིངས་ཀྱི་བྱ་བ་ཞིག་ཡིན་པས། འཚབ་འཚུབ་སྣང་མེད་ཅན་ལ་འབྲས་བུ་ཐོབ་མི་སྲིད། དེ་ཡང་ལས་དང་པོ་བས་སྦྱང་ཤིང་སྣག་ཚ་བརྡབ་རྐྱལ་སྨྱུ་གུ་ལྟེབ་གྲི་སོགས་ཉེ་མཁོ་ཚང་བར་བྱས་ལ། སྲོལ་རྒྱུན་ལྟར་ན་དཀྱིལ་ཀྲུང་སྡོད་པའི་པུས་མོ་གཡོན་མར་སྦྱང་ཤིང་གི་ལག་འཇུ་འཁེལ་བ་བྱས་ནས་དཀར་ཐིག་འདེབས་པ་དང་། ལག་གཡས་ཀྱིས་སྨྱུག་རིལ་བཟུང་ཞིང་རོ་སྟོད་ཧ་ཅང་གུག་པ་མ་ཡིན་པར་མཛུབ་མོ་ཐ་མ་གསུམ་བསྐུམས་ཤིང་མཐེ་བོང་དང་ཀེར་མཛུབ་གཉིས་པོས་སྨྱུག་རིལ་མཉེན་ཆ་ལྡན་པོས་བཟུང་ནས་མ་ཤོར་བ་དང་། ཕྲ་སྦོམ་སྐབས་བསྟུན་རན་པ། སྣག་རྫོབ་མེད་པར་ཁམས་དྭངས་པ། འཁྱོག་པོར་མ་སོང་བ་ཀ་དཔེ་ལ་བསྟེན་ནས་བྲི། ཡིག་རུས་འབྱོངས་པོ་བྱུང་མཚམས་ཟློས་ཧྲལ་དང་། དེ་ནས་ཡ་བཏགས་ར་བཏགས། ཚུགས་རིང་། ཚུགས་ཐུང་། ཤོག་ཐོག ཚུགས་ཐུང་། ཚུགས་ཆུང་། འཁྱུག་མ་ཚུགས་རྣམས་རིམ་པར་སྦྱོང་ཞིང་། དེ་ལྟར་གཟུགས་ཆེ་བ་ནས་ཆུང་བར་བསྒྱུར་བའི་འབྲི་སྟངས་བསླབས་ཚུལ་འདི་ཡང་ཐུན་མོང་མ་ཡིན་པ་ཞིག་སྟེ་གོ་རིམ་དེ་བརྒྱུད་དགོས་པ་དང་། སྤྱི་བཏང་ན་བྱིས་པའི་སྐབས་འབྲི་སྦྱོང་བྱེད་པ་ཡིན་པས་གཟུགས་པོ་འཚར་ལོངས་ཀྱི་འཕྲོད་བསྟེན་དང་མཐུན་པའི་སྡོད་སྟངས་ཤིག་ཆེ།གོང་གསལ་གྱི་གཟུགས་ཆེ་ཆུང་སྣ་ཚོགས་ལ་འབྲི་ཚུལ་ཁྱད་པར་བྱེ་བྲག་རྣམས་ཀ་དཔེ་དང་དགེ་རྒན་གྱི་མན་ངག་ལས་ཤེས་དགོས། སྤྱི་བཏང་རང་ཅག་ཡིག་མཁན་གྱིས་འཕྲིན་ཡིག་འབྲི་བ་དང་། ཟིན་བྲིས་བཏབ་པ། རྩོམ་འབྲི་བ་སོགས་དབུ་སྨད་བསྟེན་པ་ཡིན་པས། དབུ་སྨད་ཀྱི་ཡིག་གཟུགས་སྙོམས་ལེགས་སུ་འབྲི་བ་ལ་གོམས་པར་བྱེད་པ་གནད་ཆེ་ཞིང་། དེ་ཡང་ཁ་རྒྱུན་དུ་དང་པོ་ཨེ་ཡོང་བལྟ། དེ་ནས་ཨེ་མཛེས་བལྟ། མཐར་ཨེ་མགྱོགས་བལྟ་ཞེས་པ་ནི་རྒྱུ་མཚན་ལྡན་པ་ཞིག་ཏུ་སྣང་། དབུ་སྨད་འབྲི་སྦྱོང་སྐབས་གལ་ཆེ་བ་རུས་པ་ཐིག་གི་རྣམ་བཞག་དང་། ཤ་ཉམས་བཏོན་ཚུལ། མཛེས་ཉམས་བཏོན་ཚུལ་སྐོར་སྡོམ་ཚིག་ཏུ་གསལ་ལ། དབུ་ཆེན་གྱི་སྐོར་འདིར་མ་སྤྲོས་སོ། །
རྩོམ་ཁུངས།
དཔེ་མིང་། བརྡ་སྤྲོད་གཞུང་ལ་འཇུག་པའི་ཉམས་སྣང་།
དཔེ་སྐྲུན་ཁང་། བོད་ལྗོངས་མི་དམངས་དཔེ་སྐྲུན་ཁང་ ༼ ༡༩༩༧ལོར་པར་དུ་བསྐྲུན།༽
རྩོམ་པ་བོ། བཀྲ་ཐང་འཇམ་དཔལ་ཡེ་ཤེས་རྒྱལ་མཚན།
རྩོམ་སྒྲིག་པ། སྟག་ཐར་དང་ཧེ་རམ་པ།
|
|
