ཁུལ་ཡོངས་ཀྱི་ཆུང་འབྲིང་སློབ་མའི་བོད་ཀྱི་ཡིག་གཟུགས་འགྲན་སྡུར་སྐབས་དང་པོ་སྤེལ་བའི་
གསལ་བརྡ།
རྒྱ་ཆེའི་དགེ་སློབ་དང་ཁྱིམ་བདག་ལྷན་རྒྱས།
རེབ་འདིར་ཁུལ་རིག་རྩལ་ལྷན་ཚོགས་དང་ཁུལ་སློབ་གསོ་ཅུའུ་ཡི་དབུ་ཁྲིད་འོག ངེད་མཐུན་ཚོགས་ཀྱིས་ཁུལ་ཡོངས་ཀྱི་ཆུང་འབྲིང་སློབ་མ་ཀུན་ལ་ཕྱོགས་ནས་བོད་ཀྱི་ཡིག་གཟུགས་འགྲན་སྡུར་ཞིག་སྤེལ་འཆར་ཡིན་པས། འབྲེལ་ཡོད་དོན་ཚན་དག་ཕྲེང་ལ་བསྟར་ན་གཤམ་ལྟར།
གཅིག འགྲན་ཞུགས་རྣམ་གྲངས་ལ་དབུ་ཅན་དང་དབུ་མེད་ཀྱི་སྐོར་གཉིས་དང་། དེ་ཡང་སློབ་ཆུང་དང་སློབ་འབྲིང་གི་ཚན་ཁག་གཉིས་སུ་དབྱེ་ཡོད།
གཉིས། བརྩམས་ཆོས་ཀྱི་ནང་དོན་ནི་ལེགས་ཉེས་བླང་དོར་གྱི་གནས་ཀུན་གསལ་བར་བྱེད་པའི་མི་ཆོས་བསླབ་བྱ་དང་། རང་སོ་སོའི་སློབ་རའི་རིག་གནས་མངོན་པར་མཚོན་ནུས་པའི་བརྗོད་བྱ་གང་རུང་།
གསུམ། བརྩམས་ཆོས་ཀྱི་ཆེ་ཆུང་ཁྲེ་ཙི་བཞི（65cm×65cm）ཅན་ཡིན་ན་ཚད་དང་རན་ཞིང་། འབྲི་ཤོག་ལ་རྒྱུན་ལྡན་གྱི་ཤན་ཤོག་བཙོས་མ（熟宣）དང་འབྲི་སྨྱུག་ནི་སློབ་ཆུང་གི་ཚན་ཁག་མ་གཏོགས་ངེས་པར་དུ་ཤིང་སྨྱུག་སྤྱོད་དགོས།
བཞི། འགྲན་ཞུགས་བརྩམས་ཆོས་རེ་ལ་ངེས་པར་དུ་མཛུབ་སྟོན་དགེ་རྒན་རེ་མཁོ་ལ། དེ་ནི་སློབ་མ་གང་དེའི་བརྩམས་ཆོས་ཀྱི་རྒྱུ་སྤུས་དང་ནང་དོན་སྐོར་ལ་ཁག་ཐེག་ཐུབ་པ་ཞིག་དགོས།
ལྔ། བརྩམས་ཆོས་དག་2017ལོའི་སྤྱི་ཟླ་9བའི་ཚེས10ཉིན་གྱི་ཡར་སྔོན་ལ་འདི་གའི་གཞུང་སྒྲུབ་ཁང་དུ་འབྱོར་དགོས་ཤིང་། འདིར་ཆེད་དུ་ཞུ་རྒྱུ་ཞིག་ལ། ཐེངས་འདིའི་འགྲན་ཞུགས་བརྩམས་ཆོས་ཡོད་དོ་ཅོག་ངེས་པར་དུ་སློབ་གྲྭའི་ངོས་ཐད་ནས་བསྐུར་དགོས་པ་ལས་མི་སྒེར་གྱི་དེ་ལ་དང་ལེན་མེད།
དྲུག བརྩམས་ཆོས་བསྐུར་ཡུལ་ཀན་ལྷོ་ཁུལ་སྲིད་གྲོས་ཨུ་ཡོན་ལྷན་ཁང་གི་403ཡིན་ལ། བྱ་འགུལ་འདིའི་གྲ་སྒྲིག་ཚོ་ཆུང་གི་ཚོགས་མི་སྐལ་བཟང་དོན་གྲུབ་དང་འཇམ་དཔལ་ཚེ་ལོ་ལ་བསྐུར་ཀྱང་ཆོག
འབྲེལ་གཏུག་ཁ་པར། སྐལ་བཟང་དོན་གྲུབ། 13893909995
འཇམ་དཔལ་ཚེ་ལོ། 18209411636
དེ་མིན། མཇུག་མཐའི་དཔྱད་འདེམས་བརྒྱུད་སློབ་གྲྭ་ཆུང་འབྲིང་གི་ཚན་ཁག་སོ་སོའི་དབུ་ཅན་དང་དབུ་མེད་ཀྱི་སྐོར་ལ་རིམ་པ་བཞིན་ཨང་དང་པོ་གཅིག་དང་གཉིས་པ་གཉིས། གསུམ་པ་གསུམ་དང་རྟིང་སྐུལ་ལྔ་། ཕུལ་བྱུང་མཛུབ་སྟོན་པ་གཉིས་དང་ཕུལ་བྱུང་རྩ་འཛུགས་སྡེ་ཁག་གཅིག་བཅས་གཟེངས་རྟགས་དང་བྱ་དགའི་ཡན་ལག་ཀྱང་གྱ་ནོམ་པ་རེ་གྲ་སྒྲིག་བྱས་ཡོད་པ་དང་བཅས།
ཀན་ལྷོ་ཁུལ་བོད་ཀྱི་ཡིག་མཁན་མཐུན་ཚོགས་དང་།
ཁུལ་ཡོངས་ཀྱི་ཆུང་འབྲིང་སློབ་མའི་བོད་ཀྱི་ཡིག་གཟུགས་འགྲན་སྡུར་སྐབས་དང་པོའི་གྲ་སྒྲིག་ཚོ་ཆུང་གིས་གུས་ཕུལ།
|
|
