བོད་རིག་པ་ཞེས་པའི་ཡང་སྙིང་དང་སྲོག་ཤིང་ནི་ཆོས་སྡེ་ཆེན་པོ་བྱང་ཉི་མ་བླ་བྲང་ལྟ་བུ་ཡིན་དང་ཡིན་པས་མདོ་སྔགས་རིག་གནས་བཤད་ག་ལ་དགོས། ཐ་ན་ཡིག་གཟུགས་གཅིག་བུར་མཚོན་ན་བསུབ་ཏུ་མེད་པའི་བཀའ་དྲིན་བསྐྱངས་ཡོད་པར་ཤེས་ཆེད་ཉིན་མོ་འདི་དང་བསྟུན་ནས་དེའི་སྐོར་འཕྲལ་མར་བྲིས་ན་བསམ་བྱུང་། དེ་གང་ཞེ་ན། ཀུན་མཁྱེན་བླ་མ་འཇམ་དབྱངས་བཞད་པ་དེ་ཉིད་ཀྱི་སྐུ་ཕྲེང་གཉིས་པ་སྐྱབས་མཆོག་རྗེ་འཇིགས་དབང་བོའི་རིང་གདན་ས་རང་དུ་དཔར་རྐོའི་རྒྱུན་གསར་དུ་བཙུགས་པ་ཡིན་པས་ཡིག་འབྲི་བ་དང་ཞུ་དག་པ། པར་བརྐོ་བ་སོགས་ཕྱོགས་སོ་སོ་ནས་གདན་དྲངས་པ། ནང་སྒོས་ཁོང་གི་ཞབས་ཕྱིར་དུ་ཕེབས་པའི་དྲུང་ཡིག་པ་ཆོས་གྲགས་ཟེར་བས་ཡིག་རིགས་མང་བོ་བསླབ་པར་མ་ཟད། དཔར་ཡིག་གྲ་དག་ཅིང་ངོས་གཙང་བར་འབྲི་བ་སོགས་གང་ལའང་གཟབ་ནན་ཡིན་པས་རྗེས་སུ་དཔར་ཁང་ཆེན་མོའི་དོ་དམ་པ་སོང་། ནང་སྒོས་སུ་ད་ལྟའི་དབུ་ཆེན་དང་། ལཉྫ་ལྦརྟི་བཅས་ཀྱི་འབྲི་རྒྱུན་སྤེལ་བས་ཁོང་བཀའ་དྲིན་ཆེ་བར་མདོ་སྨད་ཆོས་འབྱུང་དུ་གསུངས། དབུ་མེད་དམ་ཡིག་ནག་ནི། དཔལ་མང་དཔོན་པོ་ངག་དབང་རྒྱ་མཚོ་ཞེས་པ་རིག་གནས་ཐམས་ཅད་ལས་ཀྱང་རྩིས་ལ་མཁས་པ། དཔོན་མོ་ཨེར་ཁེ་ཤ་ར་དབུས་ཕེབས་དུས་ཀྱི་གཞུང་གིས་མངགས་པའི་བླ་སྨན་དང་དྲུང་ཡིག་ཞུས། དེ་ནས་དབུས་ནས་བོད་པ་བི་ཅི་ཅི་ཟེར་བའི་མདུན་ས་ནས་ཡི་གེ་བསླབས་པས་ད་ལྟ་བཀྲ་ཤིས་འཁྱིལ་གྱི་ཡིག་ནག་གི་སློབ་རྒྱུན་ཀྱང་འདི་ལས་བརྒྱུད་པ་ཡིན་ནོ། །ཞེས་ཆོས་འབྱུང་དུ་གསལ་བར་གསུངས་པ་བཞིན་མི་ལོ་གཉིས་བརྒྱ་དང་བརྒྱད་ཅུ་རྩ་གྲངས་ཀྱི་ལོ་རྒྱུས་འདུག དུས་འདི་ནས་བཟུང་ཐོས་གླིང་གི་གྲྭ་བ་ཡིན་ནའང་དབུ་མའི་འཛིན་གྲྭར་སླེབས་མཚམས་ནས་རིག་གནས་གཙོས་པའི་ཡིག་གཟུགས་དང་པར་རྐོའི་ལག་རྩལ་སྦྱང་སྲོལ་ཡོད་པར་རྣམ་ཐར་དང་ཆོས་འབྱུང་དུ་གསུངས་པའོ། །
དེ་མཚུངས་སུ་ཀུན་མཁྱེན་ལྔ་བ་ཆེན་པོ་རྗེ་བཙུན་བློ་བཟང་འཇམ་དབྱངས་ཡེ་ཤེས་བསྟན་པའི་རྒྱལ་མཚན་མཆོག་དབུས་ཉི་མ་ལྷ་ས་ནས་ཕྱིར་གདན་སར་འབྱོར་ནས་གྲྭ་ཚང་སོ་སོའི་འགྲིག་ལམ་དག་ཐེར་གནང་བ་དུས་མཚུངས་སུ་བླ་བྲང་ཐུབ་བསྟན་ཕོ་བྲང་དུ་སྤྱི་ལོ1942ལོར་གྲྭ་བཙུན་སློབ་གྲྭ་ཞིག་ཆེད་གཉེར་གྱིས་གསར་དུ་བཙུགས། མིང་ལ་འདི་ཞེས་རྣམ་ཐར་དང་ལོ་རྒྱུས་སོགས་སུ་མ་རྙེད་མོད། ངེད་ཅག་སར་ནས་བསྟན་པའི་རྒྱལ་མཚན་སློབ་གྲྭ་ཟེར། ལ་ལས་བླ་བྲང་རྩེ་སློབ་གྲྭ་ཟེར། གང་ལྟར་སློབ་གླིང་འདིར་ལྔ་བ་ཆེན་པོ་རང་གིས་སློབ་དཔོན་གྱི་འགན་དང་། ཧྲིན་ཅིན་ཞིན་སློབ་སྟོན་པ་བསྐོས། འོན་ཀྱང་ཁོས་སློབ་སྟོན་གྱི་ལས་ཀ་བསྐྱུར་བས་ཧྭང་མེད་ཞིན་ནམ་བསོད་ནམས་རྒྱ་མཚོ་（ཧོ་པེ་ཞིང་ཆེན་དུ་འཁྲུངས་ཤིང་། ཆིན་ཧྭ་སློབ་གྲྭ་ཆེན་མོ་ནས་མཐར་ཕྱིན། བླ་བྲང་བཀྲ་ཤིས་འཁྱིལ་དུ་ཆོས་གྲྭར་ལོ་དྲུག་ལ་འགྲིམ། རྗེས་སུ་པེ་ཅིན་དཔེ་མཛོད་ཆེན་མོར་ཕྱག་ལས་མཛད།）ཞེས་པ་སློབ་སྟོན་པའི་འགན་བཞེས་སུ་བཅུག དེ་མིན་ཨ་ཁུ་དམུ་དགེ་ཚང་སློབ་གྲྭའི་དགེ་རྒན་དུ་བསྐོས། བསླབ་གཞི་ལ་རྩིས་རིགས་དང་རྒྱ་ཡིག ཚན་རིག་གི་རྒྱུན་ཤེས་སོགས་ཐུན་མོང་བའི་སློབ་ཚན་བཙུགས་པ་གཞིར་བྱས། རིམ་པས་ཚད་མའི་དཔེ་ཁྲིད་ཀྱང་བསྣན། དེ་བས་ཀྱང་ཁོང་ལྔ་བ་ཆེན་པོས་དབུས་ནས་གདན་དྲངས་པའི་དགེ་རྒན་རྩེ་དྲུང་ཐུབ་བསྟན་བསྟན་འཛིན་ལགས་ལ་འདི་སྐད་དུ། པད་དཀར་འཆང་བ་སྲོང་བཙན་སྒམ་པོའི་སྒྱུ་འཕྲུལ་རོལ་བ་ལས་གྲུབ་པའི། །ལྷ་ལྡན་ཕུན་ཚོགས་དགེ་བཅུའི་འབྱུང་གནས་ངོ་མཚོར་ཞིང་དེར་ལས་སྨོན་གྱིས། །སྐྱེས་པ་ཁྱོད་ཀྱིས་མདོ་སྨད་ལྗོངས་འདིའི་ཡིག་རིགས་སོར་འདུ་བསྒྱུར་རྣམས་ཀྱི། །སྙེམས་པ་འཕྲོག་པའི་ཡིག་རིས་ས་བོན་ཕྱོགས་འདིར་སྤེལ་བ་ཆིག་བརྩོན་མཛོད། །ཞེས་སྐུལ་བ་ལྟར་དགེ་རྒན་ཁོང་གི་བཀའ་དྲིན་ལས་གཅིག་ལས་གཅིག་བཟང་གི་ཡིག་འབྲི་བ་མང་དུ་བྱུང་བ་ལས་རེ་ཟུང་གཤམ་གསལ་ལྟར།
༼ ༡ ༽ དྲུང་ཡིག་སྨོན་ལམ་ནི་འབོ་རའི་ལོ་ཡག་ཐང་ནས་འཁྲུངས། བཀྲ་ཤིས་འཁྱིལ་དུ་རབ་ཏུ་བྱུང་ནས་རིམ་པས་སློབ་གྲྭའི་སློབ་མ་གྱུར། དེ་ནས་ཆོས་གྲོགས་ཚོ་དང་ལྷན་དུ་དབུས་ནས་གདན་དྲངས་པའི་ཡིག་གཟུགས་དགེ་རྒན་རྩེ་སློབ་གྲྭའི་མཐར་ཕྱིན་དྲུང་ཐུབ་བསྟན་བསྟན་འཛིན་ལགས་ཀྱི་མདུན་ས་ནས་ལོ་ངོར་དྲུག་གི་ཡུན་ལ་རྩེ་སློབ་གྲྭར་དར་སྲོལ་ཆེ་བའི་དབུ་མེད་ཀྱི་གཟུགས་རིས། སུག་རིང་སུག་ཐུང་། འབྲུ་ཚ་དང་ཚེགས་ཆུང་། རྒྱུག་འབྲི་དང་འཁྱུགས་འབྲི་སོགས་དཔྱིས་ཕྱིན་པ་བསླབ་ནས་ཨང་རིམ་དང་པོ་ཐོན་པ་འདི་ལྟ་སྟེ། རྣམ་ཐར་སྐལ་བཟང་འཇུག་ངོགས་ལས། སློབ་གྲྭའི་སློབ་མ་རྣམས་ཀྱི་ལན་ལྦར་གཟབ་གཤར་དང་ཧོར་ཡིག་སོགས་སྦྱང་འབྲས་ཀྱི་ཡིག་ཚད་གཟིགས། དགེ་རྒན་རྣམས་ལ་སྲུང་མདུད་དང་དར་ནང་མཛོད་རེ་བདག་སྐྱེས་དང་། ཡིག་རིས་ཨང་དང་པོ་ཐོན་པའི་སྨོན་ལམ་ལ་འཇམ་དར་ཁྲེ་གསུམ་དང། སྲུང་མདུད། ཤིང་ཐོག་སོགས་གསོལ་རས་སུ་བསྩལ། ཞེས་པའོ། ། དེ་མིན་ཁོང་སྐྱབས་མཆོག་འཇིགས་མེད་དབང་བོའི་རིང་བླ་བྲང་དགོན་པར་ཕྱག་རྒྱུན་བཙུགས་པའི་དེ་རྗེ་དམེ་དགེ་བསམ་གཏན་ཚང་གི་མདུན་ན་བསླབས་པར་རང་གིས་བྲིས་པའི་ཡིག་གཟུགས་བློ་གསལ་སྦྱི་ནོར་གྱི་སྔོན་འགྲོའི་གཏམ་དུ་གསུངས། མིང་ཙམ་མ་ཡིན་པར་དཔྱིས་ཕྱིན་པར་བསླབས་པ་ཁོང་གི་བརྩམས་ཆོས་དག་གིས་བོད་ཀྱི་ཁམས་ཆེན་མོར་ཡིག་གཟུགས་ཀྱི་མ་ཕྱི་ལྟ་བུའི་ནུས་པ་ཐོན་པས་ཀྱང་ཤེས། དེ་ནས་ཀུན་མཁྱེན་དྲུག་པ་ཆེན་མོས་བཀས་མངགས་པ་བཞིན་དྲུང་ཡིག་པ་བྱས། 1990ལོར་༼ ཡིག་གཟུགས་བློ་གསལ་སྤྱི་ནོར ༽ཞེས་པ་རྩོམ་གནང་མཛད་ནས་རྔ་བ་ཁུལ་རྩོམ་སྒྱུར་ཅུས་ཀྱིས་དཔེ་བསྐྲུན་གནང་། དེ་མིན༼ ཐོན་མིས་བོད་ཡིག་བཟོས་པའི་ལོ་རྒྱུས ༽ དང་ ༼ བོད་ཡིག་ཡིག་བསྐུར་རྣམ་བཞག ༽ སོགས་ཉེ་བར་མཁོ་བ་འགའ་ཕྱག་རྩོམ་གནང་། ། ཞ་དང་ཞོར་དུ་སྒྲ་རྩིས་སྙན་ངག་དང་སུམ་རྟགས་དག་གསུམ་སོགས་ཀྱི་དཔེ་ཁྲིད་གང་མང་གནང་། ད་ལྟའི་དུས་ན་དག་ཡིག་མཁས་པ་དགའ་སྐྱེད་ཀྱི་སྒྲ་ཐག་ཡོད། གཞན་གཙོས་མི་རིགས་སློབ་གྲྭའི་དགེ་རྒན་དང་སློབ་གཙོ་ལོ་མང་རིང་བཞུགས་པ་སོགས་ཀྱིས་མཚོན་པའི་བོད་སྤྱི་ལ་བསུབ་ཏུ་མེད་པའི་ལག་རྗེས་བཞག
༼ ༢ ༽ ནང་བསྟན་སློབ་གྲྭའི་དགེ་རྒན་དང་བླ་བྲང་དགོན་པའི་དོ་དམ་ཁང་གི་དྲུང་ཡིག་པ་ཨ་ཁུ་སོག་པོ་དཀོན་མཆོག་རྒྱ་མཚོ་ནི། མ་ལྷོ་སོག་རྫོང་དུ་འཁྲུངས་ཤིང་ཐོས་བསམ་གླིང་གི་ཆོས་གྲྭར་ཞུགས། ཚོགས་ཆེན་ཞལ་ངོ་དང་སློབ་མ་སྐུ་ཚེ་གང་བོར་བསྐྱངས། ཁོས་ནི་དཔལ་ལོ་ཙྰ་བའི་བྲིས་རྒྱུན་དབུ་ཅན་ཡིག་གཟུགས་སྣང་གསལ་སྒྲོན་མེ། མཁས་དབང་དཔའ་རིས་རབ་གསལ་དང་གུང་ཐང་ཚུལ་ཁྲིམས་ཀྱི་དབུ་མེད་བྲིས་རྒྱུན་བསྐྱངས། སྒོས་སུ་ནང་བསྟན་སློབ་གྲྭའི་དགེ་རྒན་དུ་ཕེབས་ནས་ཡིག་འབྲི་བ་མང་བོ་བསྐྱངས།
༼ ༣ ༽ རྒྱུད་སྟོད་པ་ཨ་ཁུ་འཇམ་དབྱངས་དཔལ་ལྡན་ནི་གླེས་དྲུག་དུ་འཁྲུངས། ཀུན་མཁྱེན་ཡོངས་འཛིན་རྗེ་དཀོན་མཆོག་བསམ་འགྲུབ་ཚང་དགེ་རྒན་དུ་བསྟེན། སྒྲའི་མཚམས་སྦྱོར་ལྔ་བའི་ཟིན་བྲིས་ཤིག་ཡོད་རབས་འདུག
༼ ༤ ༽ ཐང་དཀར་འཇིགས་མེད་རྒྱ་མཚོ་ནི་ཡིག་རིགས་སྣ་ཚོགས་ལ་མཁྱེན་རྒྱ་ཡངས་ཤིང་བླ་བྲང་དགོན་པའི་ཆོས་སྲིད་སྐོར་གྱི་བོད་རྒྱ་ཤན་སྦྱར་མ་ཞིག་རྩོམ་གནང་ཡོད་རབས་སྐད། དེ་མིན་ལོ་བཞི་ལས་སློབ་ཡུན་མེད་པའི་སློབ་གླིང་འདི་ནས་ཆོས་རྒྱལ་སྲོང་བཙན་སྒམ་་པོའི་རྣམ་ཐར་ཟློས་གར་གཙོས་པའི་ཡིག་རིགས་ཀྱི་འབྲས་བུ་གཟེངས་སུ་ཐོན་པ་བླངས་ཡོད། འདིའི་སྐོར་ཞིབ་མོར་གཞན་དུ་བྲིས་ཡོད་པས་གཟིགས།
ཉིན་མོ་འདི་དང་བསྟུན་ནས་འཕྲལ་མར་ཡོན་ཏན་དུ་འབོད་པས་བྲིས་པ་དགེའོ། །
|
|
