རྒྱལ་ཡོངས་བོད་ཀྱི་ཡིག་གཟུགས་དུས་ཆེན་ཉིན་མོའི་ལེགས་སྐྱེས་ཐོག་མའམ་མདོ་སྨད་ཀན་ལྷོ་བོད་རིགས་རང་སྐྱོང་ཁུལ་བསང་ཆུ་རྫོང་མི་རིགས་མཐུན་སྒྲིལ་གོང་སྤེལ་གྱི་རིག་གནས་སྣེ་ཁྲིད་ལས་གཞིའི་ཡ་གྱལ།གུང་ཐང་བསྟན་པའི་སྒྲོན་མེའི་ཆུ་ཤིང་བསྟན་བཅོས་བོད་རྒྱ་ཡིག་གཟུགས་ཞལ་ཐང་རིང་མོའི་བཤམ་སྟོན་མཛད་སྒོ༢༠༡༧ལོའི་ཟླ༤ཚེས་༣༠ཉིན།མདོ་སྨད་བླ་བྲང་བཀྲ་ཤིས་གཡས་སུ་འཁྱིལ་བའི་གནས་མཆོག་དམ་པ་ནས་གཟབ་རྒྱས་ངང་སྤེལ་བ་རེད།
ཐེངས་འདིའི་ཡིག་གཟུགས་བཤམ་སྟོན་གྱི་བྱ་འགུལ་ནི་བསང་ཆུ་རྫོང་འཐབ་ཕྱོགས་ཅིག་གྱུར་པུའུ་དང་། རྫོང་དྲིལ་བསྒྲགས་པུའུ། ཀན་ལྷོ་ཁུལ་བོད་ཀྱི་ཡིག་མཁན་མཐུན་ཚོགས་བཅས་ནས་གཙོ་སྒྲུབ་མཛད་ཅིང་། བསང་ཆུ་རྫོང་འཛུགས་སྐྲུན་གཞུང་ལས་ཁང་། རྫོང་རིག་གནས་རྒྱང་སྒྲོག་ཅུའུ། རྫོང་ཡུལ་སྐོར་ལྗོངས་རྒྱུད་ཅུའུ་སོགས་ཀྱིས་སྒྲུབ་འགན་ཁུར་ལ། རྫོང་རྡོ་རྗེ་རྩེ་དགུ་རིག་གནས་དར་སྤེལ་འགན་འཁྲི་ཚད་ཡོད་ཀུང་སི་དང་བླ་བྲང་དམངས་སྲོལ་བཤམ་སྟོན་ཁང་གི་རོགས་སྒྲུབ་འོག་སྤེལ་བ་ཡིན།
ཡིགས་གཟུགས་བཤམ་སྟོན་འཆར་འགོད་དང་གྲ་སྒྲིག་ལས་ཀ་སྤྱི་ལོ་༢༠༡༦ལོའི་ཟླ་བཅུ་བ་ནས་མགོ་བརྩམས་པ་དང་། རྗེ་འཇིགས་མེད་དཔལ་ལྡན་རྒྱ་མཚོ་མཆོག་གིས་ཡིག་གཟུགས་བཤམ་སྟོན་གྱི་ཆོས་ཕྱོགས་མཛུབ་སྟོན་གནང་བ་མ་ཟད། འཐབ་ཕྱོགས་ཅིག་གྱུར་པུའུ་ཀྲང་རྟ་མགྲིན་སྐྱབས་དང་དྲིལ་བསྒྲགས་པུའུ་ཀྲང་ཚེ་རིང་སྐྱིད་རྣམ་གཉིས་ནས་སྤྱི་ཁྱབ་འཆར་འགོད་བྱས་ཤིང་། ཁུལ་ཡིག་གཟུགས་མཁས་པ་མཐུན་ཚོགས་ཀྱི་ཚོགས་གཙོ་རྒན་སངས་རྒྱས་བཀྲ་ཤིས་དང་། ཀན་སུའུ་ཞིང་ཆེན་ནང་བསྟན་སློབ་གླིང་གི་རྒན་ཟམ་ཚ་བ་ཚེ་རིང་དོན་གྲུབ། ཀན་ལྷོའི་བྲིས་པ་རྡོ་བྷ་དང་འཇིགས་མེད་བཅས་ཀྱིས་ཞིབ་ཆའི་འཆར་འགོད་མཛད་པ་མ་ཟད། བོད་ཡུལ་མདོ་དབུས་ཁམས་གསུམ་གྱི་ཡིག་མཁན་༤༠ལྷག་གིས་བྲིས་གནང་མཛད་པའི་རྒྱུད་ལྡན་ཡིག་གཟུགས་མི་འདྲ་བ་ལྷག་ལ་བརྩམས་ཆོས་ཞལ་ཐང་༡༣༠ལྷག་འདུས་ཡོད།
བཤམ་སྟོན་ནང་དོན་གྱི་ཆ་ནས། གུང་ཐང་བསྟན་པའི་སྒྲོན་མེའི་ཆུ་ཤིང་བསྟན་བཅོས་གཙོ་བོར་བཟུང་ཐོག་བོད་རྒྱ་ཡིག་གཟུགས་གཉིས་ཀྱི་ཞལ་ཐང་རིང་མོ་དང་།སློབ་དཔོན་ཐོན་མི་ཨ་ནུའི་ཞལ་ཐང་དང་གུང་ཐང་བསྟན་པའི་སྒྲོན་མེའི་ཞལ་ཐང་བཅས་ཡིན།
ཁྱད་པར་དུ་གཅིག་གྱུར་གྱི་འགྲོ་གྲོན་དང་གཅིག་གྱུར་གྱི་ཤོག་ངོས་ཇུས་འགོད།གཅིག་གྱུར་གྱི་བོད་ལུགས་གོང་གཤམ་སོགས་གཅིག་གྱུར་གསུམ་གྱི་བྱ་ཐབས་ལ་བརྟེན་ནས་མི་རིགས་རང་གི་སྲོལ་རྒྱུན་རིག་གནས་རྒྱུན་འཛིན་དང་ཕྱི་རབས་སྐལ་ལྡན་དག་ལ་བྲིས་ཀྱི་བག་ཆགས་ཟབ་མོ་འཇོག་པའི་དམིགས་ཡུལ་གཙོ་བོར་བཟུང་པའི་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་སྐབས་དང་པོར་ཕུལ་པའི་ཡིག་གཟུགས་ཀྱི་མཆོད་པ་ཞིག་ཡིན།
ཐེངས་འདིའི་ཡིག་གཟུགས་བཤམ་སྟོན་མཛད་སྒོར་ཕེབས་པའི་སྐུ་མགྲོན་གཙོ་བོ་དང་། ཁུལ་ཡོངས་ཀྱི་ཡིག་གཟུགས་མཁས་པ་དང་ས་གནས་ཡིག་གཟུགས་དགའ་ཞེན་པ་75ལྷག་ལྷན་འཛོམས་བྱུང་བ་ཡོད་པ་རེད།
|
|
