སངས་རྒྱས་རྡོ་རྗེའམ་ལྷུན་སྨྱུག་སྲས།
སངས་རྒྱས་རྡོ་རྗེའམ་ལྷུན་སྨྱུག་སྲས་ནི་སྤྱི་ལོ་༡༩༨༧བོད་ལྗོངས་ལྷོ་ཁ་གྲྭ་ནང་རྫོང་དཀྱིལ་རུ་ཤང་། རོག་དཀར་ཞེས་པའི་ཡུལ་དེའི་ལྷུན་རབ་ཚང་དུ་སྐྱེས་ཤིང་། རང་ལོ་དགུ་ནས་ཡུལ་དེའི་དཀྱིལ་རུ་ཤང་གི་སློབ་ཆུང་དུ་བསྐྱོད། ཕྱིས་སྤྱི་ལོ་༢༠༠༢ལོར་གངས་ལྗོངས་རྡོ་རྗེ་གདན་དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ཁང་དུ་ཆོས་ཞུགས་བྱས་ཤིང་། དེ་ནས་འདོན་ཆོས་སྤྱོད་དང་བོད་ཀྱི་ཡིག་གཟུགས་སོགས་ལ་མི་ལོ་བཅུ་ཕྲག་ལྷག་ཙམ་སྦྱངས་པ་བྱས། སྤྱི་ལོ་༢༠༡༡ལོ་ནས་ད་བར་བསམ་ཡས་ཁྲི་སྲོང་ལྔ་རིག་ནང་བསྟན་སློབ་གླིང་དུ་ནང་བསྟན་རིག་གནས་དང་། ཡིག་གཟུགས་ལ་སོགས་པར་སྦྱོང་བ་བྱེད་མུས་སུ་མཆིས། དེ་སྔོན་ཡིག་གཟུགས་འབྲི་བའི་རྒྱུད་རིམ་ཁྲོད། སྤྱི་ལོ་༢༠༡༡ལོར་ལྷོ་ཁར་སྤེལ་བའི་ལོ་ངོ་དྲུག་ཅུའི་འཕོ་འགྱུར་ཞེས་པའི་ཡིག་གཟུགས་འགྲན་བསྡུར་སྐབས་དཀར་མཛེས་ཨ་ཡིག་ཐོག་ནས་འཁྱུག་ཡིག་དང་དབུ་ཅན་འབྲུ་ཚ་བཅས་ལ་ཨང་གསུམ་པ་ཐོབ། སྤྱི་ལོ་༢༠༡༢ལོར་ལྷོ་ཁ་ནས་སྤེལ་བའི་འཕོ་འགྱུར་ཞེས་པའི་ཡིག་གཟུགས་འགྲན་བསྡུར་ནང་གང་བློ་མའི་ཐོག་ནས་དབུ་ཅན་ལ་རིམ་པ་གཉིས་པ་ཐོབ་པ་མ་ཟད། དེ་མིན་གྱི་སློབ་གླིང་དུ་སྤེལ་བའི་ཡིག་གཟུགས་འགྲན་བསྡུར་ཁྲོད་ཨང་རིམ་དང་པོ་ཐེངས་མང་ཐོབ་ཅིང་སླར་ཡང་རྩེ་སློབ་གྲྭའི་ཡིག་མཁན་ཆེན་མོ་སྙེ་འཕྲིན་ལས་རྒྱལ་མཚན་ལགས་ཀྱི་དྲུང་ལ་གཏུག་ནས་དབུ་ཅན་སྙེ་བྲིས་དང་ཅོག་གྲྭ་རིན་པོ་རིན་པོའི་སྐུ་མདུན་ནས་དབུ་མེད་དབུས་བྲིས་ཚུགས་རིང་དང་ཚུགས་ཐུང་སོགས་སྦྱོང་ཞིང་མཆིས། རང་ཉིད་ཆེས་དགའ་ས་ནི་རང་མི་རིགས་ཀྱི་རིག་གཞུང་སྤྱི་དང་ལྷག་པར་བོད་ཀྱི་ཡིག་གཟུགས་ཡིན་ནོ། །
|
|
