ཡིག་མཁན་རྟ་མགྲིན་མགོན་པོ་འོས་སྦྱོར།
རྟ་མགྲིན་མགོན་པོ་ནི་༡༩༧༢ལོར་མདོ་སྨད་ཀན་ལྷོ་བོདརིགས་རང་སྐྱོང་ཁུལ་ཀླུ་ཆུ་རྫོང་གི་ཁོངས་གཏོགས་ཟམ་ཚ་ཞང་ཀ་དེའུ་མགོ་སྡེ་བ་ནས་སྐྱེས། ༡༩༨༤ལོར་ཀླུ་ཆུ་རྫོང་བོད་རིགས་སློབ་འབྲིང་གི་སྒོ་ཐེམ་ལ་ཞུགས་ནས་སྐྱབས་རྗེ་དམ་པ༧རྒྱ་ནག་པ་སྐུ་ཕྲེང་བཞི་བ་ཡོན་ཏན་དམ་ཆོས་བསྟན་པའི་ཉི་མ་ཚང་གིས་རྗེས་སུ་བཟུང་ཞིང་བུ་བཞིན་བསྐྱངས། སློབ་འབྲིང་གི་སྐབས་སུ་གྲངས་རིག་དགེ་རྒན་ཧྥ་ཀྲུང་ཞུན་ལགས་ཀྱི་བོད་ཡིག་ཡིག་གཟུགས་འབྲི་རྩལ་དང་ལྷག་པར་དུ་ཁོང་གི་པིར་སྨྱུག་ཁ་ལེབ་མོ་ཅན་གྱི་ཡིག་གཟུགས་སྒྱུ་རྩལ་གྱིས་དུང་བ་བསྐྱེད་ཅིང་ཆེས་ཐོག་མའི་བག་ཆགས་ཟབ་མོ་ཞིག་བཞག
༡༩༩༠ལོར་གཙོས་མི་རིགས་མཐོ་རིམ་དགེ་ཐོན་མཐོ་རིམ་ཆེད་གཉེར་སློབ་གླིང་（དེང་ཀན་སུའུ་མི་རིགས་སློབ་གླིང་）ཏུ་རྒྱུགས་འཕྲོད་པ་དང་། བོད་ཀྱི་ཡིག་གཟུགས་མཁས་པའི་ཁྱུ་མཆོག༧དྲུང་ཡིག་སྨོན་ལམ་ཚང་གི་ཐུགས་སྲས་དགེ་རྒན་རིན་པོ་ཆེ་སངས་རྒྱས་བཀྲ་ཤིས་ལགས་ལ་བསྟེན་ནས་བོད་ཡིག་དབུ་ཅན་དང་སུག་རིང་། སུག་ཐུང་། འབྲུ་ཚ། རྒྱུགས་བྲིས་བཅས་ལ་སྦྱངས་བ་ནན་གྱིས་བྱས་པས་དགེ་རྒན་དང་སློབ་གྲོགས་རྣམས་པའི་བསྔགས་བརྗོད་ཐོབ་པ་མ་ཟད། སློབ་གྲྭའི་ཡིག་གཟུགས་འགྲན་བསྡུར་ཁྲོད་བོད་ཡིག་ཡིག་གཟུགས་སྐོར་གྱི་ཨང་དང་པོའི་བྱ་དགའ་ཡང་ཐོབ་མྱོང་།
༡༩༩༣ལོར་སློབ་མཐར་ཕྱིན་རྗེས། ཀླུ་ཆུ་རྫོང་བོད་རིགས་སློབ་འབྲིང་ནས་དགེ་རྒན་གྱི་ལས་ཀ་གཉེར་པ་དང་། ལས་ཞོར་དུ་སློབ་གྲྭ་ཡོངས་ནས་ཡིག་གཟུགས་དཔེ་ཁྲིད་ཀྱི་ལས་འགན་ཁུར་ཏེ་སྐལ་ལྡན་སློབ་བུ་གང་མང་བསྐྱངས། སྐབས་དེར་རྫོང་རིམ་པའི་ཡིག་གཟུགས་འགྲན་བསྡུར་ཁྲོད་བོད་ཡིག་སྐོར་གྱི་ཨང་དང་པོ་ཐོབ་མྱོང་།
༡༩༩༨ལོའི་སྔ་རྗེས་སུ་ཀན་ལྷོ་ས་ཁུལ་གྱི་སྒེར་གཞུང་གང་ཐད་ན་གློག་ཀླད་བོད་ཡིག་ཕབ་འཇུག་མ་ལག་དཀོན་པའི་གནས་ཚུལ་འོག ཁོང་གིས་འཇམ་དབྱངས་བོད་ཡིག་ཕབ་འཇུག་མ་ལག་གསར་བཟོ་མཛད་པ་མ་ཟད། དེར་བསྟུན་གྱི་གློག་ཀླད་ཡིག་མཛོད་གསར་དུ་བཟོས་པས། ཀླུ་ཆུ་རྫོང་དང་རྨ་ཆུ། བསང་ཆུ་སོགས་ཀྱི་བོད་ཡིག་བཀོལ་སྤྱོད་ལས་ཁུངས་མང་པོ་དང་དགོན་སྡེ་ཁག་ལ་བོད་ཡིག་ཕབ་འཇུག་མ་ལག་གི་དཀའ་ཁག་སེལ་ཐུབ་པ་བྱུང་།
༡༩༩༩ལོར་རང་རྫོང་གི་དམའ་རིམ་སློབ་གསོ་ཁྱབ་བརྡལ་གཏོང་བའི་བྱ་བའི་དགོས་མཁོར་དམིགས་ནས་ཁོང་རྫོང་སློབ་གསོ་ཅུས་ལ་ལས་གནས་སྤོར། ཉིན་དེ་ནས་བཟུང་ཁོ་རང་དཔེ་ཁྲིད་སྟེགས་བུ་དང་ཁ་བྲལ་ནའང་མི་རིགས་སློབ་གསོ་དང་ཡིག་གཟུགས་སྒྱུ་རྩལ་ཐད་ཀྱི་འཚོལ་སྙེག་གི་གོམ་མཚམས་མ་བཞག་པར་རྫོང་བོད་རིགས་སློབ་འབྲིང་སོགས་ནས་བོད་ཀྱི་ཡིག་གཟུགས་དཔེ་ཁྲིད་གལ་ཆེན་དུ་འཛིན་པའི་སློབ་གཙོའི་རེ་བ་མ་བཅག་པར་གཟའ་ཉི་མ་དང་ངལ་གསོའི་དུས་ཚོད་སྤྱད་ནས་རྫོང་བོད་རིགས་སློབ་འབྲིང་དུ་འཛིན་གྲྭ་སྐོར་ཞིག་ལ་ཡིག་གཟུགས་དཔེ་ཁྲིད་བྱས།
དེང་སང་ཁོ་བོས་ལས་ཞོར་དུ་རང་གི་མི་ཚེའི་དགའ་ཕྱོགས་ཀྱི་རྒྱུན་བསྐྱངས་ནས་བོད་ཀྱི་ཡིག་གཟུགས་སྒྱུ་རྩལ་ལ་སྦྱངས་བ་ལྷོད་མེད་དང་།ལྷག་དོན་བོད་ཀྱི་ཡིག་གཟུགས་པ་དག་ལ་ཡིག་གཟུགས་སློབ་སྦྱོང་དང་དར་སྤེལ་གཏོང་བའི་གར་སྟེགས་ཀྱི་ཚུལ་དུ་བོད་ཀྱི་ཡིག་གཟུགས་དྲ་བ་གསར་སྤེལ་བྱས་ནས་གྲོགས་པོ་གང་མང་གི་རྒྱབ་སྐྱོར་འོག་བོད་ཀྱི་ཡིག་གཟུགས་སྒྱུ་རྩལ་དར་རྒྱས་ལ་ནུས་པ་ཕྲ་མོ་ཙམ་ཡང་འདོན་ཐུབ་ན་སྙམ་པའི་ཀུན་སློང་དང་བཅས་འབད་པ་ལྷུར་ལེན་བྱེད་བཞིན་མཆིས།
དང་པོ། མཆོད་བརྗོད་ཀྱི་ཚུལ་དུ་བོད་ཀྱི་སྲོལ་རྒྱུན་ཡིག་གཟུགས་ཁག་དཔེ་མཚོན་དུ་བཀོད་པ།
གཉིས་པ་སྣ་ཚོགས་བརྩམས་ཆོས་རི་མོའི་རིག་བྱེད།
ཡིག་གཟུགས་གི་ཐོག་མའི་དགེ་རྒན་༧རྗེ་རྒྱ་ནག་པ་ཡོན་ཏན་རྒྱ་མཚོ་དམ་ཆོས་བསྟན་པའི་ཉི་མ་ལགས་ཀྱིས་བདག་ལ་བྲིས་པའི་བརྩམས་ཆོས་རྩ་ཆེན།
བོད་ཡིག་ཡིག་གཟུགས་དགེ་རྒན་རྒན་སངས་རྒྱས་བཀྲ་ཤིས་ལགས་ཀྱིས་འགྲེམ་སྟོན་ལ་གནང་པའི་ཕྱག་བྲིས་རྩ་ཆེན།
སྙེ་བྲིས་དགེ་རྒན་སྙེ་འཕྲིན་ལས་རྒྱལ་མཚན་ལགས་ཀྱིས་གནང་པའི་ཕྱག་བྲིས་རྩ་ཆེན།
ལན་ཝར་དགེ་རྒན་ཆོས་འཁོར་བསྟན་འཛིན་རྒྱ་མཚོ་ལགས་ཀྱིས་འགྲེམ་སྟོན་ལ་གནང་པའི་བརྩམས་ཆོས་རྩ་ཆེན།
|
|
