དང་པོ། ཞང་ཞུང་གི་ཡི་གེ་ཇི་ལྟར་དར་བའི་ཚུལ།
ཞང་ཞུང་གི་ཡི་གེ་ནི་བོན་གྱི་ལོ་རྒྱུས་རྣམས་སུ་སྟོན་པ་གཤེན་རབ་མི་བོ་བྱ་བས་གསར་བཏོད་བྱས་པར་གྲགས་ཤིང་། དེ་དུས་རབས་གང་ཞིག་ལ་བྱོན་མིན་ནི་སྣ་ཚོགས་སྨྲ་སྟེ། བོན་གྱི་ལོ་རྒྱུས་《བོན་འབྱུང་》དུ། སྟོན་པ་འདས་ནས་ལི་ཤུ་འཁྲུངས། དེ་དགུང་ལོ་ཉིས་སྟོང་ལྔ་བརྒྱ་བཞེས་དུས་ཆུ་ཕག་ལོ་ལ་ཁྲི་སྲོང་གིས་བོན་བསྣུབས་པའི་དབུ་ཟུག་གོ། ཞེས་པར་གཞིར་བྱས་ནས་ལ་ལས་གཤེན་རབ་མི་བོ་འཁྲུངས་ནས་ས་འབྲུག་༼༡༩༨༨༽ལོའི་བར་དུ་ལོ་གྲངས་༣༨༤༥ལོན་ཞིང་། དེ་ནས་ད་ལྟའི་རབ་གནས་ཤིང་ལུག་༼༢༠༡༥༽གི་བར་གྱི་ལོ་༢༧བསྣན་པས་ལོ་༣༨༧༢ལོན་པར་བཤད་པ་དང་། གོང་གི་ཡིག་ཆ་ལྟར་གྲི་གུམ་བཙན་པོའི་སྐབས་སུ་གཤེན་རབ་བྱུང་ནས་ད་བར་ཧ་ལམ་ལོ་༡༦༠༠ཡས་མས་ལོན་པར་བཤད་པ། ཡང་བདག་ཅག་གི་སྟོན་པ་དང་དུས་མཉམ་པའི་མི་སྣ་ཞིག་ཡིན་ཚུལ་བཤད་པ། ཡང་དུས་རབས་བདུན་པ་དང་བརྒྱད་པའི་སྐབས་ཙམ་ལ་བྱོན་པའི་མི་སྣ་ཡིན་པར་བཤད་པ་སོགས་གང་ལྟར་ནའང་གཤེན་རབ་མི་བོ་བྱ་བ་ཞིག་ལོ་རྒྱུས་ཐོག་བྱུང་མྱོང་བ་ནི་ལོན་ཏོན་དུ་ཉར་བའི་ཏུན་ཧོང་ཡིག་ཆ་ཨང་730བ་དང་། ཧྥ་རན་སིའི་ཏུན་ཧོང་ཡིག་ཆ་ཨང་pt1068,1134;1136;
1194;1289བཅས་སུ་གཤེན་རབ་དང་གཤེར་རབ། ཡང་ན་གཤེན་རབ་མྱི་བོ་ཞེས་པའི་མིང་མི་འདྲ་བ་དྲུག་ཙམ་ཐོན་ཡོད་པས་ལོ་རྒྱུས་མི་སྣ་དངོས་ཤིག་ཡིན་པ་ནི་ཡིད་རྟོན་རུང་བ་ཉིད་དོ། །
དེ་ལྟ་བུའི་སྟོན་པ་གཤེན་རབ་ནི་བོན་གྱི་ལོ་རྒྱུས་སྲིད་པ་སྤྱི་མདོས་ལས། ཡ་གིའི་སྐྱིད་པོའི་ཡུལ། ། ཉམས་དགའ་བག་རེ་བྲོ། །ཆུ་རྒྱལ་བཞི་འདུས་མགོ། །རི་རྒྱལ་ཏེ་སེའི་མདུན། །མཚོ་རྒྱལ་མ་ཕམ་འགྲམ། ། འོལ་ལུང་གཡུ་ཡི་མཁར། །བཞུགས་གནས་ངོ་རེ་མཚར། །ཞེས་བཤད་པ་ལྟར་གངས་ཏི་སེ་དང་མ་ཕམ་གཡུ་མཚོའི་ཉེ་འཁོར། ད་ལྟའི་མངའ་རིས་ས་ཁུལ་པུ་རངས་སུ་ཡབ་དམུ་རྒྱལ་ཐོད་དཀར་དང་། ཡུམ་རྒྱལ་བཞད་མ་གཉིས་ཀྱི་སྲས་སུ་འཁྲུངས་པར་བཤད་ཅིང་། ཁོང་ལ་སློབ་མ་སྲས་གཏོ་བུ་འབུམ་སངས་དང་དཔྱད་བུ་ཁྲི་ཤེས། སྲས་ལུང་འདྲེན་གསལ་བ། རྒྱུད་འདྲེན་སྒྲོན་མ། འོལ་དྲུག་ཐང་བོ། མུ་ཆོ་ལྡེམ་དྲུག གཡུང་དྲུང་དབང་ལྡན། རྒྱལ་སྲས་འཕྲུལ་བུ་ཆུང་སྟེ་སྐུའི་སྲས་བརྒྱད། གཞན་ཐུགས་སྲས་རྨ་ལོ་གཡུ་ལོ། གསུང་སྤྲུལ་ཡིད་ཀྱི་ཁྱེའུ་ཆུང་། ཚངས་པ་གཙུག་ཕུད། མཚན་ལྡན་འ་ཞ། འཛམ་གླིང་རྒྱན་དྲུག་སོགས་མཐའ་ཡས་པ་ཡོད་པར་བཤད་ཅིང་། དེ་དག་གིས་རྒྱ་གར། རྒྱ་ནག ཕྲོམ། སྟག་གཟིག བོད་དང་ཞང་ཞུང་རྣམས་སུ་སྒོ་བཞི་མཛོད་ལྔས་མཚོན་པའི་བོན་སྒོ་མ་ལུས་བསྒྱུར་འཆད་ཀྱིས་དར་སྤེལ་མཛད་པར་གྲགས།
དེ་དག་ལས་སྟོན་པ་གཤེན་རབ་མཚན་ལྡན་གྱི་སློབ་མ་བཞི་དང་བཅས་ཞང་ཞུང་ཡུལ་ནས་ད་ལྟའི་ལྷོ་ཁ་ཀོང་བོའི་ས་ཁུལ་དུ་ཁོའི་ཆིབས་པ་འབྲུག་རྟས་གཙོས་རྟ་བདུན་བདུད་ཕྲུག་ཤོར་བ་རྐྱ་བདུན་གྱིས་བརྐུས་པའི་རྗེས་འདེད་དུ་ཕེབས་སྐབས། ཀོང་ཡུལ་གྱི་སྡེ་དཔོན་བདུད་ཁྱབ་པ་ལག་རིང་གིས་གཡོ་ཐབས་སྣ་ཚོགས་ལ་བརྟེན་ནས་ངོ་རྒོལ་བྱས་ཀྱང་མཐར་གཤེན་རབ་ཀྱིས་རྫུ་འཕྲུལ་གྱིས་བཏུལ། དེ་ནས་གཤེན་རབ་ཡུལ་གཞན་དུ་གཤེགས་པའི་ཤུལ་དུ་བདུད་རྗེས་གཤེན་རབ་ཀྱི་བཙུན་མོ་རྣམས་ལ་ཕྲ་མ་བཅུག་པས་བཙུན་མོ་བོད་བཟའ་དང་ཀོང་བཟའ་གཉིས་བསླུས་ཏེ་ཁོའི་དཔུང་རོགས་སུ་ཕེབས་པའི་སྲིད་པ་སངས་པོ་འབུམ་ཁྲིའི་ཐུགས་ཀྱི་ཡང་བཅུད་ཡིག་འབྲུ་ཁྲི་འབུམ་ཡོད་པའི་གཏོ་ཡི་བཀའ་སྒྲོམ་མེ་ལ་བསྲེགས་པས། ཡིད་ཀྱི་ཁྱེའུ་ཆུང་གིས་མེ་ལ་ལག་བསྙབས་བྱས་པ་ལས་བེའུ་བུམ་འཚིག་འཕྲོ་སྤར་མོ་གང་ཐོབ་པའི་ནང་དཔའ་བོའི་འབྲུ་ལྔ་མ་འཚིག་པར་ཡོད་པ་ལ་གཞིར་བྱས་ཏེ་གཤེན་རབ་ཀྱིས་ཡི་གེ་གསར་བ་ཞིག་སྲོལ་བཏོད་པ་ནི་རྩ་བའི་ཡི་གེ་སུམ་ཅུ། ཡན་ལག་གི་ཡི་གེ་བརྒྱད་དམ་བཅུ་ཡོད་པའི་འཕྲུལ་ཡིག་བཞི་བཅུ་ཐམ་པ་ཡིན་པར་གྲགས་སོ། །
འཕྲུལ་ཡིག་བཞི་བཅུ་ཇི་ལྟར་ཡིན་མིན་གྱི་སྐོར་ནི་གཤེན་རབ་ཀྱི་རྣམ་ཐར་འབྲིང་བོ་སྟེ་དུས་རབས་བཅུ་གཅིག་པའི་སྐབས་ཙམ་དུ་བརྩམས་པའི་《མདོ་གཟེར་མིག་》ལས། གཏོ་ཡི་བཀའ་སྒྲོ་བདུད་ཀྱིས་ཞུགས་ལ་བསྲེགས། །བྱིན་གྱིས་རླབས་ཀྱིས་དཔའ་བོའི་འབྲུ་ལྔ་ལུས། །སྨོན་ལམ་བཏབས་པས་སུམ་ཅུ་རྩ་བརྒྱད་འཕེལ། ཕྱི་རབས་དོན་དུ་སྒོ་བཞི་མཛོད་ལྔར་བྲིས། །སངས་པོའི་སྙན་དུ་བོན་གྱི་ལྟང་དབུལ་བ། །ཡིག་འབྲུ་སུམ་ཅུས་བོན་གྱི་ཁོག་པ་ཕུབ། །མགོ་ཡིས་ལམ་དྲངས་ཤད་ཀྱིས་མདོ་ཡང་བཅད། །ཚེག་གིས་བར་ཕྱེ་མི་འཁྲུགས་གསལ་བར་སྙོམས། །གུག་འགྲེང་ན་རོ་ཞབས་ཀྱུ་ཡ་ར་སྟ། །སྐབས་སྦྱོར་དོན་དུ་ཡན་ལག་རྒྱས་པར་བཏགས། ། ཞེས་བཤད་པ་ལྟར་གྱི་དཔའ་བོའི་འབྲུ་ལྔ་དང་དེ་ལས་འཕྲུལ་ཡིག་བཞི་བཅུ་གྲོལ་ཚུལ་ནི་བརྡ་སྤྲོད་ཉི་ཤུ་བདུན་པ་རྩ་འགྲེལ་དང་། བརྡ་དག་བློ་གསལ་འཇུག་ངོགས་ཞེས་བྱ་བ་སྦྲ་ཟུར་ཚུལ་ཁྲིམས་ཕུན་ཚོགས་ཀྱིས་བྲིས་པ་ལས། འབྱུང་བ་ནམ་མཁའི་ཁམས་མཚོན་པ་ཨོཾ། རླུང་ཁམས་མཚོན་པ་རཾ། ས་ཁམས་མཚོན་པ་སྲུཾ། ཆུ་ཁམས་མཚོན་པ་ཁཾ། རླུང་ཁམས་མཚོན་པ་ཡཾ། དེ་ལྔ་ལ་དཔའ་བོ་འབྲུ་ལྔ་ཟེར་ཞིང་། དེ་དག་ལས་ནམ་མཁའི་རང་བཞིན་ཨོཾ་ཡིག་ལས་ཀྵ་དང་ཀ་ཁ་ག་ང་ཧ་ཨ་ཨཾ་སྟེ་འབྱུང་བ་ནམ་མཁའི་ཡི་གེ་བརྒྱད། ཡང་ཨེ་དང་ཅ་ཆ་ཇ་ཉ་ར་བྷི་ཥྚ་བརྒྱད་ནི་མེ་ཁམས་རཾ་ལས་བྱུང་བ་དང་། ཨོ་དང་ཏ་ཐ་ད་ན་ལ་ས་མྷིང་བརྒྱད་ནི་ས་ཁམས་སྲུཾ་ལས་བྱུང་། ཨུ་དང་པ་ཕ་བ་མ་ཟ་འ་ཨཿ་བརྒྱད་ནི་ཆུ་ཁམས་ཁཾ་ལས་བྱུང་། ཨི་དང་ཙ་ཚ་ཛ་ཝ་ཡ་ཤ་ཞ་བརྒྱད་ནི་རླུང་ཁམས་ཡཾ་ལས་བྱུང། འབྱུང་བ་རེ་ལ་ཡིག་འབྲུ་བརྒྱད་རེ་བྱས་པས་བཞི་བཅུ་ཐམ་པ་ཡིན་ལ། དེ་དག་ལས་གསལ་བྱེད་སུམ་ཅུ་དང་དབྱངས་ལྔ། ཀྵ་ནི་ཡིག་མགོ། ཥྚ་ནི་ཤད། ཨཿ་ནི་ཚེག བྷི་ནི་ར་སྟ། མྷིང་ནི་ཡ་སྟ་བཅས་ལ་འཕྲུལ་ཡིག་བཞི་བཅུའམ། ཡང་ཤད་དང་མགོ་མ་བགྲངས་པའི་འཕྲུལ་ཡིག་སོ་བརྒྱད་ཅེས་རིགས་གཉིས་བརྩི་སྲོལ་ཡོད།
ཡིག་མགོ་ནི་གཡུང་དྲུང་གི་རིས་ལ་གདན་ཞབས་ཀྱུས་མཚན་པ། ཤད་ནི་ཀླད་དུ་དུང་གི་འཁྱིལ་རིས་ཅན་ལ་མར་དྲང་བོར་འཐེན་པ། ཚེག་ནི་ཟུར་བཞི་ཉིས་བརྩེགས་ཅན། གུག་འགྲེང་ན་རོ་ནི་ཡོངས་གྲགས་ཀྱི་གི་གུ་ཞབས་ཀྱུ་སོགས་དབྱངས་བཞིའི་མཚོན་བྱེད་བཞི། ཡ་སྟ་དང་ར་སྟ་ནི་ཡོངས་གྲགས་བོད་ཡིག་གི་ཡ་རའི་འདོགས་ཏེ་གཟེར་མིག་གི་དངོས་བསྟན་ལ་ཡི་གེའི་གྲུབ་ཆ་གཙོ་བོ་དྲུག་ཙམ་བསྟན་ཡོད་ལ། ལ་ལས་གཟེར་མིག་ཚིག་ཟིན་གྱི་"སྐབས་སྦྱོར་"ཞེས་པས་མགོ་ཅན་གསུམ་དང་སྔོན་རྗེས་སོགས་གང་ལ་གང་འོས་སྐབས་ཐོབ་ཏུ་སྦྱར་དགོས་པ་མཚོན་ཞེས་ད་ལྟའི་བོད་ཡིག་གི་བརྡ་སྤྲོད་ཀྱི་གྲུབ་ཆ་དང་ནུས་པ་ཆ་ཚང་འཛོམས་པའི་ཡི་གེ་ཞིག་བཟོས་པར་བཤད་མོད། གཟེར་མིག་གི་ཚིག་ཟིན་དུ་གྲུབ་ཆ་དྲུག་ཙམ་མ་གཏོགས་བསྟན་མེད་པ་དེས་དོན་ལ་ཞང་ཞུང་གི་ཡི་གེ་དེ་སྔོན་རྗེས་ཡང་གསུམ་དང་ལ་ཝའི་འདོགས། བརྩེགས་པ་རྣམས་མེད་པའི་ཆ་མི་ཚང་བའི་ཡི་གེ་ཞིག་ཡིན་པར་བསྟན་པར་བྱས་ན་རྒྱུ་མཚན་དང་ལྡན་ཏེ། མིན་ན་སྒྲ་སྦྱོར་གྱི་ཡི་གེ་ཕུན་སུམ་ཚོགས་པ་དེ་འདྲ་ཡོད་བཞིན་དུ་ཐོན་མིས་ཡིག་སྲོལ་གསར་བ་ཞིག་སྲོལ་བཏོད་དགོས་དོན་ཅི་ཡང་མེད་དོ། །
|
|
