བོད་ཀྱི་ཡིག་གཟུགས་པ་ལྕགས་མོ་ཕུན་ཚོགས་ཐུབ་ཆེན་ནམ་པད་དཀར་འབངས་ནི༡༩༧༣ལོར་ཟི་ཁྲོན་རྔ་ཡུལ་ཨ་འདུས་ཡུལ་ཚོའི་ཥེ་བ་ལྷ་སྡེ་རུ་སྐྱེས་ཤིང་།རང་ལོ༢༢སྟེང་རབ་ཏུ་བྱུང་ནས་རྔ་ཡུལ་བཀྲ་ཤིས་སྒོ་མང་དགའ་ལྡན་བཤད་སྒྲུབ་འཕེལ་རྒྱས་གླིང་གི་རྨད་བྱུང་ཐོས་བསམ་གླིང་ལ་ཆོས་བཞུགས་མཛད།
ཁོང་གིས་ཆོས་ཞུགས་འདོན་ཆའི་སློབ་གཉེར་གྱི་ཞོར་དུ་འབྲི་ཀློག་སོགས་བོད་ཀྱི་རིགས་གནས་སྤྱི་ལ་རིམ་པས་བྱེད་ཅིང་།ཁྱད་པར་དུ་༧རྗེ་བཙུན་དམུ་དགེ་བསམ་གཏན་ཚང་གི་དངོས་སློབ་བསམ་གཏན་བསྟན་པའི་རྒྱལ་མཚན་གྱི་མདུན་ནས་ལཉྫ་དང་དབུ་ཅན།ཨ་ཁུ་རང་བྱུང་རྒྱ་མཚོ་ལས་སུག་རིང་དང་སུག་ཐུང་། རྒན་སེང་གེ་དར་རྒྱས་ལས་སྡེར་ནང་ས་བྲིས།བོད་ལྗོངས་སློབ་ཆེན་གྱི་རྒན་༧ཞབས་ཤར་ཟླ་བ་ཚེ་རིང་ལས་འབྲུ་ཚ་དང་ཚུགས་མ་འཁྱུག་ལ་སོགས་པ་གཙོ་བྱས་པའི་བོད་ཀྱི་ཡིག་གཟུགས་སྒྱུ་རྩལ་ལ་སློབ་གཉེར་གྱི་དཀའ་བ་སྤྱད་དེ་སྦྱང་འབྲས་མི་དམན་པ་ཞིག་བླངས་པ་ང་ཚོའི་ཕྱི་རབས་དག་གི་མིག་གི་དགའ་སྟོན་དུ་གྱུར།
ད་ལྟ་ཁོང་ཉིད་རྔ་ཡུལ་སྒོ་མང་དགོན་དུ་སློབ་གཉེར་གྱི་བགྱི་བ་དང་དུ་ལེན་ཞོར་ཡིག་གཟུགས་སྣ་ཚོགས་ལ་གཏིང་ཟབ་སློབ་སྦྱོང་དང་།དུས་ཚོད་ཀྱི་ཁོམ་པ་བཙལ་ནས་ཐོན་མའི་མཛུབ་རིས་དང་ཡིག་གཟུགས་གླེང་མོལ། ཁྱུང་སྔོན་རྩོམ་རིག་འཕྲིན་སྟེགས་དང་འདི་ག་བོད་ཀྱི་གཟུགས་དྲ་བ་སོགས་ལ་རྒྱུན་ཞུགས་ཀྱིས་བོད་ཀྱི་རིག་གནས་སྤྱི་དང་།སྒོས་སུ་ཡིག་གཟུགས་སྒྱུ་རྩལ་འདི་ཉིད་འཛིན་སྐྱོང་སྤེལ་གསུམ་ལ་ཐུགས་ཁུར་དང་རྒྱབ་སྐྱོར་གནང་བཞིན་མཆིས།
|
|
