དང་པོ། པར་ཤིང་རྐོ་བྱེད་ཀྱི་ལག་ཆ་ལེགས་པོ་འཛོམས་པ་ནི། རྐོས་ལེགས་པའི་ཆ་རྐྱེན་གཙོ་བོ་ཞིག་སྟེ། པར་ཤིང་རྐོ་བྱེད་ཀྱི་ལག་ཆ་གཙོ་བོར་རྣོ་ངར་དང་ལྡན་པའི་གསེག་གཅོད་ཁ་སྦུབ། གསེག་གཅོད་ཁ་ལོག གསེག་གཅོད་ཁ་ལེབ། གསེག་གཅོད་ཆེ་སག གསེག་གཅོད་པུས་འགུག གསེག་གཅོད་སེན་གཟོང་ལ་སོགས་གསེག་གཅོད་ཀྱི་རིགས་དང་། མིག་འབུག་དང་། བྲག་གྲི་དང་། གདིང་འགུག་དང་། གཞན་ཡང་ལག་ཆ་རིགས་སུ་སྤྱོད་པའི་རྡོ་བརྡར་དང་། སག་བརྡར་དང་། ཀོ་བརྡར་དང་ལག་ཆའི་སྒམ་ཁུག་སོགས་སོ།།
གཉིས་པ། རྐོ་གྲི་རིགས་ཀྱི་བརྡར་ཐབས་ལ། ལག་ཆ་སོ་སོའི་དབྱིབས་མི་འདྲ་བར་བརྡར་སྟངས་གཅིག་གིས་མི་ཆོད་མོད། ལག་ཆ་རང་རང་དང་མཐུན་པའི་བརྡར་ལུགས་རེ་ཡོད་དེ། མིག་འབུག་དང་གདིང་འགུག་གཉིས་གདོང་ནས་ནང་ངོས་དང་། རྒྱབ་ངོས་ནས་སོ་ཁ་ལོན་པར་བརྡར། མེ་ལོང་ཁ་དང་བྲག་གྲི་གཉིས་ལག་པས་བརྡར་རྡོ་བཟུང་སྟེ་རྒྱབ་ངོས་ནས་བརྡར་ཞིང་ནང་ཕྱོགས་ནས་སོ་ཁ་ལོན་པར་བྱ་བ་དང་། གདིང་འགུག་ནི་གྱེན་དུ་བརྡར་དགོས་པ་རྣམས་སོ།
གསུམ་པ། རྐོ་གཞི་ཤིང་གི་རྒྱུ་སྤུས་ལ། གས་སྐྱོན་དང་། རུལ་འཁྱོགས། འཛེར་མ་སོགས་མེད་པའི་ཤིང་མཁྲེགས་པའམ་སྟག་པ་སྟ་བཀས་དང་། ཡང་ན་སོག་ལེས་དྲས་པ་གང་ཡང་རུང་བར་དུ་བའི་ཁར་ཡུན་དུ་བཞག་པ་ནི། ཤིང་མི་གས་ལ་སྲ་ཞིང་མཁྲེགས་པར་གྱུར་པའི་མན་ངག་ཡིན་ལ། སྐམ་ཐག་ཆོད་པ་དང་ཆེ་ཆུང་གང་ལྟར་འདོད་པའི་ཐིག་གིས་དྲངས་ལ་དྲས་པ་དེ་འབུར་ལེན་གྱིས་གཤོང་འབུར་མེད་པར་བྱའོ།།
བཞི་བ། པར་རྩ་འབྲི་སྦྱར་སོགས་བྱེད་ཐབས་ལ། པར་རྩ་འབྲི་གཞི་རབ་བོད་ཤོག་སྲབ་མོ། མ་རྙེད་ན་དེང་དུས་རྒྱ་ནག་གི་སྣག་བྲིས་རི་མོའི་འབྲི་གཞི་མ་ཡིན་པའི་ཞིབ་བྲིས་རི་མོའི་འབྲི་གཞི་ཤན་ཏྲི་ཞེས་པའི་ཤོག་བུ་དེས་ཆོག་ལ། པར་རྩ་འབྲི་མཁན་གྱིས་ཡིག་གཟུགས་ལེགས་འགྲིག་ཆད་ལྷག་ནོར་བ་སོགས་མེད་པའི་པར་རྩ་བྲིས་ཟིན་པ་དང་། གྲོ་ཕྱེ་གསར་བའི་བག་ཆུར་སྤྱིན་འདྲེས་ཙམ་བསྲེས་པ་སླ་མོས་པར་ཤིང་རྐོ་གཞི་ཐོག ཡི་གེའི་ངོས་ཤིང་ལེབ་ལ་བསྟན་ཏེ་ཡ་ཡོ་མེད་པར་ལྷན་སྦྱར་བྱེད། སྐམ་ཐག་མ་ཆོད་གོང་ཙམ་དུ་ལག་མཐིལ་གྱིས་བཅག་མནན་ཡང་ཡང་བྱས་ཏེ་འབྱར་ངེས་སུ་སྦྱར། སྐམ་ཐག་ཆོད་པ་དང་། སྲིང་བལ་ཆུར་སྦངས་པ་དེས་སྦྱར་ཟིན་པའི་པར་རྩའི་རྒྱབ་ནས་བྱུག་ཅིང་། དེའི་ཐོག་རྩམ་པ་དང་ཐལ་བ་གང་རུང་གཏོར་ཏེ་དལ་བུར་ཕྱིས་ན་ཡིག་འབྲུ་དོད་པར་འགྱུར་ལ། དེ་ལ་ཁ་ཅིག་གིས་སྣུམ་བྱུག་ན་ཆོག་པར་ཡང་བཤད་མོད། རྐོ་མཁན་རང་ལ་གང་གོམས་པ་ལྟར་བྱ་ལ། མདོར་ན་ཡིག་འབྲུ་རྣམས་རྡོ་དཀར་སྟེང་སྲན་ནག་བླུགས་པ་ལྟར་བཀྲ་བ་ཞིག་དགོས་ཞེས་སོ།།
ལྔ་བ། ཡི་གེ་བརྐོ་ཐབས། ཤིང་རྐོས་ལག་རྩལ་གྱི་ཐོག་མ་ཆེ་བརྐོ་བྱེད་ཐབས་ལ། གོང་གི་སྟ་གོན་ཐམས་ཅད་གྲུབ་པ་དང་། གསེག་གཅོད་སོ་ཁ་ཅུང་ཟད་མཐུག་པོ་ཞིག་ཆེ་རྐོ་བྱེད་པར། དང་པོ་ཁ་སའམ་རྟ་རའི་ཝ་འཇུར་བཙུགས་རྗེས་ཡི་གེ་ལ་གནོད་པ་མི་ཤོར་བར་གཟབ་བཞིན་དུ་འདིང་འགུག་གིས་གཏིང་ཟབ་ཏུ་ཡང་ཡང་གཞོག་དགོས་ཏེ། འདི་ལ་ཁ་ཅིག་གིས་ཡི་གེ་བརྐོས་ཟིན་རྗེས་སླར་ཁ་ས་རྐོ་བའང་སྣང་ལ། གང་ལྟར་ཡང་ཁ་ས་རྐོ་བར་ཡིག་གཟུགས་ལ་སྐྱོན་མི་ཤོར་བར་ཡིད་འཇོག་བྱེད་གལ་ཆེ། དེ་ནས་ཡི་གེའི་མཐའ་ཐིག་ནང་སྲིད་དུ་གསེག་འགྲོས་ཀྱིས་རྐང་རིང་ཀ་ག་ཉ་ཏ་ད་ན་ཞ་ཤ་ཧ་རྣམས་བྱུང་ཚེ་ཁ་བསྲིང་། ཁ་ཇ་ཐ་ཛ་ཝ་རྣམས་དང་ལ་བཏགས་འབྲུ་ཐུང་བརྩེགས་མ་རྣམས་རྐང་འབྲིང་ཡིན་པས་དེའི་རིགས་ཟབ་རྩེ་འཕྲོད་པ་དང་། ང་ཅ་ཆ་པ་ཕ་བ་མ་ཙ་ཚ་ཟ་འ་ཡ་ར་ལ་ས་ཨ་སྟེ་རྐང་ཐུང་རྣམས་ལ་རྐང་གདན་བཞག དེ་ནས་ཡིག་གཟུགས་རེའི་མཚམས་སུ་གསེག་ཁ་ཡར་བསྐོར་ནས་གཙུག་དགོས་པར། དེའི་སྐབས་བར་ལྷུ་ལེན་དགོས་པའི་ཡི་གེའི་རིགས་ལ། ཅ་ཆ་ཉ་ཏ་མ་ཙ་ཚ་ཧ་བཅས་ཡིག་འབྲུ་བརྒྱད་དང་ཡ་བཏགས་ཞབས་ཀྱུ་གཉིས་བཅས་བཅུའོ། ཡིག་ཕྲེང་ཀུན་གྱི་དབུ་སྟེང་དུ་གསེག་འགྲོས་འགྲོ་དགོས་པར། གུ་གུ་དང་འགྲེང་བུ་ན་རོ་བཅས་སྟེང་གི་ཞྭ་ལྟ་བུའི་དབྱངས་གསུམ་བྱུང་ཚེ། ཡིག་ཕྲེང་གོང་མའི་རྐང་གདན་ཅན་གྱི་རིགས་ལ་ཟབ་རྩེ་སྤྲད་དགོས་པ་ལ་སོགས་ཡིག་འབྲུ་གོང་འོག་དང་། ཁྱིམ་མཚེས་བར་འབྲེལ་བའི་དབང་གིས་འགྱུར་བ་ཤིན་ཏུ་མང་བ་ཤེས་བཞིན་དུ་ཡིག་གཟུགས་རིང་ཐུང་གང་ལ་ཐུག་ཀྱང་། རང་རང་གི་དབྱིབས་ལྟར་ཆེ་སྟེས་ཀྱིས་གྲུ་བཞི་བཟོ་ལྟ་ཐོན་པར་བྱེད་པ་དང་། རྐང་རིང་དང་ཤད་ལ་སྟེས་སྐྱོབ་ཏུ་རྐང་རྩེ་ནས་གཞོག་ཙམ་བྱས་ཏེ་ཡི་གེ་ཐམས་ཅད་གྲུ་བཞི་བཟོ་ལྟ་ཐོན་པ་བྱེད་དགོས། 
དེ་ལྟར་ཆེ་རྐོས་བྱས་ཟིན་པ་དང་། པར་ཤིང་ཧ་ཅང་སྐམ་པ་ལ་ཆུ་འཇམ་དང་། བང་ཅུང་ཟད་ཡོད་པ་ལ་ཆུ་གྲང་གིས་པར་ཤིང་ལ་ནོག་སྐྱོན་མི་ཤོར་བར་སྐྱོགས་ཀྱིས་ཁྱབ་པར་བླུགས་ཏེ་ཕྱི་ངོས་སྐམ་ཙམ་ན་མིག་འབུག་སོགས་ཞིབ་ཚགས་རིགས་རྐོ་བར། མིག་འབུག་གི་ཡི་གེ་ཅ་ཆ་ཉ་ཏ་ཐ་ན་ཙ་ཚ་ཝ་ཞ་འ་ཡ་ལ་ཤ་ཨ་དང་། གི་གུ་ཞབས་ཀྱུ་རྣམས་དང་། ཕྱེད་འབུག་གམ་གཙུག་པའི་མིག་འབུག་གི་ཡི་གེ་ཁ་ཙ་ཞ་གསུམ་དང་། ཡ་བཏགས། རྣམ་བཅད། ཟླ་ཚེས་རྣམས་དང་། ལ་ཝ་འ་གསུམ་སྒུར་བ་བཅས་ཏེ། ཐམས་ཅད་ཤིང་སྣ་འཚོ་ནས་གོང་གི་རིམ་པར་མིག་འབུག་བཙུག་པ་དང་། གསེག་གཅོད་ཀྱིས་སྟེས་པ་དང་། གསེག་བཅད་ཀྱིས་ལེན་པ་བཅས་བྱས་ཏེ། ཡི་གེ་རྐོས་བཟོའི་ལག་རྩལ་གྱི་ཁྱད་ཆོས་སྙོམས་གཙང་འགྲིག་གསུམ་གྱི་ཉམས་ཕུན་སུམ་ཚོགས་པ་ཞིག་དངོས་སུ་ཐོན་པ་ནི་རྐོས་ལེགས་པའི་ཚད་ཡིན་ནོ།
གསེག་འགྲོས་ལ། གསེག་འགྲོས་གསུམ་དང་གཉིས་དང་། གཅིག་གིས་ཆོག་པ་སོགས་ཡོད་པར། ཡིག་འབྲུ་ང་ཆ་ཇ་ཏ་ཐ་ད་པ་ཚ་ཛ་ཝ་ཟ་ཧ་ཨ་དང་། དབྱངས་བཞི། ར་བཏགས་བཅས་ལ་གསེག་འགྲོས་གསུམ་རེ་ཐོབ་ཅིང་། དེ་བཞིན་ཉ་ན་ཕ་མ་ཝ་ཞ་འ་ར་ལ་ཧ་རྣམས་ཀྱི་སྐེ་ལྷུ་ལའང་གཡས་གཅིག་གཡོན་གཉིས་བཅས་བསྡོམས་པས་གསེག་འགྲོས་གསུམ་རེ་ཐོབ། ཁ་ག་ཅ་ཙ་ཡ་ཤ་ས་ཨ་བཅས་བརྒྱད་ལ་གསེག་འགྲོས་གཉིས་རེ་དང་། ཀ་དང་ཡ་བཏགས་ཝ་ཟུར་ཚེག་རྣམས་ལ་གསེག་འགྲོས་གཅིག་གོ། དེ་བཞིན་གཤེགས་པའི་སྦོ་འགྲིག་ནི། ང་ཇ་ཇ་ད་པ་ཕ་བ་ཛ་ཝ་འ་ར་ལ་བཅས་བཅུ་གསུམ་དང་ར་བཏགས་བཅས་ལ་སྦོ་འགྲིག་ཐོབ་ཅིང་། ཁ་དང་ག་གཉིས་ལ་སྦོའི་མིང་འདོགས་ཀྱང་དོན་དུ་གསེག་འགྲོས་ཀྱིས་གཞོག་ན་ཆོག ཁ་ག་ཅ་སོགས་གསེག་འགྲོས་གཉིས་རེ་ཐོབ་པའི་ཡི་གེ་བརྒྱད་དང་། དབྱངས་བཞི་ཡ་བཏགས་རྣམས་ནག་ཆ་རུ་བཏུགས་ནས་བར་ལྷུ་ལེན་ཤེས་དགོས་ལ། སྟེས་པའི་སྐབས་རྐང་རིང་རྣམས་ཀྱི་རྩ་ཁ་བསྲིང་ཡོད་པའི་མཚམས་གསེག་འགྲོས་གྱེན་དུ་བསྐོར་ཏེ། ཡིག་འབྲུ་འཕག་མི་ཤོར་བར་ཚུར་གཞོག་པ་དང་། དེ་རྗེས་གསེག་ཁ་མར་བསྐོར་ནས་ཡང་གཞར་བྱེད་པ་ལས་འཕྲལ་དུ་ཟུར་ལ་བཅར་མི་རུང་བ་དང་། རྐང་འབྲིང་གི་ཡི་གེ་རིགས་བྱུང་ཚེ་ཟབ་རྩེ་འཕྲོད་པ་བྱེད་དེ་ཟོབ་རྐུབ་དང་གས་བརྗེས་མི་འབྱུང་བ་དང་། གཙང་སྒྲོས་སལ་སིལ་མེད་པ་ནི་ཡིག་འབྲུ་ཀུན་ལ་ཐོག་ཐ་བར་གསུམ་དུ་གཟབ་གལ་ཆེ། ཡིག་གཟུགས་ཀྱི་ལག་དང་། མགོ་སྐེ། སྦོ་ཟགས་མཆུ། ཕྲག་གོང་དང་ཁོག་གི་ཟབ་རྩེ་འཕྲོད་པ། ལི་ཁམས་འཛར་གསུམ་དོད་པ། རྐང་འགྲིག་སྦོ་འགྲིག་སོགས་སྙོམས་དགོས་པའི་རིགས་ལ་མཉམ་པར་བརྐོ་ཞིང་། གསེག་འགྲོས་དང་། རྐང་པ་དང་། མིག་དང་སྦོ་སོགས་ནང་གསེས་ཀྱི་ལག་ལེན་ཞིབ་ཅིང་ཕྲ་བ་ཀུན་ལ་མཁས་ཤིང་བྱང་པ་ན། གཞུང་འདིའི་བོད་ཡིག་འབྲི་ཐབས་ལས་འབྱུང་བ་བཞིན། གཅེས་པ་བརྒྱད་དང། འདོན་པ་བཅུ་བཞི། མ་ཆོས་ཉེར་གཅིག སྤྱི་ཆོས་གསུམ། བུ་ཆོས་བཅུ་དྲུག་བཅས་བོད་ཀྱི་ཡི་གེའི་ཁྱད་ཆོས་དྲུག་ཅུ་རྩ་གཉིས་རྣམས་ཀྱང་རང་བཞིན་གྱིས་ཐོན་པར་འགྱུར་རོ།།
དྲུག་པ། ཞུ་དག་དང་རྐོ་བཙུགས་བྱ་ཐབས་ལ། པར་ཤིང་བརྐོས་ཟིན་སླད། སྨྲར་ཞུ་དང་། བསྐྱར་ཞུ་དང་། ཡང་ཞུ་དང་། ཞུ་རྒྱན་བཅས་ཐ་ནའང་ཞུ་དག་ཐེངས་བཞི། རྒྱས་པ་ལ་ཞུ་དག་ཐེངས་བདུན་རེ་བྱེད་སྲོལ་ཡང་སྣང་པས་གང་ལྟར་ཡང་ཞུ་དག་ལེགས་པར་བགྱི་པ་དང་། ཆག་གས་དང་འབྲུ་ནོར་ཡོད་སར་སླར་རྐོ་བཙུག་བྱ་དགོས་ལ། རྐོ་བཙུག་བྱེད་ཐབས་ནི། པར་ཤིང་སྣུམ་སྲོས་མ་བྱེད་གོང་དུ་རྐོ་བཙུགས་བྱ་ཡུལ་གྱི་བུ་ག་གཏོད། སྣུམ་སྲོས་བྱས་ཟིན་རྗེས་ད་གཟོད་རྐོ་བཙུགས་བྱེད་དགོས་ཏེ། པར་ཤིང་ལ་རང་ཤིང་གིས་རྐོ་བཙུགས་བྱེད་ན་གོ་འབུར་མཉམ་པ་དང་། ཤིང་གཞན་གྱིས་བཙུགས་ན་ཅུང་ཟད་འབུར་དོད། རླུང་རྟའི་པར་ཤིང་སོགས་ཤིང་གྱེན་དུ་བསླངས་པའི་རིགས་ལ་ཅུང་ཟད་དམའ་དགོས་པ་ནི་ཉམས་མྱོང་རྒན་པོའི་བསླབ་བྱ་ཡིན་ལ། ཤིང་གང་ཞིག་གིས་བཙུགས་ཀྱང་བཙུག་ཡུལ་གྱི་བུ་ག་ཅུང་ཆུང་ལ་ཟབ་ཙམ་དང་། ཤིང་གཟེར་སྦོམ་ཙམ་བཟོས་ནས་དངོས་སུ་འཛུགས་སྐབས་བུ་གའི་ནང་སྤྱིན་ཆུ་བླུགས་ཏེ་བཙུག་ཤིང་ཅུང་ཟད་རྡུང་རྒྱུ་ཡོད་པ་བྱེད་ན་མི་ལྷུང་ཡུན་དུ་གནས་པའི་གནད་ཡོད་དོ།།
|
|
