རྔ་བའི་ལྷ་རིས་པ་ཨ་སྣང་པེ་རང་ལོ་༡༢ལ་སོན་པ་ནས་བཟུང་། བོད་ཀྱི་རིག་གནས་ཆེ་བ་ལྔའི་ཡ་གྱལ་བཟོ་རིག་པའི་ཁོངས་སུ་གཏོགས་པའི་ལྷ་རིས་སྒྱུ་རྩལ་གྱི་ཤེས་བྱ་བཙལ་ཞིང་། ཐོག་མར་བོན་གྱི་ལྷ་རིས་པ་རྒན་བློ་གྲོས་མཆོག་གི་མདུན་ནས་ཞང་བོད་གདོད་མའི་ལྷ་རིས་ལ་མི་ལོ་བཞི་ལྷག་ལ་སྦྱངས་པ་བྱས་ཏེ། དེ་རྗེས་བན་གྱི་ལྷ་རིས་པ་ཆེན་མོའི་ཆོ་ལོ་ཐོགས་པའི་གོས་ལྷ་པཎ་ཊི་ཏའི་རྒྱུད་འཛིན་པ་ས་སྐྱའི་དགེ་སློང་ཆེན་མོ་ལྷ་རིས་པ་དགེན༧ལུང་རྟོགས་རྒྱ་མཚོའི་མདུན་དུ་བཅལ་ཏེ། མི་ལོ་ལྔ་དྲུག་ཙམ་ཞིག་ལ་བན་གྱི་ལྷ་རིས་ལ་སྦྱང་བ་མི་ཉུང་བ་ཞིག་བྱས་པ་མ་ཟད། འདས་པའི་མི་ལོ་སུམ་བཅུ་ལ་ཉེ་བའི་སྔ་གཞུག་ཏུ་བོད་ཀྱི་ས་གནས་སོ་སོར་ལ་གདོད་མའི་རི་མོའི་གཞི་རྩ་བྱེད་པའི་གནའ་ཉམས་ཀྱི་ཚོན་མདང་མངོན་པར་བཀྲ་བའི་ཐང་ག་བརྒྱ་ཕྲག་དུ་མ་ཞིག་སྦྱངས་པ་ལ་ཀུན་གྱིས་བསྟོད་བསྔགས་ཀྱི་མཐེ་བོང་སྒྲེང་བཞིན་ཡོད་པ་མ་ཟད། ལྷག་ཏུ་ཁོང་གིས་བྲིས་པའི་གདོད་མའི་རི་མོའི་གཞི་རྩ་བྱེད་པའི་ཐང་ག་མང་ཤོས་ལ། ད་ལྟ་རྒྱ་ནག་གི་ཡུལ་གྲུ་སོ་སོ་ནས་སྙན་གྲགས་དེ་བས་ཀྱང་མཐོ་ལ། ཁྱད་པར་དུ་ད་སྐབས་ཁོང་གིས་བན་བོན་གཉིས་མེད་ཀྱི་ལྷ་རིས་པའི་ཕྱག་ལས་ལ། སྦྱང་འདོད་ཆེ་བས་གཞོན་སྐྱེས་རི་མོ་བ་དུ་མ་ཞིག་གི་རྗེས་སུ་ཡི་རངས་བྱེད་བཞིན་ཡོད་པ་མ་ཟད། ལྷག་ཏུ་ཁོང་གིས་ད་ལོའི་སྤྱི་ཟླ་ལྔ་བའི་ཚེས་མགོ་ནས་བཟུང་། རྒྱལ་གཞུང་གིས་གདན་ཞུས་ལྟར། གདོད་མའི་རི་མོའི་གཞི་རྩ་བྱས་དེ། བོདད་གྱི་རི་མོ་མི་ཉམས་གོང་འཕེལ་དང་ཉམས་པ་སླར་གསོའི་ཆེད་དུ། ཨ་མདོ་རྔ་བའི་བོད་ཡིག་སློབ་འབྲིང་གི་དགེ་རྒན་ཆེན་མའི་ལས་འགན་བཞེས་ནས། ༼ཞང་བོད་ལྷ་རིས་རྒྱུ་རྩལ༽ཞེས་པའི་སློབ་ཚན་ཞིག་གི་དཔེ་ཁྲིད་གནང་མགོ་འཛིན་རྒྱུ་ཡིན་ནོ།།
|
|
