སྤྱིར་བོད་ཡིག་ལ་དབྱེ་ན་དབུ་ཅན་དང་དབུ་མེད་ཀྱི་དབྱེ་བ་ཆེན་པོ་གཉིས་མ་གཏོགས་མེད་ཀྱང་། དེ་དག་ལ་ནང་གསེས་ཀྱིས་དབྱེ་ན་མང་པོ་ཡོད་དེ། དཔེར་ན་དབུ་ཅན་གྱི་གཟུགས་ལ་དབྱེ་ན་ཁྱུང་པོ་གཡུ་ཁྲི་མ་བྱོན་སྔོན་དུ་དབྱེ་བ་བརྒྱད་ཙམ་གྱི་འགྱུར་བ་བྱུང་ཞིང་གཡུ་ཁྲིས་གཏན་འཁེལ་མཛད་རྗེས་ཤ་གཟུགས་དང་རུས་གཟུགས་གཉིས་སུ་གྱེས། དཔང་ལོ་ཙཱ་བའི་བྲིས་རྒྱུན་དབུས་བྲིས་དང་བླ་བྲང་བཀྲ་ཤིས་འཁྱིལ་གྱི་ཤར་བྲིས་གཉིས་ལ་ཤ་གཟུགས་མ་ཞེས་འབོད་ཅིང་། ཁམས་ཕྱོགས་སུ་དར་བའི་སྡེབ་བྲིས་དང་། ཀརྨ་སྒར་བྲིས་གཉིས་ལ་རུས་བྲིས་ཞེས་ཡོངས་སུ་གྲགས་ལ། དབུ་མེད་ཀྱི་གཟུགས་ལ་འགྱུར་བ་ཆེན་པོ་བྱུང་ནས་ཚུགས་རིང་དང་། ཚུགས་ཐུང་། ཚུགས་མ་འཁྱུག འཁྱུག་ཆེན། འབྲི་ཚ་ལ་སྒོང་ཞབས་མ་དང་། ཚུགས་རིང་བ། ཞབས་རིང་བ། ཞབས་ཐུང་བ། དཔེ་ཚུགས་ལ་སེག་ཡོད་དང་། སེག་མེད། འབྲུ་ཚུགས། ཚུགས་ཐུང་། འཁྱུག་བྲིས། ཞན་ཡང་ལུགས་སུ་བླུག་པའི་ཡི་གེ་དང་། འབུར་དུ་དོད་པའི་ཡི་གེ འཇམ་སང་གི་ཡི་གེ་རྐོས་པའི་ཡི་གེ ཚེམ་དྲུབ་ཀྱི་ཡི་གེ འཐག་བཏགས་པའི་ཡི་གེ ལངས་གཟུགས་ཡི་གེ་དང་ཡིག་གསར་སྣ་ཚོགས། གཏེར་ཡིག་སྣ་ཚོགས། བརྡ་ཡིག་སྣ་ཚོགས། ཡིག་རིགས་དྲུག་ཅུ་རྩ་བཞི་སོགས་གནའ་ནས་ད་བར་དུ་དབྱེ་བ་དུ་མ་ཞིག་བྱུང་ཡོད་པ་ཡིན་ནོ། །
|
|
