རྩོམ་པ་པོ། སྟོད་ལུང་བདེ་ཆེན་རྫོང་ཧྥུང་ཐའེ་སློབ་ཆུང་གི་དགེ་མིང་གུར་གྲགས།
དེ་ཡང་ཡི་གེ་ནི་མི་རིགས་ཤིག་གི་རིག་གནས་སྤེལ་བྱེད་ཡིན་པ་མ་ཟད། མི་རིགས་ཀྱི་བླ་སྲོག་ཀྱང་ཡིན། གལ་ཏེ་མི་རིགས་ཤིག་ལ་རང་མི་རིགས་ཀྱི་ཡི་གེ་མེད་ཚེ་མི་རིགས་དེ་ཉམས་རྒུད་དུ་འགྲོ་སླ་བ་ཞིག་ཡིན། ཡི་གེ་གང་དང་གང་ཞིག་ཡིན་ཡང་དེ་ཉིད་ཁོང་དུ་ཆུད་དགོས་ན། ཐོག་མར་འབྲི་ཀློག་ནས་འགོ་རྩོམ་དགོས་པ་ཆོས་ཉིད་རེད། དེ་བས་ཡིག་གཟུགས་ཚད་ལྡན་ཞིག་འབྲི་རྒྱུ་ནི་ཡི་གེ་གང་དེ་སློབ་པའི་རྩ་བའི་རྨང་གཞི་ལྟ་བུ་ཆགས་ཡོད། ཚུལ་དེར་དམིགས་ནས་འདིར་སློབ་ཆུང་སློབ་མས་བོད་ཡིག་ཡིག་གཟུགས་ཚད་ལྡན་ཞིག་འབྲི་ཐུབ་རྒྱུར་མཐོང་ཆེན་བྱ་དགོས་པའི་སྐོར་རགས་ཙམ་གླེང་བ་ལ།
དང་པོ། བོད་ཡིག་ཡིག་གཟུགས་ཀྱི་བྱུང་འཕེལ་ལོ་རྒྱུས་རགས་བཤད།
དེ་ཡང་བོད་ཡིག་ཡིག་གཟུགས་ཚད་ལྡན་ཞིག་འབྲི་བ་ལ་ཐོག་མར་བོད་ཡིག་གི་བྱུང་རིམ་ཅུང་ཟད་ཙམ་ཞིག་ཤེས་དགོས་རྒྱུ་ནི་གལ་འགངས་ཤིན་ཏུ་ཆེ། གངས་ཅན་ས་ལའི་སྨན་ལྗོངས་འདིར་ཡི་གེའི་བྱུང་རིམ་ཁག་ཆེ་བ་གཉིས་སུ་བཤད་པ་ལས་དང་པོ་ནི། ལོ་ངོ་ཉིས་སྟོང་ནས་སུམ་སྟོང་སྔོན་དུ་ཞང་ཞུང་ཡུལ་དུ་འཁྲུངས་པའི་གཡུང་དྲུང་བོན་གྱི་སྟོན་པ་གཤེན་རབ་མི་བོ་ཆེས་སྟག་གཟིག་སྤུངས་ཡིག་ལ་དཔེ་བླངས་ནས་ཞང་ཞུང་སྨར་ཆེན་གྱི་ཡིག་གཟུགས་ཞེས་པ་གཏན་ལ་ཕབ་པར་མཛད་པའི་རྗེས་སུ། ཞང་ཞུང་དུ་རིམ་པས་ལྗང་གར་ལི་ཡི་གཟི་ཡིག་དང་ལྷ་བབ་ཡི་གེ་དམར་ཡིག་སོགས་ཀྱི་ཡིག་གཟུགས་དར་མྱོང་བར་གྲགས་པ་དེའོ།
སྤྱི་ལོའི་སྔོན་གྱི་དུས་རབས་གཉིས་པའི་སྐབས་བོན་པོ་ཤེས་པ་ཅན་རྣམས་ཀྱིས་བོད་ཀྱི་བཙན་པོ་ཐོག་མ་གཉའ་ཁྲི་བཙན་པོ་ཁྲིར་གསོལ་བ་དང་། བཙན་པོས་རྒྱལ་ཕྲན་བཅུ་གཉིས་དབང་དུ་བསྡུས་ནས་ཆོས་སྲིད་སྐྱོང་སྐབས་ཞང་ཞུང་སྨར་ཡིག་དེ་གཞུང་ཡིག་ཏུ་འགྱུར་བར་བཤད་ཀྱང་། “གྲི་གུམ་བཙན་པོས་བོན་ཆོས་ཀྱི་བསྟན་པ་བསྣུབས་པས་ལོ་ངམ་གྱིས་རྒྱལ་པོ་དཀྲོངས། པུ་དེ་གུང་རྒྱལ་གྱི་དུས་བོན་གྱི་བསྟན་པ་སླར་ཡང་དར་རུང་སྤུར་རྒྱལ་བཙན་པོའི་དུས་སུ་མངའ་ཁོངས་ཀྱི་རྒྱ་ཁྱོན་ཆུང་བར་བརྟེན་སྨར་ཡིག་གི་སྤྱོད་སྒོའང་རང་སོར་གནས་པའམ་རིམ་པས་ཉམས་རྒུད་དུ་སོང་བར་གྲགས”ཞེས《བོད་ཡིག་ངོས་འཛིན་དང་ཚུགས་འབྲི་ཚུལ》ཞེས་པའི་ཤོག་གྲངས་ལྔ་པའི་ནང་འཁོད་པ་ལྟར་ཕྱིས་སུ་ཉམས་རྒུད་དུ་གྱུར་བར་མངོན།
ཡི་གེའི་བྱུང་རིམ་ཁག་གཉིས་པ་ནི་ད་ལྟ་ང་ཚོས་སྤྱོད་བཞིན་པའི་ཡི་གེ་འདི་རེད། འདི་ནི་སྤྱི་ལོའི་དུས་རབས་བདུན་པའི་ནང་བོད་རྒྱལ་སྲོང་བཙན་སྒམ་པོའི་བློན་པོ་ཐོན་མི་སམ་བྷོ་ཊས་གསར་གཏོད་མཛད་པར་གྲགས། དེར་ཡང་རྒྱལ་པོ་སྲོང་བཙན་སྒམ་པོས་མཐའ་བཞིའི་རྒྱལ་ཁབ་དང་ཐོག་མར་འབྲེལ་བ་མཛད་དུས། སྨར་ཡིག་གིས་ཆོས་སྲིད་གཉིས་སྐྱོང་བར་དགོས་པ་ཆེར་མི་ཐོན་སྟབས་རྒྱལ་པོས་ཐོན་མི་སམ་བྷོ་ཊ་རྒྱ་གར་ཡུལ་དུ་མངགས། ཐོན་མིས་བྲམ་ཟེ་ལི་བྱིན་ཀ་ར་དང་པཎྜི་ཏ་ལྷ་རིག་པའི་སེང་གེ་སོགས་སློབ་དཔོན་དུ་བསྟེན་ནས་མཁས་པའི་རྩེར་སོན། ཁོང་སླར་བོད་དུ་ལོག་ཕེབས་ནས་རྒྱ་གར་གྱི་ཡི་གེ་དང་བོད་རང་གི་སྐད་ལ་ཞིབ་འཇུག་གནང་བ་དང་། སྔར་ཡོད་ཀྱི་བོད་ཀྱི་ཡི་གེ་སྨར་ཡིག་ལ་གསར་བཅོས་གནང་སྟེ། ད་ལྟའི་བོད་ཡིག་འདི་གསར་གཏོད་གནང་བར་གྲགས། ཁོང་གིས་ལཉྫ་དང་སྨར་ཡིག་གི་ཡིག་གཟུགས་ལ་དཔེ་མཛད་ནས་ད་ལྟའི་དབུ་ཅན་གྱི་ཡིག་གཟུགས་གསར་བཟོ་གནང་བ་དང་། ཝརྟུ་དང་ལྷ་བབ་ཀྱི་ཡི་གེ་ལ་དཔེ་བླངས་ནས་དབུ་མེད་ཀྱི་ཡིག་གཟུགས་གསར་བཟོ་གནང་ཞེས་ལོ་རྒྱུས་དེབ་ཐེར་ལ་འཁོད་པ་ལྟར་རོ། ཁོ་བོའི་ལྟ་ཚུལ་ལ་སྐབས་དེའི་དབུ་མེད་ཀྱི་ཡིག་གཟུགས་དེ“དཔེ་ཚུགས”ཞེས་པའི་ཡིག་གཟུགས་ཀྱི་གྲས་ཤིག་མིན་ནམ་སྙམ། དེའི་རྗེས་ཀྱི་བཙན་པོའི་རྒྱལ་རབས་ནང་ཡིག་མཁན་མཁས་པ་བརྒྱད་ཀྱི་ཕྱག་རྒྱུན་སྣ་ཚོགས་བྱུང་བ་ཚང་མ་དབུ་ཅན་གྱི་ཡིག་གཟུགས་ཁོ་ན་ཡིན་པའི་ཚུལ་ལ་བརྟག་ན། སྐབས་དེའི་དུས་ཆོས་སྲིད་སྐྱོང་བར་དབུ་ཅན་གྱི་ཡིག་གཟུགས་སྤྱོད་སྒོ་ཆེན་པོ་ཡོད་པར་སྣང་ངོ་།
ཡིག་མཁན་མཁས་པ་མང་པོ་བྱོན་པ་ལས། ཁྱུང་པོ་གཡུ་ཁྲིས་ཐིག་ཚད་བཀོད་ནས་དབུ་ཅན་འབྲི་ལུགས་ཁྱུང་བྲིས་སམ་སྙེ་བྲིས（བཀའ་འགྱུར་གསེར་བྲིས་མའི་ཡིག་གཟུགས་ཏེ། ཨེ་བྲིས་དང་སྙེ་བྲིས་ཀྱི་ཡིག་གཟུགས་ནི་ད་ལྟ་ལྗོངས་རིམ་པའི་མངོན་མིན་རིག་གནས་ཤུལ་བཞག་གི་ཁོངས་སུ་ཚུད་ཡོད）སུ་འབོད་པ་དེ་གསར་དུ་གཏོད། དེ་ནི་བོད་ཀྱི་ཡིག་གཟུགས་ལོ་རྒྱུས་ཐོག་དབུ་ཅན་གྱི་ཡིག་གཟུགས་ཚད་ལྡན་བཟོས་པའི་ཐོག་མ་ཡིན་པར་སྣང་ལ་ད་ལྟའང་བེད་སྤྱོད་བྱེད་མུས་ཡིན་པ་འདིའོ།།
དབུ་མེད་ཀྱི་ཡིག་གཟུགས་ལ“ལི་ལུགས”དང“ལྡན་ལུགས”ཞེས་པ་གཉིས་བྱུང་བ་ལས་ལི་ལུགས་ཀྱི་ཕྱག་རྒྱུན་ཆད་ནས་ལོ་བརྒྱ་ཕྲག་འདས། རྒྱལ་པོ་ཁྲི་སྲོང་ལྡེ་བཙན་སྐབས་ཀྱི་ལོ་ཙཱ་བ་ལྡན་མ་རྩེ་མངས་ཀྱི་ཕྱག་རྒྱུན“ལྡན་ལུགས”དེ་ད་ལྟ་ང་ཚོས་སྤྱོད་བཞིན་པའི་དབུ་མེད་ཡིག་གཟུགས་ཀྱི་རྨང་གཞི་ཡིན་པར་བཤད།
དུས་རབས་བཅོ་ལྔའི་མཚམས་སུ་རྒྱལ་རྩེ་སྡེ་སྲིད་རབ་བརྟན་ཀུན་བཟང་འཕགས་ཀྱིས“ལྡན་ལུགས”ཀྱི་ཕྱག་རྒྱུན་གཞིར་བཞག་དབུ་མེད་ཀྱི་ཐིག་བཤད་བརྩམས་ནས་དབུ་མེད་ཐིག་ཚད་ཀྱི་འབྲི་རྒྱུན་བྱུང་བ་དེ་ནི་དབུ་མེད་ཡིག་གཟུགས་ཚད་ལྡན་དུ་གྱུར་པའི་ཐོག་མ་ཡིན་པར་སྣང་། དགའ་ལྡན་ཕོ་བྲང་གི་སྐབས་སུ་དར་བའི་གཞུང་རིས་དང་ཨེ་རིས་ཞེས་པའི་འབྲི་རྒྱུན་དེའང་ལྡན་ལུགས་ལས་བྱུང་བར་གྲགས། དུས་རབས་ཉི་ཤུ་པའི་ལོ་རབས་ཉི་ཤུ་ནས་སུམ་ཅུའི་བར་རྩེ་སློབ་གྲྭ་བཙུགས་པ་དང་དབུ་མེད་ཀྱི་ཡིག་གཟུགས་གཞུང་ཡིག་ཚད་ལྡན་ལ་བསྒྱུར་བ་དེས། དབུ་མེད་ཡིག་གཟུགས་ཀྱི་བྱེ་བྲག་ཚུགས་རིང་དང་། ཚུགས་ཐུང་། དཔེ་ཚུགས། འབྲུ་ཚ། འཁྱུག་ཡིག་སོགས་ཡིག་གཟུགས་རིགས་སྣ་ཚོགས་ཆར་རྗེས་ཀྱི་ཤ་མོ་བཞིན་བྱུང་བ་མ་ཟད། མཁས་པ་རྣམས་ཀྱིས་ཡིག་གཟུགས་ལ་དགའ་ཞེན་དང་མཐོང་ཆེན་བྱས་ཏེ་མཐོ་རླབས་གསར་པ་ཞིག་འཕྱུར་བ་ནི་ད་ལྟ་སྤྱོད་བཞིན་པའི་ཡིག་གཟུགས་ལས་མཐོང་ཐུབ་བོ།
གཉིས་པ། སློབ་གྲྭ་ཁག་གི་བོད་ཡིག་ཡིག་གཟུགས་འབྲི་སྦྱོང་གི་གནས་བབ།
བོད་ཀྱི་ཡི་གེ་དར་ནས་ད་བར་ལོ་ངོ་ཆིག་སྟོང་གསུམ་བརྒྱ་ལྷག་ཙམ་སོང་བའི་རིང་། ཡིག་གཟུགས་ཐད་ནས་སྤྱི་ཆེ་བར་དབུ་ཅན་དང་དབུ་མེད་གཉིས་སུ་བསྡུས་པ་དང་བྱེ་བྲག་ཏུ་ཚུགས་རིང་དང་འབྲུ་ཚ་འཁྱུག་ཡིག་སོགས་སྣེ་མང་ཕུན་སུམ་ཚོགས་པ་ཞིག་མཆིས། ཡིན་ནའང་ད་ལྟའི་སློབ་གྲྭ་ཆེ་འབྲིང་ཆུང་གསུམ་ཁག་ཏུ་སློབ་མས་བོད་ཡིག་ཡིག་གཟུགས་ལ་སྣང་ཆུང་བྱེད་པའི་ཚུལ་དེ་ནི་ང་ཚོས་སློབ་མ་ཚོས་བྲིས་པའི་བོད་ཡིག་གི་སྦྱོང་ཚན་དང་ཡིག་རྒྱུགས་སོགས་ལ་བལྟས་ཚེ་ཤེས་ཐུབ་པ་ཞིག་རེད། དེའི་རྒྱུ་རྐྱེན་ནི། གཅིག་བྱས་ན་དེང་དུས་ཡིག་རྒྱུགས་སྐར་གྲངས་ཁོ་ནས་དགེ་རྒན་གྱི་བཟང་ངན་ལ་གདེང་འཇོག་བྱས་པའི་ངན་འབྲས་ཡིན་ཡང་སྲིད་ལ། གཅིག་བྱས་ན་སློབ་གྲྭ་ཁག་ནང་དུས་རྒྱུན་ཡིག་གཟུགས་སྦྱོང་བ་ནི་དགེ་རྒན་གྱི་འོས་འགན་ལྟ་བུར་བརྩིས་པ་ཡིན་ཡང་སྲིད། གལ་ཏེ་མུ་མཐུད་འདི་ལྟར་རྒྱུན་འབྱམས་སུ་སོང་ཚེ་དུས་ཡུན་རིང་པོ་མི་འགོར་བར“ལི་ལུགས”ཀྱི་ཕྱག་རྒྱུན་མིང་ཙམ་ལས་འབྲི་རྒྱུན་རྩ་བ་ནས་མེད་པར་འགྱུར་ངེས་པ་གདོན་མི་ཟ།
དེར་བརྟེན་སློབ་ཆུང་བོད་ཡིག་དགེ་རྒན་ཚོས་རང་ཉིད་ཀྱིས་བོད་ཡིག་ཡིག་གཟུགས་འབྲི་སྟངས་ཀྱི་རྩ་བའི་རྨང་གཞི་ལེགས་པོ་ཞིག་མཁྱེན་དགོས་པ་མ་ཟད། དུས་རྒྱུན་ནས་སློབ་ཁྲིད་ཁྲོད་ཐིག་རྒྱག་སྟངས་དང་ཡི་གེའི་ཁམ་རིས་བཞིན་ཐིག་ཟིན་སྟངས། སྨྱུག་གུ་འཛིན་སྟངས། མཐེབ་དབྲིལ་གཏོང་སྟངས་སོགས་རྩ་བའི་རྨང་གཞི་དག་མ་འཁྲུལ་བར་སློབ་མ་ཚོར་སློབ་ཁྲིད་གསལ་པོར་གནང་ནས་ཡིག་གཟུགས་ཀྱི་བྲིས་རྒྱུན་ཉམས་པ་སོར་ཆུད་དང་མི་ཉམས་གོང་འཕེལ་བཏང་རྒྱུ་ནི་ཤིན་ཏུ་གལ་འགངས་ཆེའོ།
གསུམ་པ། སློབ་མས་ཡིག་གཟུགས་ལེགས་པོ་ཞིག་འབྲི་ཐུབ་པའི་ཐབས་ལམ།
འོ་ན་ཇི་ལྟར་བྱས་ནས་སློབ་མས་ཡིག་གཟུགས་ལེགས་པོ་ཞིག་འབྲི་ཐུབ་པ་བྱ་དགོས་སམ་ཞེ་ན། སློབ་མས་ཡིག་གཟུགས་ཚད་ལྡན་ཞིག་འབྲི་ཐུབ་པའི་སྔོན་འགྲོའི་ཆ་རྐྱེན་ལེགས་ཤོས་ནི་གོང་རིམ་གྱི་སློབ་གསོའི་སྡེ་ཁག་དང་སློབ་གྲྭས་མཐོང་ཆེན་དགོས་པ་དང་དགེ་རྒན་གྱི་འགན་འཁྲིའི་འདུ་ཤེས་གོང་མཐོར་གཏོང་དགོས་གལ་ཆེ་བར་མཐོང་།
གོང་རིམ་དང་སློབ་གྲྭས་ཡིག་རྒྱུགས་ཀྱི་སྐར་གྲངས་ཁོ་ན་གཙོ་བོར་བཟུང་ནས་དགེ་སློབ་ཀྱི་འཇོན་ཐང་ལ་གདེང་འཇོག་གནང་བའི་རྐྱེན་གྱིས། དེང་དུས་དགེ་རྒན་མང་པོ་ཞིག་གིས་སློབ་ཁྲིད་གནང་སྐབས་ཡིག་གཟུགས་ལ་རེ་བ་ནན་པོ་མ་བཟུང་བར་ནག་པང་དང་སྦྱོང་དེབ་ཐོག་རང་སྣང་གང་དྲན་གྱིས་ཡི་གེའི་གཟུགས་སྣ་ཚོགས་འབྲི་བའམ་སྨྱུག་གུ་གང་རུང་གིས་སློབ་མའི་སྦྱོང་ཚན་བཅོས་པ་སོགས་གནང་གི་ཡོད་པས། གོམས་གཤིས་ངན་པའམ་ལམ་སྲོལ་ངན་པ་དེ་དག་ལ་འགྱུར་བ་གཏོང་རྒྱུ་ནི་ཤིན་ཏུ་གལ་འགངས་ཆེ་བར་སྣང་།
སློབ་མའི་ཡིག་གཟུགས་ཚད་ལྡན་དགོས་ན། དགེ་རྒན་རྣམ་པས་ངལ་བ་སྣ་ཚོགས་ཁྱད་བསད་ཀྱིས་རྟག་ཏུ་ཡིག་གཟུགས་ཀྱི་རྩ་བའི་རེ་འདུན་གཞིར་བཟུང་སྟེ་སློབ་ཁྲིད་གནང་དགོས་པ་ཡིན་ཏེ། ལོ་རིམ་དང་པོའི་སྐབས་ཐོག་མ་ཉིད་ནས་སློབ་མར་ཡི་གེ་འབྲི་དུས་ལུས་ཚུགས་ཡང་དག་སྡོད་པའི་གོམས་གཤིས་ལེགས་པོ་འཇགས་སུ་བཅུག་ནས་སྦྱང་ཤིང་ཐོག་ཀ་ཁའི་ཐིག་གི་རེ་འདུན་བཞིན་ཡིག་གཟུགས་སྦྱོང་དུ་འཇུག་དགོས། ལས་དང་པོའི་སློབ་མས་སྨྱུག་གུ་འཛིན་སྟངས་ཡག་པོ་ཞིག་མི་ཤེས་པས་དགེ་རྒན་ཀྱིས་ངང་བརྒྱུད་རིང་པོའི་སྒོ་ནས་ལག་བྲིས་དང་སྐམ་དྲས་བརྒྱབ་ཚེ་སྨྱུག་གུ་འཛིན་སྟངས་དང་ཐིག་ཚད་འཛིན་སྟངས། ཡི་གེ་སོ་སོའི་ཁམ་རིས་ཀྱི་རེ་བ་བཞིན་ཀ་ཁ་དང་ཟློས་ཧྲལ་གྱི་ཡི་གེའི་དཀར་ཆ་ནག་ཆ་འཚམ་པ་དང་དབྱངས་འདོགས་སྦྱོར་ཡུལ་གྱི་གནས་འཕྲོད་པོ་ཞིག་སྦྱང་དུ་བཅུག་ནས་སློབ་རིམ་དང་པོར་ཚུགས་རིང་གི་ཡི་གེ་ཚད་དང་ལྡན་པ་ཞིག་འབྲི་ཐུབ་པ་བྱ་དགོས།
དེ་ལྟར་སློབ་རིམ་ཁག་གི་ཡིག་གཟུགས་ཀྱི་རེ་འདུན་བཞིན་ཚུགས་རིང་ནས་ཚུགས་ཐུང་། དེ་ནས་རིམ་བཞིན་ཚུགས་ཆུང་། ཚུགས་མ་འཁྱུག་སོགས་ཡིག་གཟུགས་ཡག་པོ་ཞིག་འབྲི་ཐུབ་པ་བྱ་དགོས་པ་མ་ཟད། སློབ་གྲྭ་དང་འཛིན་གྲྭ་སོ་སོས་ཡིག་གཟུགས་འགྲན་བསྡུར་གྱི་བྱེད་སྒོ་གང་མང་སྤེལ་ནས་སློབ་མའི་ཡིག་གཟུགས་སྦྱོང་འདོད་ཀྱི་དགའ་མོས་སྐྱེད་སྲིང་བྱས་ན་གཞི་ནས་སློབ་མས་ཡིག་གཟུགས་ལེགས་པོ་ཞིག་འབྲི་ཐུབ་བོ།
|
|
