ཐོན་མིས་བོད་ཀྱི་ཡིག་སྲོལ་གཉིས་པ་ཇི་ལྟར་ཕྱེ་ཚུལ་ཐད་ཀྱི་བཞེད་པ་
འདྲ་མིན་སྐོར་གླེང་བ།
མདོར་ན་བན་ཕྱོགས་ཀྱི་མཁས་དབང་ཁ་ཅིག་གིས་ཐོན་མིས་བོད་ཡིག་གསར་བཟོ་མཛད་སྐབས་ཀྱི་དཔེ་གཞི་རྒྱ་གར་རང་ལ་ཁུངས་གཏུགས་པ་དང་ཞང་ཞུང་གི་ཡི་གེར་རྨང་གཞི་མཛད་པར་ངོས་མ་འཛིན་པ་ནི་དོན་དངོས་དང་མངོན་སུམ་དུ་འགལ་བའི་བཞེད་པ་ཞིག་རང་ཡིན་སྙམ།
འོན་ཀྱང་མཁས་དབང་ཁ་ཅིག་གིས་ཞང་ཞུང་གི་ཡི་གེ་ཡོད་པར་བཞེད་ཀྱང་དེ་བོད་ཡིག་ཡིན་པར་མ་བཞེད་པ་དང་། ད་ལྟའི་བོད་ཡིག་གི་ཐོག་མའི་རྨང་གཞི་ཞང་ཞུང་གི་ཡིན་པར་མ་བཞེད་པ་གཉིས་ལ་ངོ་བོའི་ཐོག་གི་ཁྱད་པར་ཡོད་པ་སྟེ། ཞང་ཞུང་གི་ཡི་གེ་ཡོད་པ་ཁས་བླངས་ཀྱང་བོད་ཡིག་ལ་མ་བརྩི་བ་ནི་གནའ་བོའི་དུས་སུ་བོད་མིའི་སྤྱི་ཚོགས་རྒྱལ་ཕྲན་མང་པོར་གྱེས་ཡོད་པ་དང་། མི་རིགས་དང་རྒྱལ་ཁབ་ཟེར་བའི་ཐ་སྙད་ཀྱི་གོ་དོན་ཡང་ཆགས་མེད་པ། དེ་བཞིན་བོད་ཅེས་པའི་མིང་དེ་ཡང་དངོས་སུ་བོད་མིའི་སྤྱི་ཚོགས་སྤྱི་ཡི་མིང་དུ་འགྱུར་མེད་པའི་ལོ་རྒྱུས་ཀྱི་ཆ་རྐྱེན་འོག རྒྱལ་ཕྲན་སོ་སོས་རང་གི་མངའ་དབང་བསྒྱུར་ཁོངས་མ་ཡིན་ཕྱིན་མི་རིགས་གཅིག་ཡིན་མིན་ལ་མ་ལྟོས་པར་རང་ཉིད་དང་ཐ་དད་ཞིག་ཡིན་པར་བརྩི་ཡི་ཡོད། དེ་ལ་བརྟེན་ནས་ཞང་ཞུང་རྒྱལ་ཕྲན་ནང་བྱུང་བའི་ཡི་གེ་དེ་བོད་ཡིག་ཡིན་པར་མ་བཞེད་པ་དེ་སྐབས་དེའི་ལོ་རྒྱུས་ཀྱི་ཆ་རྐྱེན་འོག་ཆགས་པའི་བསམ་པའི་ངོས་འཛིན་གྱི་བཀག་རྒྱ་གྲོལ་མ་ཐུབ་པའི་དབང་གིས་ཡིན་པ་ལས། ལོ་རྒྱུས་ལ་རང་འདོད་ཀྱིས་འཁྱོག་བཤད་བྱས་པ་ཞིག་མ་ཡིན་སྙམ། ད་ལྟའི་བོད་ཡིག་གི་ཐོག་མའི་རྨང་གཞི་དེ་ཞང་ཞུང་གི་ཡི་གེ་ཡིན་པར་མ་བཞེད་པ་ནི་ལོ་རྒྱུས་དངོས་དང་ཡོངས་སུ་འགལ་བ་སྨོས་ཅི། དེ་ལྟར་ན་བོད་མི་རྣམས་ཤེས་རིག་གི་དཔལ་ལ་སྤྱོད་པའི་ལོ་རྒྱུས་ལོ་གྲངས་ཆིག་སྟོང་སུམ་བརྒྱ་ལྷག་ཙམ་ལས་མེད་པ་དང་། ཆོས་རྒྱལ་སྲོང་བཙན་སྒམ་པོ་དང་ཐོན་མི་སཾ་བྷོ་ཊ་ཡང་བོད་ཡིག་གསར་བཟོ་མ་བྱས་གོང་བློ་གྲོས་ཀྱི་འཇུག་པ་ཤིན་ཏུ་དམན་པའི་ཡིག་རྨོངས་པ་ཡིན་དགོས་པ་དང་དེ་འདྲའི་ཤེས་རྨོངས་ཀྱི་གནས་ལས་མ་གྲོལ་བའི་རྒྱལ་བློན་གྱིས་ངོ་མཚར་གཟི་འོད་འབར་བའི་ལོ་རྒྱུས་ཀྱི་བྱས་རྗེས་རིམ་པ་སྐྲུན་གནང་མཛད་ཡོད་ཟེར་བ་ཡང་ཡིད་རྟོན་དཀའ་བར་གྱུར་བ་ཡིན་ནོ།།
ལྟ་བ་གཉིས་པ་ལྟར་བྱས་ན། ཐོན་མིས་བོད་ཡིག་གསར་བཟོ་མཛད་སྐབས་ཞང་ཞུང་གི་ཡི་གེར་དཔེ་བླངས་པ་ལས་རྒྱ་གར་གྱི་ཡི་གེ་དང་འབྲེལ་བ་གང་ཡང་མེད་པར་བཞེད་པ་དང་། དེ་ཡང་ཞང་ཞུང་གི་ཡི་གེར་དཔེ་བླངས་པ་ཡིན་གསུངས་པ་ཙམ་ལས་དཔེ་ཇི་ལྟར་མཛད་པའི་སྐོར་ཞིབ་གསལ་གསུངས་པ་ཡང་མེད། བོན་ཕྱོགས་ཀྱི་དེའི་འདྲའི་གསུང་ཚུལ་དེར་འགྲིག་པའི་ཆ་ཡོད་ཀྱང་བོད་ཡིག་བཟོ་སྐབས་རྒྱ་གར་གྱི་ཡི་གེ་དང་འབྲེལ་བ་མེད་པར་ངོས་འཛིན་པ་དང་ཞང་ཞུང་གི་ཡི་གེ་རྩ་བའི་ཆར་དཔེ་བཤུས་བྱས་པ་ལྟ་བུར་ལྟ་བ་ནི་དོན་དངོས་དང་མི་མཐུན་ཞིང་། ཐོན་མིས་རྒྱ་གར་གྱི་ཡི་གེར་དཔྱད་གཞི་ཇི་ལྟར་མཛད་ཡོད་པའི་སྐོར་གོང་དུ་ཞིབ་གསལ་བརྗོད་ཟིན་རུང་སླར་ཡང་སྙིང་པོར་བསྡུས་ནས་མདོ་ཙམ་བརྗོད་ན། དབྱངས་ཀྱི་སྒྲ་དོད་དང་གསལ་བྱེད་ཀྱི་སྡེ་པ་སྒྲིག་སྟངས། དབྱངས་དང་། གསལ་བྱེད་ཀྱི་མཚན་ཉིད་གསལ་བར་མཛད་པ། སྒྲ་རྩོལ་དྲག་ཞན་གྱི་དབྱེ་སྲོལ་སོགས་རྒྱ་གར་གྱི་ཡིག་སྲོལ་ལ་དཔྱད་གཞི་མཛད་ནས་གཏན་ལ་ཕབ་པ་དང་། ལྷག་པར་དུ་རྒྱ་གར་གྱི་སྒྲ་རིག་པའི་གཞུང་ལུགས་ཕྱོགས་སྟོན་དུ་བྱས་པ་དེས་བོད་སྐད་ཀྱི་སྒྲ་ཡི་འགྱུར་ཚུལ་ལ་བརྟག་ཞིབ་ཀྱིས་འཕུལ་རྟེན་མགོ་འདོགས་སོགས་ཀྱི་ཡི་གེའི་རྣམ་གཞག་གསར་པ་རིམ་པ་ཕྱེ་ཞིང་གསར་དུ་བཟོས་པའི་ཡིག་སྲོལ་དེ་དག་ཚན་རིག་དང་མཐུན་པ། བརྡ་སྤྲོད་ཀྱི་ནུས་པ་ཆེས་ཆེར་ལྡན་པར་བྱེད་པའི་ཐད་དཔྱད་གཞིའི་ཕན་རྐྱེན་ཤིན་ཏུ་ཆེ་བ་བྱུང་ཡོད་པ་ནི་ད་ལྟའི་ཡིག་སྲོལ་འདིའི་ཁྱད་ཆོས་དང་དགེ་མཚན་གྱི་ཐོག་ནས་དངོས་ར་གསལ་པོ་འཕྲོད་ཐུབ་པ་ཞིག་ཡིན། ཕྱོགས་ཚུངས་དངོས་དོན་དེའི་ཐོག་ནས་ཐོན་མིས་ཞང་ཞུང་གི་ཡི་གེ་རྨང་གཞིར་མཛད་ཕྱོགས་ཐད་སྣོན་འཕྲི་ཐཅུང་ཟད་བྱས་ནས་དཔེ་བཤུས་བྱས་པ་གཏན་ནས་མ་ཡིན་པར་དེ་ལ་རྩ་བའི་ཐོག་ནས་བསྒྱུར་བཅོས་དང་གསར་གཏོད་རིམ་པ་མཛད་ཡོད་པ་ཡང་གསལ་པོར་མངོན་ཐུབ་པ་ཡིན།
རྒྱ་གར་གྱི་སྒྲ་རིག་པའི་གཞུང་ལུགས་ཀྱིས་བོད་ཀྱི་ཡི་གེ་བཟོ་བའི་རྒྱུད་རིམ་ནང་ཕྱོགས་སྟོན་གྱི་ཕན་ནུས་ཐོན་ཡོད་ཅེས་བརྗོད་པ་འདི་རྒྱ་གར་གྱི་རིག་གནས་ལ་རྨོངས་ཞེན་བྱས་པ་མ་ཡིན། རྒྱ་གར་ནི་སྒྲ་རིག་པའི་གཞུང་ལུགས་ཐོག་མ་བྱུང་སའི་ཡུལ་ཞིག་ཡིན་པ་དང་། རྒྱ་གར་ལ་གཞུང་ལུགས་འདི་བྱུང་བའི་རྗེས་རིམ་པས་འཛམ་གླིང་ཐོག་དར་ཁྱབ་ཕྱིན་ནས་བརྡ་སྤྲོད་ཀྱི་རིག་ལམ་རྒྱ་ཆེར་འབྱེད་པའི་ལམ་སྲོལ་བཟང་པོ་ཞིག་བཏོད་པར་བརྟེན་གཞུང་ལུགས་འདི་ད་ལྟའང་འཛམ་གླིང་ཐོག་ཏུ་སྒྲ་རིག་པའི་གཞུང་ལུགས་ཀྱི་རྩ་བའི་གྲས་སུ་བརྩི་བཞིན་ཡོད། ཐོན་མིས་གཞུང་ལུགས་འདིར་སྦྱངས་པ་མཐར་ཕྱིན་པ་མཛད་ཡོད་པ་དེས་ཁོང་གིས་བོད་ཡིག་གསར་བཟོ་མཛད་སྐབས་ཐུགས་དཔྱད་གནང་ཡུལ་གྱི་ཆ་རྐྱེན་ཧ་ཅང་བཟང་པོ་བྱུང་ཡོད་པ་ནི་བརྗོད་མ་དགོས་པ་ཡིན། གལ་སྲིད་སྐབས་དེར་ཚན་རིག་དང་མཐུན་པའི་སྒྲ་རིག་པའི་གཞུང་ལུགས་ལམ་སྟོན་དུ་འཛིན་པའི་དཔྱད་གཞིའི་ཆ་རྐྱེན་འདི་འདྲ་ཞིག་མེད་ན་གསར་དུ་བཟོས་པའི་བོད་ཡིག་འདི་ཡང་ཚན་རིག་དང་མཐུན་པ་དང་། བརྡ་སྤྲོད་ཀྱི་ནུས་པ་ཆེས་ཆེར་ལྡན་པ། ཆོས་སྲིད་གང་སར་སྤྱོད་གོ་ཆོད་པ་ཞིག་ཡོང་དཀའ་བ་ནི་ཚིག་ཐག་བཅད་ནས་བཤད་ཆོག་སྙམ། དེས་ན་བོད་ཡིག་གསར་བཟོ་བྱེད་སྐབས་རྒྱ་གར་གྱི་ཡི་གེ་དང་འབྲེལ་བ་ཅི་ཡང་མེད་པར་བཤད་པ་འདི་ཡང་འཁྱོག་ལམ་དུ་ཤོར་བའི་ཤོད་ཚུལ་མ་དག་པ་ཞིག་ཡིན་ནོ།
ལྟ་བ་གསུམ་པ་ལྟར་ན། ཐོམ་མིའི་སྔོན་ནས་ད་ལྟའི་བོད་ཡིག་འདི་ཡོད་པ་དང་། དེ་སྲོང་བཙམ་སྒམ་པོའི་དུས་སུ་ཐོན་མི་སཾ་བྷོ་ཊས་བཟོས་པ་ཡིན་ཟེར་མ་བྱས་བྱས་ཚུལ་གྱི་ཧམ་རྫུན་བཤད་པར་ངོས་འཛིན་བྱེད་དགོས་པ་ཞིག་ཆགས་ཡོད། རྫུན་གཏམ་ཡིན་པའི་སྒྲུབ་བྱེད་དུ་དྲངས་པའི་རྒྱུམཚན་ནི། སྲོང་བཙན་སྒམ་པོའི་གོང་གི་རྒྱལ་རབས་རིམ་བྱུང་དུས་སུ་ཡིག་ཐོག་ཏུ་བཀོད་པའི་བོན་སྡེ་མང་པོ་ཡོད་པ་དང་དེ་དག་ཐམས་ཅད་བོད་ཡིག་གི་དབྱངས་གསལ་ཐོག་ནས་བཀོད་པ་ཤ་སྟག་ཡིན་ཟེར། དེ་ནི་ཧང་ཐལ་ཆེ་བའི་གཏམ་དུ་ཟད་དེ། ཐོན་ མིའི་སྔོན་གྱི་བོན་སྡེ་རྣམས་ད་ལྟའི་བོད་ཡིག་འདི་ཐོག་ནས་བཀོད་ཡོད་ན། ད་ལྟའི་དུས་སུ་བོན་སྡེ་དེ་གྲས་ཤོག་ལྷེའི་ཚལ་བུ་ཙམ་ཡང་མཐོང་རྒྱུམེད་པ་གང་ཡིན། དེང་སྐབས་མཐོང་རྒྱུ་ཡོད་པ་བོད་ཡིག་ཐོག་ནས་བཀོད་པའི་བོན་གཞུང་གི་གླེགས་བམ་རྣམས་ནི་ཕྱིས་སུ་ཆོས་རྒྱལ་སྲོང་བཙན་སྒམ་པོའི་རྗེས་ཀྱི་ལོ་རྒྱུས་དུས་རིམ་ནང་བྱུང་བ་ཤ་སྟག་ལས་དེའི་སྔོན་དུ་བྱུང་བ་མེད། དེ་འདྲ་ཡིན་སྟབས་བོན་སྡེ་རྣམས་ཀྱི་འགོ་ལ་ཞང་ཞུང་གི་སྐད་དུ་ཞེས་མཆོད་བརྗོད་ཚིག་ཕྲེང་གཅིག་སྨར་ཡིག་གམ་བོད་ཡིག་གིས་སྒྲ་བསྒྱུར་བྱས་ནས་བཀོད་པའི་སྲོལ་དེ་ཆགས་པ་ཡིན། ཐོན་མིའི་གོང་དུ་བོད་མིའི་སྤྱི་ཚོགས་ནང་ཡིག་སྲོལ་ཞིག་བྱུང་ཡོད་པ་དངོས་བདེན་ཡང་། ཡིག་སྲོལ་དེ་གཤེན་རབ་མི་བོ་ཆེས་གསར་དུ་བཏོད་པ་ལོ་རྒྱུས་ཐོག་ཡོངས་གྲགས་སུ་ཞང་ཞུང་གི་ཡི་གེའམ་སྨར་ཡིག་ཟེར་བ་དེ་ཡིན་པ་ལས་ད་ལྟའི་བོད་ཡིག་འདི་མིན། གཤེན་རབ་མི་བོ་ཆེས་སྲོལ་བཏོད་པའི་ཞང་ཞུང་གི་ཡི་གེ་དེ་བོད་ཀྱི་ལོ་རྒྱུས་ཐོག་དུས་ཡུན་རིང་པོ་ཞིག་གནས་ཡོད་ཀྱང་། ཡིག་སྲོལ་དེ་བརྡ་སྤྲོད་ནུས་པ་ཞན་པ་དང་ཆོས་སྲིད་རིག་གནས་སོགས་ཀྱི་ཁྱབ་ཁོངས་ཀུན་ཏུ་སྤྱོད་སྟབས་མ་བདེ་བ་སོགས་ཀྱི་ཞན་ཆ་མང་བར་བརྟེན་སྤྱི་ཚོགས་གོང་འཕེལ་འགྲོ་བའི་དགོས་མཁོ་དང་མ་འཚམས་པར་གྱུར་ནས་མཐར་ཐུག་སྤུར་རྒྱལ་དུས་རབས་ཀྱི་དུས་སྨད་དུ་ནུབ་པ་དང་། དེ་ལ་བརྟེན་ནས་ཆོས་རྒྱལ་སྲོང་བཙན་སྒམ་པོའི་དུས་སུ་ད་ལྟའི་བོད་ཡིག་འདི་གསར་དུ་བཟོས་པ་བཅས་ནི་སུས་ཀྱང་འཁྱོག་བསུབ་གཏོང་ཐབས་བྲལ་བའི་ལོ་རྒྱུས་ཀྱི་དངོས་དོན་ཡིན། དེ་ལ་མ་བདེན་བདེན་སྒྲིག་དང་ཧང་ཤེད་ཨུ་ཚུགས་ཀྱིས"རྫུན་བཤད"དང"འཆལ་གཏམ'' "གཟུ་ལུམ་འདོད་སྨྲས" "འབྱུང་པོའི་མུན་གཏམ"ཡིན་ཟེར་བ་སོགས་ཚིག་མཆོན་གྱི་ཕྲེང་བ་སྤེལ་བ་མ་ཟད་དེ "འཁྱོག་བཤད་རྒན་པོའི་བྲང་ཁར་ཕེན་པའི་ལེགས་བཤད་ཀྱི་མདའ"རུ་ངོམས་པ་ནི་གྲུབ་མཐའི་ཕྱོགས་ཞེན་གྱི་འཛིང་རྙོག་བསྐྱར་དུ་སློང་བ་དང་ལོ་རྒྱུས་ཀྱི་མེ་ལོང་ངོས་སླར་ཡང་དྲི་ནོག་གིས་སྦགས་པའི་ངང་ཚུལ་རང་དུ་ཟད་དོ།
ད་ལྟའི་བོད་ཡིག་འདི་ཇི་ལྟར་བཟོས་པའི་སྐོར་བན་བོན་གཉིས་ཀྱི་རྩ་བའི་བཞེད་པ་ཡོངས་སུ་ཕྱོགས་འགལ་ཡིན་པ་མ་ཟད། དེའི་ནང་མ་བདེན་བདེན་སྒྲིག་གི་ཤོད་ཚུལ་དང་།ར་མགོ་ལུག་བཤད་ཀྱི་འགྲེལ་པ། རང་བསྟོད་གཞན་སྨད་ཀྱི་དྲེགས་གཏམ་མང་དག་ཅིག་སྤེལ་ནས་དོན་མེད་ཀྱི་རྩོད་རྙོག་སྣ་ཚོགས་ཡོང་དོན་ཅི་ཡིན་ཞེ་ན། དེ་ལ་རྒྱུ་རྐྱེན་མང་པོ་ཡོད་པ་གཞིར་བཅས་ཀྱང་གཙོབོ་ནི་ཕྱི་རོལ་ཡུལ་གྱི་བྱ་དངོས་ལ་འཐེན་འཁྱེར་ཕྱོགས་ལྷུངས་སུ་མ་སོང་བའི་བརྟག་ཞིབ་ཟབ་མོ་མེད་པའི་ཁར། གྲུབ་མཐའི་ལྟ་བ་དང་གྲུབ་མཐའི་ཕྱོགས་ཞེན་གྱིས་རང་ལུགས་ཀྱི་ཤོད་ཚུལ་གང་ཡིན་པ་དེ་རང་ཚད་མར་བཟུང་ནས་ཨུ་ཚུགས་མཁྲེགས་བཟུང་བྱེད་པ་དེས་བཟོས་པ་ཡིན། གལ་སྲིད་ང་ཚོས་གྲུབ་མཐའི་ཕྱོགས་ཞེན་གཙང་མར་སྤངས་ཏེ་དྲང་ཚུགས་ཀྱི་ལངས་ཕྱོགས་ཐོག་ནས་བོད་ཀྱི་ཡི་གེའི་སྲོལ་ཇི་ལྟར་བྱུང་ཚུལ་སྐོར་གླེང་བ་ཡིན་ན་དཔྱད་ཡིག་ཁུངས་བཙན་ལོས་དང་། ཞིབ་འཇུག་གཏིང་ཟབ་ལོས། དབྱེ་ཞིབ་གནད་དུ་འཕྲོད་མི་འཕྲོད་སོགས་ཀྱིས་བཞེད་པ་མི་མཐུན་པ་ཡོང་སྲིད་ནའང་རྩ་བའི་བཞེད་པ་འགལ་བ་ལྟག་སྤྲོད་དུ་གྱུར་བ་དེ་འདྲ་ཡོང་མི་སྲིད་སྙམ།
དེང་གི་དུས་སུ་ནི་བོད་ཀྱི་སྤྱི་ཚོགས་འདི་ལོ་རྒྱུས་ཀྱི་དུས་མཚམས་གསར་པ་ཞིག་གི་ཐོག་སླེབས་ཡོད་པ་དང་། ལོ་རྒྱུས་ཀྱི་ཆ་རྐྱེན་འདིའི་འོག་མི་རིགས་ཀྱི་རིག་གནས་སྤྱི་དང་སྒོས་སུ་ཤེས་རིག་ཀུན་གྱི་སྙིང་བཅུད་དུ་གྱུར་བའི་བོད་ཀྱི་སྐད་ཡིག་འདི་ཉམས་པ་སོར་ཆུད་དང་མི་ཉམས་གོང་འཕེལ་ཡོང་ཆེད། རང་རེའི་མི་རིགས་འདིའི་ཡི་གེའི་སྲོལ་དུས་ནམ་ཞིག་བྱུང་བ་དང་ཇི་ལྟར་བྱུང་བའི་ལོ་རྒྱུས་ཀྱི་རྣམ་པ་ངོ་མ་གསལ་བར་བཟོས་ཤིང་། དེ་དག་འཛིན་སྐྱོང་སྤེལ་གསུམ་གྱི་བྱེད་ལམ་ཡངས་པོར་བཤང་ཐུབ་པ་བྱ་རྒྱུ་དེ་གནད་དམ་པར་འཛིན་དགོས་པའི་དུས་ལ་བབ་བསྡད་ཡོད། དེས་ན་དུས་རབས་ཉི་ཤུའི་དུས་སྨད་དང་ད་ལྟ་འཚོབཞུགས་སུ་ཡོད་པའི་མཁས་དབང་མང་པོས་དུས་བབ་ཀྱི་འགྲོ་ཕྱོགས་འདི་ལ་དགོངས་བཞེས་ཀྱིས་འོས་འགན་ཁུར་དུ་བཞེས་ཏེ་བོད་ཀྱི་ཡི་གེའི་ལོ་རྒྱུས་སྐོར་རིས་སུ་མ་ཆད་པའི་ཞིབ་འཇུག་རྒྱ་ཆེར་མཛད་བཞིན་ཡོད་པ་དང་། མཛད་ནས་ཀྱང་གངས་ཅན་ཡུལ་འདིར་ཡི་གེའི་སྲོལ་བྱུང་ནས་ལོ་ངོ་སྟོང་ཕྲག་འགའ་ཤས་སོང་བ་དང་། བཙན་པོའི་རྒྱལ་རབས་ཀྱི་དུས་སུ་ཐོན་མི་སཾ་བྷོ་ཊས་སླར་ཡང་སྔོན་མའི་ཡིག་སྲོལ་གྱི་རྨང་གཞིའི་ཐོག་རྒྱ་གར་གྱི་ཡིག་སྲོལ་དང་སྒྲ་རིག་པའི་གཞུང་ལུགས་དཔྱད་གཞིར་མཛད་དེ་ད་ལྟའི་ཡིག་སྲོལ་འདི་གསར་གཏོད་གནང་བར་བཞེད་པའི་དགོངས་ཕྱོགས་གཅིག་མཐུན་དུ་འགྲོ་བཞིན་ཡོད་པ་འདི་ནི་བོད་ཀྱི་ཤེས་རིག་དཔལ་ཡོན་དར་བའི་ལོ་རྒྱུས་ཀྱི་རྣམ་པ་ངོ་མ་གང་ཡིན་ཇེ་གསལ་དུའགྲོ་བའི་མཚོན་ཚུལ་ཞིག་ཡིན་ལ། དེ་སྔོན་གྲུབ་མཐའི་ཕྱོགས་ཞེན་གྱི་འཛིང་རྙོག་ནང་དུ་བྱིངས་པའི་སྐྱོན་འགལ་ངན་འབྲས་ལ་གཟིགས་ནས་བླང་དོར་གྱི་གནས་ལ་མི་འཆུག་པའི་དགོངས་ཞིབ་ཟབ་མོ་བཞེས་པའི་མཚོན་ཚུལ་ཞིག་ཀྱང་ཡིན་ན། འདི་ལ་ནི་ཡིད་ཀྱི་སྤྲོ་བ་རབ་ཏུ་བརྟས་ཏེ་དགའ་འབོད་ཞུ་བཞིན་ཡོད་དོ།།
|
|
