ཐོན་མིས་བོད་ཀྱི་ཡིག་སྲོལ་གཉིས་པ་ཇི་ལྟར་ཕྱེ་ཚུལ་ཐད་ཀྱི་བཞེད་པ་
འདྲ་མིན་སྐོར་གླེང་བ།
ཐོན་མིས་ད་ལྟའི་བོད་ཡིག་འདིའི་ཡི་གེའི་རྣམ་གཞག་ཇི་ལྟར་གཏན་ལ་ཕབ་པ་དང་། ཡི་གེའི་གཟུགས་དབྱིབས་གང་ལ་བརྟེན་ནས་བཟོ་གནང་མཛད་པའི་སྐོར་བཞེད་པའམ་ལྟ་བ་མི་འདྲ་བ་མང་དུ་ཡོད་པ་རྣམས་བསྡུས་ན་གཙོ་བོ་གསུམ་ཡིན་ཏེ།
(༡)ཡི་གེའི་རྣམ་གཞག་དང་ཡིག་གཟུགས་གཉིས་ཀ་རྒྱ་གར་གྱི་ཡིག་སྲོལ་ལ་དཔེ་བླངས་ནས་བཟོས་པར་བཞེད་པ་དང་།
(༢)ཡི་གེའི་རྣམ་གཞག་དང་ཡིག་གཟུགས་གཉིས་ཀ་རྒྱ་གར་གྱི་ཡིག་སྲོལ་དང་འབྲེལ་བ་གང་ཡང་མེད་པར་ཞང་ཞུང་གི་ཡི་གེར་དཔེ་བླངས་ནས་བཟོས་པར་བཞེད་པ།
(༣) ཐོན་མིས་བོད་ཡིག་གསར་བཟོ་བྱས་པ་ཟེར་བ་དེ་རང་དངོས་མེད་ཀྱི་རྫུན་གཏམ་ཡིན་པར་སྨྲ་བ་བཅས་གསུམ་མོ།།
བཞེད་པ་དང་པོ་འཛིན་མཁན་རྣམས་ནི་ཕལ་ཆེ་བ་བན་ཕྱོགས་ཀྱི་མཁས་དབང་ཡིན་པས། ཁོང་རྣམ་པའི་གསུང་ཚུལ་ཇི་འདྲ་ཡོད་པ་དཔེ་མཚོན་འགའ་ཞིག་དྲངས་ན《རྒྱལ་རབས་གསལ་བའི་མེ་ལོང》ལས"རྒྱ་ཡི་ཡི་གེ་རེ་རེ་བཞིན། རང་གང་སྤྱོད་པ་མ་གཏོགས་པ།།ཀུན་ལ་ཁྱབ་པ་གཅིག་ཀྱང་མེད།།དེ་དག་ཐམས་ཅད་ཁོང་དུ་བསྡུས།། དེ་ལ་དཔེ་བྱས་བསྡུས་པ་ནི།། བོད་ཡིག་སུམ་ཅུ་གཏན་ལ་ཕབ།།ཡི་གེའི་འབྲུ་ནི་རེ་རེ་བཞིན།།བཟོ་ཡི་རྣམ་འགྱུར་ལེགས་པར་བཅོས།།"ཞེས་དང་"ལཉྫ་ལྷའི་ཡི་གེ་འདྲ།དེ་ལ་དཔེ་བྱས་ནས་དབུ་ཅན་དུ་བྱས།ཝརྟུ་ཀླུའི་ཡི་གེ་འདྲ། དེ་ལ་དཔེ་བྱས་ཡི་གེ་ཟུར་ཅན་དུ་བྱས་སོ།།"ཞེས་གསུངས།
《བོད་ཀྱི་དེབ་ཐེར་དཔྱིད་ཀྱི་རྒྱལ་མོའི་གླུ་དབྱངས》ལས་བོད་ཀྱི་ཡི་གེ་བཟོས་ཚུལ་ནི་"དབྱངས་བཅུ་དྲུག་ལས་ཨི་ཨུ་ཨེ་ཨོ་བཞི་དང་། གསལ་བྱེད་སུམ་ཅུ་རྩ་བཞི་ལ་ལོག་པ་ལྔ། འཐུག་པོ་ལྔ། ཥ། ཀྵ་རྣམས་དོར་བའི་ཨ་དྲངས་པའི་རྩ་བཞིར། གཅིག ཆོས། འཇིག་རྟེན། གཞོན་ནུ། གཟི་བརྗིད། འོ་མ་སོགས་ཀྱིས་མཚོན་པར་རྒྱ་སྐད་ལ་ཨེ་ཀ དྷ་རྨ། ལོ་ཀ ཀུ་མཱ་ར། ཏེ་ཛསྲ། པ་ཡསྲ་བརྗོད་པས། ཅ་ཆ་ཇ་ཞ་ཟ་འ་རྣམས་མི་དགོས་པ་འདིར་བསྣན་ཏེ། དབྱངས་བཞི་གསལ་བྱེད་སུམ་ཅུར་གཏན་ལ་ཕབ་ནས། ལཉྫ་དཔེ་བྱས་ནས་དབུ་ཆེན། ཝརྟུ་ལ་དཔེ་བྱས་ནས་གཤར་མ་སོགས་ཡི་གེའི་གཟུགས་དང་བརྡ་གསལ་བར་བྱེད་པའི་སུམ་རྟགས་སོགས་བོད་ལ་ཉེར་མཁོའི་བསྟན་བཅོས་བརྒྱད་མཛད"།(ཤོག་གྲངས་༢༠-༢༡)ཞེས་གསལ། དེ་བཞིན་མཁས་དབང་ཆེན་པོ་ཚེཏན་ཞབས་དྲུང་གིས་ཀྱང《ཐོན་མིའི་ཞལ་ལུང》ནང་ཐོན་མིས"བོད་ཡིག་གསར་དུ་བཟོ་བའི་འཆར་གཞི་ལེགས་པར་བཏིང་བ་སྟེ། ལེགས་སྦྱར་གྱི་དབྱངས་བཅུ་དྲུག་ལས་ཨི་ཨུ་ཨེ་ཨོབཞིའི་དོད་དུ་གི་གུ ཞབས་ཀྱུ། འགྲེང་བུ། རྣ་རུ་བཞི་བཟོས་ཤིང་། ཨ་ཡིག་ལས་གཞན་ཨཱ་ཨཱི་ཨཱུ་རྀ་རཱྀ་ལྀ་ལཱྀ་ཨཻ་ཨཽ་ཨཾ་ཨཿརྣམས་བོད་ཀྱི་དབྱངས་ལ་མི་མཁོ་བས་དོར། གསལ་བྱེད་སོ་བཞི་ལས། གྷ་ཛྷ་ཌྷ་དྷ་བྷ་སྟེ་འཐུག་པོ་ལྔ་དང་། ཊ་ཋ་ཌ་ཎ་ཥ་སྟེ་ལོག་པ་ལྔ། མཐའི་ཀྵ་ཡིག་དོར་བས་ཉེར་གསུམ་གྱི་ཁར་བོད་ལ་ཉེ་བར་མཁོ་བ་ཅ་ཆ་ཇ་དང་ཞ་ཟ་འ་སྟེ་དྲུག་གསར་དུ་བསྣན་པས་ཉེར་དགུ་དང་།བོད་ཡིག་གི་སྐབས་སུ་ལེགས་སྦྱར་ལྟར་ཀཱ་ལིའི་སྲོག་ཏུ་ཞུགས་པ་དང་མཚམས་སྦྱོར་བ་སོགས་དབྱངས་ཡིག་བྱ་བ་བསྒྲུབ་ཏུ་མེད་པས་ན་ཨ་ཡིག་གསལ་བྱེད་ཀྱི་མཐར་སྦྱར་ནས་གསལ་བྱེད་སུམ་ཅུར་བཟོས། དེ་ནས་ག་ད་བ་མ་འ་སྟེ་སྔོན་འཇུག་ལྔ། ག་ང་ད་ན་བ་མ་འ་ར་ལ་ས་སྟེ་རྗེས་འཇུག་བཅུ།ད་ས་སྟེ་ཡང་འཇུག་གཉིས། ར་ལ་ས་སྟེ་མགོ་ཅན་གསུམ། ཡ་ར་ལ་ཝ་སྟེ་འདོགས་ཅན་བཞི་སོགས་ཐ་སྙད་ཀྱི་རྣམ་གཞག་ཆ་ཚང་བ་ཞིབ་པར་བཟོས་པར་གྲགས་སོ" (ཤོག་གྲངས་༡༦-༡༧)ཞེས་དང་། "གང་ལྟར་རྒྱ་གར་གི་གཟབ་བྲིས་ལཉྫ་དང་།བཤུར་བྲིས་ཝརྟུ་ལ་དཔེར་བླངས་པའི་ཚུལ་ནི་ད་ལྟའི་དུས་ཀྱི་འབྲི་རྒྱུན་ལས་ཀྱང་གསལ་བར་རྟོགས་ཏེ། རྣམ་པར་དཔྱོད་པ་ཞིབ་མོའི་སྒོ་ནས་ཕན་ཚུན་བསྡུར་ཏེ་བལྟས་ན་གང་ལ་དཔེར་ལེན་སའི་གཞི་དང་དཔེ་དེ་ལྟར་བཟོས་པའི་དབྱིབས་རྣམས་གསལ་བར་འཆར་བ་ནི་གཟུ་བོར་གནས་པའི་བློ་ལྡན་ཞིག་ལ་གཏམ་གྱི་ཕྲེང་བ་མང་པོ་སྤེལ་མི་དགོས་པར་གདའོ" (ཤོག་གྲངས་༢༤)ཞེས་གསལ་བར་གསུང་ཡོད།
གཞན་ཡང་མཁས་དབང་དགེ་འདུན་ཆོས་འཕེལ་གྱིས《དེབ་ཐེར་དཀར་པོའི》ནང་བོད་ཡིག་གང་ལ་དཔེར་བཅད་པའི་ཕྱི་མོ་དེ་ཡང་གུཔྟའི་ཡི་གེ་འདི་ཡིན་ནམ་སྙམ(ཤོག་གྲངས་༧༧)ཞེས་གསུངས།
གོང་གསལ་གསུངས་ཚུལ་དེ་རྣམས་ཀྱི་རྩ་བའི་དགོངས་པ་གཅིག་ཏུ་བསྡུས་ན། ཡི་གེའི་རྣམ་གཞག་ཇི་ལྟར་གཏན་ལ་ཕབ་པའི་སྐོར། རྒྱ་གར་ཡི་གེའི་དབྱངས་བཅུ་དྲུག་ནས་བོད་ལ་མི་མཁོ་བ་རྣམས་དོར་ནས་དབྱངས་བཞིར་ངེས་པ་དང་། གསལ་བྱེད་སུམ་ཅུ་སོ་བཞི་ནས་འཐུག་པོ་ལྔ་དང་། ལོག་པ་ལྔ། མཐར་ཟད་ཀྱི་ཡི་གེ་བཅས་དོར་བའི་ཁར་བོད་ལ་ཉེ་བར་མཁོ་བ་ཅ་ཆ་ཇ་དང་། ཞ་ཟ་འ་བཅས་དྲུག་བསྣན། དེ་ནས་སྲོག་གི་ཡི་གེ་ཨ་མཇུག་ཏུ་བཞག་ནས་གསལ་བྱེད་སུམ་ཅུར་ངེས་པ་དང་། དེ་ལས་འཕུལ་རྟེན་འགོ་འདོགས་སོགས་ཀྱི་དབྱེ་བ་མཛད་དེ་ཡི་གེའི་རྣམ་གཞག་ཆ་ཚང་བ་གསར་དུ་བཟོས་པ་ཡིན་གསུངས་པ་དང་། བོད་ཡིག་གི་ཡིག་གཟུགས་དཔེ་གང་ལ་བཞག་ནས་བཟོས་པའི་སྐོར་རྒྱ་གར་གྱི་ཡི་གེར་དཔེ་བྱས་ནས་བཟོས་པ་གཅིག་མཐུན་ཡིན་ཡང་། རྒྱ་གར་གྱི་ཡི་གེ་གང་འདྲ་ཞིག་ལ་དཔེ་བླངས་པ་ཡིན་མིན་ཅུང་ཟད་མ་མཐུན་པ་སྟེ། མང་ཆེ་བས་ལཉྫ་དང་ཝརྟུའི་ཡི་གེ་ཡིན་པར་བཞེད་པ་དང་། ཡང་འགའ་རེས་ན་ག་ར། འགའ་རེས་ཁ་ཆེའི་ཡི་གེ འགའ་རེས་བྷཻ་གྲུ་མ། འགས་རེས་གུ་པྟའི་ཡི་གེ་ཡིན་པར་བཞེད་པ་སོགས་ལེ་ཚན་གོང་མའི་ནང་བརྗོད་པ་ལྟར་དང་། མདོར་ན་བན་ཕྱོགས་ཀྱི་མཁས་དབང་ཕལ་ཆེ་བས་བོད་ཀྱི་ཡི་གེའི་དཔེ་ཁུངས་རྒྱ་གར་ལ་གཏུགས་ནས་བོད་རང་གི་སྔོན་མའི་ཡིག་སྲོལ་དང་འབྲེལ་བ་གང་ཡང་མེད་པར་ངོས་འཛིན་གནང་གི་ཡོད་ལ། ད་ཕན་བཞེད་པ་འདི་ཁྱབ་ཤུགས་ཆེ་བས། ལོ་རྒྱུས་ཀྱི་དེབ་ཐེར་དང་། བོད་ཡིག་གི་སློབ་དེབ་སོགས་ཀྱི་ནང་གོང་བཤད་ཀྱི་ལྟ་བ་དེ་ཡི་རྗེས་སུ་འབྲངས་ནས་འགྲེལ་བཤད་བྱེད་པ་ཡིན།
བཞེད་པ་གཉིས་པ་འཛིན་མཁན་ནི་ཕལ་ཆེ་བ་བོན་ཕྱོགས་ཀྱི་མཁས་དབང་རྣམས་ཡིན།དཔེར་ན་བོན་གཞུང《ལེགས་པར་བཤད་པ་རིན་པོ་ཆེའི་གཏེར་མཛོད》དུ་ཡི་གེའི་དཔེ་གཞི་དེ"རྒྱ་གར་གྱི་ཡི་གེ་ཡིན་པར་འདོད་ནའང་མངོན་སུམ་གྱིས་འགལ་ཏེ། ད་ལྟ་རྒྱ་གར་གྱི་ཡི་གེ་དང་བོད་ཡིག་རྣམས་སྒྲ་གཟུགས་བརྙན་དང་བཅས་པ་མི་མཐུན་པ་འདུག་པའི་ཕྱིར་དང་། མ་རྒྱུད་ལས། རྒྱ་བོད་ཡི་གེ་གཏན་ནས་མི་འདྲའོ་ཞེས་གསུངས་སོ།། དེས་ན་སློབ་དཔོན་པད་མའི་ཞལ་ནས་རྒྱ་གར་ཆོས་རྣམས་བོད་ལ་བསྒྱུར་བའི་ཚེ་རྒྱ་གར་ཡི་གེ་བོད་དུ་བསྒྱུར་མ་བཏུབ། ཀ་ཁ་སུམ་ཅུ་བོད་ལ་དཔེ་རུ་བླངས། ལྷ་ཡི་མཚན་རྣམས་འབྱུང་བའི་སྒྲ་ལས་དྲངས།། སྔགས་རྣམས་མ་བསྒྱུར་རྒྱ་གར་རང་སོར་བཞག་ཅེས་གསུངས་པ་ལ་ཡིད་རྟོན་པར་བྱའོ"(ཤོག་གྲངས་༡༦༠)ཞེས་དང་། ཡང་ཡིག་གཟུགས་ཀྱི་སྐོར་ལ "དང་པོ་དག་པ་ལྷའི་ཡི་གེ་སྟག་གཟིག་སྤུངས་ཡིག་ཏུ་བསྒྱུར། དེ་ཞང་ཞུང་ཡིག་རྒན་དུ་བསྒྱུར། དེ་སྨར་དྲག་ཏུ་བསྒྱུར། དེ་སྨར་ཆེ་ཆུང་དུ་བསྒྱུར། སྨར་ཆེན་དབུ་ཆེན་ནམ་གཟབ་ཏུ་བསྒྱུར། སྨར་ཆུང་འབྲུ་མར་བསྒྱུར། ཡིག་སྣ་འབྲུ་མ་ལས་བརྩམས་ཞེས་གྲགས་སོ"(ཤོག་གྲངས༡༥༩) ཞེས་གསལ་བ་དང་། སྔོན་བྱུང་བོན་གཞུང་གཞན་མའི་ནང་དུ་ཡང་རྩ་བའི་བཞེད་པ་ལེགས་གཏེར་གྱི་གསུང་ཚུལ་དང་མི་འདྲ་བ་མེད་པས་འདིར་རེ་རེ་བཞིན་མ་དྲངས་སོ། བོན་ཕྱོགས་ཀྱི་བཞེད་པ་དེ་ལྟར་ན་ཐོན་མིས་གསར་དུ་བཟོས་པའི་བོད་ཡིག་དེ་སྔར་ཡོད་ཀྱི་ཀ་ཁ་སུམ་ཅུར་དཔེ་བླངས་ནས་བཟོས་པ་ཞིག་ཡིན་པ་ལས་རྒྱ་གར་གྱི་ཡིག་སྲོལ་ལ་དཔྱད་གཞི་མཛད་པའི་འབྲེལ་བ་གང་ཡང་མེད་པར་ངོས་འཛིན་གྱི་ཡོད།
（མུ་འགོད）
|
|
