༄༅།།བོད་ཀྱི་ཡིག་སྲོལ་གཉིས་པའི་ཡིག་གཟུགས་ཀྱི་དཔེ་གཞི་གང་ཡིན་དང་
ཡིག་གཟུགས་ཀྱི་རྣམ་གྲངས་ཇི་ཡོད་སོགས་ཀྱི་སྐོར་གླེང་བ།
མཁས་དབང་དགེ་འདུན་ཆོས་འཕེལ་གྱིས་གསུངས་པའི་གུ་པྟའི་ཡི་གེ་དེ་ནི་དབྱངས་དང་གསལ་བྱེད་ཚང་མ་ད་ལྟའི་དབུ་ཅན་དང་འདྲ་བ་མ་ཟད། ཧ་ལམ་གཉིས་སུ་མེད་པ་ཞིག་ཡོད་ལུགས་ལ་གཞིགས་ན་དབུ་ཅན་གྱི་དཔེ་གཞིར་མཛད་པའི་ཕྱི་མོ་དེ་རང་ཡིན་ཞེས་བརྗོད་ཆོག་པ་ལྟ་བུར་སྣང་ཡང་། ཞིབ་པར་བརྟགས་ན་ཡི་གེ་དེར་ལེགས་པར་དཔྱོད་དགོས་པའི་གནས་མི་ཉུང་བ་ཞིག་ཡོད་པ་སྟེ། དེབ་དཀར་དུ་དྲངས་པའི་གུ་པྟའི་ཡི་གེའི་གཟུགས་རིས་དེ་ག་རང་ཡིན་ན་གཅིག་ནས་ཡི་གེ་དེ་ཉིད་བོད་ཡིག་དབུ་ཅན་རང་དུ་ངོས་བཟུང་ཆོག་པ་མ་ཟད། ཡིག་གཟུགས་ཀྱང་ཐོན་པོ་ཡོད་པ་ཆོས་རྒྱལ་སྲོང་བཙན་སྒམ་པོའི་སྐབས་ཀྱི་དབུ་ཅན་ཡིག་གཟུགས་ལས་སྒྲོས་ཆགས་པ་ཡོད། ད་ལྟ་ང་ཚོས་དངོས་སུ་མཇལ་རྒྱུ་ཡོད་པའི་བསམ་ཡས་གཙུག་ལག་ཁང་གི་སྒོ་འགྲམ་དུ་ཆོས་རྒྱལ་ཁྲི་སྲོང་ལྡེ་བཙན་སྐབས་སུ་བཞེངས་པའི་རྡོ་རིང་ངོས་མུ་ཏིག་སྟར་ལ་བརྒྱུས་འདྲའི་ཡིག་གཟུགས་སུ་བཀོད་པའི་དབུ་ཅན་དེ་ཡང་གུ་པྟའི་ཡིག་དཔེའི་གཟུགས་རིས་ལྟ་བུ་བཟོ་ཏ་ཐོན་པོ་དེ་འདྲ་མེད། དེས་ན་གལ་སྲིད་གུ་པྟའི་ཡི་གེ་དཔེ་གཞིར་བཟུང་བའི་དབང་དུ་བྱས་ན་ཐོན་མིས་ཡི་གེ་དེའི་གཟུགས་རིས་འདྲ་བཤུས་ཀྱིས་བོད་ཡིག་གི་ཕྱི་མོར་མཛད་པ་ཞིག་ཡིན་པ་ལས་གསར་གཏོད་གང་ཡང་མཛད་མེད་པ་དང་། དེ་ཡང་ཧ་ཅང་འདྲ་བ་ཞིག་དཔེ་བཤུས་བྱེད་མ་ཐུབ་པར་ཡིག་གཟུགས་ངན་དུ་སོང་བ་ཡིན་ཞེས་བརྗོད་དགོས་པར་གྱུར་བས་དེ་འདྲ་ནི་གཏན་ནས་ཡིན་མི་སྲིད་སྙམ། གཉིས་ནས་རང་རེའི་བསྟན་ཆོས་མང་པོའི་ནང་གནའ་བོའི་སྐབས་རྒྱ་གར་ལ་ཡིག་རིགས་མི་འདྲ་བ་དྲུག་ཅུ་རྩ་བཞིའམ་དྲུག་ཅུ་རྩ་བདུན་ཡོད་ལུགས་གསལ་བའི་ཁོངས་གུ་པྟའི་ཡི་གེ་ཞེས་པ་མེད་པ་དང་།ཐོན་མི་རྒྱ་གར་དུ་སློབ་སྦྱོང་གནང་བའི་ཡི་གེ་གཙོ་བོ་ཡང་ལན་ཝར་གཉིས་རང་ཡིན་པ་ལས་གུ་པྟའི་ཡི་གེ་སྦྱོང་གནང་མཛད་པའི་ལོ་རྒྱུས་མེད་པ་སོགས་ཀྱི་གནས་ཚུལ་ལ་བསམས་ན་གུ་པྟའི་ཡི་གེ་ཟེར་བ་དེ་རྒྱ་གར་གྱི་ཡི་གེའི་གྲས་ཨེ་ཡིན་སྙམ་པ་དང་།ཕལ་ཆེར་དེབ་ཐེར་དཀར་པོ་རང་དུ་སྔོན་གྱི་དུས་རྒྱ་གར་དུ་དམག་དྲངས་ནས་ཡུལ་གྲུ་མང་པོ་བོད་ཀྱི་མངའ་ཞབས་སུ་བཅུག་པ་ཡིན་ཞེས་གསུངས་པའི་དུས་སྐབས་སུ་བྱུང་བའི་རྒྱ་གར་སྐད་ཀྱི་སྒྲ་བོད་ཡིག་ཐོག་ནས་ཕར་བཀོད་པའི་གླེགས་བུ་དེ་འདྲ་ཡང་མིན་ནམ་སྙམ་པ་སོགས་སོམ་ཉིའི་སྒྲོ་འདོགས་གཅོད་པར་དཀའ་བའི་གནས་མང་དུ་མཆིས་པས་གུ་པྟའི་ཡི་གེ་དེ་བོད་ཡིག་གི་དཔེ་གཞིར་འཛིན་པའི་ཕྱི་མོ་ཡིན་ཞེས་ཁ་ཚོན་གཅོད་དཀའ་བར་གྱུར། དེ་མ་ཡིན་པ་རང་རེའི་ཡུལ་འདི་རང་དུ་བྱུང་བའི་སྨར་ཆེན་དང་། སྨར་ཆུང་། དེ་བཞིན་ལྷ་བབས་གསུམ་གྱི་ཡི་གེའི་གཟུགས་རིས་ནི་ད་ལྟའི་བོད་ཡིག་དང་འདྲ་བའི་ཕྱོགས་ཤིན་ཏུ་མང་བ་མ་ཟད། ཡིག་འབྲུ་ཁ་ཤས་ནི་ཧ་ལམ་གཅིག་མཚུངས་རང་དུ་མངོན་པ་སྟེ། དེ་ཡང་གསལ་བར་བཤད་ན། ཞང་ཞུང་གི་ཡི་གེ་དང་ད་ལྟའི་བོད་ཡིག་གི་དབར་ཡིག་རུས་ཀྱི་འབྲེལ་བ་ཧ་ཅང་མངོན་གསལ་དོད་པོ་ཡོད་པ་དང་།རྒྱ་གར་གྱི་ཡི་གེ་དང་ད་ལྟའི་བོད་ཡིག་གི་ཡིག་གཟུགས་དབར་ཡིག་རུས་ཀྱི་འབྲེལ་བ་རྩ་བའི་ཆར་མེད་པ་ཤིན་ཏུ་གསལ་བར་མཆོན་པས། དེ་འདྲའི་ཚུལ་ལ་བསམས་ན། ཆོས་རྒྱལ་སྲོང་བཙན་སྒམ་པོའི་དུས་སུ་ཐོན་མི་སཾ་བྷོ་ཊས་བོད་ཀྱི་ཡིག་སྲོལ་གཉིས་པ་གསར་གཏོད་གནང་བའི་སྐབས་ཡིག་གཟུགས་བཟོ་ཕྱོགས་ཐད་རྒྱ་གར་གྱི་ཡི་གེར་དཔྱད་གཞི་མཛད་ཡོད་པ་སྨོས་མེད་ཀྱང་། རྩ་བའི་དཔེ་གཞི་ནི་སྔོན་མའི་ཞང་ཞུང་གི་ཡི་གེ་རང་དུ་བཞག་པའི་ཐོག་དེ་ལ་བླང་དོར་གྱི་ལེགས་བཅོས་དགོས་ངེས་མཛད་ནས་གཏན་ལ་ཕབ་པ་གླེང་མེད་ལྟ་བུར་མངོན། དེ་ཡང་ཞང་ཞུང་གི་སྨར་ཆེ་ཆུང་རྨང་གཞིར་བྱས་ནས་དབུ་ཅན་གྱི་ཡིག་གཟུགས་དང་། ལྷ་བབས་ཀྱི་ཡི་གེ་རྨང་གཞིར་བྱས་ནས་དབུ་མེད་ཀྱི་ཡིག་གཟུགས་གཏན་ལ་ཕབ་པ་ཡིན་སྙམ།སྤྱིའི་དབང་དུ་བྱས་ན་ཡང་གསར་གཏོད་དང་འཕེལ་རྒྱས་ཟེར་བ་འདི་སྔར་ཡོད་ཀྱི་རྨང་གཞི་ངེས་ཅན་ཞིག་གི་ཐོག་ཏུ་བྱུང་བ་ཡིན་སྟབས་བོད་མིའི་སྤྱི་ཚོགས་ཁྲོད་ཆེས་སྔ་བའི་དུས་ནས་བྱུང་བའི་ཡིག་སྲོལ་དང་པོ་དེའི་རྨང་གཞིའི་ཐོག་ཐོན་མིས་ད་ལྟའི་ཡིག་སྲོལ་འདི་གསར་གཏོད་མཛད་པ་ཡིན་ཞེས་བརྗོད་ན་རྣལ་མའི་དོན་དང་མཐུན་ལ་བོད་ཀྱི་ཡི་གེའི་ལོ་རྒྱུས་འཕེལ་རིམ་གྱི་རྐང་དང་ཡང་འགྲིག་པ་ཞིག་ཡིན་པར་སེམས་སོ།
གོང་དོན་དང་འབྲེལ་བའི་གནད་དོན་གཞན་ཞིག་ནི་ཐོན་མིས་གཏན་ལ་ཕབ་པའི་ད་ལྟའི་བོད་ཡིག་འདིའི་ཡིག་གཟུགས་དབུ་ཅན་དང་དབུ་མེད་རྣམ་པ་གཉིས་ཡིན་མིན་ཐད་ལ་་
ཡང་བཞེད་པ་གཅིག་མཐུན་མེད་པ་སྟེ《དེབ་ཐེར་དཀར་པོ》དང་《ཐོན་མིའི་ཞང་ལུང》ནང་ཐོན་མིས་གཏན་ལ་ཕབ་པའི་ཡིག་གཟུགས་རྣམ་པ་གཅིག་རང་སྟེ་དབུ་ཅན་ལས་མེད་པ་དང་།རྗེས་སུ་ཡི་གེའི་ལག་ལེན་ནང་དབུ་ཅན་དེ་ཉིད་མགྱོགས་པར་བྲིས་པས་རང་བཞིན་གྱིས་དབུ་མེད་ཀྱི་རྣམ་པ་བྱུང་བ་ཡིན་ཞེས་གསུངས། དེ་ནི་བོད་ཀྱི་ཡི་གེའི་ལོ་རྒྱུས་འཕེལ་རིམ་གྱི་ཁྱད་ཆོས་ལ་དགོངས་དཔྱད་ཟབ་པར་མ་བྱུང་བའི་དབང་གིས་ཡིན་སྙམ། གང་ལགས་ཤེ་ན། སྤྱིར་བཏང་དུ་ཡིག་སྲོལ་གསར་པ་བཟོ་རྒྱུ་དེ་གཞི་རྒྱ་ཆེ་ཞིང་རྙོག་འཛིང་ཚེབའི་ཤེས་བྱའི་ལས་གཞི་ཡིན་པས་བཟོ་བྱའི་ཡིག་སྲོལ་གང་ཡིན་པ་དེར་ཐོག་མ་ཉིད་ནས་ཡིག་གཟུགས་ཀྱང་མི་འདྲ་བ་གཉིས་གསར་བཟོ་བྱེད་རྒྱུ་ནི་འགྲུབ་དཀའ་བ་ཞིག་ཡིན་མོད། ཐོན་མིས་བོད་ཡིག་གསར་བཟོ་མཛད་སྐབས་སྔར་ཡོད་ཀྱི་ཡིག་གཟུགས་འདྲ་མིན་དཔེ་གཞིར་མཛད་པའི་ཆ་རྐྱེན་ཡོད་པར་བརྟེན་ཐོག་མ་ཉིད་ནས་ཡིག་གཟུགས་རྣམ་གྲངས་གཉིས་ཙམ་གསར་གཏོད་མཛད་མི་ཐུབ་པ་མེད་ལ་མཛད་ཀྱང་སྲིད་པ་ཞིག་ཡིན། དོན་དངོས་སུ་ཡང་དེ་ལྟ་སྟེ། དེ་སྔོན་པོ་ཏ་ལའི་གཟིམ་ཆུང་གི་གཡང་སྒམ་ནང་བཞུགས་སུ་གསོལ་བའི་ཐོན་མིའི་ཕྱག་བསྟར་མའི་ཕྱག་བྲིས་ཚལ་བུ་དེའི་ཡིག་གཟུགས་དབུ་མེད་ཡིན་པ་དང་། ལྷ་ས་ཕ་བོང་ཁ་དགོན་དུ་ཡོད་པའི་ཡི་གེ་དྲུག་མའི་གཟུངས་ཀྱི་ཡིག་ཕུད་དེ་དབུ་ཅན་གྱི་ཡིག་གཟུགས་ཡིན་པ་དེའི་ཐོག་ནས་གསལ་པོ་མཚོན་ཐུབ།དབུ་ཅན་མགྱོགས་པར་བྲིས་པས་རང་བཞིན་དུ་དབུ་མེད་ཀྱི་རྣམ་པ་བྱུང་བ་ཡིན་གསུངས་པ་དེ་ཡང་དོན་དུ་དེ་འདྲ་ཡིན་མི་སྲིད་ཅིང་། ཐོན་མིས་བོད་ཀྱི་ཡིག་སྲོལ་གཉིས་པ་གསར་གཏོད་མཛད་ཚུན་ཡིག་གཟུགས་ལ་འཕེལ་འགྱུར་རིམ་པ་བྱུང་ཡོད་རུང་། རྩ་བ་ཐོག་མ་ཉིད་ནས་ཡོད་པའི་ཡིག་གཟུགས་རྣམ་པ་གཉིས་ཀྱི་རྨང་གཞིའི་ཐོག་འཕེལ་འགྱུར་སྣ་ཚོགས་བྱུང་བ་སྟེ།དབུ་ཅན་ལ་ཁྱད་ཉམས་མི་འདྲ་བའི་དབུ་ཅན་གྱི་ཡིག་གཟུགས་གསར་པ་མུ་ཏིག་སྟར་བརྒྱུས་དང་ཁྱུང་བྲིས་སོགས་རིམ་པ་མཆེད་པ་དང་། དབུ་མེད་ལ་ཁྱད་ཉམས་མི་འདྲ་བའི་དབུ་མེད་ཀྱི་ཡིག་གཟུགས་གསར་པ་འབྲུ་ཆེན་དང་། ཚུགས་བྲིས། འཁྱུག་བྲིས་སོགས་རིམ་པ་མཆེད་པ་ལྟ་བུ་ཡིན། དེ་སྔོན་ཡིག་གཟུགས་དེ་གཉིས་བོད་ཀྱི་ཡུལ་ཕྱོགས་སོ་སོར་དར་ཁྱབ་ཆེ་ཆུང་ལ་བལྟས་ན་དབུས་གཙང་ཁུལ་དུ་དབུ་མེད་ཀྱི་འབྲི་སྲོལ་དར་ཁྱབ་ཆེ་བ་དང་། མདོ་ཁམས་ཁུལ་དུ་དབུ་ཅན་འབྲི་སྲོལ་དར་ཁྱབ་ཆེ་བས་ཡི་གེའི་སྤྱོད་མཁོ་ཇི་སྙེད་ཧ་ལམ་དབུ་ཅན་རང་གི་ཐོག་ནས་འབྲི་བ་དང་། ཡིག་གཟུགས་མཛེས་ཤིང་མགྱོགས་པར་འབྲི་མཁན་གྲགས་ཅན་གྱི་ཡིག་མཁན་མང་པོ་ཡོད་ལ་ད་ལྟའང་ཡོད་མུས་སུ་ཡིན་ཡང་། དབུ་ཅན་རྣམ་པ་རང་ཚུགས་སུ་གནས་པ་ལས་དབུ་མེད་ཀྱི་རྣམ་པར་འགྱུར་བའི་སྣང་ཚུལ་མེད། དེས་ན་བོད་ཡིག་ལོ་རྒྱུས་འཕེལ་རིམ་གྱི་ཁྱད་ཆོས་ལ་བལྟས་ནའང་འདྲ། ཡི་གེའི་ལག་ལེན་དངོས་ཀྱི་གནས་ཚུལ་ལ་བལྟས་ནའང་འདྲ། དབུ་ཅན་མགྱོགས་པར་བྲིས་པས་དབུ་མེད་ཀྱི་ཡིག་གཟུགས་བྱུང་བར་བཞེད་པ་འདི་ནི་གང་ནས་བལྟས་ཀྱང་ཅུང་ཟད་མི་འཐད་པའི་གསུང་ཚུལ་རང་ཞིག་ཡིན་སྙམ། མདོར་ན་བོད་ཀྱི་ཡིག་སྲོལ་གཉིས་པའི་ཡིག་གཟུགས་ཀྱི་དཔེ་གཞི་གཙོབོ་ནི་བོད་ཡུལ་རང་དུ་སྔར་ནས་ཡོད་པའི་ཞང་ཞུང་གི་སྨར་ཡིག་ཡིན་པ་ལས་ལཉྫ་དང་ཝརྟུ་མ་ཡིན་ལ། དབུ་ཅན་དང་དབུ་མེད་ཀྱི་ཡིག་གཟུགས་ཀྱང་ཐོན་མིས་ཡིག་སྲོལ་གཉིས་པ་གསར་གཏོད་མཛད་སྐབས་ནས་ཡོད་པའི་རྩ་བའི་ཡིག་གཟུགས་རྣམ་པ་གཉིས་ཡིན།།
རྫོགས་སོ།།
|
|
