བོད་ཀྱི་ཡིག་བྲིས་འབྲི་བར་ཐོག་མར་ཐལ་བྱང་དུ་འབྲི་དགོས། དེ་ལ་རྒྱུ་མཚན་གཉིས་ཡོད་དེ། གཅིག་ནི་སྔོན་ཚེ་བོད་ཁུལ་དུ་བོད་ཤོག་བཟོ་བའི་ལག་རྩལ་ནི་ལག་བཟོ་ཁོ་ནར་བརྟེན་དགོས་པས། དེང་སང་ལྟ་བུའི་འཕྲུལ་ཆས་སྟབས་བདེ་པོ་དང་ཤོག་བུ་འབེལ་པོ་མེད་ལ། ཤོག་བུའི་རིན་གོང་ཆེ་བ། ཤོག་བུ་ཅུང་ཟད་ཀྱིས་ཡང་ཡང་སྦྱངས་བའི་འབྲི་གཞི་འདར་དཀའ་བ་སོགས་ཀྱིས་ཐོག་མར་ཐལ་བྱང་དུ་མི་སྦྱོང་ཀ་མེད་དང་། གཉིས་ནི་ཐལ་བྱང་དུ་ཡིག་གཟུགས་ལེགས་པོ་འབྲི་ཐུབ་དཀའ་ཞིང་། གལ་ཏེ་ཐལ་བྱང་དུ་ཡིག་གཟུགས་ཚད་ལྡན་ཞིག་ཐོན་ན། ཤོག་བུའི་ངོས་སུ་ཡིག་གཟུགས་ཤིན་ཏུ་ལེགས་པོ་ཞིག་འོང་བ་ཐེ་ཚོམ་མེད་པས། དབུས་གཙང་གི་སློབ་ཆུང་དུ་དེང་དུས་ཀྱང་སློབ་ཕྲུག་ཚོ་སློབ་གྲྭར་འགྲོ་བར་རྒྱབ་ཏུ་ཤིང་བྱང་ཞིག་ཁུར་ནས་འགྲོ་བར་མཐོང་བ་དེ་ཡིན།
ཐལ་བྱང་བཟོ་བར། ཐལ་བྱང་བཟོ་བའི་རྒྱུ་ནི། སྟག་པ་ཤིང་དྲང་ལ། འཛེར་མ་དང་། རུལ་སྐྱོན། གས་སྲུབ་མེད་ཅིང་གྲིབ་སྐམ་ལེགས་པ་བྱས་པ་དེ། ཞེང་དང་རིང་ཚད་ཡི་གེ་པོ་ཏི་ལྡེབ་ཐུང་ཙམ་ལ་སྲུབ་མཐུག་སོར་ཕྱེད་ཙམ་རེ་ཡོད་པ་གཉིས་དང་། གསུམ་དང་། བཞི་སོགས་གང་འདོད་ཆ་ལྡན་དུ་དྲས་ནས་གཤགས། དེ་ལ་འབུར་ལེན་གྱིས་ངོས་ཐམས་ཅད་དྲང་ཞིང་འཇམ་པར་བྱས་མཐར། ཤིང་ལེབ་དཀྱུས་ཀྱི་གོང་འོག་གཉིས་ནས་སོར་ཕྱེད་རེ་དང་། སྣེ་གཉིས་ནས་སོར་གཉིས་ཙམ་རེའི་མུ་ཁྱུད་དམ་ལྕགས་རི་བཞག་ཐོག དེའི་ནང་ཕྱོགས་གསེར་ལོས་ནས་གཉིས་ཙམ་རེ་ཕབ་སྟེ་ངོས་ཤིན་ཏུ་སྙོམ་ལ་འཇམ་པར་གཞོག་སྟེ་མཐར་གཞོང་བ་ལྟ་བུ་ཞིག་ཏུ་གྱུར་པས་ས་ཆ་འགའ་ཞིག་ཏུ་ཐལ་གཞོང་ཞེས་ཀྱང་འབོད། དེ་ལ་ཐལ་བྱང་གཅིག་ཁོ་ན་བྱེད་ན། ངོས་གཅིག་འཇམ་པོ་གླེགས་ཤིང་ལྟ་བུ་ལ། ངོས་གཅིག་གཞོང་པ་བྱ། གཉིས་བྱེད་ན་མདུན་རྒྱབ་གཉིས་ལེབ་མོ་དང་། ནང་ངོས་གཉིས་གཞོང་པ་ཁ་སྤྲོད་དུ་འཇོག་ཆོག་པར་བྱ། གསུམ་དང་བཞི་སོགས་བཟོ་ན། མདུན་རྒྱབ་གཉིས་གོང་ལྟར་ལ། བར་མ་གཉིས་ལ་མདུན་རྒྱབ་ཀུན་དུ་ཐལ་གཞོང་ཅན་ཡི་གེ་འབྲི་གཞི་ཅན་ཏུ་བྱའོ།།
ཐལ་བྱང་སྣེ་གཉིས་ཀྱི་ཕྱི་ངོས་གའུ་ཅན་དུ་བྱེད་པ་མཛེས་ཆོས་ཡིན་ལ། མདུན་རྒྱབ་དང་མུ་ཁྱུད་ཀུན་ལ་མཚལ་དང་ཡང་ན་ལི་ཁྲི་བྱུགས་པའི་སྟེང་། མདུན་ངོས་སུ་རག་འདུལ་གྱི་པ་ཏྲ་དང་། དེའི་དབུས་སུ་ཨ་ར་པ་ཙ་སོགས་ཤེས་རབ་འཕེལ་བྱེད་ཀྱི་གཟུངས་ལཉྫའི་ཡི་གེ་བྲིས་ཏེ་པོ་ཏིའི་དབུ་ལྡེབ་ལྟ་བུ་མཛེས་པར་བྱ། གཞོང་པའི་མཐིལ་ཤིན་ཏུ་སྙོམས་པ་ནི་ཡི་གེ་འབྲི་གཞི་ཡིན་པས་སྣག་ཚ་བྱུགས་པའི་ཐོག་བཀྲག་རྩིས་ཕྱི་ནང་ཀུན་བཀྲ་ཞིང་མཛེས་ལ་ཚོན་མི་ལོག་པར་བྱ། བཀྲག་རྩི་བསྐམས་ནས་སྤྱོད་སྟངས་ལ། སྣག་ཚ་བྱུགས་པའི་གཞིར་མར་ཅུང་བསྐུས་ནས་མེ་དང་ཡང་ན་ཉི་མར་བསྲོས་ནས་ཞུ་བ་དང་ཡང་ན་སྙོམ་པར་བྱུགས་པའི་ཐོག་གོ་ཐལ་བླུག་ན་དཀར་པོར་འགྲོ་བ་དེ་འབྲི་གཞི་ཡིན་ལ། དེའི་འབྲི་བྱེད་སྨྱུ་གུ་ནི། ཤིང་སྤེན་མས་བཟོ་དགོས་ཏེ། གལ་སྲིད་སྲ་ཤིང་རིགས་ཀྱིས་སྨྱུ་གུ་བཟོས་ན། འབྲི་གཞོང་ངོས་སུ་ཡི་གེ་བྲིས་རྗེས་ཀྱི་རི་མོ་དོད་ཅིང་། འབྲི་གཞིའི་ངོས་མི་འཇམ་པར་འགྱུར་བས། ངེས་པར་དུ་འབྲི་གཞི་ཐལ་བྱང་གི་རྒྱུ་སྲ་ཤིང་སྟག་པ་དང་། སྨྱུ་གུའི་རྒྱུ་ཤིང་སྙི་བ་སྤེན་མ་ལས་བྱེད་དགོས་ཏེ། འདི་ནི་ཤོག་བུའི་རྒྱུ་མཉེན་ཞིང་འཇམ་ལ། བྲི་སྨྱུག་གི་སྨྱུག་རྒྱུ་སྲ་མཁྲེགས་ཅན་དགོས་པ་ལས་ལྡོག་པ་ཞིག་ཡིན་པ་དང་། འདི་ནི་ཐལ་བྱང་དང་བྲི་སྨྱུག་བཟོ་བའི་གནད་ཀྱི་དམ་པའང་ཡིན་ནོ།། དེ་ནས་ཐལ་བྱང་གོ་ཐལ་གྱིས་དཀར་པོར་གྱུར་པ་དེར་ཐིག་ཤིང་ལ་བརྟེན་ནས་ཡིག་ཕྲེང་ཅི་ཙམ་འདོད་པའི་ཐིག་བཏབ་པའི་ཐོག་ཡང་བསྐྱར་ཐལ་བ་བླུག གོ་ཐལ་གྱིས་འབྲི་གཞི་སླར་དཀར་པོ་ལྟར་འགྱུར་ཡང་། ཐིག་བཏབ་མུས་སུ་དེ་ཙམ་གྱི་སྣུམ་མེད་པས་ཐིག་མངོན་ཙམ་པ་ཞིག་ཏུ་གྱུར་པའི་ཐོག་ནས་ཡི་གེ་འབྲི་ན། གཞི་ནག་པོ་ཡིན་ཕྱིར་ཤོག་བུ་དཀར་པོའི་སྟེང་སྣག་བཟང་པོས་ཡི་གེ་བྲིས་པ་བཞིན་འབྱུང་ལ། ཐེངས་རེ་བྲིས་འཕྲལ་ཡང་དུ་ཕྱིས་ནས་སྣུམ་བྱུག་སྔར་ལྟར་བྱས་ཏེ་ལན་ཁྲི་སྟོང་དུ་མ་བསྐྱར་ཆོག་པས་འགྲོ་གྲོན་ཆུང་བ་དང་། ཐལ་བྱང་རྒྱ་ཆུང་བས་ལག་ཏུ་འཛིན་བདེ་བ། གཞོང་བའི་མཐའ་མུ་ཁྱུད་ཀྱིས་བསྐོར་ཕྱིར་རྫོད་དཀའ་བ། དེར་མཁོ་བའི་རྒྱུ་ཆ་རྙེད་སླ་བ། དེའི་ཕྱི་ནས་ཀོ་དཀྲིས་ཀྱིས་དཀྲི་བྱེད་ཡོད་པས་ཡི་གེ་པོ་ཏེ་ཆུང་ངུ་ཞིག་དང་འདྲ་བས་གཞི་བྱིས་ཀུན་ཏུ་ཁྱེར་བ་དང་ཉར་བདེ་བ། བོད་ཀྱི་ཡིག་གཟུགས་འབྲི་བར་འབྲི་གཞི་གཞན་དུ་བྲིས་པ་དང་མི་འདྲ་བ་ཡིག་གཟུགས་ལེགས་པོ་འོང་པ་བཅས་ཁྱད་ཆོས་དུ་མ་ལྡན་ལ། ད་དུང་ཐལ་བྱང་དེ་རིགས་རལ་གྲི་ལྟར་རྐེད་པར་འཕྲེད་དུ་དྲངས་ནས་འགྲོ་བའང་ཡོད་པར་མཐོང་ངོ་། །
གོང་དུ་བཤད་ཟིན་པའི་ཐལ་བྱང་ནི་ཡི་གེ་འབྲི་གཞི་སྟེ། རི་མོ་སྦྱང་གཞིའི་ཐལ་བྱང་བཟོ་ན། ཐལ་བྱང་གི་རྒྱུ་དང་བྲི་སྨྱུག་གི་རྒྱུ་དང་བཟོ་ཐབས་ཐམས་ཅད་གོང་དང་དྲ་བར། ཤིང་ལེབ་གྲུ་བཞི་ལྕགས་རི་མེད་པ་ཞིག་དགོས། རྒྱུ་མཚན་ནི། ཡི་གེ་འབྲི་གཞི་ལྟ་བུ་རྒྱ་ཆུང་ན་རི་མོ་འབྲི་གཞི་མི་འོང་བ་དང་། ལྷ་ཐིག་དང་ཡིག་ཐིག་མི་འདྲ་བས། ཡི་གེའི་ཐིག་ནི་འཕྲེང་ཐིག་ཁོ་ནས་ཆོག་མོད། ལྷ་འབྲི་བར་ཐིག་ཆེན་ཐིག་ཕྲན་མང་དུ་འདེབས་དགོས་པས་ལྕགས་རི་ཡོད་ན་ཐིག་འདེབས་མི་བདེ་བས། དབྱིབས་གྲུ་བཞི་ཅུང་ཟད་ནར་མོ་པང་དུ་བཞག་བདེ་ལྕགས་རི་དང་བྲལ་བ་ཞིག་དགོས།
དངོས་སྤྱོད་སྐབས་གཟབ་བྱ་ནི། མར་བྱུགས་མང་ན་ཐལ་བ་འཛིན་ཚད་མཐུག་དྲག་པས་སྨྱུག་རྐྱག་མང་ཞིང་ཡིག་གཟུགས་ལེགས་པོ་མི་འོང་། མར་མེད་ན་ཐལ་བ་མི་འགོས། ཐལ་བཤལ་བྱས་རྗེས་ཡང་དུ་མེ་དང་ཉི་མའི་དྲོད་ཕོག་ན། ཐལ་བ་སྣུམ་གྱིས་ཟོས་ནས་ཁ་དོག་ནག་པོར་འགྲོ་བས་དེ་ལ་ཡི་གེ་དང་རི་མོ་གསལ་བོ་མི་དོད། ཐལ་བྱང་གི་ངོས་ལ་ལག་པ་དང་གོས་སོགས་ཀྱིས་རེག་བརྡར་ཤོར་ན་རྫོད་སླ་བ་ཤེས་པར་བྱའོ།།
|
|
