སྤྱི་ཁོག་ཕུབ་པའི་ཆུ་འཛིན་ཕང་བ་རུ།།སྒྱུ་རྩལ་བཏོན་པའི་འཇའ་ཚོན་རྣམ་པར་བཀྲ།། ཆར་གྱིས་བརླན་པའི་ཀུན་དགའ་ར་བའི་དཔལ།། མིག་གི་བུང་བ་མ་བོས་མགྲོན་དུ་ཆས།། ཡི་གེ་འབྲི་ཚུལ་སྦྱངས་ནས་ཕལ་ལམ་བྱང་ཐོག་སྤྱི་ཁོག་འབུབས་ཚུལ་དང་། སྒྱུ་རྩལ་འདོན་ལུགས་ལེགས་པར་ཤེས་ན།ཡིག་མཁན་གྱི་གྲལ་ཏུ་ཚུད་སླའོ།།
ང་ཚོས་དུས་རྒྱུན་ཡིག་བསྐུར་རམ། སྟབས་ཞུའམ། ཁ་བྱང་ངམ།རྩོམ་རེ་འབྲི་ནའང་རྣམ་གཞག་ངེས་ཅན་ཞིག་དང་བསྟུན་དགོས་ལ། སྒྱུ་རྩལ་གྱི་རང་བཞིན་དང་ལྡན་པ་ཞིག་བྲིས་ན།དེ་ལ་བྲི་གཞི་དང་། ཡིག་སྣ་དང་། འཇོག་མཚམས་དང་།ཚོན་དང་བཅས་པ་གང་ལ་གང་འཚམ་དུ་བྱ་དགོས།རྣམ་གཞག་སྤྱི་ཙམ་པ་འདི་ལ་སྤྱི་ཁོག་ཅེས་བྱ་ཞིང་། བྲི་གཞི་དང་། ཡིག་གཟུགས་དང་། གཞོགས་འདེགས་དང་བཅས་པ་ཕན་ཚུན་མཛའ་གྲོགས་སུ་སྦྱར་དགོས། རྣམ་གཞག་བྱེ་བྲག་པ་འདི་ལ་སྒྱུ་རྩལ་ཞེས་བྱའོ།།
སྒྱུ་རྩལ་མཚོན་པའི་བྲིས་མ་སྟེ། ཡི་གེའི་ལམ་དུ་དྲངས་པའམ་རི་མོའི་གཟུགས་སུ་བཀོད་པའི་མཛེས་ཆོས་ཤིག་ཡིན་ན། ལྟ་མཁན་གྱི་འདྲེན་བྱེད་དུ་ཐོག་མར་སྣང་བ་ནི་སྤྱི་ཁོག་ཕུབ་ཚུལ་ཡིན་པས། མི་ཡི་ཡག་བཙོག་ངོ་དང་། བྲིས་མའི་ཡིག་བཙོག་འཁོད་ཟེར་བའི་དཔེ་ལྟར་ལ། དེ་ནས་རྣམ་པར་རོལ་བའི་སྟོན་མོ་ནི་སྒྱུ་རྩལ་བཏོན་ཚུལ་ཡིན་པས།བུ་མོ་རྒྱན་གྱིས་མཛེས། ཡི་གེ་རྩལ་གྱིས་མཆོག་ཟེར་བའི་དཔེ་ལྟར་རོ།། དེ་ནས་སྨད་དུ་བྱུང་བའི་ཉམས་སྤྱི་ཁོག་ལ་རག་ལས་པ་དང།མངོན་པར་མཛེས་པའི་དཔལ་ཡིག་རྩལ་ལ་རག་ལས་པའི་ཚུལ།མེ་ཏོག་ལོ་མས་བསྐྱོར་ན་ལྷག་པར་མཛེས་པ་དང་། གླུ་ངག་རོལ་མོས་བཀྱགས་ན་ལྷག་པར་སྙན་པ་བཞིན། སྤྱི་ཁོག་དང་སྒྱུ་རྩལ་ཕན་ཚུན་ཆར་བ་ཆུ་གྲོགས་དང་། ཉི་མ་མེ་གྲོགས་སུ་གོ་ཆོད་པར་བྱ་དགོས། འབྲི་རྩལ་ཙམ་ལ་གལ་ཆེན་བྱས་ནས་སྤྱི་ཁོག་ལ་ཇི་མི་སྙམ་པར་བཞག་ན། ཁལ་གཡས་གཡོན་ལྕི་ཡང་ཤོར་བའི་དཔེའོ།།
དང་པོ། སྤྱི་ཁོག་འབུབས་ཚུལ།
སྤྱི་ཁོག་ཏུ་བྲི་གཞི་དང་། ཡིག་སྣ་དང་། ཐིག་ཕྲེང་དང་། སྣེ་ཐིག་དང་།མཐའ་མཚམས་སོགས་འདུས་ཡོད་ལ། བྲི་གཞི་ནི་ཤོག་བུའམ། གོས་སམ། བྱང་ཤིང་སོགས་ཏེ། བྲི་གཞི་ལ་ཞེང་ཆེ་ཆུང་དང་སྲིད་རིང་ཐུང་སོགས་ཀྱི་ཁྱད་པར་ཡོད་ལ། ཡི་གེ་མང་ཉུང་དང་། ཡིག་སྣ་གང་བྲི་ནི་བྲི་གཞི་དང་བསྟུན་དགོས། ཆ་བཞག་ན། དཔེ་ཆ་གཏོས་ཆེ་བ་ཞིག་ལ་མཚན་བྱང་རིང་བ་དང་། གཞུང་སྲབ་མོ་ཞིག་ལ་མཚན་བྱང་ཡང་ཐུང་བར་བྱ་བ་དེ་ཡང་ཞྭ་མོ་མགོ་ལ་འཕྲོད་ན་མཛེས།མགོ་འོག་ལུས་པོ་ཆུད་ན་བདེ། ཟེར་བ་བཞིན་ནོ།། བྲི་གཞི་སྲིད་དུ་རིང་བ་ལ་སུག་རིང་ངམ་འཁྱུགས་བྲིས་དང་། འཕྲེད་དུ་རིང་བ་ལ་སུང་ཐུང་ངམ་བར་བྲིས་དང་། སྒོ་བྱང་ལྟ་བུ་ལ་གཟབ་མ་དང་།ཐམ་ག་ལ་དབུ་ཅན་ནམ་དཔེ་ཚུགས་སམ། ལཉྫའམ་ཝརྟུ། ཧོར་ཡིག་སོགས་གང་ལ་གང་རིགས་བྲི་བར་བྱ།དེ་ཡང་མཐའ་གཅིག་ཏུ་མ་ངེས་ཏེ། སྤྱི་ཡི་གེ་མང་ཉུང་དང་། ཡིག་མཁན་ཡིག་སྣ་གང་ལ་མཁས་པར་ཡང་ཕལ་ལམ་བསྟུན་དགོས། གཞན་ཡང་། བྲི་གཞིའི་མདོག་དང་། འབྲི་བྱེད་ཀྱི་ཚོན་རྩི་ཡང་གང་ལ་གང་འཚམ་ཏུ་བྱ་དགོས།སྤྱིར་ཤོག་བུ་དཀར་པོ་ལ་ཡི་གེ་ནག་པོ་འབྲི་བ་ཡིན་མོད། མཛེས་ཉམས་དང་འཇུག་ཡུལ་གྱི་དབང་གིས། བྲི་གཞི་དཀར་པོ་ལ་ཚོན་དམར་པོ་དང་།དམར་པོ་ལ་སེར་པོ་དང་།ནག་པོ་ལ་དཀར་པོ་སོགས་གང་ལ་གང་འཚམ་རྟེན་དང་བརྟེན་པ་ཁ་གསལ་བ་ཞིག་ཡིན་དགོས།
ཐིག་ཕྲེང་དུ་ཡིག་ལམ་དང་། བར་སྟོང་དང་། སྣེ་ཐིག་དང་། མཐའ་བཞི་སོགས་འདུས་ཡོད་ལ། ཡིག་ལམ་དང་བར་སྟོང་གི་འབྲེལ་བ་ནི།འབྲུ་མང་ཉུང་དང་བྲི་གཞི་ཆེ་ཆུང་ལ་ཐུག་ཡོད། སྤྱིར་ཡིག་ལམ་དང་བར་སྟོང་གི་ཞེང་མཉམ་པ་དང་། སྔ་མ་ཕྱི་མ་ལས་ཞེང་ཆེ་བ་དང་། ཕྱི་མ་སྔ་མ་ལས་ཞེང་ཆེ་བ་གསུམ་ལས་གང་འགྲིག་རེ་བྱ་དགོས།མཐའ་མི་འཆལ་བ་སྣེ་ཐིག་གི་རྒྱ་སྟེ། དཔེ་ཀ་བ་བཞིན། ཐིག་ཕྱི་མ་སྦོམ་པ་དང་།
ནང་མ་ཕྲ་བ་གཉིས་བར་དོག་པོར་བཤིབས་ནས་རྒྱག་པ་དང་། སྣ་ཐུང་མ་ལ་ཐིག་རྐྱང་ཡིན་ཡང་ཆོག གཡས་གཡོན་གཉིས་ཀྱི་ཐིག་རྒྱའི་ནང་ཡིག་ཕྲེང་རེ་སྲིད་དུ་ཆུད་པའི་མཚམས་སུ་ཐིག་རེ་བརྒྱབ་པའི་གཡས་མཐའི་དཀར་ཕྲེང་ནང་དུ་གཞུང་མཚན་དང་ལྷེ་གྲངས་བྲི་བར་བྱ།ཞན་པར་དང་ཡིག་ཤོག་གཞན་དག་ལ་སྣེ་ཐིག་རྒྱག་མི་དགོས་ཀྱང་། མཛེས་པའི་ཉམས་འདོན་པར་དེ་ལུགས་ཀྱི་ཤུགས་བསྟན་ཞིག་འཇོག་དགོས།
མཐའ་བཞིའི་འཇོག་ཚུལ། གོང་འོག་གཉིས་ཡིག་ལམ་གྱི་བར་སྟོང་ལས་ཞེང་ཆེ་བ་དང་། མཐའ་གཉིས་ཅུང་ཟད་དོག་པར་བྱ།སྣ་རིང་ཡིན་ན་མཐའ་གཉིས་ཡངས་བར་བྱ།སྤྱིར་མཐའ་བཞིའི་ཞེང་ཆེ་ཆུང་ཡི་གེའི་མང་ཉུང་ལ་བལྟོས་ནས་གང་འོས་སུ་གཞག་པར་བྱའོ། །
ཐིག་ཕྲེང་གཙོ་བོར་འཛིན་པའི་སྤྱི་ཁོག་ནི། བརྩམས་ཆོས་མཛེས་བྱེད་ཀྱི་རྒྱན་ཡིན་ཏེ། ཡིག་གཟུགས་དེ་འདྲ་མི་མཛེས་ཀྱང་།སྤྱི་ཁོག་ཕུབ་པ་བཟང་ན། ཟླ་བའི་ར་རི་རང་འོད་ཀྱིས་གབ་པ་ལྟ་བུ། ཡིག་གཟུགས་མཛེས་ཉམས་ཐོན་ཀྱང་།སྤྱི་ཁོག་ཕུབ་པ་ཚུལ་བཞིན་མ་བྱུང་ན། གཡུ་ལ་རྡོ་ཞད་འདྲེས་པ་འདྲ། ཡིག་གཟུགས་མཛེས་ཤིང་སྤྱི་ཁོག་བཀོད་པ་ལེགས་ན།གསེར་གཞོང་ལ་ནོར་བུས་གང་བ་བཞིན་ནོ།།
བྲི་བྱའི་རྣམ་གྲངས་ནི་དཔེ་ཁ་བ་བཞིན་ཏེ།
ཀླད་དུ་བྲི་བྱའི་ཡུལ་ལམ་དོན་ནམ་མཚན་བྱང་དང་།དེའི་མན་ཆད་གཞུང་ཡིག་དང་། མཐའ་མར་འབྲི་མཁན་གྱི་མིང་དང་བྲིས་དུས་བཅས་ཡིན་ལ། དགོས་དབང་གིས་ཐམ་ག་མནན་པའང་ཡོད་དོ།སྤྱིར་ཀླད་དང་མཇུག་ཏུ་ཡི་གེ་ཆུང་བ་དང་།གཞུང་དུ་ཡི་གེ་ཆེ་ལ་གཟུགས་སྣའང་དེ་གཉིས་དང་མི་འདྲ་བ་རེ་བྲིས་ན་ལེགས། བྲི་ཡུལ་གྱི་ཡི་གེ་གཞུང་ཡིག་གི་གཡས་མཐའ་དང་མཉམ་པ་དང་།མཚན་བྱང་གི་ཡི་གེ་དཀྱིལ་ལ་དབབ་པར་བྱ།མཇུག་གི་ཡི་གེ་གཞུང་ཡིག་གི་ཚུན་ཆད་དང་གཡོན་མཐའ་ལས་མི་འདའ་བར་བྱ། གཞུང་ཡིག་གི་ཚིག་མཐའ་ཐིག་ཕྲེང་ཟིན་པ་ཉུང་ན། དེའི་རྗེས་སུ་བར་ཅུང་ཟད་ཕྱེ་ནས་ཐད་ཀར་བྲིས་ནའང་འཐུས་ཏེ། དཔེ་ག་བ་ལྟ་བུ།
བྲི་བྱ་ལ་ལར་དགོས་པ་མེད་ན་གཞུང་ཡིག་ཙམ་ཏུ་མ་ཆོག་པར་བྱ། དཔེ་ང་ལྟ་བུ།གཞུང་ཡིག་ཚིགས་སུ་བཅད་པ་ཚིག་ཕྲེང་རིང་ཐུང་མཉམ་ན། རྐང་བ་སོ་སོ་གོང་འོག་བཤིབས་ནས་དགོད་པར་བྱ། རིང་ཐུང་ཐལ་ཆེ་བར་དེ་ལྟར་མི་འོས། མཛེས་བྱེད་དུ་བྲེང་ཆགས་པར་བྱ་སྟེ། དཔེ་ང་བ་ལྟ་བུའོ།
|
|
