ས་བྲིས་པ་ཁྲ་ངག་དབང་བརྩོན་འགྲུས་རྒྱ་མཚོའམ། ཡང་ན་སྣུམ་རས་ཞུ་བ་ནི་༡༩༧༥ལོར་རྨ་སྟག་ལུང་ས་ཆར་ལང་ཚོ་གསར་དུ་བཞད་ཅིང་ལོ་བདུན་གྱི་ཐོག་བོད་ཡིག་གསར་དུ་ཀློག་སྦྱང་བྱས་པ་དང་ལོ་བཅུ་བཞི་ཐོག་རང་གི་ཁུ་བོ་ཁྲ་བྲིས་ཆེན་བླ་མ་མཆོག་རས་ནས་ས་བྲིས་སྦྱངས། མ་ཟད་ས་བྲིས་ཀྱི་བྲིས་བཤད་སོགས་བྲིས་ཀྱི་མན་ངག་ཆ་ཚང་ཐོབ། དེ་ནས་ཁ་བཏོན་སོགས་ཚན་ཆུང་གི་སྐོར་ཅུང་ཙམ་བྲིས་མྱོང་། ལོ་ཉེར་གཅིག་ཐོག་ཁྲ་བྲིས་རྒན་པད་གྲགས་ཚང་གི་མདུན་ནས་ས་བྲིས་ཀྱི་ཡིག་ཆེན་དང་། ཡིག་ཆུང་། ཡིག་འབྲིང་། འབྲུ་ཚ་དང་བཅས་ས་བྲིས་ཆ་ཚང་མཐར་ཕྱིན་པར་སྦྱངས། མ་ཟད་ཤོག་ལས། ཤོག་མདོག སེར་ཐིག ཤོག་གུ་སྐྱ་བརྡར་དང་། སེར་བརྡར། སྣག་བཟོ་ལུགས། མཚལ་འཁྱག་འདུལ་ལུགས། མཐའ་ཐིག་དང་དབུ་ཁང་ཕུབ་ལུགས། ཤོག་ལྡེབ་ཀྱི་མཐའ་དང་སྲིད་ཀྱི་ཚད་འཇོག་ཚུལ་སོགས་མན་ངག་གི་རིགས་ཁྲ་བྲིས་ཆེན་རྣམ་གཉིས་ལས་མནོས། དེ་ནས་བླ་མ་གཏུམ་དྲག་རྡོ་རྗེ་ཚང་ལ་ཁྲོས་ཆོག་ཆུང་བ་ལྔ་དང་མན་ངག་གི་སྐོར་སོགས་ཡིག་ཆེན་དང་ཡིག་འབྲིང་གཉིས་ཀྱི་ངོས་ནས་བྲིས། ཁྲ་གླིང་སྤྲུལ་བསྟན་པའི་ཉི་མ་ལ་གེ་སར་སྒྲུབ་པ་དང་། དགོན་བར་མའི་བླ་མ་རྡོར་འཛིན་ཚང་ལ་བསྟན་པ་བུ་གཅིག་གི་རྒྱུད་སོགས་བྲིས། མ་ཟད་ས་བྲིས་ཀྱི་ཐོག་ནས་ཡིག་ཐང་གི་རིགས་གྲངས་ཉེར་ལྔ་ཙམ་བྲིས་ནས་ཕྱོགས་ཀྱི་སྐྱེས་ཆེན་དང་རྒྱ་བླ་དག་ལ་ཕུལ་ཟིན། རྨ་ཡུལ་སྡེར་ནང་དགོན་གྱི་དགེ་བཅུའི་ཁྲིམ་སྲོལ་ཚད་ལྡན་ཁྱིམ་ཚང་ལེགས་སྐྱེས་ཀྱི་ཐོག་མ་དབང་བདུད་གསོལ་འདེབས་ཀྱི་ཡིག་ཐང་བྲིས། དེ་ནི་ད་ལྟ་བསྐྱར་པར་བྱས་ནས་ཁྱིམ་ཚང་རེ་ལ་ཡིག་ཐང་རེ་ཡོད་དོ།། བསྙེན་པའི་རིགས་ཚར་བརྒྱ་དང་སུམ་ཅུ་ཙམ་རང་དགོན་དང་ལྷ་སྡེ་རྒྱ་བླ་ཁ་ཤས་དག་ལ་བྲིས་མྱོང་བ་དེ་དག་ད་ལྟ་ཧྲང་ཧེ་གྲོང་ཁྱེར་གྱི་ཕྱོགས་སུ་སྤེལ་ཡོད་པར་བཤད་མཁན་ཡོད་ནའང་རང་གི་མིག་གིས་ད་ལྟ་མཇལ་མ་མྱོང་། མགོ་ལོག་ལུང་སྔོན་དགོན་ནས་བློ་རྟགས་བསྡུས་གསུམ་དང་། ཐུན་མོང་རིག་གནས་སྐོར་སུམ་རྟགས་དག་གསུམ། སྙན་ངག་ཚངས་སྲས་བཞད་སྒྲ། གྲུབ་དོན་ས་གསུམ། ཕར་ཕྱིན་སྐོར་སོགས་དང་། སྔགས་ཕྱོགས་བཅུའི་མུན་སེལ་བཅས་གསན། རང་ཡུལ་རྨ་སྡེར་ནང་ནས་སྙིང་ཐིག་སྔོན་འགྲོ་དང་། སྤྱོད་འཇུག སྤྱི་དོན་འོད་གསལ་སྙིང་པོ་སོགས་མདོ་སྔགས་ཀྱི་ཆོས་སྐོར་མང་དུ་མནོས། གཞན་ལུང་སྔོན་དགོན་དང་། དབང་མདའ། ཁྲ་གླིང་། བྲ་སྐོར། སྤང་ཐོག དཔོན་སྐོར་སོགས་ལ་ས་བྲིས་ཁྲིད་པའི་སློབ་མ་མང་དུ་མཆིས་སོ།། མ་ཟད་རྨ་ཡུལ་སྡེར་ནང་གི་ཡུལ་ཚོའི་སྟེང་དུ་དགེ་སློབ་དག་ལ་ས་བྲིས་ཀྱི་རྨང་གཞི་ཐོག་མ་བཙུག་མཁན་དེའང་ཡིན་ནོ།།
རང་དགོན་གྱི་བཤད་སྒྲུབ་གཉིས་དང་། གཞུང་གྲྭ་དག་ལ་ས་བྲིས་ཁྲིད་པའི་སློབ་མ་མང་དུ་མཆིས། མ་ཟད་རང་ཡུལ་གྱི་ལྷ་སྡེའི་ནང་དུ་མི་སྐྱ་ཕོ་མོ་དང་བཙུན་མའི་རིགས་དག་ལ་ས་བྲིས་དང་བོད་ཀྱི་ཡིག་གཟུགས་གཞན་དག་བཅས་དུ་མ་ཁྲིད་མྱོང་ངོ་།། ད་ལྟ་རྨ་ཡུལ་སྡེར་ནང་གི་ས་བྲིས་པ་དགེན་རྣམས་ཀྱིས་ས་བྲིས་ཀྱི་བྲིས་བཤད་སོགས་བཀའ་འདྲི་བྱེད་གནས་ཀྱི་གཙོ་བོ་དོན་དངོས་གནས་སུ་ཡིན་འདུག ད་ལྟ་བོད་ཀྱི་ཐུན་མོང་དང་ཐུན་མིན་རིག་གནས་སོགས་ཀྱིས་བོད་མི་རིགས་ཀྱི་སློབ་ཚོགས་དག་ལ་ཞབས་ཞུ་ཅུང་ཙམ་སྒྲུབ་བཞིན་ཡོད། ཞེས་སྨྱུག་མིང་པ་མཚོ་བྱུང་འཛུམ་པའི་ལང་ཚོ། དྲྭ་མིང་པ་འབྲུ་སྨྱུག་རྒྱལ། དངོས་མིང་པ་ངག་བརྩོན། ཡང་ན་སྣུམ་རས་སུ་བརྗོད་པ་དེས་རང་གི་ད་སྔོན་ཡན་གྱི་ལོ་རྒྱུས་ཅུང་ཙམ་དྲང་བདེན་གྱི་སྒོ་ནས་སྐལ་པ་ལུག་ལོར་ཟླ་༡༢ཚེས་༢༢ཉིན་སྨྲས་སོ།།
|
|
