བོད་ཀྱི་ཡིག་གཟུགས་པ་གནམ་འདེགས་ཀ་བ། དངོས་མིང་ལ་ཀླུ་རྒྱལ་དོན་གྲུབ་ཟེར། སྤྱི་ལོ་༡༩༧༩ལོར་རེབ་གོང་རོང་བོ་ས་དཀྱིལ་སྡེ་བར་སྐྱེས། ད་ལྟ་རྨ་ལྷོ་ཁུལ་ཡིག་མཁན་མཁས་པའི་མཐུན་ཚོགས་གྱི་ལས་འཛིན་པ་དང་། ཀྲུང་གོའི་དངུལ་ཁང་ལས་རིགས་ལྟ་སྐུལ་ཚོགས་པ་མཚོ་སྔོན་ལྟ་སྐུལ་ཅུའི་མཛེས་རྩལ་ལས་འཛིན་ཚོགས་མི་ཡིན། ཆུང་དུས་ནས་རེབ་གོང་བ་མཁར་རྩེ་རྒྱལ་དང་། དགེ་རྒན་ཆེན་མོ་རྡོ་རྗེ་རྒྱལ། དགེ་རྒན་ཆེན་མོ་ཤ་བོ་ཁྱི་ཐར་སོགས་ཀྱི་མདུན་ནས་ཡིག་གཟུགས་སྣ་ཚོགས་དང་རི་མོའི་རྨང་གཞི་སྦྱངས་མྱོང་ལ། རྨ་ལྷོ་མི་རིགས་དགེ་ཐོན་སློབ་གྲྭ་དང་ནུབ་བྱང་དགེ་ཐོན་སློབ་ཆེན་སོགས་ནས་སློབ་མཐར་ཕྱིན་རྗེས་བྱ་བའི་ལས་གནས་སུ་ཞུགས་པ་དང་། སྔ་རྗེས་སུ་ཀྲུང་གོའི་མི་དམངས་དངུལ་ཁང་མགོ་ལོག་ཁུལ་ཡན་ལག་དངུལ་ཁང་དང་། ཀྲུང་གོའི་དངུལ་ཁང་ལས་རིགས་ལྟ་སྐུལ་དོ་དམ་ཨུ་ཡོན་ལྷན་ཁང་མགོ་ལོག་ལྟ་སྐུལ་ཡན་ལག་ཅུའུ། རྨ་ལྷོ་ལྟ་སྐུལ་ཡན་ལག་ཅུའུ་སོགས་སུ་དངུལ་ལས་ལྟ་སྐུལ་བའི་བྱ་ལས་གཉེར། ཁོའི་ཡིག་གཟུགས་བརྩམས་ཆོས་ཁག་ལ་སྔ་རྗེས་སུ་བྱ་དགའ་སྣ་ཚོགས་དང་། རྒྱ་ཆེའི་བོད་རིགས་མང་ཚོགས་ཀྱིས་གདེང་འཇོག་དང་དགའ་བསུ་མི་དམན་པ་ཐོབ་པ་དང་། ལྷག་པར་ཏུ་མཛེས་རྩལ་ཡིག་གཟུགས་ལ་ན་གཞོན་མང་པོའི་དགའ་བསུ་ཐོབ་བཞིན་ཡོད། ད་ལྟ་བོད་ཀྱི་ཡིག་རིས་སྒྱུ་རྩལ་ལ་མུ་མཐུད་དུ་སློབ་སྦྱོང་དང་འཚོལ་རྟོག་བྱེད་པའི་བརྩོན་པ་མ་ལྷོད་པར་མེས་པོའི་ཤུལ་བཞག་རིག་གནས་རྩ་ཆེན་འདི་ཉམས་པ་སོར་ཆུད་དང་མ་ཉམས་པ་གོང་འཕེལ་གཏོང་བའི་ལས་སུ་དམ་བཅའ་བརྟན་པོས་མུ་མཐུད་དུ་ཧུར་བརྩོན་བྱེད་མུས་སུ་ལགས།
|
|
