དགེ་བའི་བཤེས་གཉེན་ཆེན་མོ་དྲུང་ཡིག་སྨོན་ལམ་རྒྱ་མཚོས།
གཅིག ཡི་གེ་བྲི་བའི་ལག་ལེན་དངོས་ཀྱི་ཚེ་ན། ལག་གཡས་བརྐྱངས་བསྐུམས་ལྷོད་གསུམ་འཚམ་ཞིང་། ལོ་ན་སྨིན་ཙམ་པ་ཞིག་ལ་མཚོན་ན། ལག་པའི་སྤར་ཁྱིམ་དུ་ཕུག་རོན་གྱི་སྒོ་ང་ཆུད་ཙམ་ལྟ་བུའི་ཁོང་སྟོང་བཞག་པའི་སོར་མོ་མས་མ་གསུམ་གྱི་བསྐུམས་ཚད་རན་ན། སོར་མོའི་རྩ་ཁམས་དག་རང་རྣལ་དུ་འབབ་པས་བྲི་ཡུན་རིང་ཡང་སོར་ཚིགས་དང་མཁྲིག་ཚིགས་མི་ན་བར་ཕན་པར་མ་ཟད་ཡིག་གཟུགས་ཀྱང་ལེགས་ཙམ་ཐོན་པ་ལ་ཕན།
གཉིས། སྨྱུ་གུ་གཟུང་བའི་སྐབས་ན། མཐེབ་མཛུབ་གཉིས་ཀྱི་དམ་ལྷོད་རན་པ་དང་། ཡིག་གཟུགས་ཤིན་ཏུ་ཆུང་ཚེ་སྨྱུག་ཁམ་ནས་ཚོན་གང་ངམ་གང་དང་ཕྱེད་ཙམ་ལས་མི་རིང་བར་བཟུང་ན་བཟང་།
གསུམ། ཡི་གེ་བྲི་གཞི་དེ་རང་གི་ནུ་མ་གཡས་པའི་དྲང་ཐད་དུའམ་དཀྱིལ་ཀྲུང་གི་སྐབས་སུ་པུས་མོ་གཡས་པའི་སྟེང་དུ་བཞག་སྟེ། ལུས་སྟོད་དྲང་བོར་བསྲངས་བཞིན་བྲིས་ན་འཕྲེང་མི་ཡོ་བ་དང་། ཡིག་གཟུགས་དྲང་བོའམ་ཀྲོང་ངེར་འབྲི་ཐུབ་པར་ཕན་ཞིང་། མཇིང་ཚིགས་དང་སོག་སྲུབས་མི་ན་བར་ཕན་ཞེས་སྨྱུག་ཐོགས་མཁས་པ་དུ་མའི་དངོས་བརྒྱུད་ཀྱི་ཞལ་རྒྱུན་དང་། ཕྲན་བུའི་ལོ་ངོ་བཞི་བཅུ་ཙམ་གྱི་ཉམས་མྱོང་དངོས་ལྟར་ཅུང་ཟད་དཔྱད་གཞིར་ཕུལ་བ་ལགས་སོ།།
|
|
