བོད་ཀྱི་ཡི་གེ་ནི་གཡུང་དྲུང་བོན་གྱི་སྟོན་པ་གཤེན་རབ་མི་བོ་ཆེས་སྲོལ་གཏོད་གནང་བར་གྲགས་ཤིང་། ལོ་ངོ་བཞི་སྟོང་ལྷག་གི་སྔོན་གྱི་སྟག་གཟིག་སྤུངས་ཡིག་དང་ཞང་ཞུང་སྨར་ཆེན་སོགས་ལ་ཁུངས་གཏུགས་ཆོག་ལ། དེ་ལས་རིང་བའི་ལོ་རྒྱུས་ཡོད་ཀྱང་སྲིད། དུས་རབས་བདུན་པའི་སྟོད་ཙམ་ལ་བོད་རྒྱལ་སྲོང་བཙན་སྒམ་པོའི་སྐུ་དུས་སུ་སྲོལ་གཏོད་བྱས་པའི་བོད་ཡིག་འདི་ནི། ཐོན་མིས་རྒྱ་གར་གྱི་གུབྟའི་ཡི་གེ་ལ་དཔེར་བྱས་ཤིང་། བོད་ཡིག་སྔོན་མ་ཞང་ཞུང་སྨར་ཡིག་དང་། སྟག་གཟིག་སྤུངས་ཡིག་སོགས་ལས་ཀྱང་ལེགས་ཆ་ཅི་རིགས་བཏུས་ཏེ་བོད་ཡིག་འདི་སྲོལ་གཏོད་མཛད་པ་རེད། དེ་རྗེས་བསྟན་པ་སྔ་དར་གྱི་སྐབས་སུ་ཆ་ངར་རིན་ཆེན་འབར་དང་། ཆབ་དཀར་བེའུ་ཚེ། གཙང་དགེ་བསྙེན་དཀོན་མཆོག གྲ་ཤོད་རྣམ་གཉིས་སོགས་ཀྱིས་རིམ་པར་ཡིག་གཟུགས་མི་འདྲ་བ་སྣ་ཚོགས་གསར་བཅོས་བྱས་ཤིང་བོད་ཡུལ་དུ་དར་ཁྱབ་ཆེན་པོ་བྱུང་། བསྟན་པ་ཕྱི་དར་གྱི་སྐབས་སུ་ཁྱུང་པོ་གཡུ་ཁྲི་འབར་དང་། ཤཱཀྱ་རྡོ་རྗེ། ཞང་བཙུན་སོགས་ཀྱིས་སྔོན་གྱི་ཡི་གེར་ལེགས་བཅོས་དང་། ཡིག་གཟུགས་མི་འདྲ་བ་དུ་མ་གསར་བཅོས་དང་ཁྱབ་སྤེལ་གནང་ཞིང་། གཡུ་ཁྲིའི་སློབ་མ་ཡིག་མཁན་བཅུ་གཉིས་བྱུང་བ་རྣམས་ཀྱིས་བྲིས་རྒྱུན་དར་རྒྱས་སུ་བཏང་བ་ནས་བཟུང་མདོ་དབུས་ཁམས་གསུམ་དུ་ཡིག་གཟུགས་མི་འདྲ་བ་སྣ་ཚོགས་དར་རྒྱས་ཆེན་པོ་ཕྱིན་པ་རེད།
བྱེ་བྲག་ཀརྨ་སྒར་བྲིས་ནི་ཐོག་མར་ཀརྨ་པ་སྐུ་ཕྲེང་བརྒྱད་པ་མི་བསྐྱོད་རྡོ་རྗེའི་ཞལ་སློབ་སྤྲུལ་སྐུ་ནམ་མཁའ་བཀྲ་ཤིས་ཀྱིས་ཞྭ་དམར་དཀོན་མཆོག་ཡན་ལག་དང་། རྒྱལ་ཚབ་གྲགས་པ་དོན་གྲུབ་གཉིས་ཀྱིས་ཞལ་བཀོད་གནང་བ་ལྟར་ཀརྨ་སྒར་བྲིས་སྲོལ་གཏོད་མཛད། དེའི་བྲིས་རྒྱུན་ཀརྨ་པ་སྐུ་ཕྲེང་རིམ་བྱོན་གྱིས་རིམ་པར་རྒྱུད་འཛིན་དར་སྤེལ་བཏང་ནས་སི་ཏུ་ཆོས་ཀྱི་འབྱུང་གནས་བར་དུ་བརྒྱུད་ཅིང་། ཁོང་གིས་ཀརྨ་སྒར་བྲིས་ཀྱི་ཡིག་གཟུགས་ལ་མཛེས་ཉམས་གཏོད་ནས། ཡིག་གཟུགས་སྲོལ་གཏོད་གནང་བ་ལ་དུས་སྔ་ཕྱིའི་དབང་གིས་སྒར་གསར་དུ་གྲགས་ཤིང་། དེའི་ཡན་གྱི་བྲིས་རྒྱུན་ལ་སྒར་རྙིང་སྟེ། དེ་ནས་བཟུང་བྲིས་རྒྱུན་མི་འདྲ་བ་གཉིས་བྱུང་ནས། རིམ་པར་བྲིས་རྒྱུན་དེ་དག་ཀརྨ་པ་བདུད་འདུལ་རྡོ་རྗེ་ནས་སི་ཏུ་པདྨ་ཉིན་བྱེད་བར་དུ་བརྒྱུད་ཅིང་། དེའི་སློབ་མ་ཀོང་སྤྲུལ་ཡོན་ཏན་རྒྱ་མཚོ་དང་། ཀོང་སྤྲུལ་གྱི་དངོས་སློབ། མཁས་དབང་འབྱོ་ཁྱུང་སྤྲུལ་པདྨ་འཕྲིན་ལས་རྒྱ་མཚོ་ནས་རིམ་པར་ཁམས་ནང་ཆེན་འབྲོང་པ་ཀ་གཞུང་ཡུལ་ཤོག་རྨེ་སྟོད་དུ་དར་ཞིང་། གོང་པ་བྱང་ཆུབ། ཧོར་དགའ་རྡོར། གོང་པ་དགེ་གྲགས། གདུང་སྲས་འབྱོ་པདྨ་འགྱུར་མེད་སོགས་ནས་ད་ལྟའི་བར“སྒར་རྙིང”དང་“སྒར་གསར”གྱི་བྲིས་རྒྱུན་བར་མ་ཆད་པར་བྱུང་བ་ཡིན། ད་ལྟ་བར་དུ་སྒར་གསར་རྙིང་གི་བྲིས་རྒྱུན་ཕན་ཚུན་མ་འདྲེས་པར་རང་རྐང་ཚུགས་པའི་སྒོ་ནས་བརྒྱུད་པའི་བྲིས་རྒྱུན་དང་། བྲབ་བྲིས་སོགས་ནི་ཀ་གཞུང་ཡུལ་གྱི་ཐུན་མིན་བྲིས་རྒྱུན་ཞིག་ཡིན། ཡིག་གཟུགས་འབྲི་སླ་བ་དང་། འདོན་བདེ་བ། གཟུཊ་མཛེས་པ་སོགས་ཀྱི་ཁྱད་ཆོས་གསུམ་ལྡན་དང་། ལྷག་པར་དུ་བྲིས་ཀྱི་རྒྱུད་པ་ལྡན་ཞིང་། ལི་ཁམ་རྫོགས་གསུམ་གྱི་འགྲེལ་བཤད་ཆ་ཚང་བ། ཁྱད་ཆོས་གསུམ་ལྡན་གྱི་དམིགས་གསལ་བྲིས་རྒྱུན་སྒར་གསར་ལ་ཅུང་ཟད་མཛེས་ཉམས་གཏོད་དེ་མི་རྣམ་རིན་པོ་ཆེས་ནང་བྲིས་ནོར་བུ་མ་ཞེས་པ་སྲོལ་གཏོད་གནང་། སྒར་གསར་དང་ནང་བྲིས་ལ་གཞི་བྱས་ཏེ“ཀ་བྲིས”ཞེས་པ་ས་གནས་རང་ནས་བྱུང་བའི་བྲིས་རྒྱུན་སོགས་གཞི་གཅིག་ལ། རྣམ་པ་ཐ་དད་པའི་ཡིག་གཟུགས་སྲོལ་གཏོད་དང་འཕེལ་རྒྱས་རང་བཞིན་ཅན་དཔེ་ཚུགས་གཞན་ལས་ཁྱད་དུ་འཕགས་པ་འདི་དག་དང་། གཞན་ཡང་མདོ་དབུས་ཁམས་གསུམ་གྱི་སྐྱེ་བོ་མང་པོའི་ཡིད་དབང་གཅིག་ཅར་འཕྲོག་ཅིང་། བསྟོད་བསྔགས་བར་མེད་དུ་འཐོར་བའི་མི་རྣམ་འབྲུ་ཚ་ཞེས་པ་གཟུགས་མཛེས་ཤིང་སྒྱུ་རྩལ་རང་བཞིན་ལྡན་པ་འདི་སྲོལ་གཏོད་གནང་བ་དང་། མ་ཚད་ཁ་སང་དེ་རིང་ཡང་མདོ་དབུས་ཁམས་གསུམ་གྱི་ས་ཕྱོགས་སོ་སོར་སློབ་གཉེར་བྱེད་བཞིན་པའི་རང་ཡུལ་གྱི་བྲིས་པ་མང་པོ་ཞིག་གིས། སློབ་གླིང་ཆེ་ཁག་མང་པོ་ནས་བྲིས་གཟུགས་འགྲན་བསྡུར་ཁྲོད་གཟེངས་རྟགས་གང་མང་བཞེས་ཤིང་གདེང་འཇོག་ཚད་མཐོན་པོ་ཐོབ་པ་དང་།སྤྱིར་ཀ་གཞུང་ས་གནས་ལ་མཚོན་ནའང་། ས་རྒྱ་ཆུང་ཞིང་། མི་གྲངས་ཉུང་ཡང་། བྲིས་མཁན་གྱི་ཁ་གྲངས་མང་བ་སོགས་ཡུལ་ཕྱོགས་གཞན་དང་བསྡུར་ན་འབུར་དུ་དོད་པའི་དམིགས་བསལ་གྱི་ཁྱད་ཆོས་ལྡན་པ་བཅས་ཀྱིས། དེང་སང་དུས་རབས་ཀྱི་འཕེལ་ཕྱོགས་དང་བསྟུན་ནས། བྲིས་རྒྱུན་འདི་དག་རྒྱུད་འཛིན་དང་འཕེལ་རྒྱས་གཏོང་རྒྱུ་ནི་འོས་སུ་བབས་པའམ། དུས་བསྟུན་གྱི་བྱ་བ་གལ་ཆེན་ཞིག་ཡིན་པ་ལ་ཡིན་པར་ཤེས་པའི་སྒོ་ནས་སྨྱུག་བྲིས་ནས་པིར་བྲིས་དང་། པོད་བྲིས་ནས་ཐང་བྲིས་ཀྱི་ལམ་དུ་གོམ་པ་སྤོས་ཏེ་ཐུན་མོང་དང་ཐུན་མིན་ཀྱི་ཀ་གཞུང་ཡིག་གཟུགས་སྒྱུ་རྩལ་དེང་རབས་གྱི་ལམ་དུ་རྒྱུད་འཛིན་དང་དར་སྤེལ་བྱེད་བཞིན་པ་ལགས་སོ།།
|
|
