ཡིག་གཟུགས་ཀྱི་དཔེ་འདི། དཔར་དུ་བསྐྲུན་ཚུལ་བྱུང་བ་མདོ་ཙམ་དང་སྦྲགས་ཅུང་ཟད་ཞུ་བ་ལ། རང་རེའི་དང་པོའི་སློབ་དཔོན་ཐོན་མི་སམྦྷོ་ཊ་མཆོག་གིས། སྤྱི་ལོའི་དུས་རབས་བདུན་པའི་མཇུག་ཙམ་ན། བོད་ཡིག་གི་གཟུགས་ཐོག་མར་བརྩམས་པ་ནས་བཟུང་།བསྟན་པ་ཕྱི་དར་གྱི་དབུ་ཚུགས་ནས་ཡུན་རིང་མ་ལོན་པ་ན། ཁྱུང་བོ་གཡུ་ཁྲི་འབར་ཞེས་བྱ་བས་ལོ་ཙྰ་བ་ཆེན་པོ་སྐ་བ་དཔལ་བརྩེགས་ལུགས་ཀྱི་དབུ་ཆེན་ཡིག་གཟུགས་དཀྱིལ་འཁོར་གྱི་ཆ་ཚད་ལ་དཔེ་བླངས་ནས་ཆ་ཆེན་ཆ་ཆུང་དུ་བགོས་ཏེ་ཐིག་རིས་སུ་བཏབ་པའི་བར་ལ། དབུ་ཆེན་གྱི་གཟུགས་ལ་བྱེ་བྲག་གི་འགྱུར་བ་སྔ་ཕྱི་དགུ་ཙམ་བྱུང་བར་བཤད། གཡུ་ཁྲིས་ཆ་ཚད་ཐིག་ཁོངས་སུ་འབྲི་བའི་སྲོལ་ཕྱེས་པ་དང་། ཤིང་དཔར་བརྐོ་བ་སོགས་རིམ་གྱིས་དར་བ་ནས། ད་ལྟའི་བར་དབུ་ཆེན་ཡིག་གཟུགས་ལ་ལུས་བྱིངས་ཀྱི་འགྱུར་བ་མ་བྱུང་བར་མངོན། ད་ལམ་རྔ་བ་ཁུལ་བོད་ཡིག་ཡུན་ཐུང་སྦྱོང་བརྡར་འཛིན་གྲྭར་གཞུག་སྐབས། སློབ་དཔོན་མཆོག་དང་། འགོ་ཁྲིད། དགེ་སློབ་བྱིངས་ཀྱིས་གསུང་བསྐུལ་དང་། རང་གིས་ཀྱང་ལས་དང་བོ་བ་འགར་ཅུང་ཟད་ཕན་རེ་ཉག་གཅིག་གིས་དཔེ་འདི་འབྲི་སྐབས། ཁྱུང་བོ་གཡུ་ཁྲིའི་གསུང་རིན་ཆེན་སྒྲོམ་བུ་དང་། སྨྱུ་གུའི་བསྟན་བཅོས་འཕྲུལ་གྱི་སྒྲོན་མེའི་དཔེ་རྙིང་བྲིས་མ་ཞིག་དང་། སུམ་པ་པཎ་ཌི་ཏས་དབུ་ཆེན་གྱི་ཡིག་གཟུགས་ཐིག་ཁོངས་སུ་ཕབ་པ་དང་། གཡུ་ཁྲིའི་ཐིག་རྩའི་སྡོམ་ཚིག་དྲངས་པ་དང་། གོང་སྤྲུལ་ཡོན་ཏན་རྒྱ་མཚོས་ཤེས་བྱ་ཀུན་ཁྱབ་ཏུ་དྲངས་པའི་སྡོམ་ཚིག་བློ་གསལ་དགའ་སྟོན་དུ་བཀོད་པ་དེ་དང་། སྡེ་སྲིད་སངས་རྒྱས་རྒྱ་མཚོས་གཡའ་སེལ་དུ་དྲངས་པའི་གཡུ་ཁྲའི་ཐིག་རྩའི་སྡོམ་ཚིག་དང་། དེའི་འགྲེལ་བ་བཅས་ལ་ཞིབ་གཏུག་ཅི་ལྕོགས་ཀྱིས་གཞི་བཟུང་། བླ་བྲང་བཀྲ་ཤིས་འཁྱིལ་དུ་སྔ་སོར་དཔང་ལོ་ཙྰ་བའི་ཕྱག་བྲིས་དངོས་དང་། དེའི་ཁྲིད་རྒྱུན་ཀུན་མཁྱེན་འཇིགས་མེད་དབང་བོའི་བཀས་ཡུལ་དབུས་ནས་ཞུས་ཏེ་ཕེབས་པའི་ཕྱག་རྒྱུན། སློབ་དཔོན་བཀའ་དྲིན་ཅན་དམུ་དགེ་བསམ་གཏན་ལགས་ཀྱི་དྲུང་དུ། ཕྲན་ན་ཆུང་བའི་དུས་བསླབས་པ་ཇི་བཞིན་བྲིས་པ་ཡིན། སྡེ་སྲིད་ཆེན་མོའི་ཐིག་འགྲེལ་དུ་ཡིག་འབྲུ་སོ་སོའི་ཆ་ཤས་རེ་རེ་བ་བཞིན། དཔངས་ཞེང་ཕྲ་སྦོམ་ཕབ་འཇོག་གི་ཆ་གྲངས་བགོས་པ་ཆེས་ཕྲ་ཞིང་ཞིབ་པ་ཞིག་ལགས་ནའང་། ལས་དང་པོ་བ་ཞིག་ལ་མཚོན་ན་ཐོག་མར་སློབ་པ་ལ་བློས་ཆུན་དཀའ་བར་སྣང་བས། འདིར་ཐིག་ཁོངས་ཀྱི་ལང་ཚེ་དགུ་ལ་བསྒྲིལ་ཏེ་བྲིས་ཤིང་། ཡིག་འབྲུ་སོ་སོའི་ཡན་ལག་གམ་ཆ་ཤས་རེ་རེའི་མིང་སྡོམ་ཚིག་ལས་བཤུས་ཏེ་མཆན་གྱི་ཚུལ་དུ་བཀོད། མགོ་དཔུང་རྐང་གསུམ། ཕུབ་ཟགས་བཅས་ཀྱི་སྨྱུག་འགྲོས་དང་འཐེན་སྟངས། ཉམས་དང་ཟུར་དག་དཔྱིས་ཕྱིན་པར་ཐོན་པ་ལ། སྨྱུ་གུའི་ཁམ་རྩེ་གསེག་ལུགས་ཀྱི་ཚད་མང་ཉུང་ལའང་རགས་ལས་པས་དེའི་རྣམ་བཤད་ཉུང་ཤས་བཅས་ཕྱག་རྒྱུན་དང་། རང་གི་ཡུན་མི་ཐུང་བའི་ཉམས་མྱོང་ཟུང་དུ་སྦྲེལ་ནས་བྲིས་པ་ཡིན། གོང་སྨྲས་ཐིག་བཤད་དེ་དག་ཏུ། རྐང་ལག་གི་གྲངས་ཀྱི་མིང་འདོགས་ཚུལ་མི་མཐུན་པས། འདིར་རྐང་རིང་གསུམ་པོ་ལས་གཞན་དག་འབྲིང་ཞེས་ཐ་སྙད་སྦྱར་ཡོད། ཞིབ་པར་རྟོགས་འདོད་རྣམས་སྡེ་སྲིད་གསུང་གཡའ་སེལ་དང་། ༡༩༨༠ལོར་ཀན་སུའུ་མི་རིགས་དཔེ་སྐྲུན་ཁང་གིས་དཔར་དུ་བསྐྲུན་པའི་བརྡ་སྤྲོད་བློ་གསལ་དགའ་སྟོན་གྱི་མཇུག་ཏུ་གཟིགས་པར་ཞུ།
ཡིག་མགོ་བསེ་རུ་འདྲ་གཅིག་སྦྲུལ་སྣ་གཉིས་ལྡན་པ་ཏྲ་འདྲ། ཤད་ནི་རྒྱ་ཁབ་བསླངས་འདྲ། ཀ་ནི་མགོ་རིང་ཡིན་ལ་མགོའི་ཚད་ཚག་ལྔ་དང་། མགོའི་ཕྱེད་ཚད་ནས་མཆེ་བ་འདོན་དགོས། ཀ་ནི་རྐང་རིང་ཡིན་ལ་རིང་ཚད་མགོ་ཡི་ཕྱེད་དང་གཉིས་ཡིན་དགོས། ཁ་དང་ག་ཡང་མགོ་རིང་ཡིན། ང་ཡིག་མགོ་འབྲིང་ཡིན་ལ་ཚག་བཞིའི་ཚད་ཡིན་ནོ། ཅ་དང་ཆ་དང་ཉ་གསུམ་མགོ་འབྲིང་ཡིན་ལ་ཇ་ཡིག་མགོ་རིང་ཡིན་ལ་ནང་དཀར་གཉིས་དང་ནག་གསུམ་མཉམ་དགོས། ཏ་ཐ་ད་ན་བཞི་མགོ་འབྲིང་ཡིན། ཏ་ཡི་ཕུབ་བམ་ཁོག་འདྲེན་ཟླུམ་དགོས། ད་ཡི་དཔུང་པའི་རིང་ཐུང་མགོ་དང་མཉམ་པ་དང་། ན་མིག་རབ་ཡིན་ཉ་ཡི་མིག་དང་འདྲ་བར་ཟླུམ་པོ་ཡིན་དགོས། པ་ཕ་མ་གསུམ་མགོ་ཐུང་ཡིན་ལ་རིང་ཐུང་ཚག་གསུམ་གྱི་ཚད་དང་མཉམ་དགོས། ཙ་ཚ་ཛ་གསུམ་ཅ་ཆ་ཇ་གསུམ་དང་འདྲ་ལ་ཕོད་བཏགས་ཡོད་མེད་ཀྱི་ཁྱད་པར་ཙམ་ཡིན། ཝ་ནི་བར་མགོ་བཏགས་པའི་ཁྱད་པར་ཚམ་མོ།། ཞ་ཟ་གཉིས་མགོ་འབྲིང་ཡིན་ལ་རིང་ཐུང་ཚད་ནི་གོང་ནས་བཤད་ཟིན་པས་བསྐྱར་བཟློས་མི་བྱེད། འ་ཡི་མགོ་ནི་ཟུར་གསེག་མགོ་ཡིན་ལ་སྤྱིའི་ཆ་ནས་ཚག་གསུམ་དང་ཕྱེད་ཙམ་དུ་སྣང་། ཡ་ཡིག་མགོ་ཐུང་དུ་གསུངས་ཡོད་མོད་ཚག་མགོ་ཅན་ནམ་ཁམ་གང་གི་ཚད་ཅན་ནོ།། ར་ཡིག་མགོ་འབྲིང་ཡིན་པ་སོགས་གོང་གི་འབྲི་དཔེ་དང་ཞིབ་དུ་བསྡུར་ནས་འབྲི་བར་བྱའོ།།
ལ་ཤ་ས་གསུམ་མགོ་ཐུང་ཡིན་ལ། ལ་ཡིག་གི་ཕུབ་དཀར་གསུམ་ལྷག་ཙམ་དང་ལེ་གུའི་འཕྲེད་འདྲེན་བགས་ཀྱིས་གཞོལ་བ་ཟགས་མཆུའོ།། ཤ་ཡིག་ལེ་གུ་ལ་ཡི་འཕྲེད་འདྲེན་དང་འདྲ་བ་ཡིན་ལ་ཡར་འཕུར་དྲང་དགོས་པ་དང་། ཤ་མིག་ཟླུམ་ལ་མིག་གི་དཀར་ཕྱེད་བཞི་ལས་བརྒལ་མི་རུང་། རྐང་བ་ནི་རྐང་རིང་ཡིན་ལ་སྣག་ཆ་གཅིག་ཕྱི་ནང་གང་ལའང་མི་འཁྱོལ་བར་དྲང་བོར་འབྲི་དགོས། ས་ཡིག་གི་མགོའི་གསེགས་སུ་དཔུང་བ་འདོན་པ་དང་དཀར་གཉིས་མཉམ་ལ་ཟགས་མཆུ་རྣོ་ལ་མ་འཁྱོལ་བ་ཡིན་དགོས། ཧ་ཡིག་མགོ་འབྲིང་ཡིན་ལ་དཔུང་བ་ས་འདྲ་ཨེན་ཙམ་མཐོ་དགོས། ལེ་གུ་མཉེན་ལ་མགོ་ཡི་དཀྱིལ་དུ་འབབ་པ་དང་། སྨད་ཕུབ་ཟླུམ་ལ་མགོ་དཀྱིལ་བསྐྱལ་བ་དང་རྐང་བ་འབྲིང་དུ་གསུངས། ཨ་ཡིག་མགོ་ཐུང་ཡིན་ལ་དཔུང་རྩའི་མས་ཀྱི་ཕྱི་ཟུར་ནས་ཟགས་མཆུ་རིམ་གྱིས་འདོད་དགོས་ལ་ཡར་འཕུར་དྲང་ལ་ཟགས་མཆུ་རྣོ་དགོས་པ་སོགས་སོ།།
དབྱངས་བཞི་ལས་གི་གུ་ནི་ཟླུམ་ཐུང་འགྲིལ་གསུམ་དང་འཁྱུག་མཉེན་དྲང་བ་གསུམ་གྱི་ཁྱད་ཆོས་ཐོན་དགོས། ཞབས་ཀྱུ་ཟླུམ་འགྲིལ་འཁྱིལ་བག་དང་ལྡན་དགོས་ལ་མདའ་མདུང་ཚུགས་གཉིས་བབ་དང་བསྟུན་ནས་བྲིས་ཆོག་པར་གསུངས། འགྲེང་བུ་ནི་གསེགས་ཀྱིས་གཞོལ་ཞིང་སྟོད་སྨད་ཕྱེད་པ་སྟེ་འགྲེང་བུའི་ཆོས་གཉིས་ཕྱེད་གཉིས་ཆོད། ན་རོ་གེ་གེས་པདྨའི་མདོངས། གཉིས་ཆོད་འཛུམ་ལ་མཐོ་དམན་མེད་པ་ན་རོའི་ཆོས་གསུམ་མོ།།
|
|
|
