རང་ཅག་ཁ་བ་ཅན་ལ་བཀའ་དྲིན་གཞལ་མཐའ་བྲལ་བའི་སློབ་དཔོན་ཆེན་མོའམ་བོད་ཀྱི་ལོ་ཙཱ་བ་ཐོག་མ་སྟེ་ཐོན་མི་སམ་བྷོ་ཊའི་བཀའ་དྲིན་མཛད་རྗེས་ལ་ཡང་ཡང་དྲན་གསོའི་སླད་དུ་ཁོང་གི་ལོ་རྒྱུས་མདོ་ཙམ་དགོད་པར་བྱས་ན། དེ་ཡང་ཐོན་མི་སམ་བྷོ་ཊའི་མཚན་གཞན་ལ་ཐོན་མི་ཀུན་ཏུ་བཟང་བོ་དང་། ཐུ་མི་ཨ་ནུ་སོགས་སུ་འབོད་པ་ཡོད་ཀྱང། ཡོངས་གྲགས་སུ་ཐོན་མི་སམ་བྷོ་ཊ་ཞེས་ཟེར། ཐོན་མི་ཞེས་པ་ནི་ཁོང་གི་འཁྲུངས་ཡུལ་སྙེ་མོ་ཐོན་གྱི་གྲོང་ཚོ་ལུག་ར་ཁ་བ་དང་། ཐོན་པ་ནི་ཁོང་གི་མི་རྒྱུད་ཡིན་པས་དེ་ལྟར་ཐོགས་པར་བཤད་པ་ཡིན། སམ་བྷོ་ཊ་ཞེས་པ་ནི་རྒྱ་གར་སྐད་དེ། བོད་སྐད་དུ་བསྒྱུར་ན་སམ་ཞེས་པ་ཡང་དག་པ་དང་། བྷོ་ཊ་ཞེས་པ་བོད་དེ་བོད་ཡང་དག་པ་ཞེས་པར་གྲགས། ད་དུང་། ཐོན་མི་སམ་བྷོ་ཊའི་འཁྲུངས་ཡུལ་དང་ཡབ་ཀྱི་མཚན་ལའང་མཁས་པའི་བཞེད་སྲོལ་མི་འདྲ་བ་མང་དུ་མཆིས་ཏེ། ཁ་ཤས་ཀྱིས་ཡབ་ཐོན་མི་ཨ་ནུ་ར་ག་ཏའི་སྲས་སུ་འཁྲུངས་པར་བཞེད་ལ། ཡང་འགའ་རེས་ལྷོ་གཉལ་བ་སྣང་གྲགས་ཀྱི་སྲས་སུ་བཞེད་པའང་ཡོད། དེ་བཞིན་དུ་འཁྲུངས་ཡུལ་ལ་ཡང་གོང་དུ་བརྗོད་པ་ལྟར་སྙེ་མོ་ཐོན་གྱི་གྲོང་ཚོ་ལུག་ར་ཁ་བ་དང་། ལྷོ་ཁའི་གཉལ་དུ་ངོས་འཛིན་པ་སྟེ་མི་འདྲ་བ་གཉིས་ཡོད་དོ། །
གང་ལྟར་ཡང་སློབ་དཔོན་ཁོང་ནི་དུས་རབས་བདུན་པའི་སྟོད་ཀྱི་ཆར་བོད་རྒྱལ་སོ་གསུམ་པ་བཙན་པོ་སྲོང་བཙན་སྒམ་པོའི་སྐུ་དུས་སྟེ་སྤྱི་ལོ༦༡༨ཙམ་ལ་སྐུ་འཁྲུངས་ཤིང་། ཡོངས་གྲགས་སུ་དགུང་ལོ༡༥སྟེ་སྤྱི་ལོ༦༣༣ལོར་རྒྱལ་བོའི་བཀའ་ལྟར་རྒྱ་གར་དུ་ཆས་པར་བཤད། རྒྱ་གར་གྱི་ཡིག་མཁན་བྲམ་ཟེ་ལེགས་བྱིན་ཀ་ར་དང་པཎྚི་ཏ་ལྷ་རིག་པའི་སེང་གེ་སོགས་སློབ་དཔོན་དུ་བསྟེན་ཏེ་ཡིག་རིགས་དུ་མ་ལ་མཁས་པར་སྦྱངས་ཤིང་། སྒྲ་ཀ་ཙཱན་གཉིས་དང་། པཱར་ཎི་བ། གཞན་རྟོགས་སླ་བ་རྒྱལ་བོའི་ལུགས་ཀྱི་བསྟན་བཅོས་དང། རྟོགས་དཀའ་བ་པཎྚི་ཏའི་ལུགས་ཀྱི་བསྟན་བཅོས་སོགས་ལ་བསླབས།
འདིར་ལེགས་བྱིན་ཀ་ར་ཞེས་པའི་མཚན་གྱི་འབྲི་ཚུལ་ལའང་སྔོན་གྱི་མཁས་པ་རྣམས་མི་མཐུན་ཏེ། ལི་བྱིན་ཀ་ར་དང་། ལི་བི་ཀ་ར། ཡང་ན་ལི་བི་ཧ་ར་སོགས་འབྲི་ཚུལ་མི་འདྲ་བ་མང་དུ་བདོག
དེ་ལྟར་ལོ་ངོ་བདུན་གྱི་རྗེས་སྟེ་སྤྱི་ལོ༦༤༠ལོར་བོད་དུ་ཕེབས་ཤིང་། ཐོག་མར་ལྷ་སའི་སྐུ་མཁར་མ་རུ༼ཡོངས་གྲགས་སུ་ད་ལྟའི་བོད་ཀྱི་གནས་ཆེན་ཕ་བོང་ཁ་ཞེས་པ་ཡིན་ལ། ལྷ་སའི་བྱང་ངོས་སུ་སྤྱི་ལེ་བརྒྱད་ཙམ་ཕྱིན་པའི་སར་ཡོད།༽བྱ་བར་རྒྱལ་བོ་དང་ལྷན་དུ་ལོ་གསུམ་མམ་བཞིའི་རིང་མཚམས་ལ་བཞུགས་ནས་བོད་ཀྱི་སྐད་འདི་སྒོ་ཀུན་ནས་ཕུན་སུམ་ཚོགས་པར་མཚོན་ཐུབ་པའི་ད་ལྟའི་འུ་ཚོའི་ཡིག་གཟུགས་འདི་གསར་བཟོས་གནང་བ་རེད།
སྐབས་དེར་རྒྱལ་བོ་རང་གིས་ཐོན་མི་སློབ་དཔོན་དུ་བཀུར་ནས་ཡི་གེ་ཐོག་མར་བསླབས་པས་སློབ་དཔོན་ཞེས་པའི་མཚན་ཡང་དུས་འདི་ནས་བཟུང་སྟེ་གསོལ་བ་ཡིན་པར་གྲགས།
རྒྱལ་བོས་ལོ་གསུམ་རིང་ལ་ཐོན་མིས་བསླབས་པའི་ཡི་གེ་དག་ཁོང་དུ་ཆུད་པ་གནང་རྗེས་བློན་པོ་རྣམས་སྐུ་མཁར་མ་རུའི་ཐང་ཆེན་དུ་བསྐོངས་ནས་ཁོང་ཚོར་ཐུ་མིས་རང་རེ་བོད་མིའི་ཆེད་དུ་ཡི་གེ་གསར་གཏོད་གནང་བས་ཁོང་གི་མཛད་རྗེས་ནི་རི་རྒྱལ་ལྷུན་པོ་འདྲ། ཡི་གེ་ཡོད་ན་སངས་རྒྱས་བསྟན་པ་ཡུན་གནས་ཡོང་བ་དང་། འཇིག་རྟེན་གྱི་བྱ་དངོས་གང་ཡང་ཐོ་འགོད་བྱས་ཆོག ད་ལྟ་ངས་འཛམ་བུ་གླིང་ལ་དེ་རིང་ནི་ཐུ་བྷོད་ལ་རང་གི་ཡི་གེ་འདི་ཡོད་པའི་ཉིན་དང་པོ་ཡིན་པའི་ཁྱབ་བསྒྲགས་བྱ་རྒྱུ་ཡིན།
|
|
