བོད་ཀྱི་བྲིས་པས་ལྷ་བབས་དུས་ཆེན་ལ་ཕུལ་པའི་ཡིག་གཟུགས་ཀྱི་མཆོད་པ།
ལྷ་འབབ་དུས་ཆེན་ནི་སྟོན་པའི་དུས་ཆེན་ཆེན་པོ་བཞིའི་ཡ་གྱལ་ཞིག་ཡིན་པ་དང་། བདག་ཅག་གི་སྟོན་པ་ཤྰཀྱ་ཐུབ་པ་སྐུ་འཁྲུངས་ནས་ཡུན་རིང་མ་སོང་བར་ཡུམ་སྒྱུ་འཕྲུལ་མ་སྐུ་གཤེགས་པར་བརྟེན་སྟོན་པ་ཤྰཀྱ་ཐུབ་པས་མ་ཡུམ་ལ་བཀའ་དྲིན་གསོ་བའི་གོ་སྐབས་མ་བྱུང་།འོན་ཀྱང་སྟོན་པ་ཉིད་ཀྱི་འཇིག་རྟེན་མིའི་རིགས་ཀྱི་སྐྱེ་བའི་སྡུག་བསྔལ། རྒས་འགྲོ་བའི་སྡུག་བསྔལ། ན་བའི་སྡུག་བསྔལ། ཤི་བའི་སྡུག་བསྔལ་བཞི་པོ་མཐོང་ཐེངས་དང་པོར་རང་ཉིད་རྒྱལ་པོ་ཞིག་ཡིན་པའི་ཆ་ནས་རང་ཉིད་ཀྱི་མངའ་འབངས་རྣམས་ཀྱི་སྐྱེ་རྒ་ན་འཆིའི་སྡུག་བསྔལ་བཞི་པོ་སྐྱོབ་ཐབས་མ་བྱས་ན་ཡོང་ཐབས་མེད་པར་བསམས་ནས་རང་ཉིད་ཀྱི་མི་སེར་དང་བཅས་པའི་འགྲོ་བ་རྣམས་ཀྱི་སྡུག་བསྔལ་བཞི་པོ་ལས་འགྲོལ་ཐུབ་པའི་ཆེད་དུ་ཆོས་ཀྱི་སྒོར་བཞུགས་ནས་མཐར་སངས་རྒྱས་ཀྱི་གོ་འཕང་ཐོབ་པ་དང་། དེ་ནས་ཐབས་ཤེས་མི་འདྲ་བ་སྣ་ཚོགས་ཀྱི་ཐོག་ནས་རིགས་མཐོ་དམན་གྱི་དབྱེ་བ་མེད་པར་ཆོས་མང་པོ་གསུངས་ཏེ་མངའ་འབངས་རྣམས་སྡུག་བསྔལ་ལས་འགྲོལ་བའི་ཐབས་བསྟན་པར་མཛད། འོན་ཀྱང་རང་ཉིད་སྐྱེ་བའི་མ་ཡུམ་ལ་དྲིན་གསོ་དགོས་པ་ནི་ཧ་ཅང་གལ་ཆེ་ཞིག་ཡིན་པ་མ་ཟད་མིའི་རིགས་ལ་ཕ་མ་ནི་གལ་ཆེའི་ནང་གི་གལ་ཆེ་ཞིག་ཡིན་པར་སྟོན་པའི་ཆེད་དུ་རང་ཉིད་ཀྱི་མ་ཡུམ་ལྷ་ཡུལ་དུ་སྐྱེ་བ་བཞེས་ཡོད་པར་གཟིགས་ནས། ཆེད་དུ་དྲིན་གསོ་བའི་ཆེད་དུ་ལྷ་ཡུལ་དུ་ཕེབས་ནས་ཆོས་གསུངས་ཏེ་ཕ་མའི་བཀའ་དྲིན་གསོ་བར་བྱས།སྟོན་པས་རྒྱུ་ནོར་སོགས་ཀྱིས་ཕ་མའི་བཀའ་དྲིན་མ་གསོས་པར་སྟོན་པ་ཉིད་ལ་གཙོ་བོ་མངའ་བའི་ཆོས་ཀྱིས་ཕ་མའི་བཀའ་དྲིན་གསོས་པ་ཡིན། དེས་གང་ཞིག་བསྟན་གྱི་ཡོད་ཟེར་ན། མི་སུ་དང་སུ་ཡིན་ཀྱང་རང་ཉིད་གང་ཡོད་པ་དེས་ཕ་མའི་བཀའ་དྲིན་གསོ་དགོས་པར་བསྟན་པ་ཡིན། དཔེར་ན། རྒྱུ་ནོར་མེད་ཀྱང་ཞབས་ཞུས་བཀའ་དྲིན་གསོ་བ། རིང་བར་གནས་ཚེ་ཁ་པར་གཏོང་བ་སོགས་ངག་འཇམ་པའི་སྒོ་ནས་ཡིད་ཚིམ་པར་བྱེད་པ་ལྟ་བུ། དེ་ལྟར་ཕ་མའི་བཀའ་དྲིན་གསོ་བའི་ཆོས་ས་ཡི་སྙིང་པོའི་མདོ་གསུངས་ཏེ་ཕ་མར་བཀའ་དྲིན་གསོ་དགོས་པ་གལ་ཆེ་ཡིན་པ་བསྟན་བསྒྲུབས་རྗེས་མི་ཡུལ་དུ་ཕེབས་སྐབས་མིའི་རིགས་ཀྱིས་སྟོན་པ་ཤྰཀྱ་ཐུབ་པར་ཕེབས་བསུ་ཞུ་བའི་ཆེད་དུ་ས་ཁང་རྣམས་ལ་གཙང་སྦྲ་གད་བདར་དང་ཁང་པར་ས་དཀར་གསོ་བ་སོགས་བྱས་ཏེ་ཕེབས་བསུ་ཞུ་བའི་དུས་ཆེན་དེས་ནང་པ་སངས་རྒྱས་པའི་རྗེས་འཇུག་པ་རྣམས་ལ་མ་ཡུམ་ལ་བཀའ་དྲིན་གསོ་དགོས་པ་ཆེད་དུ་བསྟན་ཏེ་མ་ཡུམ་དུས་ཆེན་ཡིན་ཞེས་དངོས་སུ་མ་གསུངས་པ་ཙམ་ལས་མ་ཡུམ་དྲིན་གསོའི་དུས་ཆེན་དེ་སྟོན་པས་ལོ་ངོ་ཉིས་སྟོང་གོང་ནས་བཏང་ཡོད་པས་བོད་ཟླ་༩་༢༢ལ་ང་ཚོས་ངེས་པར་དུ་མ་ཡུམ་དྲིན་གསོའི་དུས་ཆེན་དེ་གཏོང་དགོས་པ་སྟེ། དམིགས་བསལ་གྱིས་ཕ་མར་མཚམས་འདྲི་ཞུ་བ། ང་ཚོས་ཕ་མ་དང་མཉམ་དུ་ཁ་ལག་ཟ་བ། ཕ་མར་དགུན་ཁའི་གྱོན་གོས་ཉོ་བ། ཕ་མར་ཁ་པར་རྒྱག་པ། སྟོན་པའི་མ་ཡུམ་དྲིན་གསོའི་དུས་ཆེན་དེ་ཕ་མར་བུ་ཕྲུག་སོགས་ལ་བཤད་པ་སོགས་བྱས་ཏེ་དུས་ཆེན་དེར་སྲུང་བརྩི་ལེགས་པར་ཞུས་ནས་སྟོན་པ་ཉིད་ཀྱི་རྗེས་འབྲངས་པ་ཞིག་ཡིན་པའི་རྟགས་ཚན་མངོན་པ་བྱ་དགོས། །
|
|
