དུས་ཕྱིས་ཁྱུང་ཡུལ་དུ་སྤྲུལ་སྐུ་བློ་ལྡན་སྙིང་པོའི་སྐུ་དུས་སུ་བྱུང་བའི་བཤད་སྲོལ་ངག་སྒྲོས་ནི་སྤྲུལ་པའི་སྐུ་དེ་ཉིད་ཀྱིས་ཁྱུང་གཉིས་ལ་ཡར་ནང་ལ་སྨྱུག་སོ་གཏོར་བས། ལ་ཡར་ནང་ལ་བྲིས་མཁས་ཆེར་བྱུང་བ་དང་། ཁྱུང་གཉིས་ལ་མར་ནང་ལ་ལྷ་པིར་གཏོར་བས། ལ་མར་ནང་ལ་ལྷ་བཟོ་བྱུང་ཆེ་བའི་གཏན་ཚིགས་གྲགས། ཁྱུང་དཀར་ནག་གཉིས་ཀྱི་ཡུལ་གྲུར་ལྷ་བྲིས་ཆེས་སྙན་པ་ཆེ་བ་ལྡོང་མདོ་དང་ར་ལ་རྒྱ་མཁར་སོགས་བྱུང་ལ་ལྡོང་མདོའི་ལྷ་ཚུགས་ནི་ཞང་བོད་མི་རིགས་ཀྱི་ཁྱད་བོན་འབུར་དུ་ཐོན་ཡོད་པ་མ་ཟད། ནང་གི་ཐིག་རྩ་མདོ་གཟི་བརྗིད་སོགས་ཀྱི་དགོངས་པ་དང་ཡོངས་སུ་མཚུངས་ཤིང་། ཕྱི་ཡི་ལྷ་ཚུགས་ནི་ཞང་བོད་མི་རིགས་ཀྱི་ཤ་ཚུགས་རུས་ཚུགས་ཀྱི་ཁྱད་བོན་ཡོངས་སུ་མངོན་ཡོད་ལ། ད་དུང་ཤ་ཚུགས་ཆེས་ཆེར་རྒྱགས་པ་ཡང་མིན་ལ་ཆེས་སྐམ་པོ་ཡང་མིན་པར་མི་རིགས་ཤིག་གི་ཚུགས་ཀ་མ་ཤོར་བའི་ལྷན་སྐྱེས་ཀྱི་ཡོན་ཏན་དུ་མས་གཏམས་ཡོད་པ་སོགས། མདོར་ན་ལྷ་ཚུགས་དེ་དག་དངོས་སུ་མཐོང་ན་ཅི་ཡིན་དཔོག་ནུས་པ་ལས་འདིར་སྤྲོས་པ་ཆེར་མི་བྱ། ཁྱུང་གཉིས་ལ་ཡར་ནང་ལ་ཁྱུང་སེར་བྲིས་ཀྱི་ཞིང་ཁམས་ཞེས་བརྗོད་པར་དེར་བྱུང་བའི་བྲིས་ཁམས་འབུར་དུ་ཐོན་པ་མ་ཎིའི་ཁམས་ཞེས་པ་ནས་རྒྱན་སྤུ་བཅད་པའམ་རྙུ་ཧྲུག་ཐང་ལ་བདལ་བ་ལྟ་བུའི་ཁྱད་ཡོན་འབར་ལ། དེ་དང་ཕྱོགས་མཚུངས་མགར་བའི་ཁམས་དང་། ག་གཟི་ཁམས། དགོངས་རྟོགས། སྒོ་ཧྲང་སོགས་དུ་མ་བྱུང་ཡོད་སྐད། འདིར་བྲིས་ཁམས་ཞེས་རུས་མིང་དང་ཁྱིམ་མིང་ཅི་རིགས་བརྒྱུད་ནས་བཏགས་ཡོད་ པའི་རྒྱུ་མཚན་བགྲང་ཡོད། གཞན་ཡང་ཁྱུང་སྨད་ཕྱོགས་སུ་དར་བའི་སྟ་རེའི་ཁམས་ནི་བྲིས་རྙིང་དང་རྩེ་དྲུག་ ཕྱོགས་སུ་དར་སྲོལ་ཆེ་ཞིང་། ཁྱུང་དཀར་ཕྱོགས་སུ་ཁྱུང་བྲིས་ཞེས་པ་དཀར་རུའི་བྲིས་རྙིང་དང་ད་དུང་ལྷོ་བྲིས་ནི་སྟ་རེ་དང་ཆེས་མཚུངས་པའི་བྲིས་ཁམས་དེ་དག་སྤྱི་ཁོག་འབྲི་སྲོལ་ནི་འབྲུ་མ་དང་ཡོངས་སུ་མཚུངས་ལ་ནང་གསེས་ལྷུ་རུས་ཚུགས་གསུམ་དང་། ལི་ཁམས་ཟག་གསུམ་སོགས་ཀྱི་ཁྱད་ཡོན་འདོན་སྟངས་མི་མཚུངས་ས་དུ་མ་ཡོད་པར་མངོན། ད་དུང་ཁྱུང་པོ་གཡུ་ཁྲིའི་ཕྱག་སྲོལ་དབུ་ཅན་ཐིག་ཁོག་པིར་བྲིས་མ་དང་། སྨྱུག་བྲིས་མ་སོགས་ལ་དགོས་པའི་མན་ངག་ནི། དེ་ཡང་བྲིས་ཀྱི་མཁས་པའི་ངག་ལམ་ནས། ཨ་མིག་མ་མིག་ན་མིག་གསུམ། ཆུ་ནང་ཉ་མོའི་མིག་འདྲ་དགོས། ཨ་སྐེ་ན་སྐེ་ད་སྐེ་གསུམ། བྲག་ཐོག་གླ་ཕོའི་སྐེ་འདྲ་དགོས། འབྲུ་ཤ་མི་ཚོ་བཤའ་མི་དགོས། རྐང་པ་མི་རིང་ཆུ་མི་འབོགས། གི་གུ་ཕོ་རོག་ཤ་བཏོག་འདྲ། འགྲེང་བུ་སྤང་ལ་མདའ་ཟུག་འདྲ། ན་རོ་ཐང་དཀར་ལྡིང་པ་འདྲ། ཞེས་དང་། ཡང་མགོ་རབ་ཟླ་བ་ཚེས་པ་འདྲ། མགོ་འབྲིང་ཐག་དུམ་གྲིས་བཅད་འདྲ། མགོ་ཐ་ཚག་མགོ་ཟུར་གསུམ་འདྲ། ཞེས་དང་ཡང་། དཔུང་རབ་ཐུགས་ཀར་བུམ་འཛིན་འདྲ། དཔུང་འབྲིང་མདའ་མོ་འཕེན་པ་འདྲ། དཔུང་ཐ་ལག་ཆད་འཕྲེད་ཉལ་འདྲ། ཡང་། སྦོ་རབ་ཟླ་བ་ཚེས་པ་འདྲ། སྦོ་འབྲིང་སེན་རྗེས་དོད་པ་འདྲ། སྦོ་ཐ་སྒ་རུ་བཀུག་པ་འདྲ། ཞེས་དང་ཡང་མིག་རབ་ཆུ་ནང་ཉ་མིག་འདྲ། མིག་འབྲིང་ཞིང་གི་ནས་འབྲུ་འདྲ། མིག་ཐ་ཁྲོ་བོའི་སྤྱན་མིག་འདྲ། ཡས་འཕུལ་རབ་ནི་རྒྱ་ཁབ་སློང་བ་འདྲ། ཞེས་སོགས་ཀྱི་མན་ངག་སློབ་བུའི་ཡིད་ལ་འཆང་དགོས། ད་ཆར་ཁྱུང་ཡུལ་ཕྱོགས་སུ་བྲིས་ཚགས་དོད་པོའི་ཤུལ་འཛིན་གྱི་ཚ་རླབས་ཤིག་མཆེད་མུས་ཡིན་པ་སོགས་མདོར་ན་ཁྱུང་ཡུལ་འདི་རུ་འཁྱིལ་བའི་གནའ་བོའི་སྒྱུ་འཕྲུལ་པིར་རྩེ་ལས་ཐོན་པའི་ལྷ་རིས་དང་ཡིག་རིས་སོགས་གཅིག་ལས་གཅིག་སྒེག་པ་དང་འདི་ལས་དེ་མཛེས་པའི་ཟོལ་དུ་བཞད་འདུག་པས་ན། ཁྱུང་ཡུལ་པིར་སྨྱུག་གི་ཞིང་ཁམས་ཞེས་གྲགས་པའི་གཏན་ཚིགས་ཀྱང་འདི་ཉིད་ཡིན་ནོ། དེར་བརྟེན་གནའ་ཤུལ་རིག་གནས་འདི་དག་ང་ཚོའི་ཚེ་མཇུག་ནས་རྒྱུན་མཐུད་མ་ཐུབ་པར་ག་བུར་རྫི་ལ་ཕྱར་བ་ལྟར་ཡལ་བར་གྱུར་ན་ཡིད་ཤིན་ཏུ་ཕངས་ཤིང་ད་དུང་ཕ་ཤུལ་བུ་འཛིན་མི་ཐུབ་པར་མི་རབས་རྗེས་མས་ང་ཚོར་འཁང་ཚིག་ཆེན་པོ་ཞིགགཡུག་ཉེས་ཆེ་བས་དེ་ལུགས་ཚང་མས་ནོར་འབེལ་ན་ལུགས་སྲོལ་ཉམས་ན་ཉམས་ཞེས་པའི་དཔེ་ལྟར་མི་ཡོང་བའི་རེ་ནན་ཞུ། ཞེས་གྲོགས་འགས་ཡང་ཡང་བསྐུལ་བ་ལ་རྟེན་ནས་རྒན་རབས་མྱོང་ཅན་དང་བྲིས་མཁས་པ་དག་ལ་དྲི་བཤེར་གཏུགས་གསུམ་ལན་འགར་བྱས་ཏེ། བློ་གྲོས་རབ་གསལ་གྱིས་༢༠༡༡ལོའི་ཟླ་༡ཚེས་༣ཉིན་མཇུགས་རྫོགས་པར་བྲིས། གྱེར་ཝེར་རོ།
|
|
