ཡང་གནའ་བོའི་ཞང་བོད་ཀྱི་ཡིག་རིགས་འཕེལ་རིམ་ཐད་ལ་དར་རྒྱས་གསལ་སྒྲོན་ལས་འདི་ལྟར་བཞེད་ཡོད་དེ། དག་པ་ལྟ་ཡི་ཡི་གེ་སྟག་གཟིགས་སྤུངས་ཡིག་ཏུ་བསྒྱུར། རྟག་གཟིག་སྤུངས་ཡིག་ཞང་ཞུང་ཡིག་རྒན་དུ་བསྒྱུར། ཡིག་རྒན་སྨར་སྦྲག་ཏུ་བསྒྱུར། དེ་སྨར་ཆེ་ཆུང་དུ་བསྒྱུར། སྨར་ཆེན་དབུ་ཆེན་ནམ་གཟབ་ཏུ་བསྒྱུར། སྨར་ཆུང་འབྲུ་མར་བསྒྱུར། ཡིག་སྣ་འབྲུ་མ་གལས་བརྩམས་སོ། ཞེས་དང་། ད་དུང་ཆོས་པའི་གཞུང་ལུགས་དུ་མ་ནས་བོད་ཡིག་སྐོར་ལ་འདི་ལྟར་བཞེད་དེ། བཙུན་པ་རིན་ཆེན་ཚུལ་ཁྲིམས་ནས་མཛད་པའི་རིག་གནས་ལྔ་ཡི་རྣམ་བཞག་ནང་། མདོར་བསྡུས་བཞི་པ་ལས། བཅོམ་ལྡན་འདས་མྱ་ངན་ལས་འདས་པར་གྱུར་པ་ན། བཀའ་སྡུད་པ་པོ་དག་གིས་ཐེག་པ་གསུམ་གླེགས་བམ་ལ་བྲིས་ཏེ། སྡེ་སྣོད་གསུམ་མ་གྷ་དྷའི་སྐད་ཀྱིས་བྲིས་སོ། མདོ་སྡེ་ནི་སིནྡྷུའི་སྐད་ཀྱིས་བྲིས་སོ། ཞེས་པ་ནས་བོད་ཀྱི་ཡུལ་དུ་ཐེག་པ་གསུམ་བོད་ཀྱི་ཡུལ་དུ་བོད་སྐད་ཀྱིས་བྲིས་སོ། ཞེས་གསལ་བས་ཕལ་ཆེར་གནམ་གྱི་ཁྲི་བདུན་གྱི་དུས་སྐབས་སུ་ཁེལ་ཡོད། ཡང་སློབ་དཔོན་པདྨའི་ཞལ་ནས། རྒྱ་གར་ཆོས་རྣམས་བོད་དུ་བསྒྱུར་བའི་ཚེ། རྒྱ་གར་ཡི་གེ་བོད་དུ་བསྒྱུར་མ་གཏུབ། ཀ་ཁ་སུམ་ཅུ་བོད་ལ་དཔེ་རུ་བླངས་། སྔགས་རྣམས་མ་བསྒྱུར་རྒྱ་གར་རང་སར་བཞག ལྷ་ཡི་མཚན་རྣམས་འབྱུང་བའི་བརྡ་ལས་དྲངས། ཞེས་དང་། ཡང་ཉང་ཉི་མ་འོད་ཟེར་གྱིས་བརྩམས་པའི་ཆོས་འབྱུང་མེ་ཏོག་སྙིང་པོ་ལས། བོད་ཀྱི་ཡི་གེ་ནི་ཁྲི་ཡེར་བཙན་པོའི་དུས་སུ་བྱུང་བར་འདོད། ཅེས་སོགས། ཐོན་མི་སམྦྷོ་ཊའི་སྔོན་ནས་བོད་ལ་ཡི་གེ་ཡོད་ཚུལ་བོན་གྱི་ཡིག་ཚང་ཙམ་མ་ཟད་ཆོས་པའི་གཞུང་ལུགས་ནས་ཀྱང་གསལ་ཡོད་ལ། ད་དུང་ས་འོག་ནས་ཐོན་པའི་གནའ་རྫས་དམར་ཡིག་ཅན་དང་། ཡིག་རྙིང་འགའ་རྙེད་སོན་བྱུང་བ་འདི་དག་ལ་བསྙད་ནས་བོད་ཡིག་ཡོད་ཚུལ་གྱི་ལམ་བུ་ཞིག་རྙེད་ཐུབ་པར་མངོན། མདོར་ན་ང་ཚོས་སྲོང་བཙན་གོང་དུ་བོད་ཡིག་ཡོད་པར་འདོད་པའི་གོང་གི་དཔེ་གཞུང་དེ་དག་ནག་སྲུབ་རྡོག་རོལ་དུ་གཏོང་མ་ཕོད་པ་ནི། བོད་ཀྱི་ལོ་རྒྱུས་ལ་སྐྱོན་གྱི་རྨ་ཁ་ཆེན་པོ་ཞིག་དོད་ཐུབ་རྒྱུ་ལ་ཐེ་མི་ཚོམ། ད་ལན་འདིར་ང་ཚོས་བོད་རིག་པའི་ཞིབ་འཇུག་གི་ཁྱབ་ཁོངས་སུ་གཏོགས་པའི་མི་རིགས་ཤིག་གི་གནའ་སྲོལ་ཕག་ཏུ་ཡིབས་པ་རྣམས་ཀུན་གྱི་སྤྱན་སྔར་དུ་གཟིགས་མོར་བཤམས་སྟོན་ཆེད་དུ། བཟོ་རྒྱལ་གར་མ་ལི་ཤོའི་ཕྱག་རྒྱུན་ལས་མཆེད་པའི་ཁྱུང་པོའི་ཡིག་གཟུགས་ཕྱོགས་བསྒྲིགས་ཞེས་པ་འདིའི་ནང་ཁྱུང་ཡུལ་དུ་འབྲི་སྲོལ་ཡོད་པའི་ཡིག་བྲིས་གཙོ་བཞག་བྱས་པ་དང་འབྲེལ་གལ་འགངས་ཆེ་བའི་ཡིག་རིགས་འགའ་ཞིག་འདིར་བཀོད་ཡོད །སྤྱིར་གནའ་བོའི་མཐོ་སྒང་ཞང་བོད་ཀྱི་ཡུལ་གྲུ་ལ་དར་མྱོང་བའི་ཡི་གེ་དག་པ་ལྷ་ཡི་ཡི་གེ། སྟག་གཟིག་ཀྱི་སྤུངས་སོ་ཆེ་ཆུང་གཉིས། ཞང་ཞུང་གི་སྨར་ཆེན་སྨར་ཆུང་གཉིས། ཡང་ཞང་ཞུང་གི་ཡིག་རྒན་དང་སྨར་སྦྲག་གཉིས། བོད་ཀྱི་འབྲུ་མ་དང་དབུ་ཆེན་སོགས་ནི། སྤྱི་ལོའི་སྔོན་ནས་བྱུང་བར་འདོད་ཅིང་དེ་རྗེས་ཡིག་ཕྲན་རྣམས་རིམ་བཞིན་གྱེས་ཚུལ་བོན་མཁས་རྣམས་ཀྱིས་རྩལ་གྱིས་བཏོན་ནས་གསུངས་ཡོད། དེ་ཡང་ཞལ་སྣག་ཤོག་གསུམ་བཟོ་ཞུལ་བྲིས་མཁས་སོགས་ཀྱི་ངག་ལམ་དང་ལག་གི་སྟབས་སོགས་ཀྱི་བརྒྱུད་ནས་མཁྱེན་དགོས་པ་གཞིར་བཅས། མཚལ་དཀར་དམར་སོགས་ནི་ཡོངས་གྲགས་ས་ཚོན་སོགས་ལས་སྦྱོར་སྡེབས་བྱས་ནས་གྲུབ་དགོས་ལ། སྣག་ཚ་ནི་མར་མེ་ལས་བྱུང་བའི་དྲེག་པར་བཟང་དྲུག་བསྲེ་བ་དང་ཡང་ན་གསེར་དངུལ་རིན་ཆེན་སྣ་ལྔ་ཕྱེ་མོ་རྣམས་ལ་ཁྲུས་ཆུ་དང་བྱིན་རླབས་གང་བཟང་རྣམས་བསྒྲིལ་ནས་འབྲི་སྲོལ་ཡོད། ཤོག་གུ་ནི་མཁས་པ་རྣམས་ཀྱི་ཞལ་རྒྱུན་ལ་བརྟེན་ནས་བཟོ་དགོས་པར་མན་ངག་ཟབ་ཞན་གྱིས་ཤོག་གུའི་ཁྱད་གོན་མི་འདྲ་བ་དུ་མ་འབྱུང་བ་ཡིན་འདུག ལོ་རྒྱུས་ཐོག་ནས་ཁྱུང་པོ་འདི་ནི་ཞང་ཞུང་སྒོ་ཕུག་བར་གསུམ་ནས་ཞང་ཞུང་སྒོ་པའི་ལྟེ་གནས་ལྟ་བུ་གྱུར་ནས་ད་ལྟའི་བར་ཞང་ཞུང་གི་རིག་གནས་མདོ་སྔགས་སེམས་གསུམ་གྱི་བཤད་ཁྲིད་དང་སྒོམ་ཁྲིད་གཙོས་པའི་སྒྱུ་རྩལ་རི་མོ་ལྷ་རིས་དང་ཡིག་བྲིས་སོགས་མུ་མཐུད་ནས་རྒྱུན་སྐྱོང་བྱ་བའི་བསྟི་གནས་སུ་གྱུར་དང་འགྱུར་བཞིན་འདུག གནའ་བོའི་དབུ་མེད་ཀྱི་བྲིས་ལུགས་འདི་ལ་ལི་ལུགས་དང་ལྡན་ལུགས་གཉིས་སུ་གྱེས་ཚུལ་བཤད་ལ། ལི་ལུགས་སམ་ལེགས་ལུགས་འདི་གཉིས་ལས་འབྲུ་མའི་ཡིག་གཟུགས་འདི་ཉིད་འཕེལ་ཚུལ་ཡང་བཤད་ཡོད། གང་ལྟར་གནའ་བོའི་ཡིག་གཟུགས་འདི་དག་གི་བྲིས་དཔེ་དཔེ་རྙིང་གི་ཁྲོད་ནས་རྙེད་རྒྱུ་ཡོད་པར་འཁོད་པའི་ལོ་རྒྱུས་ནི། བྲིས་དཔེ་འདི་དག་གི་མ་ཕྱི་སྔོན་སྲོང་བཙན་དང་། ཁྲི་སྲོང་གི་དུས་རབས་སོགས་ནས་དཔེ་ཆའི་མཉམ་དུ་གཏེར་དུ་སྦས་ནས་ཕྱིས་གཤེན་ཆེན་ཀླུ་དགའ་སོགས་ཀྱི་གཏེར་དུ་དྲངས་ཚུལ་བོན་གྱི་ཡིག་ཚང་དུ་འཁོད་ཡོད། དེ་ནས་གཅིག་རྗེས་གཉིས་མཐུད་ཀྱིས་ལག་བྲིས་ཀྱི་རྩོལ་བར་ཞུགས་ནས་ད་བར་དུ་གནས་པ་ཞིག་ཡིན་པར་ངེས། དེ་ཡང་སྤྱིར་ལག་བྲིས་ཀུན་གྱི་རྒྱལ་པོ་རུ་གྲགས་པའི་འབྲུ་མ་འདི་ཉིད་ནི་བོན་གྱི་ཡིག་ཚང་ཁུང་མ་ནས་ཡིག་སྣ་འབྲུ་མ་ལས་བརྩམས་སོ་ཞེས་པའི་གཏན་ཚིགས་འདིས་ཞང་བོད་ཀྱི་ཡིག་རྙིང་ཞིག་ཏུ་ངོས་འཛིན་ཐུབ། དེ་ལས་གྱེས་པའི་ལག་བྲིས་དུ་མ་ཞིག་བྱུང་བར་ངེས་ཤིང་། དེ་རྗེས་བསྟན་པ་སྔ་དར་གྱི་དུས་སུ་ཁྱུང་ཡུལ་ཧོར་སོགས་ལ་འབྲུ་མ་འདི་དར་བར་ ཐོབ་འདོད་ཅིང་། འདི་ཉིད་ལག་ཏུ་ལེན་སྐབས་ངེས་པར་དུ་ཚང་དགོས་པའི་ཁྱད་བོན་ནི་ལྷུ་རུས་ཚུགས་གསུམ་དང་། ལི་ཁམ་ཟག་གསུམ། དཀར་ཆ་ནག་གསུམ། དགྱེ་ལྷུ་སྒུར་གསུམ། ཤ་ལྷུ་རུས་གསུམ། འགོ་ཚགས་ཁོག་བྲང་ལ་སོགས་ནང་གསེས་བྲིས་ཀྱི་རྣམ་གྲངས་དུ་མ་ཞིག་བྲིས་ཀྱི་མཁས་པའི་ངག་ལམ་དང་། ལག་གི་སྟངས་སྟབས་སོགས་བརྒྱུད་ནས་མཁྱེན་ཐུབ་པར་དགོས། ལྗིབ་བམ་རྒྱེབ་ཅེས་པའི་ཡིག་གཟུགས་འདི་ལ་ནང་གསེས་དུ་མ་བྱུང་ལ། གྲྭ་ལྗིབ་དང་། རྒྱ་རོང་ལྗིབ། ལྗིབ་ནག་རལ་པ་ཅན། ལྗིབ་དཀར་རྒྱ་མདུད་མ། ལྗིབ་འཁྱུག་སོགས་བྱུང་། གཟབ་ཚུགས་ལ་དུ་མ་བྱུང་ཚུལ་ནི། ཁྱུང་པོ་གཡུ་ཁྲི་ལུགས་དང་། བོད་ཀྱི་པར་གཟབ། སྡེ་དགེའི་ཟངས་པར་ལུགས། བོད་ཀྱི་གཡའ་སེར་ལུགས། གསེར་མདོག་ལུགས། རྡོ་གཟབ་ལུགས། སློབ་དཔོན་མེད་པའི་བཙན་བྲིས་སོགས་དུ་མ་བྱུང་སྐད། (མུ་འགོད)
|
|
